Nyob ntawm koj tus kheej puas xav tias qhov uas tshaj tawm Txojmoo zoo yog ib tes haujlwm loj lossis tsuas yog qee tus tshwj xeem thiaj ua tau txoj haujlwm no xwb? Lossis koj xav tias tshaj tawm Txojmoo Zoo yog yuav tsum mus rau ib thaj chaw deb deb, tiv dhau tej kev sim siab? Tseeb tiag, tshaj tawm Txojmoo Zoo yog Tswv Yexus cov lus samhwm tseg rau peb txhua tus, tsis xaiv leej twg ntsej muag. Vajtswv hu peb kom tshaj tawm txoj kev cawmdim no rau txhua tus, yog pib kiag ntawm thaj chaw uas peb tabtom sawv thiab nyob hauv peb lub neej.

Hnub no, yog hnub 14/07/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Carla Pollard dhau ntawm Zaj kawm TSEB TXOJ MOO ZOO RAU TXHUA QHOV.

“Nej cia li mus thoob plaws lub ntiajteb no thiab qhia Txojmoo Zoo kom sawvdaws hnov” (Malakaus 16:15).

Tus tub tshaj tawm Txojmoo Zoo Hudson Taylor yog tus neeg tau xa Txojmoo Zoo tuaj rau Suav teb. Nws tau tham txog nws txoj kev tshaj tawm tias: “Kuv pom tias Vajtswv tej haujlwm loj puav leej muaj peb ntu: tes haujlwm ntawd thaum pib cuag li ua tsis tau, tom qab ntawd muaj kev nyuaj zuj zus tshwm tuaj, thiab thaum kawg tes haujlwm tau ua tiav.” Tus tub xa moo zoo Hudson Taylor tseg sijhawm ntau xyoo los txhim kho, ua ntej uas cov pej xeem nyob Sab Hnub Tuaj qhib siab los txais yuav Cawm Seej Tswv Yexus.

Coob tug saib yawg zoo li ib tug neeg tseem ceeb ua tej haujlwm loj. Tiamsis nyob ntawm Hudson Taylor, yawg tsuas yog ib tug tseb Vajtswv tej noob, thiab ntseeg tias txhua lub noob no yuav tawg kaus rau hauv tus mloog lub siab.

Thaum uas hnov txog Hudson Taylor zaj, kuv xav tias: “Kuv yuav tsis muaj hnub dhau tau los ua ib tug xa moo zoo”. Kuv xav tias kom ua tau qhov haujlwm no, yus yuav tau tawm ntawm qhov chaw tso siab mus rau ib lub tebchaws deb, kawm lus tshiab, thiab ntsib ntau txoj kev sim siab. Tiamsis thaum kawg kuv pom tias, peb tsis tas yuav yog ib tug neeg tseem ceeb, tsis tas yuav mus deb, vim Tswv Yexus lub suab hu tsis yog tsuas tseg rau qee tus neeg tseem ceeb xwb. Vajtswv hu peb txhua tus kom qhia Vajtswv txoj kev cawmdim.

Ua ntej uas Tswv Yexus rov mus saum ntuj, Tswv Yexus tseg rau peb ib lo lus samhwm: “Cia li mus thoob plaws ntiajteb, qhia Txojmoo Zoo rau txhua tus.” (Malakaus 16:15).

Qhov no tsis tau txhais tias koj yuav mus thoob plaws lub ntiajteb no, mus rau ib qhov chaw deb ua kom tiav Vajtswv tej lus samhwm. Yog tias ua tau li no yim zoo. Tiamsis yuav tau paub tias daim teb tshaj tawm nyob kiag hauv peb lub tsev, peb qhov chaw ua haujlwm, nyob ntawm tej chaw muag khoom, peb tej zej zog. Peb qhov haujlwm yog ua timkhawv qhia rau txhua tus ib ncig – xws li niam txiv, menyuam, cov phooj ywg ua haujlwm thiab tag nrho – txog tej yam loj uas Tswv Yexus tau ua pub rau peb.

