Gơs tú bol he kư ơm sum tòm bơta nđac Yàng ai he in, mơ hui tòm pa bơta nđac hớ cau ndai in. Bol he gơlơh be sền ò màng ală hwềng soàn ro ran kơp kờn bơta kơn goboh mơ dong klas ơm gut dăr he. Yàng hòi ja bol he gơlik gơs ală cau kong sồr bơta kờn gơboh mo kơp gơn, cèng bơta nđac Yàng dê tus jơh ală cau.

Ngai do, ngai 18/10/2024, Bơta Hoi Dan Kơp Ngai dăn jạ ală ồng mọ oh mi bơtê băl jơnau Yàng dê kơnòm dê bơta dong kơl mọ Cassey Nathan bơh townggume TỀ LĂM ALĂ CAU TUS MƠ YÀNG.

“Behơ̆, lòt tĕ lơh jơh ală làng bol in gơlik gơs cau bơtê Añ jê, ai sơnđan tĕ Yàng Bèp, Yàng Kòn mơ Yàng Hwềng Goh, lơh ƀaptem bol khai in.” (Mathiơ 28:19)

Lài mơ tu guh rê hơ đăng Trồ, Yàng Jesu lời wơl bol he in gơnoar sổr dơng màng do:
“ Behơ̆, lòt tĕ lơh jơh ală làng bol in gơlik gơs cau bơtê Añ jê, ai sơnđan tĕ Yàng Bèp, Yàng Kòn mơ Yàng Hwềng Goh, lơh ƀaptem bol khai in”. (Mathiơ 28:19-19)

Iat gơlơh be ò kalkle dô êt lơi, mơya gơnoar sôr Yàng dê gơs oă ală pơnah kalkle. Dô bơta màng rlau jơh hớ lah phi să tòm he mơ săng jơh ală bơta ơs mờng he dê mơ lot jat gơnoar sôr Yàng dê. Be ồng Pol cil lah “ Añ neh kong pơng di chi pơng bal mơ Bơtau Krist, bulah behơ̆ añ kis, ò di la añ kis tai, mơya Bơtau Krist kis tòm añ; tŭ do añ gam kis tòm poac să, hơ̆ la añ kis tòm bơta dòn Kòn Yàng Tom Trồ dê, la Bơtau neh kòñ gơboh di añ, mơ neh phi să tòm Kơnràñ bơh añ” (Galati 2:20).

Kơp măng dớ poh, ur clau he lơn nền lơh jat gơnoar sồr cau bơtê. Bol he ò gơs bơta rơn dap lơi, mìng git lah lọt tus tiah gơs oă cau ơm tìng hớ. Oh mi git sơl bol he lọt tiah lơi? Ngan, bol he lọt tus sieu thi dơng! Digul ală cau rgôr rgac, bol he lơh nên dô nă cau ur ruh, mìng dô nă khai gui tìng gah gung lot, gơlơh be jong dô nơm bơta lơi.

“ Ai kờn đơs chờ sơl?” – bau clau an lụp. An kơlôi: Ơ…,gơlơh be ò kơnòm! Mơya an kah wơl nchi bơtai bol he gơs mat tìng do, mơ sơ bach sơbang dong bau clau an ji.

“ Gơs” – khai sơmah sơmài đơs wơl mơ bol he. Krơi is ngan, do lah dô nơm tú lơm pah nàng he tom bơh bơr băl, mơ an neh yăl khai in bơh nus kờn đơs chò an ji. Bol he gơs dô nơm bơta kờn băl gen tàng bol he gơs gơtomklac băl. Lồi dut, khai đơs lah: “ krơi is ngan tú bar nă ur clau tus mơ an be do!”

“ Nchi bơtai oh kơlôi be hớ?” an lụp.

“ Cau clau bơyô kờn gơboh neh sờ êt sờ êl mơ sang oh.”

Bol he kư tom bơh bơr mơ git khai lah dô nă cau pa tus tiah dờng do, lơh broă tom san bay mơya ò git loh ală bơta ơm gut dăr. An sơn tờm yăl khai in bơh bơta kờn gơboh Bơtau Krist dê – Yàng neh rơn dap lài khai in dô nơm tơnggume tơm rài kis, mơ lồi dut Yàng kơp kờn ai ơm mơ Yàng tom jơh rài. Mơya, bơta sèng lụp tơ nớ gơlơh an in krơi is mơ bìng hon chơ:

“ An lơh be lơi nàng geh dong klas?”

