Cau lơi tòm bol he kung gơs bơta rngòt rngơt. Bulah ngan hala mìng tòm mpau, bơta rngòt rngơt rgơi lơh bol he tis nrah tòm klăm jơngọ. Bulah behơ̆, bol he ò pal ntao diđap mat mơ bơta rngòt rngơt dô nă. Bơta gơs mat Yàng dê là bơta àng tề lam bol he găn ală bơta gơlong, dong bol he joi bàn bơta lơngai tòm tŭ lơmpah klăm jơngọ rlau jơh.

Ngai do, ngai 12/10/2024, Bơta Hòi Dan Kòp Ngai dan jà ală ồng mò oh mi bơtê bal Jơnau Yàng kơnòm dê bơta dong kơl ồng Merle Mills dê bơh tơnggumê DÒN KƠNÒM HALA RNGÒT RGNƠT?

“Yàng Jesu đơs tai mơ bol khai lah: “Añ la bơta àng dunnia dê; cau lơi jat Añ rơp ò lòt tòm bơta klam jơngo, mơya gơs bơta àng bơta kis dê.” (Jang 8:12)

Dùl tòm ală bơta rngòt rngơt rlau jơh tŭ găm kơnòm añ jê la ală tŭ hiu añ ò geh đèng. Tòm bơta klam jơngo kơrwang gut dar, bol he kơlôi tus ală phăn dơng gơs jơt nơm jơng, măt dà tơlir trồ mơ sŏ tơlir gam kơp joi tòm trồ măng. Oh mi bol he ơm rơwá bal, prơm rngòt bơh ală bơta rngòt rngơt tơm bơta kơlôi is, jơl tus di tŭ mê bàp añ chu dô nơm ôs đèng. Bơta àng dềt rhin hơ̆ nisơna tă jan jơh ală bơta rngòt rngơt, lơh ală muh mat prơm rngòt bol he dê pờ ñŏ, tă jan jơh ală rùp kơlôi sơnưng kir rngòt.

Cau sò tơm hwềng soan bol he dê kòñ nùs tôr mơ hwing nùs bol he gơduh tòm bơta rngòt rngơt, lơh bol he ò rgơi wet tus hơ ală jơnau hơ Bèp hơđang jong bềng gơnap gơnoăr mơ kòñ gơboh dê. Bulah là bơh bơta kơlôi hala ngăn, ală bơta rngòt rngơt dô ơs pồn tơm ală tiah klăm jơngo nùs tôr dê, kơryan lơh sơlung sơlăng bơta ring lơngai bol he dê.

Sadrak, Mesak, mơ Abetnegô neh khin cha pơndang săng cun să he diđap rùp ràk mơ màh dơng jơnhoa mơ Bơtau Nebukatnessar dê bơtao gơs. Ala mơ bơta rngòt rngơt jơm gom, bol khai neh sac wet tus hơ gơnap gơnoăr dơng ryŭ Yàng Tòm Trồ dê:
Bol khai yal lah: “Sadrak, Mesak, mơ Abetnegô ho wơl mơ bơtau lah: “Ơ bơtau Nebukatnessar, bơh bơta do bol hi ò càng tò să di đap bơtau. Dilah bơtau sơrbì bol hi tòm bơnhă ồs hơng, gen ơ bơtau; Yàng Tom Trồ la Bơtau bol hi duh broă geh gơnoar dong bol hi klàs bơh hơ̆ mơ bơh di tê bơtau.”

Cau ur bong mơñà di jơng Yàng Jêsus neh pha lin bơta rngòt rngơt mơ ală jơnau đơs bơh tồi glài să tòm dê. Ala bơh lơi bơta rngòt rngơt kơryan, mò neh wet tus wil tơl hơ Yàng Jêsus mơ duh khoai di jơng Kơnràñ. Yàng Jêsus neh đơs mơ ală cau gut dar:
“Di ngan Añ đơs mơ bol mê, làm jơh dunnia tòm tiah lơi gơs bơto yal Jơnau Niam do, gen kung yal wơl broă khai neh lơh hơ̆ nàng kah bơh khai.” (Mathiơ 26:13)

Pier mơ Jang kol ală cau at bồ gùng duh khoai tòm Jerusalem kơryan ò di đơs tus hala bơto yal ai sơnđăn Yàng Jêsus tai (Broă 4:18).

