Cov kwv tij sawv daws, peb ua neej nyob rau hauv lub ntiajteb no, muaj tej zaug saib nws kuj yoojyim tiamsis muaj tej zaug txojkev uas peb taug nws yeej nyuaj thiab tsaus ntuj nti. Thaum ntawd peb tsis paub yuav tshuam txojkev twg thiaj zoo lossis puas tshuam mus yuam kev es tso dhau tej txoj kev tseem ceeb hauv lub neej. Tej no tsis yog tsuas tshwm sim rau hauv peb lub neej xwb tiamsis tseem tshwm los ntawm peb sab ntsujplig thiab.

Hnub no, yog hnub 13/10/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm XAIV TSHUAM KEV YOG SIJHAWM.

“Tus Tswv hais tias, Kuv yuav qhia txojkev uas koj yuav taug rau koj, kuv yuav qhia koj thiab ua koj tus tuavxam.” (Ntawv Nkauj 32:8)

Lub sijhawm mus koom rooj txhawb siab rau tebchaws Kauslim tsis ntev los no, kuv kawm tau ib zaj zoo heev. Kaj ntug hnub ntawd, peb pawg mus kos npe, thiab muab npe los coj ua raws li lub rooj npaj taw kev. Thaum ua tiav, peb muaj ob peb sijhawm khoom ua ntej lub rooj yuav pib, yog li peb siv lub sijhawm no los mus ncig lub nroog Seoul. Peb pib nce saum tàu điện thiab mus rau ntawm qhov chaw peb yuav mus.

Thaum rov qab los rau ntawm thaj chaw ua rooj txhawb siab, peb hais tias tsuas yog rov txoj qub kev thiab nqes ntawm qhov chaw nqes 152 xwb ces yog lawm. Tiamsis, thaum lub tàu điện khiav tau ib ntus, kuv pib ua xyem xyav, hnov cuag li txoj kev no zoo tsis thooj li txoj peb tuaj. Tomqab rov tshuaj kev, peb pom tias muaj ob qhov chaw nqes 152 nyob rau ob txoj kev sib txawv. Peb twb ua poob lub sijhawm tseem ceeb thiab tsis hloov tàu yog lub sijhawm.

Peb maj nroos nqes rau qhov chaw nqes tom ntej, peb rov qab los rau ntawm qhov chaw pib, tiamsis qhov yuam kev no ua rau peb los tsis ncav lub sijhawm pib.

Dhau tej uas kuv ntsib dhau no, kuv kawm tau ib zaj kawm ntawm sab ntsujplig tseem ceeb. Peb txoj kev mus ntawm sab ntsujplig kuj zoo li txoj kev uas peb mus zaum no. Peb hnov tso siab rau txoj kev uas peb tab tom mus, vim peb xav tias peb paub zoo thiab peb tsis cia Vajtswv ua tus coj kev. Tiamsis zoo li thaum kuv pom tias kuv mus yuam kev lawm, muaj tej lub sijhawm Vajtswv yuav ua rau kom peb pom tias peb mus yuam kev lawm. Txawm li los Vajtswv yeej ua siab ntev tos thiab coj peb rov qab los kom yog kev.

Vajluskub hais meej meej tias Vajtswv yog tus qhia thiab taw kev rau peb:
“Tus Tswv hais tias, “Kuv yuav qhia txojkev uas koj yuav taug rau koj, kuv yuav qhia koj thiab ua koj tus tuavxam.” (Ntawv Nkauj 32:8)

Ua Vajtswv tsaug thaum uas paub tias Vajtswv tsis yog tsuas saib peb raws li tej kab lig kev cai coj nruj nruj xwb, tiamsis Vajtswv saib xyuas thiab qhia peb los ntawm txoj kev hlub. Vajtswv tsis yog tsuas yog tus tsim kev cai lossis txiav txim thaum peb mus yuam kev xwb. Vajtswv yog Leej Txiv siab ntev, hlub thiab coj peb ib kaujruam zuj zus hauv lub neej, txawm yog yuav nyob ntu twg hauv lub neej. Vajtswv paub peb zoo dua li peb paub peb tus kheej, thiab nkag siab tej uas peb cheem tsum, dhau ntawm Vajtswv taw kev rau peb coj peb tsev neeg, Pawg Ntseeg thiab tej neeg ib ncig.

Nyob hauv lub neej, muaj ntau zaug peb mus txog rau ntawm ntau txoj kev cais hauv lub neej. Piv txwv, thaum ntsib kev txomnyem hauv txoj haujlwm lossis txoj kev sib raug zoo, peb paub tias peb yuav ua dabtsi, raws li tej uas tus kheej ntsib dhau lossis tus kheej txoj kev kawm paub. Tiamsis yog tsis thov Vajtswv thiab tsis nrhiav Vajtswv ua tus coj kev, tej zaug peb yuav mus yuam kev peb yeej tsis paub. Tej kev puas tsuaj lossis tej txoj kev tws ntawd ntau zaug yog lub cim ua rau peb pom tias peb tab tom mus yuam kev. Kuj zoo ib yam li thaum kuv mus yuam kev. Vajtswv yeej tseem ua siab ntev, zoo siab hlo taw kev rau peb yog tias peb paub txo hwjchim tig rov qab los nrhiav Nws. Nyob ntawm sab ntsujplig, qhov uas mloog thiab cia Vajtswv ua tus coj kev yog yam uas tseem ceeb kom peb tsis mus yuam kev thiab mus raws li Vajtswv lub siab nyiam.

