Niaj hnub nim no tej zaug muaj ntau tus viv ncaus tab tom raug tej ris tej lub nra nyav heev, vim yuav tsum xyaum ua lub neej kom zoo pov khawv li neeg ntiajteb lub siab nyiam. Lub ntiajteb tsim muaj tej txoj cai siab siab rau cov uas ua pojniam, ua ib leej niam, saib xyuas tsev neeg, thiab yuav tsum tuav lub npe yog ib tus pojniam kom zoo tsim txiaj. Tiamsis tsis paub puas muaj zaum twg peb nres tshuaj tej cwjpwm tiag uas Vajtswv xav kom peb muaj nyob rau hauv Vajtswv lub tsev?

Hnub no, yog hnub 20/10/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Ann White dhau ntawm Zaj kawm TUS POJNIAM UAS TSIM TXIAJ.

“Tus pojniam uas tsimtxiaj muaj nqis dua nyiaj thiab kub, tiamsis laj nrhiav tau ib tug pojniam zoo li ntawd.” (Pajlug 31:10)

Ntau xyoo dhau los, kuv coj rawv ib txoj kev xav nws tsis tshua muaj tseeb txog tus cwjpwm ntawm ib tus pojniam uas ntseeg Vajtswv. Thaum tseem me, kuv ntseeg tias ib tug pojniam tsim txiaj nyob hauv Vajtswv lub qhov muag yog ib tug pojniam rau siab ntso npaj rau tej menyuam kom lawv mloog lus thiab tu vaj tse kom huvsi. Tus pojniam ntawd yuav tsum coj tus cwjpwm txo hwjchim, mloog lus, tsis quav ntseg txog yus lub siab nyiam thiab ntshaw dabtsi. Thaum ntawd nyob ntawm kuv, tej cwjpwm no yog tus tshim ntsuas rau txhua tus pojniam uas hwm Vajtswv. Kuv siv zog tsis so ntau xyoo kom dhau los ua ib tug pojniam zoo li no, tiamsis thaum kawg kuv txais tau kev puas tsuaj xwb.

Nyob rau lub ntiajteb niaj hnub no, muaj ntau tus lawv muab tej kev xav tsis yog los quab yuam rau cov pojniam ntseeg Vajtswv. Nyob rau tiam uas muaj ntau txoj kev txhais Vajtswv txojlus yuam kev li tiam no, peb yuav tsum tau tshem txoj kev xav tsis yog no thiab hais txog qhov tseeb uas Vajluskub tau qhia meej meej xwb.

Vajtswv txojlus sau nyob hauv Pajlug 31:10 “Tus pojniam uas tsimtxiaj muaj nqis dua nyiaj thiab kub, tiamsis laj nrhiav tau ib tug pojniam zoo li ntawd”

Tomqab nees nkaum xyoo siv zog ua lub neej raws li tus qauv nyob hauv Pajlug 31:10-31, thaum kawg kuv pom qhov tseeb no. Tus pojniam tau hais txog nyob hauv ntu Vajluskub no yog ib tug neeg hwm Vajtswv, nquas thiab nres txhua yam khov kho. Nws kam txais yuav lub meej mom ua thawj coj, ua siab tawv tiv tej kev sim siab. Thaum kuv nrhiav pom cov cwjpwm no, daim duab txog tus pojniam no rov qab tshwm hauv kuv lub siab, dhau los ua lub hauv paus txhawb rau kuv lub neej tom ntej.

Paub tias, yeej tsis muaj leej twg yuav ua tau tiav raws li daim duab tus pojniam tsim txiaj nyob hauv Pajlug 31, tiamsis kuv ntseeg tias ntu Vajluskub no nqua hu kom peb dhau los ua cov pojniam tseem ceeb, ua siab ntev thiab muaj siab tawv ua raws li txoj kev uas Vajtswv xav. Yog li peb yuav tau ua lub neej hla dhau ntiaj teb txojcai thiab tej uas peb cim civ tsim muaj, los txais yuav lub peev xwm uas Vajtswv tau muab pub rau peb tsis tseg (Ntawv Nkauj 46:1).

Cia li koom siab ua ke xav txog tej cwjpwm tau hais txog nyob hauv Pajlug 31, kom nrhiav tau tej tus cwjpwm uas Vajtswv tau nqua hu koj ua tiav nyob hauv lub neej.

Tus pojniam nyob rau hauv ntu no tsis yog tsuas paub txog tus kheej muaj nqis xwb, tiamsis tseem nthuav qhia tias nws yog ib tug pojniam ncaj ncees thiab txaus ntseeg. Nws yog ib tug txawj ua lag luam, muaj tswv yim, nkag siab. Nws nquag, paub siv txhua yam uas nws muaj los pab rau tsev neeg los ntawm txoj kev hlub puv ntoob, ua siab ntev thiab siab zoo. Tsis yog li xwb, nws tseem yog ib tug saib xyuas, muaj peev xwm thiab ua tau txhua yam zoo, kam ntsib tej kev sim siab, ua siab tawv thiab muaj zog. Nws yog tus tsimnyog qhuas, muaj kev ntseeg thiab tsis ntshai, nws ua lub neej nrog kev siv zog thiab muaj lub siab hwm Vajtswv.

