Peb tab tom ua neej nyob rau hauv lub ntiajteb uas kev kuv ntxhov thiab kev faib cais tshwm sim muaj nyob rau txhua hnub. Tsis hais tej kev sib cav me me mus txog tej kev sib tawm tsam loj hauv txhua lub tebchaws, thaum pom li no ua rau kev koom siab cuag li yog yam uas nyob deb deb nrhiav tsis pom. Yog li puas muaj ib txojkev twg los pab kom txuas txhua tus rov los koom siab ua ke, zoo li tus TSwv twb niaj hnub nqua hu peb?

Hnub no, yog hnub 17/10/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Carolyn Fraiser dhau ntawm Zaj kawm QHOV MUAJ NQIS NTAWM KEV KOOM SIAB.

“Qhov uas Vajtswv haiv neeg los nyob ua ke li tej kwv tij yog ib qhov uas zoo thiab ua rau lawv muaj kev zoo siab heev!” (Ntawv Nkauj 133:1)

Thaum wb txiav txim siab ua txoj haujlwm tu tej menyuam ntsuag– yog saib xyuas lawv ib ntus mus txog thaum lawv nrhiav tau ib tsev neeg tshiab – wb lub tsev cia li dhau los ua ib qhov chaw ntxhov nyho. Txhua hnub puav leej muaj ib qho teeb meem tshiab tshwm tuaj, los ntawm tej teeb meem me me – xws li sib txeeb tej nyuag khoom ua si, txeeb tsheb caij, lossis ib leeg yuam ib leeg ua tej ntaub ntawv kawm. Ntawm no tseem tsis tau hais txog tej kev sib ceg vim tej zaub mov noj!

Muaj tej hnub kuv xav muab tso pov tseg thiab qw nrov nrov tias: “Nej tsum tsis txhob sib ceg lawm puas tau?” kuv nco kuv tau ua li no ob peb zaug. Tseeb tiag, txawm yog ntau xyoo lawm los, kuv yeej tseem qw nrov nrov txhua zaug uas tseg sijhawm ntau los nyeem xov xov xwm saib fuab cua ntau. Tej lub sijhawm ntawd, kev kaj siab nyob hauv kuv cuag li ploj mus lawm.

Peb tab tom ua lub neej nyob rau hauv txoj kev coj noj coj ua sib faib ua pab ua pawg. Sib faib vim tsis koom neeg, tsis koom meej mom, tsis muaj nyiaj ntau thiab kev tswjhwm faib cais lub tebchaws ua ntau pab – “Peb” thiab “lawv” peb yooj yim txuas ua ke nrog cov neeg koom kev ntshaw li peb lossis koom kev ntseeg, tiamsis peb ho zam, ntau zaug tseem tsis koom cov neeg uas tsis muaj kev xav li peb. thaum kawg kev koom ua ib lub siab dhau los ua ib yam nyob deb. Txhua tus nyias yeej ruaj siab tias nyias tus kheej txoj kev thiaj yog.

Nyob rau hauv lub ntiajteb saib taus tus kheej lub tswv yim, txoj kev koom ua ib lub siab tsis yog tus phiaj uas peb yuav mus kom txog. Ntau zaug, nyob rau hauv cov ntseeg Vajtswv los, kev sib faib hauv tej Pawg Ntseeg kuj txawv tsis deb lub ntiajteb.

Tiamsis Tswv Yexus xav kom Nws Pawg Ntseeg nthuav tawm txoj kev txawv. Vajtswv xav kom peb ua lub neej koom ua ib lub siab. Tswv Yexus twb thov Vajtswv rau qhov no nyob hauv Yauhas 17:20-21: “Tsis yog kuv thov koj pab cov neeg no xwb, tiamsis kuv thov koj pab cov neeg uas hnov tej lus uas lawv qhia thiab los ntseeg kuv kom lawv koom ib lub siab. Txiv, thov cia lawv nyob hauv wb, ib yam li koj nyob hauv kuv thiab kuv nyob hauv koj; thov koj pab kom lawv ua tau ib lub siab, ntiajteb thiaj paub hais tias koj txib kuv los.”

Tswv Yexus qhia paub tias txoj kev koom ua ib lub siab nws tsim muaj lub zog loj heev.
Vajntxwv Daviv nthuav tawm rau peb pom txog lub zog loj koom ua ib lub siab nyob hauv Ntawv Nkauj 133:1. Yawg sau: “Qhov uas Vajtswv haiv neeg los nyob ua ke li tej kwv tij yog ib qhov uas zoo thiab ua rau lawv muaj kev zoo siab heev!”

