Tej nthwv cua tshwm sim hauv lub neej ua rau peb txhawj thiab ntshai. Vajtswv txojlus qhia tias yog leej twg muab yus lub neej tso rau hauv Vajtswv txojlus, ntseeg siab rau Vajtswv, ces txawm yuav ntsib cua daj cua dub loj luaj twg los lub neej yeej tsis yoj yees. Koj tabtom muab koj lub neej tso rau qhov chaw twg?

Hnub no, yog hnub 14/10/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Sandra Holcombe dhau ntawm Zaj kawm SAWV KHOV KHO NTAWM CUA DAJ CUA DUB.

“Yexus hais tias, txhua tus uas hnov kuv tej lus thiab ua raws li tej lus ntawd, tus ntawd zoo ib yam li tus uas muaj tswvyim, nws ua nws lub tsev rau saum pobzeb. Thaum los nag xob nag cua, dej nyab thiab cua ntsawj lub tsev ntawd. Lub tsev ntawd tsis vau, rau qhov nws ua rau saum pobzeb. ( Masthais 7:24-25)

“Cov neeg uas cia siab rau tus Tswv zoo ib yam li lub Roob Xi-oos uas muab tshem tsis tau, thiab nyob ntawm nws qhov chaw mus ibtxhis li” (Ntawv Nkauj 125:1).

Koj puas hnov dua txojnkauj muaj lub npe hu tias “Kuv Tus Ntsujplig Pheeb Rau Ntawm Tswv Yexus”? Xyoo 1863, thaum muaj kev tsov rog rau tebchaws Mekas, tus tub sau nkauj William B. Bardbury tau muab suab rau txojnkauj no , tus sau cov ntsiab lus yog Edward Mote.

Feem ib ntawm txojnkauj, yawg sau:

“Kuv tus ntsujplig txiav txim siab pheeb rau hauv qhov chaw ncaj ncees uas yog Yexus Khetos xwb; tseeb tiag kuv yeej tsis xav pheeb kuv lub peev xwm, yuav sawv khov kho rau ntawm Tswv Yexus xwb.

Pheeb rau ntawm Tswv Yexus zoo li lub pob zeb tawv, lwm qhov chaw zoo li suab zeb xwb, tseeb tiag lwm qhov chaw tsuas zoo li suab zeb xwb.”

Bradbury thiab Mote nkawd puav leej siv nkawd lub peev xwm los sau tej txojnkauj zoo heev li ntawd. Yog li, tamsim no peb thiaj tau txais txoj kev qab zib los ntawm lawv los, yog ib txojnkauj zoo los txog niaj hnub nim no tsis txawj ploj.

Nyob hauv Mathais 7:24-27, Tswv Yexus hais txog tus neeg ua nws lub tsev rau saum suab zeb, yog tej haujlwm tsis muaj nqis. Tsis tas li ntawd, tus neeg muaj tswv yim lub tsev ruaj khov thaum cua daj cua dub tuaj vim ua rau saum pob zeb.

“Yexus hais tias, txhua tus uas hnov kuv tej lus thiab ua raws li tej lus ntawd, tus ntawd zoo ib yam li tus uas muaj tswvyim, nws ua nws lub tsev rau saum pobzeb. Thaum los nag xob nag cua, dej nyab thiab cua ntsawj lub tsev ntawd. Lub tsev ntawd tsis vau, rau qhov nws ua rau saum pobzeb. “Tus uas hnov kuv tej lus, tiamsis tsis ua raws li tej lus ntawd, tus ntawd zoo ib yam li tus uas tsis muaj tswvyim, nws ua nws lub tsev rau saum cov suabzeb. Thaum los nag xob nag cua, dej nyab thiab cua ntsawj lub tsev ntawd, ces lub tsev ntawd txawm vau thiab puastsuaj tas huv tibsi lawm” (Mathais 7:24-27).

Tamsim no koj lub neej tau ua rau ntawm tus cag dabtsi? Koj tej haujlwm puas tab tom tso rau ntawm Yexus Khetos ua tus cag ruaj khov? Nyob hauv koj tej haujlwm koj ua, koj puas muaj homphiaj txhawb nqa Vajtswv pauv qhov uas qhuas koj tus kheej?

Koj tsis tas yuav ua tej haujlwm loj xws li tsim nkauj, puab tsev, saib xyuas tej haujlwm loj, lossis tsim muaj tej chaw ua haujlwm loj.

Tiamsis tej haujlwm uas koj tuaj yeem ua tau yog ua tej haujlwm xws li pab cov neeg tsis muaj tsev nyob ib mentsis mov noj, lossis ua tej haujlwm txhawb lwm tus zog. Txawm koj paub tias koj lub zog muaj nrim. Lossis rau siab ntso ua qhov haujlwm kom zoo tshaj plaws uas Vajtswv muab rau koj ua rau ntawm thaj chaw uas Vajtswv txib koj, hnub dhau hnub, nyob rau qhov twg, lub sijhawm twg thiab paub tias Vajtswv yuav qhib kev rau koj.

Lossis koj tab tom siv zog nrhiav tej uas koj ua poob lawm: lub zog, lub neej txijnkawm, kev ua lag luam…

Nco ntsoov tias Vajtswv ntsia pom koj. Vajtswv paub tej yam uas Vajtswv tau muab pub rau koj. Vajtswv paub koj yuav kov yeej txhua nthwv cua, yog koj paub pheeb rau ntawm Nws thiab vam khom Vajtswv thaum txog Vajtswv lub sijhawm.

Tswv Yexus yog peb tus cag ruaj khov, peb txoj kev cia siab peb muaj cuab kav pheeb rau ntawm Nws:

“Nws tib leeg thiaj yog tus tsomkwm
kuv thiab cawm kuv dim xwb,
nws yog tus tiv thaiv kuv, thiab kuv yuav tsis swb ib zaug li.” (Ntawv Nkauj 62:2)

Thov caw nrog kuv peb thov Vajtswv ua ke:
Kub ua Vajtswv koj tsaug rau qhov koj yog kuv qhov chaw nkaum, yog tus tiv thaiv kuv thaum muaj cua daj cua dub hauv lub neej. Thov Vajtswv pab kom kuv paub muab kuv lub neej tso rau ntawm koj, zoo li ib tug neeg muaj tswv yim ua nws lub tsev rau saum pob zeb, kom dhau ntawm tej teeb meem lawm kuv yuav tsis yoj yees tiamsis yuav saj tau Vajtswv koj. Kuv thov hauv Tswv Yexus Khetos lub npe. Amees.

Cov kwv tij txhua tus, koj lub neej tab tom tso rau saum tus cag twg? Ntau zaug Vajtswv tso cai rau tej teeb meem hauv lub neej tshwm tuaj: cua daj cua dub, dej loj, tsis yog cia rhuav koj, tiamsis yog lub sijhawm koj yuav tau rov qab tshuaj koj tus kheej kom paub tias koj lub neej tab tom ua rau saum tus cag twg. Muab koj lub neej tso rau ntawm Vajtswv, Vajtswv yog lub qhov chaw nkaum thaum muaj cua daj cua dub, thaiv koj kom kaj siab lug hauv Nws.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw: [email protected]. Tswv Yexus hlub koj. Thiab peb xav kom txuas tau nrog koj.