Ntau zaug peb pheej txais txoj koob hmoov uas Vajtswv pub rau peb xwb, tiamsis peb hnov qab faib tej koob hmoov ntawd mus pub rau lwm tus. Peb qi muag ua tug tsis paub qhov tseeb tias, ib ncig ntawm peb muaj ntau tus ntsujplig tab tom nrhiav kev hlub thiab kev cawm dim. Vajtswv nqua hu peb kom dhau los ua cov cev lus coj Vajtswv txoj kev hlub thiab kev cia siab mus pub rau txhua tus.

Hnub no, yog hnub 18/10/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Cassey Nathan dhau ntawm Zaj kawm COJ TXHUA TUS LOS CUAG VAJTSWV.

“Yog li ntawd nej cia li tawm mus qhia txhua haivneeg hauv qab ntuj no, kom lawv los ua kuv cov thwjtim: Nej yuav tsum tuav Vaj Leej Txiv, Vaj Leej Tub thiab Vaj Ntsujplig tus Dawbhuv lub npe, muab lawv ua kevcai raus dej.” (Mathais 28:19)

Ua ntej yuav rov qab mus saum ntuj, Tswv Yexus tau samhwm tej lus no tseg rau peb:
“Yog li ntawd nej cia li tawm mus qhia txhua haivneeg hauv qab ntuj no, kom lawv los ua kuv cov thwjtim: Nej yuav tsum tuav Vaj Leej Txiv, Vaj Leej Tub thiab Vaj Ntsujplig tus Dawbhuv lub npe, muab lawv ua kevcai raus dej.” (Mathais 28:19)

Mloog cuag li yooj yim, tiamsis tes haujlwm cob qhia thwj tim ho muaj ntau feem nyuaj. Ib qho tseem ceeb tshaj plaws yog tso yus tus kheej thiab tawm hauv qhov chaw tso siab uas peb ib txwm nyob mus. Ib yam li Paulus tau sau: “Yog li ntawd, kuv twb nrog Yexus Khetos tuag saum tus ntoo khaublig lawm, txojsia uas nimno kuv muaj tsis yog kuv txoj , tiamsis yog Yexus Khetos txoj. Qhov uas nimno kuv muaj txojsia nyob twb yog vim kuv ntseeg Vajtswv tus Thb, tus uas hlub kuv thiab muab nws txojsia los txhiv kuv.” (Kalatias 2:20)

Muaj ib hmo xya ntawd, wb ob niam txiv txiav txim siab ua txoj haujlwm cob neeg ua thwjtim. Wb twb tsis npaj homphiaj, tsuas paub tias yuav tau mus rau ntawm tej chaw muaj neeg coob coob. Koj puas paub tias wb mus qhov twg? Yog, wb mus rau hauv ib lub tsev muag khoom loj loj! Yog thaj chaw tib neeg coob coob, wb lub qhov muag cia li nres rau ntawm ib tug menyuam txhais, nws zaum ib leeg ntawm qhov rooj nkag rau hauv, cuag li tab tom tos ib yam dabtsi twg.

“Koj puas nyiam hu nkauj?” Kuv tus txiv nug. Kuv xav tias: tus dabtsi, cuag li nws yuam kev lawm! Tiamsis kuv rov qab nco txog qhov uas vim li cas wb ho muaj ntsej muag nyob ntawd, thiab kuv tig rov qab los pab kuv tus txiv.

“Nyiam” – nws teb luag ntxhi. Xav tsis thoob, ntawm no yog lub sijhawm rau wb pib sib tham, thiab kuv thiaj qhia rau tus ntxhais ntawd paub txog kuv txoj kev ntshaw nkauj. Wb maj nroos nrhiav tau txoj kev sib txuas ua ke. Thaum kawg, tus ntxhais hais tias: “Zoo heev thaum uas neb nrog kuv nyob ua ke zoo li no!”
“Vim li cas koj ho xav li ntawd?” Kuv nug.

“Kuv tus hluas nraug chim rau kuv thiab tso kuv pov tseg rau ntawm no.”

Peb sib tham ntxiv thiab paub tias nws nyuam qhuav txav chaw tuaj rau ntawm lub nroog no, ua haujlwm rau hauv tshav dav hlau tiamsis yeej tsis swm tej chaw ib ncig. Kuv pib qhia rau nws paub txog Yexus Khetos txoj kev hlub- qhia rau nws paub tias Vajtswv muaj homphiaj zoo kawg nkaus tseg rau nws lub neej thiab Vajtswv xav kom nws tau nrog Vajtswv nyob ua ke hauv lub neej ib txhis. Tiamsis lo lus nug txuas ntxiv ua rau kuv xav tsis thoob thiab kub siab lug: “Kuv yuav ua li cas kuv thiaj txais tau kev cawmdim?”

