Rài kis cau dòn Yàng rơp ò rgơi kis mơ pràn kơldang dilah siau bơta gơtom klac sùm mơ Yàng Hwềng Goh-Bơtau ai gơnap-gơnoar mơ lơh rngoh-rngac bol he nang lơh jat gơnoar sồr Kơnràñ dê ai dunnia in. Nang kis rài kis gơlik công nha Yàng in, cau dòn Yàng ò kơnom di pràn is he dê, mơ ya pal kơp koñ mơ rac dan gơnoar pràn pa mơ ò tŭ lơi ro-jruh Yàng dê.

Ngai do, ngai 09/10/2024, Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng kơnom di bơta dong kơl Vernell Windsor bơh tơnggume DÒP SOH TĔ GƠNAP-GƠNOAR.

“Bơh lơgar Yàng Tom Trồ ò di bơh jơnau đơs mơ ya bơh gơnap-gơnoar.”
(I Kôrinhtô 4:20)

Dơ̆ lồi-dut oh mi sền gŏ ală rnàs ang gơcrà jơh hơđang trồ la tŭ lơi taih? Gơ lơh oh mi in rngòt mơ kung ai lơh krơi sơl? Ntàs hơ̆ tơngkah oh mi in kah tus ală bơkao bơta àng geh pơnđang tom ală ngai wer dờng sơl?

Jơh tơl nă bol he ai lơh hon-chò mơ ală gơnoar pràn krơi is tom dô tŭ tơngai lơi hơ̆. Digơlan tai bơh hơ̆ mơ añ kah tŭ gam dềt, añ koñ gơboh ngan ală cau gơs gơnoar pran. Bol he ngui ao he dê nang lơh gơs ao jruh, mơ joi ală gai jra nang lơh mơng rgơi lơh bơta krơi! Tŭ do kơlôi wơl, añ gơdan ñọ̆ ngan, mơ ya sền wơl bơta kơlôi sơnơng bol he dê tŭ hơ̆ gơs oă bơta ngan.

Sră Goh kung cih wơl ală cau gơs gơnoar pran lơh ală broă crih-crài tom tŭ bol khai ai sơnđan Yàng. Kah tĕ tus Samsôn tom sră Ală Kwang Cahrña tap 14-16, hala bơtau Davit mơ ală cau khin cha ông dê (I Yal Yau 11). Mơ ngan, pơnyơu niam rlau jơh bol he dê, hơ̆ la Yàng Jesu, Bơtau lơh ală têl krơi, Bơtau gơlik gơs Kon Mơnus.

I Kôrinhtô 4 cah is bar seng cau mơ bar bơta: ngui jơnau đơs hala ngui gơnoar pran. Cau gơnoar bơto dờng ông Pol neh cih: “Mơ tai, gơs dô êt cau jòng să he, tồnlah añ ò lòt tus hơ oh mi tai. Mơ ya dilah Yàng kòñ añ lòt, gen añ rơp tus mhar hơ oh mi; mơ añ rơp sơwì nàng git ală cau jòng is să he hơ̆, ò di bơh jơnau đơs bol khai dê ò, mơ ya bơh gơnap-gơnoar bol khai dê. Bơh lơgar Yàng Tom Trồ ò di bơh jơnau đơs mơ ya bơh gơnap-gơnoar. Ñchi ală oh mi kòñ taih? Kòñ at gai mơ tus, hala ai bơta kòñ gơboh mơ nùs niam-lơnhơn mơ tus hơ oh mi taih?” (I Kôrinhtô 4:18-21)

Tŭ gam dềt, bol he òs đơs chò bal: “Gai mơ lŭ lơh añ pă kơting, mơ ya jơnau đơs kal-kê lơh añ jê-sồt.” Do la jơnau đơs blac mơ oă cau neh dòn! Loh lang gen jơnau đơs gơs gơnoar pran lơh hơđang bol he oă rlau behơ̆. Cau gơnoar bơto dơng ông Pol neh ai cau Kôrinhtô sac rwah digùl bơta pơniam wơl krañ-cê hala lơbơn niam. Gơwèt mơ să tom añ, añ rơp ò gơn tai mơ ya sac “nùs nhơm lơbơn niam”.

Pol neh ngui gơnap-gơnoar Jơnau Yàng dê nang bơto sồr mơ rong siam ală cau dòn tơm Kôrinhtô tom bơta dòn. Ông cih, “Bulah oh mi gơs dô tơlak cau bơto tom Bơtau Krist, mơ ya ò gơs oă bèp; bơh tom Yàng Jesu Krist añ neh tơnggơs oh mi bơh Jơnau Niam. Behơ̆ añ bơto tơngkah oh mi, pal đom krơh añ.” (I Kôrinhtô 4:15-16)

Seng Sră Goh do kung bè ală “rnàs” lơh broă tom nùs nhơm añ tai bơh ală jơnau jak chai geh prap tom hơ̆. Bol he yal tơlik bơta dòn he dê ò di ming mơ jơnau đơs, mơ kung gan gơnap-gơnoar, Gơnap-gơnoar Jơnau Niam dê hơ̆ la jơnau bơh bơta kis gam sùm sùm geh ai gan Yàng Dong Klàs Jesu. Gơnap- gơnoar hơ̆ neh tơm pơrgơl ò git nđò rai kis tom ală rài. la cau dòn Bơtau Krist, bol he pal bơto yal jơnau song do oă cau in. Tom tŭ cau lơi hơ̆ lòt tus mơ Bơtau Krist, gơnap-gơnoar Yàng Tom Trồ dê rơp rang tơlik mơ dong bol khai tus hơ lơgar Kơnràñ dê. Têl krơi ting dô hơ̆ la Jơnau Yàng Tom Trồ lơh broă tom nùs bol khai. Gơnap-gơnoar Yàng dê geh rang tơlik tom tŭ bol khai yal tơlik bơta dòn tom Kơnràñ, mơ dòn di Jơnau Kơnràñ dê. Bơta gơtom klac digùl bol he mơ Yàng dong bol he gơtom sor mơ gơnap-gơnoar Yàng Hwềng Goh dê. Tom tŭ bol he geh rcang sir mơ bơta jak chai mơ bơta bọ̆ng mơñà Yàng Hwềng dê, bol he geh dòp soh gơnap-gơnoar Kơnràñ dê nang bơto yal Jơnau Niam, ơn tê hòi dan hơđang ală cau kòp-ji mơ ceng bơta àng tus ală cau gam ơm tom klam jơngo.

Dan jà bol he dô nùs bal tòm bơta hòi dan:
Khoai Yàng Hwềng Goh, dan nhơm kis bơh tom Kơnràñ lơh pa wơl rai kis mơ bơta duh rngòt kòn dê, dong kòn git lam bơta pran kơldang bơh đang jòng bơh di Kơnràñ, nang kòn sùm rcang sir yal tơlik bơta dòn mơ dòp wơl jơnau hòi jà kis digùl dunnia roh rui do. Kòn jơh nùs hòi dan tom sơnđan Yàng Jesu Krist, A-men.

Ơ jơh ală ông mò, oh mi koñ gơboh, Yàng Hwềng Goh lơh broă dô bă pran kơldang hala lơbơn tom rai kis să tom, hiu nhă, Hiu Jum Goh oh mi dê? Dan tĕ Yàng tơm pơrgơl oh mi mơ kis tom bơta gơtom klac bal mơ Yàng Hwềng kờp ngai, nang geh dòp soh gơnap-gơnoar mơ kis lơh cơng Kơnràñ in dô bă gơlik công nha.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.