Tŭ sền tom bơta lề làc tơnơ̆ bơta ồs sa jơh, digơlan tom nùs rơp kơlôi sơnơng dô nơm sèng lùp: dilah jơh ală bơta lơi he gơs găm rọh jơh, gen bơta lơi găm wơl taih? Tŭ lòt găn ală bơta gơlòng bŏl glăr tom rài kis, gen ală phăn, jền priă gen bŏl he prap gar jŏ jòng lài or gơs lòt băl mơ bŏl he hala ò? Hala bơh bơta koñ gơboh mơ bơta dòn là ală bơta gơs kwơ màng rlau jơh, la tiah king crŭ bŏl he di?

Ngai do, ngai 21/10/2024 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Cheri Cowell dê bơh Tơnggume BƠTA LƠI GĂM WƠL TƠNƠ̆ MƠ TŬ LIK KLÀS BƠH DI ỒS?

“Gen broă kòp nă cau dê rơp geh ràng tơlik; bơh tòm ngai Yàng dê rơp yal loh. Tài bơh gơ rơp geh ràng tơlik tòm ồs, mơ ồs rơp lòng broă kòp nă cau dê la mbe lơi.” (I Kôrintô 3:13)

Tom dô kơnhai prăng ne, bŏl he nggùi di đap tivi, ơm mŏ mŏ sền ală bơta ồs sa chu bri dờng kòp ală tiah. Dô bơta kơn njơ̆-njŭt gơr wang gut dar. Cau lơi kung họi lùp is, dilah bŏl he ơm tom tŭ behơ̆ gen rơp lơh mbe lơi taih? Bŏl hi rơp cèng pơnjat bơta lơi tom ală phăn mơna kas màng he di? Gơwèt hơ ăñ, lùp is nùs he gơs tơl pràn nàng mat tomtoh mơ mat gơwèt mơ ală broă rọh rui jơh ală bơta hala ò.

Kŭng be ală cau neh rọh hiu tum, ăñ kŭng gơs oă phăn kas màng. Phăn bàn bơh ală cau neh loă rài, ală phăn òs mòng ò tŭ lơi chàn ala, ală phăn kirsơnre bulah dềt rhền mơya kas màng rlau jơh gơwèt mơ ăñ. Rọh jơh ală bơta rơp la dô bơta ji sồt ò tŭ lơi jai kơlôi sơnơng. Ăñ ò tŭ lơi wă wờng jơh ală bơta moat jrung dờng hơ̆, mơya ăñ git la Yang lọh jơh. Ngăn behơ̆, Kơnrẵn neh tơngkah tus broă lòt găn dô nơm broă ồs sa chu pơrguc tom I Kôrintô 3: 11-15:
“Bơh ò gơs cau lơi rgơi bơt dô nơm mơnàng ndai rlau mơ mơnàng neh bơt, hơ̆ la Yàng Jesu Krist. Mơya dilah cau lơi ai màh, priă, lŭ màng, chi, ñhơt ro, rhe nàng bơt hơđang mơnàng hơ̆, gen broă kòp nă cau dê rơp geh ràng tơlik; bơh tòm ngai Yàng dê rơp yal loh. Tài bơh gơ rơp geh ràng tơlik tòm ồs, mơ ồs rơp lòng broă kòp nă cau dê la mbe lơi. Dilah broă cau lơi bơt hơđang mơnàng hơ̆ gam wơl, gen cau hơ̆ rơp geh phan ƀàn. Dilah broă cau lơi gơkòl chu pơrguc jơh, gen cau hơ̆ rơp roh phan ƀàn, mơ să tòm cau hơ̆ rơp geh dong klàs, mơya kung be cau lik klàs bơh di ồs.”

Cau Gơnoăr Bơtô dờng ồng Pol đơs lah Cau Don Jat Yang bŏl he găm bơt bơtào hơđăng mơnang kơ̆ cê – hơ̆ la Yang Jesu Krist. Mơya geh sèng lùp lah: bŏl he găm ngùi ală phăn lơi nàng bơtào bơt rài kis he? Gen bŏl he găm gơs sền màng ryŭ oă ir đah bơdih, bơta hừh nùs cau ndai di, hala nùs koñ să tom di taih? Hala ală bơta lơi he găm gơs sơl? Ală phăn bŏl he sơmbat kơ̆ tom hơ̆ nàng bơtào bơta dòn sŏng hala gơnoăr is he di băl mơ cau gơp bon he gơs kơ̆ cê ngăn sơl?