No yog yam uas kuv ib txwm ntshaw thiab tamsim ntawd kuv pib qhia hmoo zoo rau Nws. Kuv nthuav tawm txoj kev zoo nyob hauv Vajluskub, yog tias koj ntseeg hauv siab thiab lees yuav Tswv Yexus ua tus Tswv, thiab ntseeg tias Vajtswv twb tsa Nws sawv hauv qhov tuag rov qab los koj yuav dim (Loos 10:9)
Nws tau tsa suab thov Vajtswv thiab txais txoj kev cawm dim tsis ua xyem xyav thaum muaj tib neeg coob coob nyob hauv chaw muag khoom. Thiab lub sijhawm ntawd, nws lub neej tau hloov pauv.

“Thaum no koj rov qab muaj dua ib hnub yug ntxiv!” – kuv hais rau tus ntxhais – “Ntawd yog hnub koj tau yug dua tshiab!” Peb sib qawm zoo siab thiab thaij ib daim duab ua ke khaws cia rau lub sijhawm tseem ceeb no. Los txog rau hnub no, kuv yeej tseem txuas lus ua ke nrog nws zoo li ib tug sib txheeb nyob hauv txoj kev ntseeg.

Vajtswv yeej xav kom txhua tus uas tsis tau ntseeg Vajtswv ntsib tau cov ntseeg uas nthuav tawm Yexus Khetos tus duab tshav thiab coj lawv los cuag Nws. Cov ntseeg ntawd yeej yog koj thiab kuv. Kuv yuav nco ntsoov txog txoj kev txhawb zog uas Vajtswv tseg rau wb hnub ntawd. Ib tug ntsujplig txais tau kev cawmdim nyob hauv Yexus Khetos, thiab cov timtswv saum ntuj ceeb tsheej yuav zoo siab. Ntawd yog ib hnub zoo kawg nkaus!

Koj puas npaj txhij thov Vajtswv pub lub zog rau koj thiab muaj lub siab tawv ua tiav tes haujlwm cob qhia thwjtim uas Vajtswv tseg rau koj? Koj puas npaj txhij tawm hauv koj qhov chaw tso siab mus qhia Yexus Khetos txoj kev hlub rau lub ntiajteb? Tswv Yexus twb cawm koj thiab kuj yog tus uas sawv daws tab tom nrhiav. Cia li sawv thiab dhau los ua qhov pom kev rau qhov tsaus, kom sawv daws yuav ntsia pom Tswv Yexus dhau ntawm koj tej lus tim khawv!

Thov caw nrog kuv peb thov Vajtswv ua ke:
Leej Txiv saum ntuj, kuv tig los rau ntawm koj hauv Tswv Yexus lub npe, thov koj pub lub hwjchim lub siab tawv rau kuv kom kuv kam ua tim khawv qhia txog koj rau hauv lub ntiajteb no. Thov zam txim rau kuv vim muaj ntau zaug kuv tsis kam qhia Txojmoo Zoo rau sawv daws. Ua Vajtswv tsaug vim tej lub sijhawm zoo uas koj muab pub rau kuv qhia txog koj txoj kev hlub thiab kev zoo. Nyob hauv txoj kev ntseeg, kuv tsa suab zoo siab vim hauv koj lub tsev puv npo tej ntsujplig tau txais kev cawmdim! Kuv thov hauv Tswv Yexus Khetos lub npe. Amees.

Cov kwv tij, txhua zaug peb sib ntsib, txhua lo lus sib tham puav leej dhau los ua lub sijhawm zoo rau koj qhia Tswv Yexus txoj kev hlub rau tej neeg ib ncig. Thaum koj muaj siab tawv tawm mus thiab ua tim khawv txog Vajtswv, Vaj Ntsujplig lub hwjchim yuav pab peb hloov pauv lwm tus lub neej. Npaj kom txhij thiab cia Vajtswv coj koj, vim nyob hauv Vajtswv txhais tes, peb txoj kev siv zog tej zaug nws yuav dhau los ua kev hloov pauv loj rau Vajtswv lub tebchaws.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.