Puas muaj zaum twg koj muab koj tus kheej piv rau lwm tus thiab koj pom tias koj ua tsis tau dabtsi? Peb pheej nrhiav mus nrhiav los yus lub meej mom thiab yus tus kheej lub koob npe los ntawm txoj kev siv zog kom yus tseem ceeb dua lwm tus. Txog thaum kawg, thaum pom tias yus ua tsis tau raws li lub siab ntshaw, peb yooj yim suav tias yus yog tus neeg poob qes thiab tsis tseem ceeb. Tiamsis, tej ntawd puas yog yam muaj nqis tiag uas Vajtswv tau muab tso rau hauv peb txhua tus?

Hnub no, yog hnub 15/10/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jill Dube dhau ntawm Zaj kawm KOJ TSEEM CEEB NYOB HAUV VAJTSWV LUB QHOV MUAG.

“Yog li ntawd lub qhovmuag yuav hais rau txhais tes hais tias, “Kuv tsis yuav koj!” los yeej hais tsis tau. Lossis lub taubhau yuav hais rau txhais kotaw hais tias, “Kuv tsis yuav koj!” los yeej hais tsis tau ib yam nkaus.” (1 Kauleethaus 12:21)

Yog li ntawd lub qhovmuag yuav hais rau txhais tes hais tias, “Kuv tsis yuav koj! ” los yeej hais tsis ‘ tau. Lossis lub taubhau yuav hais rau txhais kotaw hais tias, “Kuv tsis yuav koj! ” los yeej hais tsis tau ib yam nkaus “(1 Kauleethaus 12:21)

Thaum nyeem Paulus cov lus no, kuv cia li luag. Kuv yeej tsis tau muaj ib zaug “tsis cheem tsum” kuv txhais tes, tiamsis kuv yuam kom kuv tej tess taw yuav tau “ua haujlwm”! Thaum pom Paulus muab Vaj Ntsujplig tej koob hmoov coj los piv rau tib neeg lub cev, ces kuv lub siab rov qab xav txog tej yam zoo siab yav dhau los. Kuv thiab kuv cov phooj ywg, peb pheej siv tes taug kev nraum tshav puam tsev kawm ntawv… yog ib qhov txujci uas peb twb xyaum ntev los tom tej kev mus! No yog ib qho kuv tau ntsib dhau zoo heev.

Thaum loj hlob, kuv tsis muab tes mus kev lawm. Tiamsis qhov uas muab qhov ncauj los qhib tej khoom, muab kotaw khaws vuam txwv, lossis muab hauv caug tsav tsheb yog yam uas kuv ib txwm ua. Txawm yog txoj kev no tsis yog thaum twg twb zoo, tiamsis nws muaj nqis rau tej lub sijhawm muaj kev phomsij cheem tsum txog! Kuv paub kuv tus kheej yeej tsis txawj tag txhua yam. Kuv yuav tsis siv kuv lub qhov muag los noj ncuav lossis muab lub mloog pob ntsej los ntsaws rau ntawm txiv ntswg. Thiab muaj ntau zaug kuv thiaj nug tias kuv lub plab puas yuav xav rau kuv lub hlwb, thiab kuv yeej paub tseeb hais tias yeej yuam tsis tau kuv lub plab ua lub hlwb txoj haujlwm.

Kuv tsis tau xav tias txhais tes yuav ua txhais taw haujlwm, lossis lub hauvcaug yuav ua tus tsav tsheb. Kuv kuj tsis tau muab lub qhov muag los piv nrog lub qhov ncauj thiab siv zog muab tej ntawd hloov. Nyuaj heev txog qhov uas yuav pauv li ntawd. Sim xav saib yog muaj ib hnub twg lub qhov ncauj tsis kam zom thiab tsis kam nqos vim nws khib lub qhov muag, thiab hais tias nws nkees heev rau txoj kev noj tej zaub mov lawm, thaum no nws tsuas xav saib ib puas tsav yam ib ncig xwb? Yeej ua tsis tau li, puas yog? Peb paub tias lub qhov ncauj nws tsis yog ua kom muaj nqis rau nws; tiamsis nws ua haujlwm rau tag nrho lub cev.

