Ơ ală ồng mò oh mi kỡn gơboh, tòm rai kis, gơs tú oă bơta loh lang mơ buôn soh lơm, mơya kung gơs tú rai kis he klam jơngo mơ kal ke. Bol he gó he tis nrah, bè la neh lòt gan dô nơm gung dơng mang mơ ò lòt tòm gung hớ. Bơta do ò di ming gơlik gơs tòm rai kis kòp ngai lơm mơya kung gơlik gơs tòm gung lòt jat Yàng.

Ngai do, ngai 13/10/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơh tơnggume: SAC GUNG DI.

“Añ rơp bơto sồr mê, sơnio mê in gùng pal lòt; Mat Añ rơp sền di mê mơ bơto dong kòl mê.” (‭‭Đơs Crih‬ ‭32‬:‭8‬)

Tòm tú lòt tòm lơgar Hàn Quốc, ẵn neh gơs dô bơta ò tú lơi rgơi húi. Ang drim ngai hớ, mpôl bol he dê lòt tus nàng cih sơnđan, dòp sră mơ bơta tề lam bơh Mpôl Lam Bồ. Tơnớ hớ, he gơs dô ết tú lơmpah lai mơ tú gơlik gơs bơta jơnum, bol he neh lòt kơnhơl tòm bòn dơng Seoul. Bol he hao rdeh mơ git loh lang rơp dơh wơl tòm tiah lơi?

Tòm gung rê wơl tòm tiah jơnum, bol he tồn lah he rê wơl gung yau mơ dơh wơl tòm hiu 152 la di. Mơya, tú rdeh neh lòt, gen ẵn pin wil wơl, sên gung do ò di la gung neh lòt. Tơnớ neh sên wơl mpàn sơnio gung, bol he gó bàr nơm hiu 152 mơ bàr nơm gung pha is. Bol he neh lòt gan tiah dơng mang mơ ò pơrgơl rdeh di tú.

Mhar dơh wơl tòm hiu tơnớ, bol he rê wơl tòm tiah pơrgơl rdeh, mơya bơta do neh lơh he in chơrla tú jơ sơntòm.

Bơh bơta do ẵn gơs dô bơta bơtê dơng mang tòm gung lòt jat Yàng. Gung lòt jat Yàng he dê kung behớ sơl. Bol he chò nùs ngan tòm gung he sac, kơnòm di bơta git wă să tòm he dê mơ sang bơta tề lam Yàng dê.

Kung bè tú ẵn sên gó he neh lòt tis gung, gơs tú Yàng ai bol he in gó lah bol he neh lòt tis nrah. Bulah behớ, Kơnrẵn sum kơp gơn bol he mơ tề lam bol he rê wơl gung di.

Sră Goh tơng kah bol he lah să tòm Yàng la Bơtau bơto mơ sơnio gung bol he in:
“Añ rơp bơto sồr mê, sơnio mê in gùng pal lòt; Mat Añ rơp sền di mê mơ bơto dong kòl mê.” (Đơs Crih 32:8)

Ưnngai Yàng oă ngan bơh tú git lah Yàng ò di ming sên bol he mơ gơnoar sôr lơm, mơ Kơnrẵn rong siam mơ bơto sôr bol he mơ bơta kỡn gơboh. Kơnrẵn ò di la Bơtau ming ai bơta boh lam lơm hala lơh glài tơ mal tú bol he tis nrah. Gơ pơrlớ wơl, Yàng là cau Bèp Lơbơn Niam, sum kỡn gơboh mơ tề lam kòp cơnđoà tòm rai kis bol he, tòm kòp tú. Kơnrẵn git loh lang rlau mơ să tòm he, git ală bơta bol he cang mơ sên gó, bơh hớ tề lam bol he gơwèt mơ hiu nhă he dê, Hiu Jum Goh mơ ală cau ơm gut dar.

Tòm rai kis, gơs tú bol he ntào di đap bơta sac rwah gung dơng mang. Bè la, tú he tìp bơta bol glar kal ke tòm broă lơh hala di gul he mơ cau ndai, he tồn lah he git pal lơh bơta lơi, kơnòm do bơta git lam hala bơta jak chài he dê. Mơya, dilah ò hòi dan mơ joi jat bơta tề lam bơh Yàng, bol he rơp lòt tis gung mơ ò rgơi sên gó. Ală bơta ò gơs công nha hala bơta bol glar kal ke gơs tú rơp la bơta ai he in bol he neh sac tis gung. Kung bè ẵn neh hai tis rơndeh, Yàng kừ ơm kơp bol he, sơnio gung he in lòt dilah bol he pơndềt să mơ joi jat Yàng. Tòm gung lòt jat Yàng, bơta git kơno mơ lòi Yàng tề lam la bơta dơng mang rlau jơh nàng he ò lòt tis gung mơ sum lòt jat nùs kỡn Yàng dê.

