Geh tŭ lơi he pơn drơm să tờm băl mờ ala cau ndai gớs chài rgơi, mờ sền là să tòm he là gơ plơ̆ gơ pừ? Bol he sùm sơ noach jòi dồ tiah mờ bơta gớs kwơ să tòm he bơh bơta pơn đơl lơh he in geh gơ klŏ rlau mờ cau ndai. Tian gớs tŭ hè ò dòp rò bè bơta kơp koñ, bol he sền ís là ờ sơp hala ò gớs kwơ. Mơ ya, gen hơ̆ ngăn là bơta gớs kwơ mờ Yàng neh lời tòm kòp nă bol he sơl?

Ngai do, ngai 15/10/2024, Bơta Hòi Dan Kòp Ngai dan jà ồng mò oh mi bơtê bal Jơnau Yàng dê kơnòm dê bơta dong kòl Jill Dube bơh tơnggume BOL HE KWƠ MÀNG TÒM MĂT YÀNG.

“Mat ò rgơi đơs mơ tê lah: “Añ ò càng mê;” hala bồ ò rgơi đơs mơ jơng lah: “Añ ò càng bol mê.” (‭‭I Kôrintô‬ ‭12‬:‭21)

Tŭ đọk jơnau ồng Pol dê, añ neh ño, añ ò tŭ lơi đớs “ ò càng” mờ tê he dê, mờ ya añ neh bơ klơn gơ păl “ cơn đoà”! Tŭ sền pol pơn drơm bơta nđàc đah hwềng mờ ala pơ nah tòm să jăn bol he, bơta kơlôi sơ nơng añ dê cèng añ tús mơ mờ ala broă chò hòp neh geh lòt găn. Añ mờ ala cau bơyô mờng òs cơn đoà tòm gùng bơ đap ò dŭ họk…mờ tê, là bơta bol hi neh sùm lơh dê gùng dà hi lòt găn kung bè tòm tiah siêu thị. Ngăn là dồ bơta lòt găn chò hòp.

Ngăn, là tŭ neh dờng, añ ò “ cơn đòa” mờ tê tai. Mơ ya, pờ phăn mờ sề, dồñ chô sét mờ jơng, hala máy rơdeh mờ kơl tăng kùng ò di là broă ngài tai mờ añ. Bulah bơta hơ̆ ò di tŭ lơi kung jat bè he koñ, mờ ya bơta hơ̆ gớs kwơ tòm tŭ he tìp broă ni sơ na gơn tơng tús. Añ git nền bơta chài añ tús tềng lơi. Añ rơp ò ngui măt nàng să ƀañ hala ơn phăn iat tòm muh. Mờ geh tŭ dơ̆ neh lùp ís là bròc chài kơlôi tòm gơl dê bồ tơng ngoh he sơl ò, añ git nền ò chài bơ klơn bròc lơh broă mờ ƀồ tơng ngoh chài lơh.

Añ ò hềt tŭ lơi kơlôi ƀlàng tê rơp tòm gơl jơng, hala ƀồ gơl tăng nàng máy rơ deh. Añ ò tŭ lơi pơn drơm măt mờ bơr mờ pơn đơl tòm gơl bol gơ. Gen ngăn là kal ke tŭ kơ lôi tús bơta hơ̆. Kơ lôi tús dồ ngai, bơr ò bai rơ ging, tơ mut phăn sa bơh gơ boàn mơ măt, mờ đớs lah añ neh bol mờ broă sa lép phăn sa , mờ tŭ do gơ mìng koñ sền dê ala phăn gut dăr? Gen ngăn là ò chài bè hơ̆? Bol he git lah bơr ò gớs go bơh bơta kwơ màng ís gơ dê, gơ gớs go là duh broă jơh să jăn in.

