Tŭ do bol he kis tom dô lơgar tiah mơ bơta cah is mơ tơm sò tŭ lơi kung gơlik gơs tom rài kis kờp ngai. Bơh di ală bơta tơm pơndang dềt rhên tom hiu nhă tus ală bơta ò gơròm bơdih bon lơgar, bơta gơtơmsor băl hala bơta dô bă băl gơlơh bè sơlo ngai sơlo ngai ngan. Gơs gùng lơi nang lòt gan ală dơrñăng cah is hơ̆ mơ joi ban bơta dô bă băl ngan, kung bè Yàng òs sùm hòi jà bol he?

Ngai do, ngai 17/10/2024, Bơta Hòi Dan Kờp Ngai dan jà jơh ală cau ơm iat kơlôi sơnơng Jơnau Yàng kơnom di bơta dong kơl Carolyn Fraiser bơh tơnggume BƠTA KWƠ MÀNG BƠTA DÔ BĂ BĂL DÊ.

“Ne, tom tŭ oh mơ mi ơm gơtomsòr băl, la niăm lơngai ò git nđò!” (Đơs Crih 133:1)

Tom tŭ bol he lơh nên lơh broă lơh sền gar dong kơl cau kơnom-rong siam ìng jơl tus di tŭ ală oh joi geh dô nơm hiu nhă-hiu ơm òs ring-lơngai bol he dê mhar gơlik gơs dô tiah tơmlơh hô-hơng. Kờp ngai lơi kung gơs dô bơta tơm lơh pa, sền wơl jơh ală bơta gơlơh bè dềt rhên-kung bè tơm-pìt ală pèt rùp nang rgơi tơrjik wơl, tơm-pìt rơndeh coh, hala kư bơtuh bal mơ gơp nang lơh bơta bơtê tom hiu. Mơ hơ̆ ò hềt đơs tus ală bơta tơm pơndang gợjing ồs mìng bơh broă sa ñô!

Gơs ală ngai, añ ming koñ săng jơh ală bơta mơ driau lah: Ală kòn rgơi pơdơh wơl bơta tom pơndang hala ò?” Añ kah gơs tŭ añ kung neh lơh behơ̆. Mơ, ngan behơ̆, tơnơ̆ mơ oă sơnăm, añ kư koñ driau dơng kờp tŭ ơn oă ir tŭ jơ sền mạng xã hôị hala sền ală bơta geh tơnggit. Tơm ală tŭ hơ̆, bơta lơngap-lơngai tom añ gơlơh roh jơh jat kờp bơta geh tơnggit.

Bol he gam kis tom dô rnoàs bing bơta cah is. Lang bòl, sơban, bơta lơh sa mơ broă dà lơgar òs tơm cah dunnia gơlik gơs bar gah pha is- “bol he” mơ”bol khai”. Bol he buôn soh gơtom klac mơ ală cau gơs bơta kơlôi băl hala bơta dòn, mơ ya du-pleh, gơs tŭ săng loi ală cau ò bal dô bơta kơlôi sơnơng. Lồi dut, bơta dô bă băl gơlik gơs ngai ngan-kờp nă cau lơi kung prap kơ̆ bơta kơlôi is he dê la di pal.

Tom dô dunnia jòng ro bơta kwơ mang să tom, dô bă băl ò di la tơnggu tus mơ bol he òs wèt tus. Mơ di mpôl cau dòn, bơta cah is digùl ală Hiu Jum Goh kung ò pha is mơ dunnia dô ềt lơi.

Mơ ya Yàng Jesu kơp koñ Hiụ Jum Goh Kơnràñ dê rang tơlik bơta pha is dơng rlau. Kơnràñ koñ bol he kis tom bơta dô bă băl. Kơnràñ neh hòi dan bơta do in tom Jang 17:20-21: “Hơ̆ ò di mìng bơh bol khai mơ añ hòi dan lơm ò, mơ ya kung bơh ală cau rơp kơnòm dê jơnau bol khai mơ dòn añ sơl, nang jơh ală bol khai in gơs dô bă bal.” Yang Jesu git lah bơta dô bă băl rơp gơlik gơs bơta pran dơng.

Bơtau Davit neh rang tơlik bol he in sên gọ̆ bơta pran tơm bơta dô bă băl tom Đơs Crih 133:1. Ông cih: “Ne, tom tŭ oh mơ mi ơm gơtomsòr băl, la niăm lơngai ò git nđò!” Oh mi kơno behơ̆, hon-chò sơl? Mơ ya Davit òơm dơh wơl ting hơ̆. Ông kung pơnyơu bơta dô bă băl kung bè “mơñà kwơ mang”.