Seng Sră Goh mơ jơnau Anh gơs jơnau “loving eye” – gơtha la sên mơ mat bêng bơta kỡn gơboh. Kơnrẵn ò di ming sên he bè òs, mơ sên mơ bơta kỡn gơboh, bè dô nă cau Bèp sên kòp cơnđoà lòt kon he dê. Kơnrẵn ò sang lòi he, bulah he lòt tis nrah. Bol he sùm la kon klau, kon ur kỡn gơboh Kơnrẵn dê.

Gơs tú lơi ồng mò oh mi lùp is gung mơ he sac rwah mơ lòt hớ la gung mơ Yàng kỡn tề la he hala ò? Gơs tú bol he kis mhar, kơnòm di bơta chài rgơi is he dê mơ húi hwơr bơta jòi jat nùs kỡn Yàng dê tòm ală bơta. Kung bè he neh sang dô bă tiah tòm gơl rơndeh, bol he rgơi lòt ngai rlau tòm gung he ai la di, mơya ngan la he neh tis nrah. Dơh wơl té dô êt mơ kơlôi sơnưng lah: ồng mò oh mi sum hòi dan nàng dan bơta tề lam Yàng dê tề lam he tòm kòp cơnđoà sơl? Gơs tú lơi he kơnòm is mơ să tòm he mơ húi lah Yàng la Bơtau sên gó jơh gung lòt ồng mò oh mi dê sơl? Lòi té dô êt tú nàng sên wơl gung dà he dê mơ sên gó bơta tề lam kỡn gơboh Yàng dê, bơh ming gơs Kơnrẵn rgơi git gung dà lam he tus tòm bơta hon chò mơ ring lơngai wil tơl.

Ưnngai Yàng bơh jơnau ho lah Kơnrẵn sum ơm bal, tề lam mơ tiar mòn bol he tòm bơta kỡn gơboh. Kơnrẵn hoi jà bol he sum don kơnòm wil tơl tòm bơta tề lam Kơnrẵn dê.

“Jơh nùs dòn kơnòm tĕ di Yàng Jehôwa. Bañ dòn kơnòm di bơta àng loh kòn dê;Tòm jơh ală gùng dà kòn dê, dòp git tĕ Kơnràñ, Gen Kơnràñ rơp bơsong ală gùng dà kòn dê.” (Jơnau Pơnđil 3:5-6)

Ơ ală ồng mò oh mi kỡn gơboh, bol he cơnđoà lòt tòm bơta tề lam Yàng dê ò? Hala gơs tú lơi he dòn kơnòm oă di bơta chai rgơi he dê mơ tis nrah lòt gung is mơ he ò git sơl? Dilah sên gó he tis nrah, bẵn bassil mơ rê wơl té mơ Yàng. Kơnrẵn sum wă rò bol he mơ lam bol he rê gung mơ Kơnrẵn neh rcang bol he in. Bơta hon chò tú he đal git he neh tis mơ rê wơl di tú la kwơ mang ngan.

Lòi té Yàng la cau tề lam rai kis ồng mò oh mi dê, bơh ming Kơnrẵn git loh lang gung dà hon chò mơ công nha bol he pal lòt. Dòn kơnòm té di Kơnrẵn, bơh Kơnrẵn sum wèt sên bol he mơ mat sên bêng bơta kỡn gơboh, mhar tề lam kòp cơnđoà lòt jat Yàng he dê.

Dan jà bol he dô nùs bal tòm bơta hòi dan:
Khoai Yàng la Bèp kỡn gơboh kon dê, kon ưnngai Yàng bơh Kơnrẵn la Bơtau kỡn gơboh kon bulah gơs tú kon lòt is ngai mơ Kơnrẵn tú nùs kỡn hala ò kỡn. Ưnngai Yàng bơh Kơnrẵn sum hòi kon rê wơl mơ Kơnrẵn mơ Jơnau Kơnrẵn dê. Kon dăn ơn rai kis kon tòm mpang tê tề lam bêng bơta kỡn nđàc Yàng dê mơ jơh nùs hòi dan. Tòm sơnđan Yàng Jesus Krist. Amen.

Ơ ală ồng mò oh mi kỡn gơboh, tòm ngai Cau Kơnòm Să Jơnau Niam, Bơta Hòi Dan Kòp Ngai dan pơyoa jơnau tòm pà bơta chò hòp tus ală cau kơnòm să: Dan oh mi in kừ kớ bơta dòn mơ cơnđoà lòt tòm bơta tề lam Yàng dê. Bulah gung lòt tòm ngai tơnớ bêng bơta bol glar kal ke, kừ dòn nền lah Yàng kỡn gơboh mơ rơp tề lam oh mi. Bơta Hòi Dan Kòp ngai dan pơyoa jơnau chò tus di ồng mò oh mi, bulah he tòm sơnam lơi kung rơp sên gó he sùm pràn kơl dang tòm Yàng, đềt mêr mơ Yàng mơ cơnđoà lòt tòm bơta tề lam kỡn gơboh Kơnrẵn dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.