Muaj qee yam teeb meem tshwmsim tuaj muaj ntau zaug tsis paub yuav txhais li cas, zoo li ib daim duab uas muab zais cia tseem nrhiav tsis tau pom nyob ntawm daim duab loj. Ib qhov teeb meem muaj cuab kav hloov pauv tag nrho txhua yam, ib qhov teeb meem ua rau txoj kev nyob ntsiag to yaj tshis. Thiab nyob hauv txoj kev nrog tus Tswv mus tej zaug yuav muaj qee lub sijhawm koj cim civ nug koj tus kheej hauv txoj kev poob siab: “Tsis paub qhov no puas yog Vajtswv lub homphiaj tiag?” Yog li thaum uas ntsib tej teeb meem uas yog daim duab tsis zoo hauv lub neej, Vajtswv txojlus qhia peb yam dabtsi?

Hnub no, yog hnub 15/07/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Tori Troncone dhau ntawm Zaj kawm DAIM DUAB ZAIS CIA.

“Peb paub hais tias peb cov uas hlub Vajtswv, txawm yog peb tau zoo thiab txomnyem los Vajtswv yuav ua kom tej ntawd muaj nqis rau peb cov uas Vajtswv porn zoo hu los raws li Vajtswv npaj tseg lawm” (Loos 8:28).

Wb ob niam txiv nyiam txoj kev ua si dhos duab heev. Wb koom dhos ntau daim duab heev ua rau kuv tsis nco qab tas lawm. Txawm yog pheej dhos duab ua si li ntawd los, muaj qee daim duab wb yeej tsis paub tias nws nyob qhov twg hauv daim duab loj. Tsis paub yog txoj kev twg los, daim duab no thaum kawg kuj nrhiav tau nws thiab muab coj los dhos kom yog nws qhov chaw, thiab dhos tau daim duab zoo.
Nyob hauv lub neej, muaj tej lub sijhawm peb yuav hnov cuag li yus ntsib ib daim duab uas nrhiav tsis pom. Nyuaj rau peb ntseeg tias tej yam uas peb ntsib dhau nws nyob hauv Vajtswv lub homphiaj. Thiab muaj qee lub sijhawm, kuv cim civ nug tias Vajtswv puas ua haujlwm, vim txhua yam nws tsis zoo li kuv siab xav.

Nyob hauv 1 Xamuyees tshooj 23, peb pom Daviv nyuam qhuav cawm lub nroog Kelas dim ntawm cov tub rog Filitees. Tiamsis pauv qhov uas Daviv txais tau kev zoo siab ces Daviv ntsib dua ib qhov teeb meem tshiab: Xa-ules thiab nws cov tub rog tab tom tuaj caum nws txog rau ntawm Kelas (nqe 8). Tseem phem tshaj thiab yog Vajtswv nthuav qhia rau Daviv paub tias cov neeg Kelas uas Daviv nyuam qhuav cawm yog cov uas yuav ntxeev siab rau yawg thiab muab yawg cob rau Xa-ules (nqe 12). Daviv yuav tau khiav mus rau tom roob moj sab qhua Xifes nkaum Xa-ules (nqe14). Tiamsis Xa-ules yeej tsis tso yawg tseg.

“Lub sijhawm ntawd, txawm muaj ib tug txivneej tuaj hais rau Xa-ules hais tias, “Koj cia li rov qab tamsim no! Cov Filitees twb tuaj vij peb lub tebchaws tas lawm! ” Yog li ntawd, Xa-ules thiaj tseg tsis caum Daviv, thiab tig rov mus tua cov Filitees lawm. Vim li ntawd, thiaj muab qhov chaw ntawd hu ua lub Laj Roob Sib Quas” (1 Xamuyees 23:2-28).

Kuv xav tias qhov uas cov Filitees tuaj vij lawv yog daim duab uas muab zais cia nyob rau hauv cov Yixalayees daim duab loj. Yog ib tug yeebncuab tsis sib haum, cov neeg Filitees qhov kev ua yeej tsis yog raws li Vajtswv lub homphiaj Vajtswv npaj tseg rau Vajtswv haiv neeg.