“Hơ̆ ò gơkrơi bè mơñà kas mang tuh hơđăng bồ, gơhòr mù di sơnò tềp, hơ̆ la sơnọ̀ tềp Arôn dê, gơhòr tus di ngko ao khai dê. Mơ tai, ò gơkrơi be dà tŭ bơh mơnơm Hemôn, mù hơđăng ală mơnơm Siôn dê! Ting hơ̆ Yàng Jêhôwa neh ai lơngai-lơngò.” (seng 2-3)

Tơm Rai Bơta Ho Bal Yau, ală cau gơnoar lam bồ ơn phăn duh khoai ngui dà mơñà nang bong mơñà cau geh hôi sac tom gơnoăr broă sang goh. Mơ ya là sơnio bơh di bơta gơs măt, lơngai mơ bơta sang goh Yàng Tom Trồ dê hơđăng rai kis bol khai dê. Tus dê Rai Bơta Ho Bal Pa, mơñà găm gơs gơtha đah hwêng, sơnio bơh Yàng Hwềng Goh mơ bơta gơs mat bêng gơnap gơnoăr Kơnràñ dê tòm rai kis kờp nă cau don.
Bơta dồ bă băl pờ mpông ai lơngai mơ bọ̆ng mơñà Yàng Tơm Trồ dê gơhor tus, bîng di hơđăng hwềng nùs kơp nă bol he. Do la bơta mơ Yang neh ơn lai ai Hiu Jum Goh Kơnràñ. Tơm tŭ bol he kis tòm bơta dô bă băl, bol he pơnđang sol rùp Yang Jesu dê mơ bơh hơ̆ rơp lơh cau ndai in lòt tus rềp hơ Kơnràñ. Ală cau lơi joi ban Kơnràñ gen rơp sên gọ̆ bơta lơngap-lơngai, bơta kơñ gơboh, mơ bơta chò-hop ngăn.

Bol he neh ơn jơh nùs tôr he dê, tom gơnoăr broă là me bèp rong-siam, nang bơto tơngkah ală oh kon kis koñ gơboh bal mơ gơp. Mơ tờm ală tŭ kal-kê joi geh, tơm tŭ ală bơta tơm pơndang băl neh gơpơdơh wơl, ală kòn lik lòt đah bơdìh wĭng kơnnhơl bêng bơta chò hop. Tơm ală tŭ behơ̆, añ òs ntào di gah mpông, ơm momọ̆ sền ală kòn bơnôr kơnhơl. Mơ añ ñọ̆, nùs bêng bơta cho-hòp.

Bol he kung rgơi lòt găn, git lam bơta chò-hop mơ bơta ring-lơngai hơ̆ kờp ngai, tŭ pơnđơl pran kis gơtomsor bal mơ ală oh mi cau don tom bơta dô bă băl mơ Yàng Tơm Trồ. Niam rlau jơh tom tŭ oh mi kis gơròm băl.

Dan jà bol he dô nùs bal tòm bơta hòi dan:
Khoai Yàng, bol kòn ưnngai Kơnràñ tai bơh bơta koñ gơboh dơng ơnàng mơ bơta dô bă băl mơ Kơnràñ neh ai kòn in. Tom dô lơgar bîng bơta cah is mơ sò dră, dan Kơnràñ ai kòn in bơta jak chai mơ pràn kơldang nang sơrlèt rlau jơh ală bơta pha is, mơ joi gŏ bơta dô bă băl tom Kơnràñ. Dan Yàng kư̆ pơnjat tề lăm mơ bong mơña kòn in, nang bơta lơngai mơ bơta gơs mat sùm Kơnrañ dê tuh lam bă tiah mơ bol kòn jă-jơng tus (cơnđoà tus). Kòn jơh nùs hòi dan tom sơnđan Yàng Jesu Krist, A-men.

Ơ jơh ală ông mò, oh mi koñ gơboh, tom tŭ ntào di đap ală bơta ò gơròm bal mơ ò wă wơng băl, kờp koñ lah bol he prap gar nùs kong ơt mơ ơt-ơ̆l băl nang bơ̆t bơtao kơtùng bơta ring-lơngai, koñ gơboh. Kơp koñ lah bol he sùm kis tom bơta koñ gơboh mơ gơtomsor, nang pơnđang sol rùp Bơtau Krist tom ală broă lơh mơ jơnau đơs he dê. Dô nùs bal tĕ pơnđơl pràn bơt bơtao bơta dô bă băl, nang gơnap-gơnoar Yàng Hwềng sùm hor lik bơh rài kis kờp nă bol he dê. Tom tŭ hơ̆, jơh ală cau gùt dar rơp git lah bol he la kòn sau Yàng dê, mơ jong ro sơnđăn Kơnràñ.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.