Ngài do, digơlăn oă oh mi cau ur gam gơkol àñ bơta kơñjơ̆ kơñjut, tòm tŭ pal dơp geh bơta wil tơl jat ală bơta kơp kờñ ò ngăn dunnia dê. Dunnia ai bol he in ală rnoàs jơnhoa ngan bơh broă lơh cau ur, cau mề, at bồ hiu nhă, mơ prap gar rùp să la cau ur jak chài. Mơ ya gơs ya tŭ lơi bol he ơm bơdơh wơl nàng sền sơwì wơl ală nùs nơm niam mơ Yàng kơp kòñ tòm ală cau ur tòm hiu Kơnràñ dê hala ò?

Ngai do, ngai 20/10/2024, Bơta Hòi Dan Kòp Ngai dan jà ală ồng mò oh mi bơtê bal Jơnau Yàng kơnòm dê bơta dong kơl mò Ann White dê bơh tơnggumê CAU ÙR JAK CHÀI.

“Dô nă cau ùr jak chài mơ chài rgơi ñcau rơp jòi bàn taih?
Bơta kas màng khai dê rlau mơ lŭ màng.” (Jơnau Pơnđik 31:10)

Tòm oă sơnăm, añ neh prap dô bơta kơlôi ò di bơh rùp cau ur dòn Krist dê. Bơh găm kơnòm dềt, añ neh dòn lah dô nă cau ùr jak chài tòm mat Yàng la dô nă bau ùr, cau mê sùm ghi ga rcăng ală kòn dòn bơr niam mơ dô nơm hiu tum sùm sang goh, niam. Cau ùr hơ̆ pal pơnjat prap nùs nhơm phi să, don duh, ò kơlôi tus bơta gơlik gơs hala nùs kơlôi is să tòm dê. Tŭ hơ̆ gơwèt mơ añ, ală nùs nhơm niam dô la rnoas ò rgơi siơ̆u kơp nă cau ùr dòn duh lơi in. Añ neh pơnđơl pràn ò sơ ỏi lơgah tòm oă sơnăm nàng gơlik gơs cau ùr behơ̆, mơ ya lồi dut ming dơp geh bơta ơlah.

Tòm dunnia ngai do, oă cau găm ơn ală bơta kơlôi sơnưng rkwet rkwe hơđăng cau ùr dòn Krist. Digùl ală bơta kơlôi sơnưng tis bơh Sră Goh, bol he pal tă săng ală bơta kơlôi sơnưng tis dô mơ yal loh jơnau song mơ Sră Goh neh bơto dô bă loh lang.

Jơnau Yàng geh cih tòm sră Jơnau Pơnđik 31:10 “Dô nă cau ùr jak chài mơ chài rgơi ñcau rơp jòi bàn taih?
Bơta kas màng khai dê rlau mơ lŭ màng.”

Tơnơ̆ rlau mơ bar jơt sơnăm pơnđơl pràn kis jat rnoas niam bơh tòm sră Jơnau Pơnđik 31:10 -31, lôi dut añ neh đal git jơnau song. Cau ùr geh yal tơlik tòm sèng Sră Goh do là cau duh rngòt Yàng, jak lơh broă mơ rgơi lơh is. Khai khin cha dơp lèng gơnoăr broă at bồ, rcăng sir ntao diđap mắt mơ ală bơta gơlong mơ nùs khin cha mơ bơta dòn. Tŭ añ dơp git ală nùs nhơm pràn kơldang mơ bềng gơnoăr pràn hơ̆, rùp sơñio cau ùr do neh lơh gơduh nùs añ, gơlik gơs dô bơta kơp kòñ dơng ală ngai tơnơ̆ añ in.

Ngăn, ò cau lơi rgơi wil tơl geh tus dê rup cau ùr jak chài tòm Sră Jơnau Pơnđik 31, mơ ya añ dòn lah sèng sră goh do hoi jà bol he gơlik gơs ală cau ur krơi is, pràn mơ khin cha jat gùng dà mơ Yàng neh rcăng lai. Behơ̆ gen, pal lòt găn ală nhal mơ dunnia mơ să tơm bol he bơtao gơs, nàng dơp rò ală bơta jak chài mơ Yàng neh ai pà mơ bơta dong kơl ò dơh bơh Kơnràñ (Đơs crih 46:1).

Kơlôi bal tĕ bơh nùs nhơm niam geh cih tòm Jơnau Pơnđik 31, nàng jòi ală nùs nhơm niam mơ Yàng gam hôi jà ồng mò oh mi lơh niam lin rlau tai tòm rài kis he dê.

Ală cau ùr tòm sèng Sră Goh dô ò di ming dơp git jrô ndơp bơh kas mang să tòm he dê, mơ kung ràng tơlik he la dô nă dòn song mơ dipal dòn kơnòm. Khai la dô nă cau kă brô jak chài, mơ sùm git jak, git wă wơng. Khai tơryăng tơryông, git ngui ală ryas pràn, ai bơntơl hiu nhă in mơ bơta kòñ gơboh bềng liu, nùs dơng ơnang mơ lơbơn niam. Ò di ming behơ̆ lơm ò, khai kung la dô nă cau at bồ jơh nùs, jak chài is, bềng pràn jak mơ công nha, sùm nato diđap ală bơta gơlong mơ bơta khin cha mơ pràn kơldang. Khai geh jong rơ, ràng tơlik bơta dòn mơ chò hòp, mơ geh ală cau ki ngam. Hơđăng jơh ală, khai kis mơ bơta tơryang tơryông jơh nùs mơ nùs duh rngòt Yàng.