Hnub no, ntu Vajluskub no txhawb kuv zog kom kuv yuav nrhiav pom tag nrho tej peev xwm uas Vajtswv tau muab pub rau kuv. Txog rau hnub no, kuv yeej tseem pom tias Vajtswv tshoov kuv siab tawm ntawm kuv qhov chaw tso siab mus ua lub neej raws li Vajtswv lub suab hu. Hnub no, kuv tseg sijhawm tsawg zog los txhawj txog tej uas kuv txais tsis tau. Thiab hnub no, pauv qhov uas kuv tshua txog tej uas kuv txais tsis tau tau, kuv txiav txim siab ua lub neej kom phim raws li Vajtswv lub siab nyiam.

Thaum nyeem txog ntu Vajluskub no, kuv nco txog cov pojniam nyob rau Nam Á uas kuv tau ntsib lawv. Cov niam tsev no lawv tau kov yeej ntiajteb txoj kev cai thiab kam ua lub neej tiv tej kev txomnyem uas lawv yuav ntsib thaum lawv sawv los ua thawj coj raws li Vajtswv tau nqua hu lawv. Cov pojniam ntawd tau tseg ib tug qauv zoo rau hauv kuv lub siab txog lawv txoj kev hlub. Tib txhij ntawd, kuv kuj xav txog cov pojniam uas peb tab tom ua haujlwm pab rau lawv hauv zej zog, lawv muaj lub siab tawv tiv dhau lub neej phomsij thiab lub neej yav dhau los muaj kev tu siab, los txais ib lub neej tshiab. Kuv paub muaj ib tug pojniam tau xaiv nrog tus Tswv mus, siv zog tsis so los nrhiav kev pab rau tus kheej thiab tsev neeg tom qab uas lawv raug ua saib tsis taus, tawm tsam nrog lub neej quav yeeb, thiab peb caug ib xyoo ua neej nrog txoj kev raug kaw. Nyob rau ntawm kuv tus kheej pom, tus pojniam no yog ib tug uas muaj lub siab tawv uas kuv yuav tau saib taus.

Hnub no, kuv xav txog Pajlug 31 zoo li ib ntu Vajluskub txhawb zog, muaj ntau tus cwjpwm uas txhua tus niam tsev zoo li peb yuav tau siv zog thiaj yuav ua tau, tsis yog tej haujlwm uas peb pheeb rau tej ntawd los ntaus nqi rau tus kheej.

Ntawm kuv, kuv dhau los ua ib tug niam tsev raws li Pajlug 31 tsis tau txhais tias yuav ua tau zoo tag nrho txhua yam, tu tau lub tsev kom du lug, dhau los ua ib leej niam muaj tswv yim lossis coj tus cwjpwm nyob sib haum xeeb kom tsis muaj ib yam dabtsi yuav thuam tau. Tseeb tiag tsuas yog Yexus Khetos tib leeg xwb Nws thiaj ua tau zoo kawg nkaus. Tseem ceeb yog peb yuav tau siv zog, saib rau yam zoo, ua siab ntev ntsib tej kev sim siab, saib xyuas tus kheej thiab tshua txog lwm tus tej kev cheem tsum. Tib txhij ntawd peb yuav tau muaj lub siab tawv siv yus tej koob hmoov uas Vajtswv pub los ua tiav Vajtswv lub homphiaj tau npaj tseg rau peb.

Thov caw nrog kuv peb thov Vajtswv ua ke:
Ua Vajtswv tsaug vim koj tau tsim muaj cov pojniam uas tsim nyog hwm muaj nqis tshaj nyiaj thiab kub. Thov Vajtswv ntxiv zog rau cov pojniam nyob hauv Vajtswv lub tsev kom lawv muaj siab tawv, hla dhau ntiajteb txoj kev cai, thiab ua lub neej raws li Vajtswv lub suab hu Vajtswv tseg rau lawv lub neej. Thov kom Vajtswv ntxiv zog thiab kev txawj ntse, kom cov pojniam uas zoo kawg nkaus no yuav ua tiav tes haujlwm uas Vajtswv tau muab cob rau lawv, ua lub neej kom Vajtswv lub npe tau nrov dhau ntawm Nws lub neej. Kuv thov hauv Tswv Yexus Khetos lub npe. Amees.

Cov kwv tij txhua tus, nyob hauv Vajtswv qhov muag, tus pojniam uas tsim txiaj tsis yog zoo li tej uas ntiajteb xav, tiamsis yog tus neeg ntseeg siab rau Vajtswv, tsis ua lub neej raws li ntiajteb tej kev cai tiamsis kam ua raws li Vajtswv lub suab hu tseg rau lawv. Ntawd thiaj yog tus neeg muaj lub siab tawv siv nws tej koob hmoov uas Vajtswv pub rau nws los ua lub neej muaj nqis. Cia siab tias txhua tus niam tsev yuav muab txhua lub nra nyhav tso tseg thiab muaj lub siab tawv mus raws li Vajtswv lub suab hu, zoo li tej qe hlaws muaj nqis ci ntsa iab ci Vajtswv tus duab rau lub ntiajteb no sawv daws pom.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw: [email protected]. Tswv Yexus hlub koj. Thiab peb xav kom txuas tau nrog koj.