Pol tơngkah lah rơp gơs tŭ bơta lòng rơp gơlik gơs, mơ tŭ hơ̆, bơta gơtơmchồl ngăn tom nùs kòp nă rơp geh ràng tơlik. Băñ kơlôi tìs lah Yang rơp ai gơnoăr ồs sa chu pơrguc digul bri nàng lòng ală làng bŏl tềng hơ̆, Mơya Kơnrẵn rơp ngùi broă gơlik tus do nàng dŏng bŏl he sơwì is tom dơlăm nùs he. Do la tŭ bŏl he lòng is sền ală “Gách” gen he găm bơt rài kis di ngăn la ală phăn bơt kơ̆ cê, hala mìng la ală phăn ing lơm, siơ̆u kwơ màng jŏ jọng.

Poh do, tŭ ăñ pơrdòn hiu tum niăm geh bơka niam pơnjat kơnhai ñha rung, gen nisơna lùp is: ăñ rơp kơlôi rcang bơh broă rọh jơh ală phăn bàn he găm gơs prap, Rlau la ơn nùs kơlôi gơwèt bơt bơtào rài kis dềt mềr gơwèt he mơ Yang? Dilah ală phăn găm rọh thit, mơya bơta tom klac ăñ băl mơ Yang găm wơl, gen ăñ rơp sền sơwì is he la cau gơs lơngai sơl? Gen ăñ, rơp jòi bàn bơta hon chò ngăn tom Kơnrẵn, bulah ală bơta rọh jơh hơ̆?

Ồs lòng wơl mơ rơp ràng tơlik ală bơta lơi la lài ngăn tom nùs bŏl he. Dilah gơs ală bơta kwơ màng gơwèt hơ bŏl he – bơta koñ gơboh, ală bơta gơtòmklác băl, mơ bơta dòn – găm wơl tơnơ̆ mơ tŭ lòng hơ̆, gen hơ̆ la phăn bàn dờng ngăn. Gen găm phăn bàn lơi dờng màng rlau mơ broă lòt găn ồs lòng sền mơ găm prap gar ală bơta he sền màng ryŭ tom rài kis?

Dan jà bol he dô nùs bal tòm bơta hòi dan:
Ưnngai Yang, tài bơh Kơnrẵn la mơnang kơ̆ cê rài kis kọn di. Tŭ kọn tìp ală bơta lòng sền mơ bŏl glăr, dăn dŏng kọn sền lọh lang bơta lơi lah kas màng ngăn. Dăn bơtô kọn ĭn git ơn bơta koñ gơboh, mơ bơta dòn tom Kơnrẵn jơñhoa hơđăng ală phăn mơna dunnia do. Bulah dunnia do tomgơl, dăn ai kọn ĭn nùs khin cha nang sum òs sơmbat kơ̆ tom Yang mơ dòn kơnòm di bơta tề lăm Kơnrẵn di. Kơp kỡn kọn sum kah lah, tŭ ală bơta gut dăr kọn rơp rọh thit jơh, gen bơta koñ gơboh Kơnrẵn di la sum sum ò tŭ lơi tòmgơl. Kon jơh nùs họi dăn, kọn ai sơnđăn Yang Jesu Krist. Amen

Ơ ală ồng mọ ọh mi koñ gơboh, tơnơ̆ wơl, ală bơta lơi ò gơkòl phà tơnrọh bơh ồs gen lah bơta kwơ màng ngăn. Bơta koñ gơboh, bơta ală bơta gơtòmklác băl, mơ bơta dòn wăñ lơngơh tom Yang hơ̆ la ală phăn bàn ò tŭ lơi kơr. Tŭ lòt găn ồs lòng sền, bơta bŏl he găm prap wơl ò di là phăn mơna, mơya la bơta phăn bàn đah hwing màng ryŭ ngăn – bơta lơngap lơngai mơ bơta dòn kơ̆ cê tom Yang. Kơp kỡn bŏl he rơp lọt găn bơta càl rbut dờng mơ găm sơmbat prap wil tơl ală bơta kas màng rlau jơh gen Yang neh ai pà.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.