Gơs tŭ lơi ồng mò oh mi lùp is digơlan Jơnau Yàng tòm Sră Goh la ai pà he in ò ơ? Gơs tŭ lơi ồng mò oh mi kơ lôi sơ nơng Yàng mìng lơh bơta dờng ơnàng be ală cau pràn kơldang be Jôsep, Môise, Dabit gòi, mơya rài kis he pa is, Yàng tòm gơl hala ò? Gùng dà Yàng dê mơ bơta kơ lôi sơ nơng Yàng dê be lơi tiah?

Ngai do, ngai 22/05/2022, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Stormie Omartian bơh tơnggume: YÀNG GĂM BE ÒS.

“Ală broă Yàng Jehôwa dê la dờng ngan, Bơtê jat tĕ bơh jơh ală cau kòñ gơboh bơta hơ̆.”
(Đơs Crih 111:2)

Đơs Crih 111:2 cih: ‘Ală broă Yàng Jehôwa dê la dờng ngan, Bơtê jat tĕ bơh jơh ală cau kòñ gơboh bơta hơ̆. ‘

Ală cau jak chài đơs bơh pơnah đơs hwơr lài niam rlau jơh tòm rài tơnơ̆ hơ̆ la bơta lơh lòt tòm rài yau. Bơta hơ̆ gơs gơtha la Yàng Tòm Trồ bol he dê, Bơtau ò tofm gơl, neh ràng tơlik oă bơta mơ bol he rgơi kơp gơn dê Yàng tòm rài tơnơ̆ gan dê ală bơta mơ bol he geh sền tòm Jơnau Yàng.

Yàng la Bơtau Ai Pà

Yàng neh ai pà mana lơh gơs phan sa làng bol Yàng in tòm blàng bras; Yàng kơrmap gar òi ào mơ khŏ jă bol khai dê ò sèt ò siar. (Lik Ejiptơ 16: 4; Yal wơl 29:5)
Yàng sôr dô nă cau gơ noar hwơr lòt tus hơ cau ur bơnrau rbah mơ Kơnràñ neh ai pà phan sa ò dơh. (I Ală Bơtau 17: 7-16)
Yàng lơh gơs piang la 5.000 nă sa bơh mìng bàr nơm piang la mơ pram nơm ka. (Luka 9:12-17)

Yàng sôr kơnđà cèng phan sa tus cau gơnoar hwơr Eli (I Ală Bơtau 17: 6) mơ rcang tiah pồn mơ tiah rlô bol cau gơnoar hwơr Jôna in (Jôna 4:6)

Yàng la Bơtau Tò Să mơ Gơrwàng

Sol kư̆ ting jat Dabit, la cau rơp gơlik gơs bơtau mơ ngùi tòm sơbàn ồng dê. Bơtau Sol kòñ tòm chơt Dabit mơya Yàng kòñ i gar ồng mơ Yàng rơp jào ông Sol tòm tê Dabit (I Samuên 24:1-4).
Tŭ làng bol Israel ting jat làng bol Yàng dê, Kơn ràñ neh pò gùng nàng bol khai lòt gan dà lềng mơ tơn ñơp chơt jơh cau sò tòm bol khai dê (Lik Ejiptơ 14:27-29)

Yàng la Bơtau Sơm Bòi

Dô nă cau ur geh sơm bòi bơh bơta bư dê ào Yàng Jesu (Mak 5:28-29)

Yàng lơh Laxarơ kis wơl mơ sơm bòi cau jơ ngo mat geh àng (Jang 11:38-44; Jang 9:1-7).

Yàng đơs dô jơnau mơ sơm bòi cau dĭ cau at dô rhiang ling dê (Mathiơ 8:5-13).
Kòp dun kung ò gơlơh kalke Yàng in (Mathiơ 8:3).