Vajtswv tsim peb lub cev los zoo li ib daim duab ciaj sia rau txoj kev sib txuas ua ke nyob hauv Pawg Ntseeg: txhua feem yeej cheem tsum. Thaum muaj ib feem mob lawm, tag nrho lub cev puav leej yuav txais tau thiab koom tes rau txoj kev kom tau kho zoo. Thiab thaum muaj ib feem loj hlob tag nrho txhua feem yuav puav leej zoo siab. (I Kauleethaus 12:25,26).

Kuv tsis paub txog qhov no thaum pib. Kuv raug daig rau hauv txoj kev dag ntxias, thaum pheej muab tus kheej mus piv rau lwm tus thiab pom tias yuav tau zoo dua lawv. Thaum pom tias yus tsis muaj dab tsi yuav tseem ceeb lawm, kuv pib nkaum. Thaum Vajtswv pub rau ib tug neeg twg muaj ib txoj koob hmoov tiam qhua, tiamsis lawv ho tso tseg mus caum lwm txoj koob hmoov ua tus tswj, ces leej twg yuav qhib qhov rooj txais tos qhua, tu thiab txhawb lawv? Thaum muaj ib feem twg ntawm lub cev tsis kam lees ua nws qhov haujlwm, ces tag nrho lub cev yuav tau ris tej yam tsis zoo.

Nyob hauv phau ntawd “Yexus Khetos Pawg Ntseeg” tus sau Watchman Nee txhais tias txhua tus nyob hauv Yexus Khetos lub cev ib leeg puav leej muaj ib teg haujlwm tseem ceeb tau Vajtswv muab cob rau lawv: “Txawm yog qhov haujlwm ntawd yuav me luaj twg los, yeej tsis muaj ib yam dabtsi yuav hloov tau. Txawm yog feem ua haujlwm loj hauv lub cev los kuj hloov tsis tau rau feem ua haujlwm me, yeej tsis muaj leej twg yuav hloov tau lwm tus. Koj yeej hloov tsis tau kuv chaw, kuj ib yam li kuv kuj hloov tsis tau koj chaw. Yog li thaum peb txhua tus nyias paub nyias qhov haujlwm no peb yuav zoo siab heev!”

Vajtswv pub rau peb txhua txoj koob hmoov thiab lub peev xwm nyob rau hauv Yexus Khetos lub cev, qhov chaw ntawd nws yeej zoo txaus tsis yog sib txeeb. Qhov ntawd puas yog yam ua rau “peb sawv daws zoo siab”? Cia siab tias peb yuav ntseeg siab rau Vajtswv thiab lees yus lub nra nyob hauv Yexus Khetos lub cev, zoo li Vajtswv txojlus tau hais: “Peb yog Yexus Khetos lub cev”! Txhob muaj ib zaum twg hnov qab qhov tseeb no. Qhov tseem ceeb tsis yog tias peb yog leej twg, tiamsis peb yog leej twg li tug. Txawm peb tsis muaj zog los nco ntsoov tias peb yog Yexus Khetos tus muaj hwjchim loj kawg nkaus li.

Thov caw nrog kuv peb thov Vajtswv ua ke:
Tus Tswv, thov Vajtswv pab kom kuv paub tias kuv muaj nqis ntawm Koj, thiab kuv muaj ib qhov chaw tseem ceeb nyob hauv koj lub cev. Kom dhau ntawd, kuv paub ua lub neej koom ua ib lub siab thiab ib leeg pab ib leeg, ib leeg kho zoo ib leeg. Thov Vajtswv pab kom kuv muaj kev nkag siab txog kuv tus kheej lub meej mom, kom kuv ua lub neej ua dej num rau hauv Pawg Ntseeg kom yim ua tau zoo. Kuv thov hauv Tswv Yexus Khetos lub npe. Amees.

Cov kwv tij txhua tus, thaum peb paub peb yog Yexus Khetos tug lawm, peb yuav nrhiav tau yam muaj nqis nyob hauv Vajtswv lub homphiaj. Tsis yog koob npe ntawm tus kheej, tiamsis yog txoj kev sib raug zoo ua ke ntawm peb thiab Vajtswv thiaj yog yam muaj nqis ntawm peb. Thaum paub tias peb yog ib feem nyob hauv Yexus Khetos lub cev, peb muaj cuab kav ua lub neej nrog txoj kev ntseeg thiab kev kaj siab thiab paub tias peb muaj ib qhov chaw uas hloov tsis tau hauv Vajtswv lub homphiaj.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw: [email protected]. Tswv Yexus hlub koj. Thiab peb xav kom txuas tau nrog koj.