Nqe Vajluskub nyob hauv lus mekas tseem muaj lo lus tias “Loving eye” txhais tias lub qhov muag ntxim hlub. Vajtswv tsis yog tsuas lam saib peb xwb, tiamsis saib los ntawm lub ntsej muag hlub, zoo li ib leej txiv saib nws tej menyuam. Vajtswv tsis tso peb tseg, txawm yog ntau zaug peb yuam kev. Peb yog Vajtswv tej tub thiab tej ntxhais uas Vajtswv hlub.

Puas tau muaj zaum twg koj cim civ nug tias txoj kev uas yus tab tom mus puas yog txoj kev uas Vajtswv xav coj koj kev? Ntau zaug peb maj nroos thiab ntseeg peb tus kheej lub peev xwm, yo li thiaj hnov qab txoj kev nrhiav Vajtswv hauv peb tej kev txiav txim siab. Zoo li qhov uas peb tsis ncav lub tàu yuav tau mus deb zog rau ntawm txoj kev uas peb cim civ suav tias yog, tiamsis qhov tseeb tiag peb tab tom yuam kev. Nres ib mentsis thiab xav: Koj puas pheej thov Vajtswv cia Vajtswv coj koj ib kaujruam zuj zus? Puas muaj zaum twg koj ntseeg koj tus kheej hnov qab Vajtswv yog tus uas ntsia pom tag nrho txoj kev koj mus? Cia li tseg sijhawm rov qab tshuaj koj txoj kev thiab nrhiav Vajtswv ua tus coj kev, vim tsuas yog Vajtswv xwb thiaj yuav paub txoj kev coj mus txais tau koob hmoov thiab kev kaj siab tiag.

Ua Vajtswv tsaug rau Vajtswv tej lus cog tseg tias Vajtswv yuav nrog nraim thiab coj peb qhia peb hauv txoj kev hlub. Vajtswv nqua hu kom peb ntseeg siab rau Vajtswv ua tus coj kev.

“Cia siab rau tus Tswv kom kawg koj lub siab lub ntsws. Tsis txhob cia siab rau koj tej kev txawj ntse. Txhua yam uas koj ua koj yuav tsum nco ntsoov tus Tswv, nws thiaj yuav coj koj taug txojkev uas yog txoj tseeb” (Pajlug 3:5-6).

Cov kwv tij, nej puas tab tom mus raws li Vajtswv ua tus coj kev? Lossis peb ho ntseeg rau tus kheej lub peev xwm ua rau peb yuam kev, yuam kev mus rau lwm txoj kev uas peb twb tsis paub? Yog tias koj pom tias koj tab tom mus yuam kev, txhob nkees rov qab los cuag Vajtswv. Vajtswv zoo siab hlo txais yuav peb thiab coj peb rov qab los kom yog txoj kev uas Vajtswv twb npaj txhij rau peb lawm. Yuav muaj kev zoo siab thaum uas peb pom tias peb mus yuav kev rov qab los yog caij yuav muaj nqis heev.

Cia Vajtswv coj koj lub neej, vim tsuas yog Vajtswv xwb thiaj paub txoj kev zoo uas peb yuav tau mus. Ntseeg siab rau Nws, vim Nws saib rawv peb los ntawm lub qhov muag hlub, zoo siab coj peb ib kaujruam zuj zus hauv yus lub neej sab ntsujplig.

Thov caw nrog kuv peb thov Vajtswv ua ke:
Tus Tswv, Koj yog Leej Txiv uas hlub kuv, kuv ua koj tsaug vim Koj yog tus hlub kuv txawm yog muaj ntau zaug kuv mus deb koj txawm yog tsis paub lossis txhob txwm. Ua Vajtswv tsaug vim Koj hu kuv tig rov qab los rau ntawm koj thiab koj tej lus. Kuv thov muab kuv lub neej fij rau koj ua tus coj kuv. Kuv thov hauv Tswv Yexus Khetos lub npe. Amees.

Cov kwv tij txhua tus, ncaj rau hnub nco txog tej menyuam ntseeg Vajtswv hnub no. Kev thov Vajtswv txhua hnub xa cov lus noj qab nyob zoo no xa mus rau cov uas nyob rau lub hnub nyoog tab tom loj hlob: Thov foom kom nej yuav ruaj khov hauv txoj kev ntseeg thiab cia Vajtswv ua tus coj kev. Txawm yog txoj kev tom ntej yuav muaj ntau yam kev sim siab los, ntseeg tias Vajtswv tus muaj kev hlub yuav coj nej ib kaujruam zuj zus. Kev thov Vajtswv hnub no thov foom ib lo lus zoo rau cov mloog hnub no, txawm yog nej tab tom nyob rau hom hnub nyoog twg los thov kom nej yuav hluas hauv Vajtswv, txuas ua ke nrog Vajtswv thiab mus nrog Vajtswv txoj kev ua tus coj nej.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw: [email protected]. Tswv Yexus hlub koj. Thiab peb xav kom txuas tau nrog koj.