Ală càl rbut gơ hào guh tom rài kis lơh bŏl he ĭn kơlôi sơnơng oă, rngòt rngơt. Jơnau Yang bơtô lah dilah cau lơi ơn rài kis he di tom Yang Tom Trồ, jơh nùs dòn kơnòm Yang, bulah tìp càl rbut dờng, rài kis găm ò lơnggơr. Rài kis he găm ơn hơđăng mơnàng lơi taih?

Ngai do, ngai 14/10/2024 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Sandra Holcombe dê bơh Tơnggume NTÀO KƠ̆ DIGUL CÀL RBUT.

“Behơ̆ cau lơi kơno ală jơnau Añ bơto do mơ lơh jat, gen kung be dô nă cau jak chài bơt hìu khai hơđang lŭ klềr. Dùh mìu, dà tih, càl khồm druh dê hìu hơ̆, mơ hìu ò tơrlah bơh neh bơt hơđang lŭ klềr.” (Mathiơ 7:24-25)

“Cau lơi dòn kơnòm di Yàng Jehôwa, gen be mơnơm Siôn ò lơnggơr mơya gam gơs sùm sùm.” (Đơs Crih 125:1)

He òs mòng bơh jơnau đơs chò goh “HWING ĂÑ LƠH NIN” sơl? Năm 1863, digul bơta tom lơh Hoa Kỳ, cau cih chò William B. Bradbury neh cih jơnau ntas chò gọh do, kơnòm hơđăng jơnau Edward Mote di.

Sèng sơnrờp jơnau chò gọh do, ồng neh cih:
“Hwing ăñ lơh nin ming ơm tom tiah,
Sŏng rĭng mơ mham Je-su di lơm.
Ngăn ăñ ò khin kơ-nom pràn is,
Ming kơ-nom di sơn-đăn Yang lơm.

Ơm tom Je-su be pơ-nai lŭ,
Ală tiah ndai be bras tơr-luh,
Ală tiah ndai be bras tơr-luh,”

Jơh bar nă ồng Bradbury mơ Mote neh ngùi bơta jak chài lơh ntas kơñi, mơ cih ală jơnau đơs chò he di dô bă krơi is. Tài bơh hơ̆, tŭ do bŏl he geh pơrdon cồng nha plai lơngồt bŏl khai di, tô bơta kas màng ngăn, rlau mơ tŭ tơngai.

Tom Sră Goh Ma Thi Ơ 7: 24-27, Yang Jesu neh yăl jơnau tơnggit bơh cau bơrngơl gơla bơt hiu he hơđăng bras, mơ broă hơ̆ gơlik ò kwơ. Sơlơ̆ wơl, hiu cau jak chài di bơt gen kơ̆ cê mơ ò wăñ lơngơh bulah tìp càl rbut dờng tài bơh bơt hơđăng lŭ klêr.

“[24] “Behơ̆ cau lơi kơno ală jơnau Añ bơto do mơ lơh jat, gen kung be dô nă cau jak chài bơt hìu khai hơđang lŭ klềr. [25] Dùh mìu, dà tih, càl khồm druh dê hìu hơ̆, mơ hìu ò tơrlah bơh neh bơt hơđang lŭ klềr. [26] Ai cau lơi kơno ală jơnau Añ bơto do mơ ò lơh jat, gen kung be dô nă cau bơrngơl gơla bơt hìu khai hơđang bràs. [27] Dùh mìu, dà tih, càl khồm druh di hìu hơ̆, gen hìu tơrlah, tơrlơm lề oă ngan.” (Mathiơ 7: 24-27)

Jơ do rài kis he geh bơt hơđăng bơta lơi? Ală broă he lơh găm gơs ơn hơđăng mơnàng kơ̆ cê Bơtau Krist di sơl? Tom kòp nơm broă lơh he di, he gơs ơn tơnggume la yò tơnguh Yang chan ala Jọng ro să tom he sơl ơ?

He ò càng di lơh ală broă dờng ir be chài cih chò, bơt bơtào, at bồ ală broă lơh dờng ngăn, hala bơtào gơs doanh nghiệp.

Mơya broă lơh hơ̆ ming rơp buơn rlau la broă he găm tom pà ală bơta păl càng òs mòng be dŏng kòl ală cau ò gơs hiu tum ơm bơh dô ềt phăn ngùi sa, hala sac ală broă lơh chồl tơngkah cau ndai bulah he git gơnoăr pràn he ò tơl. Hala mìng lơh broă niăm ngăn tom Yang neh ơn rơndăp, ngai sơrlèt ngai, bulah kòp bă tiah lơi, tŭ lơi, mơ dòp git Yang rơp pò gùng dà he ĭn.

Hala gơs tŭ he găm sơlơ lơh pa wơl ală bơta lơi he neh lơh roh: pràn kơldăng, broă tom ur klau, broă lơh…

Kah tĕ lah Yang rơp sền gŏ he. Kơnrẵn git ală bơta lơi Kơnrẵn neh ai he ĭn. Kơnrẵn git he rơp pha lin ală càl rbut dờng lơi he tìp, dilah he git gơn kơnòm tom Kơnrẵn mơ gơri jat tŭ tơngai Kơnrẵn di.

Yang Jesu la mơnang kơ̆ cê bŏl he di, kơp kỡn bŏl he rơp đơs mơ Kơnrẵn lah:
“ Mìng dô nă Yàng la lŭ klềr añ jê, mơ bơta dong klàs añ, la theng kơ̆ cê añ jê; añ rơp ò wañ lơnggơh.” (Đơs Crih 62:2)

Dan jà bol he dô nùs bal tòm bơta hòi dan:
Ưnngai Yang tài bơh Kơnrẵn la lŭ klềr kơ̆ cê, la Bơtau sền gar mơ tiah rĭng lơngai digul ală bơta gơlòng bŏl glăr rài kis di. Kơp kỡn Yang dŏng kọn git ơn mơnang rài kis he hơđăng să tom Kơnrẵn, kŭng be dô nă cau jak chài bơt hiu he hơđăng lŭ klềr, nàng bơh ală bơta gơlòng bŏl glăr, kọn kŭng ò tŭ lơi wañ lơnggơh mơ sơlơ git Yang jrô ndơp rlau tai. Kon jơh nùs họi dăn, kọn ai sơnđăn Yang Jesu Krist, Amen.

Ơ ală ồng mọ ọh mi koñ gơboh, rài kis he găm bơt mơnang hơđăng bơta lơi? Ală tŭ Yang ai gơnoăr broă iơh gơlik gơs: Dùh mìu, dà tih, càl khồm ò di nàng tơnkram chơt he, mơya hơ̆ là tŭ he păl càng sền sơwì wơl nàng git rài kis he găm bơt di hơđăng mơnang lơi. Jào phi tĕ rài kis he Yang ĭn, Kơnrẵn la theng kơ̆ cê digul gơlòng bŏl glăr, sum jơm ndơp he tom bơta lơngap lơngai wil tơl Kơnrẵn di.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.