Ngai, sèng Sră Goh dô neh chôl bơtrôt añ neh ngui jơh wil tơl ală bơta jak chai mơ nđàc mơ Yàng neh ai añ in. Jơl tus dê ngai do, añ sùm dơp git lah Yàng gam chôl bơtrôt añ lik bơh ơnih ring lơngai añ jê nang jat jơnau hoi jà Kơnràñ dê. Mơ ngai do, añ lơi dô ết tŭ jơ rlau nang kơlôi rcăng bơh ală bơta añ òhềt geh. Mơ ngai dô, ala mơ wă kơlôi tus ală bơta òhêt geh, añ lơh nền wèt tus hơ broă gơlik gơs rup să crih crai rlau jơh sư tơm he dê, jat nùs kòñ Kơnràñ dê.

Tòm tŭ kơlôi bơh sèng Sră Goh dô, gen añ kah tus ală cau ùr tờm Nam Á mơ añ neh tìp. Bol khai neh lòt găn ală kơryan dunnia mơ ntao diđap măt mơ ală bơta kalkê bơh jền prìa nàng mut tus gơnă at bồ mơ Yàng neh hoi jà bol khai. Ală cau ur hơ̆ neh lơi wơl tòm añ nùs rngoh rngac mơ bơta kòñ gơboh jrô ndơp. Mơtai, añ kơlôi tus ală cau ur mơ bol he neh duh broă tòm bòn lơgar, bol khai neh khin cha lòt găn dê ală bơta gơlik gơs kălkê mơ rai kis yau jê sồt nàng dơp rò dô nơm rai kis pa, bềng pràn kơldang. Añ git dô nă cau ur neh sac lòt jat Yàng, pơnđơl pràn ò dơh nàng rong kis să tơm mơ hiu nhă tơnơ̆ mơ neh gơs dô pah rai kơnòm să kol cau blàc pơrlôm, dô bơta tơmlơh mơ bơta gơduh tòm ham kòñ poac să dê, mơ pe jơt sơnăm ơm jam jŏ jong. Gơwet mơ añ, khai la dô nơm rup bơta pràn kơ̆ mơ nùs khin cha mơ añ sùm sền dơng mang.

Ngai do, añ kơlôi Jơnau Pơnđik 31 be dô sèng sră bềng bơta chôl bơtrôt, dô pang sră cih bơh ală nùs nhơm mơ ală cau ur be bol he pal cang pơnđơl nàng geh gơs, ò di la dô pang sră cih broă pal lơh nàng bol he sơnđing di gơ mơ cahrña is să tơm he.

Gơwet mơ añ, gơlik gơs cau ur jak chài jat Jơnau Pơnđik 31 ò di gơtha la pal lơh sir wil tơl tòm ală broă, prăp ai hiu nhă sùm sang goh niam, gơlik gơs cau mề cau dê kơlôi hala prăp nus nhơm lơbơn niam ò geh tiah lah pơrhơng. Ngan behơ̆, ming Bơtau Krrist rgơi geh tus wil tơl lơm. Ala mơ hơ̆, dơng mang la bol he kư pơnđơl jơh pràn, pơnjat prăp dô bơta sền lăng di, kơ̆ nùs ntao diđap ală bơta gơlong, sền gar să tòm mơ wet tus bơta pal cang cau ndai dê. Mơtai, bol he kung pal cang khin cha ngui ală nđàc mơ Yàng neh ai nàng lơh wil tơl tơnggu rơndap mơ Yàng neh rcăng lai bol he in.

Kơp kòñ sră Jơnau Pơnđik 31 rơp lơi wơl bơta kơp kòñ jơh tơl nă bol he in nàng gơlik gơs ală cau ur khin cha, tơryang tơryông mơ dòn song mơ Yàng gam hoi jà. Ò git ngai dô la tŭ nàng oh mi bơ dơh wơl ală bơta jê sồt, bơta bàssil mơ rngot, nàng khin cha cơnđoà lòt jat gùng mơ Yàng neh rcăng sir oh mi in hala ò?

Dan jà bol he dô nùs bal tòm bơta hòi dan:
Ưnngai Yàng bơh Kơnràñ neh crơng gơs ală cau ur kas màng rlau mơ lŭ màng. Dan Kơnràñ bơntơl pràn nàng ală cau ur tòm Hiu Kơnràñ rgơi pràn kơ̆, lòt găn ală bơta kơlôi ò niam dunnia dê, mơ lòt jat jơnau hoi jà Kơnràñ ai rai kis he in. Dan Kơnràñ bơntơl tai pràn kơldang mơ bơta jak chài, nang ală cau ur crih crai dơ pơnjat lơh sir gơnoăr broă mơ Kơnràñ neh jao, kí lơh ang gơklŏ sơnđan Kơnràñ găn dê rai kis he. Kòn ai sơnđan Yàng Jêsus Krist hòi dan mơ Yàng Bèp, Amen.

Ơ ală ồng mò oh mi kòñ gơboh, tom mat Yàng,cau ur jak chài ò di la cau wil tơl jat rnoas dunnia, mơ la cau jơh nùs dòn kơnòm Kơnràñ, khin cha lòt găn dê ală bơta kơlôi ò niam dunnia dê nang joi jat jơnau hòi jà Kơnràñ dê. Hơ̆ la alư cau ur khin cha ngui ală nđàc mơ Yàng neh ai he in, nang kis dô rai kis bềng liu kwơ mang mơ gơring niam. Kơp kòñ lah jơh tơl nă oh mi cau ur rơp tă săng ală kơñjơ̆ kơñjut mơ khin cha lot jat jơnau hòi jà Yàng dê, be ală lŭ mang ang gơcrà bơta gơklŏ Kơnràñ dê dunnia in sền lăng.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.