Yàng Tòm Trồ neh crơng gớs rùp să bol he bè là dồ nơm rùp niam hàng bơh bơta tòm klac tòm Hìu Jum Goh: nàng ò gơs bơta cah is tòm să jan; pơrlơ̆ wơl, ală pơnah pal kơlôi rcang bal mơ gơp.Behơ̆, dilah dô pơnah lơi kong jê sồt, gen jơh ală pơnah ndai kong jê sồt bal mơ gơ, hala dilah dô pơnah lơi geh jòng ro, gen jơh ală pơnah ndai kung hòn chò bal mơ gơ.”(I Kôrintô‬ ‭12‬:‭ 25,26)

Bơh tŭ sơn rờp añ ò đăl git bơta do. Añ neh gơ kòl tòm bơta pơr lồm, kòp tŭ pòn drờm să tòm he mờ cau ndai mờ sền gŏ he păl gơ klŏ rlau cau ndai. Tŭ sền gŏ bơta gớs kwơ he dê ò kwơ màmg, añ neh rơ kồn să he rlau mờ tòm pà băl cau in. Tŭ Yàng Tòm Trồ pà ai dô nă cau in bơta nđàc wă rọ cau nach. Mờ ya bol khai ò bài mờ ting jat bơta nđàc cau lăm, gen cau là cau pờ mpồng wă rọ cau nach crih, sền gar mờ bơt bơtào bol khai? Tŭ dồ pơnah ò pài lơh bơta gơs kwơ he dê, gen jơh să jăn ròp dòp cồng nha ò niam.

Tòm sră “Hìu Jum Goh Bơtau Krist”, cau cih sră Watchman Nee neh đớs kòp pơnah tòm să jăn Bơtau Krist gớs dồ bơta kwơ mang ís geh Yàng Tòm Trồ jào broă: “ Bulah là broă dêt rhền, ò rgơi tòm gơl.” Bulah broă dờng nhất tòm să jăn kung ò rgơi tòm gớs broă dêt rhền nhất, ò gớs cau lơi rgơi tòm gơl cau ndai. Bol he ò rgơi tòm gơl añ, kung bè añ ò rgơi tòm gơl bol he. Ngăn, kòp nă bol he kung đăl git bơta do, gen bol he rơp sơn đoh bơh bơta chò hòp.

Yàng Tòm Trồ ai jơh tơl nă bol he ala bơta nđàc mờ chài rgơi ís tòm să jăn Kơnràñ, tềng hơ mìng gớs bơta lơh wil tơh ờ di lah tòm pìt băl. Hơ ngăn là broă nàng “ chò hờp băl” sơl? Kơp koñ bol he git gơn kơ nờm Yàng mờ dòp rò kòp broă bol he tòm să jăn Bơtau Krist, bè Jơnau Yàng neh tơng kah: “ Oh mi là să jăn Bơtau Krist”! Bañ tŭ lơi hŭi jơnau song do. Kwơ màng ò di lah bol he là cau, mờ ya hơ̆ là bol he gơ rê mờ cau lơi. Bulah bol he lơ bơn hala ò sơp, gen sùm kah lah bol he gơ rê băl mờ Bơtau Dờng Màng mờ niam lơ hơn nhất.

Dan jà bol he dô nùs bal tòm bơta hòi dan:
Khoai Yàng koñ gơboh, dăn Kơnràñ dong kòl kòn git đăl bơta gớs kwơ kòn geh dê đap Kơnràñ, mờ kòn at dồ bơta kwơ màng tòm să jan Kơnràñ dê. Gen bơ tềng hơ̆, kòn git kís dồ bă băl mờ dong kòl băl, pơn dòm băl mờ sơm bời băl. Dăn Yàng pà ai kòn in bơta git wa jrô dơp bơta gơ noăr broă he dê, nàng kòn kís dồ rài kís duh broă bơh bơta wil tơl lin rlau tòm Hìu Jum. Kòn hòi dăn tòm sơn đăn Yàng Je-su Krist, A-men.

Ơ ồng mọ, oh mi koñ gơboh, tŭ đăl git Bơtau mờ he gơ rê băl, bol he rơp jòi bàn bơta kwơ màng tòm broă dờng màng Yàng Tòm Trồ dê. Ò di là broă gớs gŏ hala kís niam sa jăn, ngăn là che rbŏ bol he mờ Kơnràñ là bơta cèng tús bơta kwơ màng bol he dê, Tŭ git he là dò pơnah tòm să jăn Bơtau Krist dê, bol he rơp kís bơh bơta dòn mờ bơta ring lơngai, git lah bol he gớs kwơ màng mờ ờ rgơi tòm gơl tòm broă Kơnràñ dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.