“Zoo ib yam li cov roj muaj nqis uas muab hliv rau saum Aloos taubhau ntws los rau ntawm nws cov hwjtxwv thiab ntws mus rau ntawm nws lub ntsej tsho. Zoo ib yam li tej lwg saum Roob Helemoos uas nrog los rau saum tej ncov roob ntawm lub nroog Xi-oos. Qhov ntawd yog qhov chaw uas tus Tswv tau coglus foom koob hmoov pub kom muaj txojsia ntev dhawv tsis txawj kawg (nqe 2-3)

Nyob hauv Vajluskub Qub cov pov thawj hlob siv roj coj los hliv rau cov neeg uas tau Vajtswv hu los ua txoj haujlwm dawbhuv. Txawm yog lub cim qhia paub tias Vajtswv tshwm ntsej muag, tau koob hmoov thiab tau Vajtswv hloov dua tshiab nyob hauv lawv lub neej los. hla mus rau Vajluskub Tshiab, cov roj ntawd yeej tseem muaj lub ntsiab dawbhuv li ntawd, ua piv txwv txog Vaj Ntsujplig thiab Nws lub hwjchim tshwm nyob rau hauv txhua tus ntseeg lub neej.

Kev koom ua ib lub siab qhib ib lub qhov rooj rau txoj koob hmoov thiab Vajtswv cov roj ntws los puv npo rau peb txhua tus ntsujplig. Ntawm no yog yam uas Vajtswv npaj rau Vajtswv txhua Pawg Ntseeg. Thaum peb ua neej nyob hauv txoj kev koom ib lub siab, peb yuav nthuav tawm Tswv Yexus tus duab – thiab dhau ntawd rub tau coob tug los cuag Tswv Yexus. Leej twg nrhiav Nws yuav nrhiav tau kev kaj siab, kev hlub thiab kev zoo siab ib txhis.

Peb twb siv tag nrho peb lub siab, thaum yog ib leej niam leej txiv puag, qhia rau tej menyuam txoj kev ua lub neej koom siab ua ke. Nyob rau tej lub sijhawm ntawd, thaum muaj kev sib cav dhau lawm, tej menyuam lawv yuav khiav mus nraum zoov ua si, puv npo tej suab luag thiab zoo siab! Tej lub sijhawm zoo li ntawd, kuv sawv ntawm qhov rai, saib tej menyuam dhia ua si. Kuv luag ntxhi thiab zoo siab kawg.
Peb muaj txoj kev zoo siab thiab kaj siab ntawd txhua hnub, thaum siv zog ua lub neej kom sib haum xeeb nrog tej kwv tij koom ua ib lub siab hauv ib tug Vajtswv. Zoo kawg nkaus thaum peb nyob sib haum xeeb ua ke.

Thov caw nrog kuv peb thov Vajtswv ua ke:
Peb ua Vajtswv tsaug vim Vajtswv txoj kev hlub loj thiab koom siab ua ke uas Vajtswv tseg rau peb. nyob rau hauv lub ntiajteb puv npo kev sib faib thiab sib tawm tsam, thov Vajtswv pub kom kuv muaj kev txawj ntse thiab muaj lub zog tiv dhau tej kev sib txawv, thiab nrhiav tau txoj kev koom siab ua ke nyob hauv Nws. Thov Vajtswv ua tus coj kev ywg roj rau kuv, kom Vajtswv txoj koob hmoov thiab kev tshwm ntsej muag nws phwj yaws txhua qhov uas peb txhais ko taw tsuj txog. Kuv thov hauv Tswv Yexus Khetos lub npe. Amees.

Cov kwv tij txhua tus thaum peb ntsib tej kev tsis sib haum, cia siab tias peb yuav ua taus siab ntev thiab thooj yim tsim kom muaj txoj kev nyob sib haum xeeb, sib hlub. Cia siab tias peb yuav ua neej nyob hauv txoj kev hlub thiab sib haum xeeb, nthuav tawm Yexus Khetos tus duab nyob rau hauv peb txhua tes haujlwm thiab peb lo lus hais. Koom siab ua ke tsim kom muaj txoj kev koom siab ua ke, kom Vaj Ntsujplig lub hwjchim yuav phwj yaws hauv peb txhua tus lub neej. Thaum ntawd tej neeg ib ncig yuav paub tias peb yog Vajtswv cov menyuam thiab qhuas Vajtswv lub npe.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.