Tiamsis raws li zaj xwm txheej nyob hauv 1 Xamuyees, twb yog txoj kev ua rog zaum no tau cawm Daviv dim ntawm Xa-ules txhais tes thaum uas ntes yuav luag tau Daviv. Tom qab no, Daviv dhau los ua cov Yixalayees tus vajntxwv, raws li Vajtswv lub homphiaj tau npaj tseg. Cov neeg Filitees txoj kev ua rog, txawm yog saib cuag li tsis yog kev, tiamsis ho dhau los ua ib feem tseem ceeb hauv Vajtswv lub homphiaj.

Thaum Daviv sawv ua vajntxwv, Vajtswv hais meej meej rau yawg tias:

“Koj yuav muaj xeebntxwv huamvam coob, thiab kuv yuav pub koj lub tebchaws nyob ruaj khov mus ibtxhis. Koj tus nom yuav tsis poob mus ib simneej li” (2 Xamuyees 7:16).

Vajtswv tej lus cog tseg tau ua tiav nyob hauv Yexus Khetos – tus Vajntxwv ntawm txhua tus vajntxwv, Tus Tswv yug zoo – yug los ntawm Daviv caj ces. Cov neeg Filitees txoj kev tuaj ua rog, yog ib qhov teeb meem cuag li nws tsis zoo, tiamsis ho dhau los ua ib feem tseem ceeb hauv Vajtswv zaj xwm txheej cawmdim uas tau sau tseg pub rau peb.

Ntau zaug lub neej zoo li ib daim duab muaj tej daim peb tsis pom meej, ua rau peb tsis nkag siab thiab tsis paub ua cas. Tiamsis nyob rau tej lub sijhawm ntawd, ntau zaug peb yuav cim civ nug Vajtswv tias Vajtswv puas tseem nrog peb nyob. Thoob plaws Vajluskub, Vajtswv cog lus tias Vajtswv yuav muab yeeb ncuab tej tswv yim phem pauv los ua tej yam zoo pub rau peb (Chivkeeb 50:20). Txhua yam koom ua ke muaj nqis rau tus uas hlub Vajtswv (Loos 8:28). Peb tus Vajtswv yog tus tswj tag nrho lub ntiajteb no, thiab Vajtswv cog lus tseg tias txawm yog muaj tej daim duab muab zais cia ua rau peb xav tsis thoob los thaum kawg, tag nrho puav leej nyob hauv Vajtswv lub homphiaj zoo kawg nkaus.

“Tej zaum cov hauv roob thiab pov roob yuav tawg mus, tiamsis kuv txojkev uas hlub koj yuav tsis paub kawg li. Kuv coglus tseg hais tias yuav muaj kev thajyeeb, mas kuv yuav ua raws li kuv tej Ius ntawd mus ibtxhis.” Tus Tswv uas hlub koj yog tus uas hais tej lus no” (Yaxayas 54:10).

Thov caw nrog kuv peb thov Vajtswv ua ke:
Qhuas Vajtswv yog tus Tswj, yog tus tuav peb lub neej! Txawm yog ntau zaug muaj tej kev sim siab tshwm tuaj ua rau kuv hnov ntxhov siab los kuv paub tias yeej tsis muaj ib yam dabtsi nyob sab nraud Vajtswv txoj kev zoo. Thov koj muab txoj kev mloog lus tso rau hauv kuv lub siab kom kuv txaus siab thiab muaj kev kaj siab txawm yog nyob rau hauv lub neej muaj ntau yam hloov pauv los kuv ntseeg Vajtswv txojkev ncaj ncees thiab Vajtswv lub homphiaj uas Vajtswv tseg rau kuv. Kuv thov hauv Tswv Yexus Khetos lub npe. Amees.

Cov kwv tij txhua tus, tus Vajtswv uas peb ntseeg yog tus Tswv ntawm tag nrho lub ntiajteb no. Yog li, Vajtswv yeej yuav tiv thaiv peb txhua yam hauv lub neej. Yuav tsis muaj ib yam dabtsi xav tsis thoob lossis yuam kev yog tias peb mloog Vajtswv lub homphiaj zoo kawg nkaus uas Vajtswv twb npaj txhij lawm. Pauv qhov uas peb pheej nug tias vim li cas, ces koj puas zoo siab hlo nug Vajtswv tias: Tus Tswv, Koj xav kom kuv ua dabtsi rau koj?

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.