Peb tau samhwm kom qhia Txojmoo Zoo, qhia tias Tswv Yexus yog Vajtswv tus tub tau tuag theej peb tej kev txhaum. Nws raug luag muab faus thiab sawv rov qab los tom qab peb hnub kom peb tau txais kev zam txim thiab txais tau txojsia tshiab. Tej neeg ib ncig peb tab tom cheem tsum kom tau txhawb zog, cheem tsum ib tug phooj ywg, cheem tsum tau tso dim hauv txoj kev txhaum, lawv cheem tsum hnov txoj kev cia siab uas Vajtswv pub. Peb tau Vajtswv cob qhov haujlwm tseeb ceeb yog mus tseb lub noob uas yog Vajtswv tej lus. Peb tsis tas yuav tos txog rau thaum mus ib ncig lub ntiajteb no ua kom tiav yus qhov haujlwm. Peb cia li pib kiag ntawm qhov chaw peb tab tom nres.

Tiamsis qhov haujlwm tseb lub noob tsis yog thaum twg twb yooj yim. Ntawv Nkauj 126:6 sau tias muaj tej lub sijhawm peb yuav poob kua muag ntawm txoj kev peb tab tom taug:
“Cov neeg uas quaj ntsuag thaum coj tej noob qoob mus cog…”
“Tiamsis Vajtswv txojlus kuj cog tseg tias tej kua muag ntawd yuav ua rau muaj kev zoo siab
lawv yuav hu nkauj seev yees mus sau tej qoob ntawd los tsev.” (Ntawv Nkauj 126:6).

Tswv Yexus hais rau peb tias:
“…nej cia li tsa qhovmuag saib tej teb; nplej twb siav heev zoo hlais lawm” (Yauhas 4:35).
Peb tsis tas yuav mus nrhiav tej qhov chaw deb deb. Tsuas yog peb qhib qhov muag pom muaj sijhawm zoo xwb, cia li qhib pob ntseg los mloog tej lus samhwm thiab qhib siab los teb Vajtswv lub suab hu. Hnub no, koj puas npaj txhij txais yuav Vajtswv lub suab hu, pib qhia Vajtswv Txojmoo Zoo thiab Vajtswv txoj kev cawmdim lawm tau? “Cia li tsa muag saib” – Tswv Yexus tab tom caw koj mus rau ntawm nws qhov chaw ua teb.

Thov caw nrog kuv peb thov Vajtswv ua ke:
Leej Txiv, peb nco Koj tshav ntuj rau koj txoj kev hlub loj uas koj tau ua pub rau peb. Peb ua koj tsaug vim koj samhwm tej lus samhwm loj rau peb – qhia Txojmoo Zoo rau txhua tus. Thov Txiv koj pub lub zog thiab pub kom peb muaj lub siab tawv coj txoj kev cawmdim no mus rau cov neeg uas koj tso ib ncig ntawm peb. Thov qhib lawv lub siab thiab pab kom peb paub txog lub sijhawm zoo qhia koj lub npe. Kuv thov hauv Tswv Yexus Khetos lub npe. Amees.

Cov kwv tij, tsis ntev los no koj puas saib txoj kev tshaj tawm Txojmoo Zoo yog ib tes haujlwm yuav tsum ua nyob rau hauv koj lub neej txhua hnub? Cia li tseg txoj kev tshaj tawm Vajtswv lub npe yog txoj haujlwm yuav tau ua ua ntej nyob rau hauv peb lub neej. Txhua zaug Vajtswv pub sijhawm, cia siab tias peb yuav tsis nyob twj ywm lossis ntshai. Thov Vaj Ntsujplig tshoov siab, pub rau peb tej lus muaj hwjchim tshoov au tib neeg lub siab uas cheem tsum txoj kev cawmdim.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.