Do lah bơta an kơp kờn, mơ an neh yăl Jơnau Niam khai in. An neh ràng tơlik Jơnau song tom Sră Goh, dilah ai dờn tòm nùs mơ yăl tơlik Yàng Jesu lah Bơtau Dong Klas, mơ dờn Yàng Tom Trồ lah Bơtau neh ai Yàng Jêsu kis wơl bơh bơta chơt, gen tàng ai rơp geh dong klas. (Roma 10: 9)

Khai neh sơn tơm hòi dan yăl tơlik bơta dòn mơ dợp geh bơta dong klas, ò gơs kalkle lơi bulah tom taih hớ gơs oă cau rngôr rngac. Mơ bơh tú hớ, rài kis khai geh tơm gơl pa wơl.

“Jơ do, oh rơp geh rlau dô nơm ngai deh!” – An đơs mơ khai – “Hớ là ngai oh geh dêh wơl pa!”. Bol he tòm ut băl dô bah chơ hơp mơ chup dô nơm rụp lơh kissơnre. Tus ngai do, bol he găm tòm bơh bơr sùm, be ală cau bơyô kờn gơboh tòm bơta dòn.

Yàng kơp kờn ală cau ò gơs bơta dòn geh tip ală cau neh dòn Yàng mơ ràng tơlik bơta àng Bơtau Krist dê mơ tề lam bol khai tus mơ Yàng. Ală cau hớ lah să tòm ai kung be să tòm an. An neh kah sùm bơta sôr bơtrut mơ Yàng neh ai bol he in tom ngai hớ. Dô nơm hwêng soàn geh dờn bơta dong klas Bơtau Krist dê, mơ ală Cau Gơn rơh hơđăng LơGar Trồ rơp geh hon chờ, Hớ lah dô ngai kwơ màng!
Oh mi rơp pợ nus nàng hòi dan mơ Yàng, dan Yàng ai he in bơta pran kơdăng mơ nus khin cha nàng lơh wil tơl gơnoar broă Yàng neh jao sơl ơ? Oh mi neh lơh nên sang jơh ală bơta mờng ơs he dê nàng lot yăl bơta kờn gơboh Bơtau Krist dê tus làm plai ù sơl ơ? Yàng Jesu neh dong klas oh mi mơ kung lah Bơtau mơ ală cau kơp kờn joi. Nhă té mơ gơlik gơs bơta àng tom rài klăm jơngo, nàng ală cau ndai rơp bàn Yàng bơh jơnau yăl tơnggit oh mi dê!

Dan jà bol he dô nùs bal tòm bơta hòi dan:
Khoai Yàng Hơ Đăng Trô, nùs kòn dê gơrê mơ Yàng tòm Sơnđan Yang Jesu, dan Yàng ai kòn in gơs gơnap gơnoar mơ nus khin cha nàng lơh chơng Yàng in tòm ù do. Dan toh glai kòn in, ală tú kòn lơn bơn soui, ò khin cha nàng yăl tơlik Jơnau Niam Yàng dê di đap ală cau. Ưn ngai Yàng bơh ală tú lơmpah Yàng neh ai kòn in nàng kon bơtô yăl bơta kờn gơboh mơ bơta niam Yàng dê. Tòm bơta dòn, kòn ai nus hon chò bơh hìu Yàng dê bìng lìu hwêng soàn geh dong klas! Kon jơh nus hoi dan tom sơn đan Yàng Jesu krist, A-men.

Ơ ală ồng mọ oh mi kờn gơboh, kơp tú he tip măt, kơp jơnau tờm bơh bơr sùm gơlik gơs lơmpah nàng he in bơtô yăl bơta kờn gơboh Yàng dê tus di ală cau ơm gut dar he. Tú he khin cha sang jơh ală bơta mơng ơs he dê mơ lơh chơng Yàng in, Gơnap gơnoar Yàng Hwềng Goh rơp tomgơl rài kis cai ndai. Păl lời té nus mơ ai Yang tề lam oh mi, tòm mpang tê Yang dê, ală bơta pran is he bulah dệt mơya Yang neh lơh dờng nàng geh tom gơl ală bơta tom Lơgar Trồ.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.