Ala mơ lơi bơta rngòt rngơt gom gơrwang, bol khai pràn kơldang yal lah:
“Mơya Pier mơ Jang ho lah: “Ală ồng sền sơwì tĕ di đap Yàng Tom Trồ, lơh jat jơnau ală ồng dê hala lơh jat jơnau Yàng Tom Trồ dê? Bơh bol hi ò rgơi ò đơs bơh ală bơta he neh gŏ mơ kơno.” (Broă 4:19-20).

Bơta rgnòt rngơt gơlik ò rgơi lơh diđap bơta pràn kơldang bơta dòn dê.

Bulah oă sơnăm neh sơlet rlau, mơ ya kơp tŭ ò gơs đèng, ală rùp tòm kơlôi sơnưng bơh ală phan gam pồn ndơp tòm klăm jơngo kung gam lơh nùs tôr añ kơlôi rcăng. Bulah behơ̆, añ neh bơtê gùng dà riwơl hơ ală jơnau hơ tòm Sră Goh, tiah mơ añ geh dong klàs ală bơta rngòt rngơt, bulah ngăn hala tòm bơta kơlôi sơnưng. Bơta àng bơh ală jơnau hơ Yàng dê hơ̆ cèng tus bơta lơngap lơngai mơ chò hop, bơtrơh tơlik ală bơta rngòt rngơt kơlôi rcăng.

Be Đơs Crih 119:130 geh cih: “Tòm tŭ bơto sồr jơnau Yàng dê gen gơ pơnđàng sòl, Gơ ai bơta git wă cau ò hoan git in.”

Ngai do, ồng mò oh mi gam rngòt bơh bơta lơi? Bol he gơs gơnoăr ò ai gơnoăr bơta rngòt gòm gơrwang he, kơnòm dê bơta wet tus hơ bơta ang Yàng Jêsus dê – bơta àng gơn kơnòm gam sol pơnđang tòm tiah klam jơngo, bơtrơh tơlik ală bơta dơrcul rngòt:
Yàng Jesu đơs tai mơ bol khai lah: “Añ la bơta àng dunnia dê; cau lơi jat Añ rơp ò lòt tòm bơta klam jơngo, mơya gơs bơta àng bơta kis dê.” (Jang 8:12)

Kơnòm gơnoăr pràn Yàng Tòm Trồ dê, oh mi mơ añ rgơi lòt găn ală bơta rngòt rngơt, bulah tòm bơta kơlôi hala tòm rài ngăn.

Dan jà bol he dô nùs bal tòm bơta hòi dan:
Khoai Bèp Hơđang Jong, tòm ală tŭ lơmpah klam jơngọ kir rngòt rài kis dê, dan Yàng sùm gơs mat mơ bơtrơh tơlik ală bơta rngòt rngơt găm at bồ nùs tôr mơ hwing nùs kòn. Dan Yàng dong kòn wet tus hơ bơta àng Kơnràñ dê, bơh tŭ hơ̆ kòn geh dong klàs bơh ală bơta rngòt rngơt. Kòn ai sơnđăn Yàng Jesus Krist hòi dan mơ Yàng Bèp, Amen.

Ơ ală ồng mò oh mi kòñ gơboh, gơnap gơnoăr Yàng rơp dong bol he lòt găn ală bơta rngòt rngơt. Bơta àng Kơnràñ dê rơp sol pơnđang gùng dà bol he dê, lơh bơta klam jơngọ roh jơh. Tom tŭ dòn kơnòm dê bơta gơs mat mơ gơnoăr pràn Kơnràñ dê, bol he rơp jòi bàn bơta lơngai mơ bơta pràn nàng ntao diđap mat mơ ală bơta gơlong lơi. Bơta kòñ gơboh ò gơs nhal Yàng dê rơp dong klàs bol he klàs ală bơta rngòt rngơt mơ cơnđoà lòt kơ̆ win tòm bơta àng Kơnràñ.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.