Tòm Rài Yau, Yàng neh sơm bòi Bơtau Exechiên mơ pà ồng in kis jo tai 15 nam jat jơnau ồng rac dan (I Ală Bơtau 20:5-6)

Yàng la Bơta Kòñ Gơboh

Jang 15: 13 cih: “Ò gơs bơta kòñ gơboh lơi dờng rlau mơ bơta kòñ gơboh bơh bơyô he mơ phi bơta kis he.”

Yàng Jesu neh lơh bơta do mơ oă rlau mơ hơ̆. Bơta hơ̆ sơn tòm bơh dô bơta lơh nền krơi is tŭ sang sơrbì lơ gar trồ nàng tus tòm dunnia. Mơ Yàng neh tus be dô nă kòn oh nga. Bơtau Gơnap Gơnoar neh sac rwah nàng sang sơrbì lơgar trồ nàng gơlik gơs dô nă kòn dềt. Yàng neh kong pù lơh mơ kong dơño dơhial. Sră Goh cih lah: Yàng neh gơlik tồi glài tài bơh añ mơ ồng mò oh mi (II Kôrinhtô 5:21).
Rôma 8:32 cih: ‘Kơnràñ neh ò pơlai Kòn tòm Kơnràñ dê, mơya tài bơh jơh ală bol he tàng neh jào phi Kòn hơ̆, gen Kơnràñ ò di kung rơp cèng jơh ală bơta bal mơ kòn hơ̆ mơ ai tơn bol he in ò ơ? ‘
Gen, tŭ do ồng mò oh mi kơp kòñ bơta lơi tiah? Bơta rcang, bơta jak chài, bơta sền gar hala bơta lơngap lơngai ? Lòi dô êt tŭ jơ do nàng rac dan Yàng ai pà ồng mò oh mi in bơta pal càng gơ wèt mơ nùs don nền lah Yàng la Bơtau ò tòm gơl, Kơnràñ rơp iat kơ no ồng mò oh mi mơ pà ală bơta pal cang ồng mò oh mi dê jat nus kòñ wil tơl Yàng dê.

Dan jà bol he dô nùs bal tòm bơta hòi dan:
Khoai Yàng kòñ gơboh, kòn ưn ngài Yàng tài bơh Yàng la Bơtau ò tŭ lơi tòm gơl. Ală jơnau ho pơ gon Yàng dê mơ ală bơta Yàng neh ràng tơlik bơh Yàng gam be os. Kòn dan Yàng toh glài tài bơh bơta lơbơn siơ̆u, ò don mơ pin wil wơl kòn dê. Kòn dan Yàng tus mơ lơh broă tòm bơta gơlik gơs gùt dar kòn dê tŭ do. Dan Yàng pò gùng mơ tề lăm kòn tòm ală bơta. Yàng la Bơcat ală bơta kòn pal càng tòm rài do. Dan Yàng tuh bềng liu tòm kòn nus kòn bơta kis Yàng dê mơ ai pà kòn in bơta pràn kơldang nàng pơn jat cơnđòa lòt tòm bơta dòn mơ bơta dòn bơr. Dan pò mat kòn nàng sền gŏ bơta ryŭ ryơm dờng ơnàng Yàng dê mơ dong kòl kòn ơn nùs ơn tôr dê Yàng. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, Kơp kòñ Jơnau Yàng chồl bơtrut bơta dòn mơ ơm kơ̆ cê tòm Yàng. Do la tŭ jơ di pal nàng ồng mò oh mi lòi tŭ jơ tòm bơh bơr mơ Yàng. Jào phi Yàng in ală bơta pal càng bơh sa jan, bơta pràn kơldang jên priă mơ hiu nhă ồng mò oh mi dê. Jào phi ală bơta kơ lôi sơ nơng he dê, đơs mơ Yàng ală bơta rơndap tap sèng rài tơnơ̆, rac dan Yàng ai pà bơta jak chài mơ tề lam ồng mò oh mi mơ bol he rơp bàn jơnau hòi dan he dê geh Yàng iat kơno mơ geh ho.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.