Rài kis hơđăng ù bîng bơta kalkê, gơlòng, mơ ală bơta lơh kòn mơnùs in sền gŏ bòl glar, lơgah lơgañ. Mơ ya la ală cau geh Yàng sàc rwah mơ dọ̆ng klàs, bol he sùm dòn nền di bơta gơklọ̆ mơ gơnap-gơnoar Kơnràñ ai he in tom tŭ kis digùl dunnia do. Behơ̆ bơta gơklọ̆ hơ̆ la ñchi taih? Mơ lơh mbe lơi tô git lam?

Ngai do, ngai 16/01/2025, Bơta Hòi Dan Kờp Ngai dan jà jơh ală cau ơm iat kơlôi sơnơng Jơnau Yàng kơnòm di bơta dong kơl Michale Plemmons bơh tơnggume BƠTA GƠKLỌ̆ GƠKOL PUN NDƠP.

“Añ rơp ò lòi bol mê ơm kòn đoi ò, añ rơp lòt tus hơ bol mê.” (Jang 14:18)

Bol he gam kis tom dunnia bîng ală bơta gơlòng bol glar, tiah kờp nă cau lơi kung pal ntào di đap bơta tom gơl ò pơdơh. Ală bơta geh yal tơnggit ò niam gơtơn tus sùm lơh oă cau in kis tom bơta kơlôi rcang mơ roh rĭng-lơngai. Digùl dô lơgar mơ oă bơta ò kơ̆ nên, bol he gơs bơta gơn kơnòm lơi hala ò?

Bar rbô năm lai, tom mang lai mơ tŭ Yàng Jesu kong pơng đin, Kơnràñ neh đơs mơ ală cau bơtê lah Kơnràñ ò ơm mơ bol khai sum. Tŭ jơ Kơnràñ neh tus, la tŭ Kơnràñ pal phi să jơi kòn mơnus in. Yàng git jơh ală bơta dơrcul mơ moat-jrung ală cau bơtê dê, gen tang Kơnràñ neh ho mơ bol khai lah:

“Hơ̆ la Hwềng Jơnau-song dê mơ dunnia ò rgơi dòp, bơh ò gŏ Kơnràñ, kung git Kơnràñ sơl; ai bol mê gen git Kơnràñ, bơh Kơnràñ ơm sùm mơ bol mê, mơ rơp ơm tom bol mê sơl. Añ rơp ò lòi bol mê ơm kòn đoi ò, añ rơp lòt tus hơ bol mê.” (Jang 14:17-18)

Bơta gơklọ̆ pun ndơp hơ̆ la bơta gơs mat tom pơrgơl rài kis jơh ală cau dòn Bơtau Krist dê. Tom tŭ bol he sơnđan Kơnràñ la Yàng, la Bơtau Dọ̆ng-klàs bol he, Hwềng Goh Kơnràñ dê rơp tom pơrgơl nùs nhơm mơ rài kis bol he, rào goh bol he klàs bơh ală tôi glài. Sơntòm bơh di tŭ hơ̆, Kơnràñ gơs mat tom rài kis bol he. Hơ̆ la bơta gơklọ̆ gơkol pun ndơp mơ Yàng Hwềng Goh ai kờp nă cau in dòn dòp Yàng ngai do.

Bol he rơp dòp geh gơnap-gơnoar tom tŭ gơs Yàng Hwềng Goh mùt ơm tom nùs. Gơnap-gơnoar hơ̆ rang tơlik loh lang tom ală cau neh geh deh bơh Yàng Dọ̆ng-klàs.

Añ kah wơl bơh ală bơta git lam đah hwềng he dê, tom tŭ Yàng Hwềng Goh bơto sồr añ gan ală blah Sră Goh. Kung ò git nđò dơ̆ Yàng neh ngui ală dĭ gơna Kơnràñ nàng tơngkah bơh nùs koñ Kơnràñ dê. Nùs nhơm mơ rài kis đah hwềng añ jê ngan geh kis pràn kơldang ò git nđò!

Hwềng Goh Yàng dê kung tomgơl bol he gan ală bơta tom rài kis. La ală cau dòn Yàng, bol he dòn lah jơh ală broă gơlik gơs bol he in ò di la be òs, mơ la gơ ơm tom nùs koñ Yàng dê. Hwềng Goh Kơnràñ dê lòt bal mơ tề lăm bol he tom kờp phuk, kờp ngai. Tom bơta hon-chò hala tŭ gơlòng bol glar, Yàng sùm gơs mat mơ bol he. Tom tŭ dô nă cau hòi dan bal mơ Yàng tom bơta bol glar he dê, kung la tŭ jơnau đơs Kơnràñ di bư di nùs nhơm bol khai, jùt jơh dà mat mơ lơh rài ală bơta rngòt rngơt, ò rĭng-lơngai. Mìng dô nă Yàng la Bơtau bîng liu bơta jak chai, rcang sir pơndòm-pơndiàng mơ tề lăm bol he tom tŭ jơ pal cang.

Bulah kis digùl pah rài kalkê dunnia dê, bol he git Kơnràñ sùm gơs mat rềp ngan mơ bol he, tŭ ală ngai bol glar iơh-rmơh rlau jơh. Nùs nđàc sơngit Yàng dê nđàc ală hwềng soan kong jê-sồt. Hiu Jum Goh Yàng dê la tiah mơ kòn mơnùs rgơi joi geh bơta gơn kơnòm di bơta kis bal mơ bơta tơm gơl. La ală cau gơrê mơ Hiu Jum Goh, bol he pal ceng tus dunnia do in bơta gơn kơnòm hơ̆, tai bơh Yàng Hwềng Goh neh ai nùs nhơm, nùs nđàc sơngit, bơta koñ gơboh Kơnràñ dê bol he in. Tom tŭ ntào di đap bơta kup kơryan bơh cau sò-tom, bơta dòn mơ krơh Yàng Dọ̆ng-klàs dê la gùng dong kơl bol he, ai bol he gọ̆ bơta pal cang ngan ală hwềng soàn gùt dar he.

Bol he ò ntào di đap ngai tơnơ̆ ìs dô nă bơh bơta gơklọ̆ pun ndơp bơta kis dê mơ nùs nhơm Kơnràñ dê ơm tom kờp nă bol he. Bañ lòi gơkol hwài tơmùt tom bơta rngòt rngơt bơh ală ngai kalkê di đap. Bơta do neh geh Cau Gơnoar Bơto Dơng ông Jang mơ cau Gơnoar hwơr Đanien ai gŏ lai. Yàng Jesu kung ho lah bulah gơs bơta lơi gơlik gơs, Kơnràñ kung kư ơm bal mơ bol he jơl sum sum.

“Mơ ya tom tŭ Hwềng Jơnau-song dê tus, gen Kơnràñ rơp lam bol mê tom làm jơh jơnau song; bơh Kơnràñ ò đơs is he dê, mơ ya Kơnràñ kơno bơta lơi gen đơs wơl bơta hơ̆, mơ yal lài bol mê in ală bơta rơp tus.” (Jang 16:13).

Dan jà bol he dô nùs bal tòm bơta hòi dan:
Khoai Yàng, Bơtau bîng gơklọ̆ mơ gơnap-gơnoar. Kòn ưnngai Yàng tai bơh bơta nđàc dọ̆ng klàs mơ Kơnràñ ai kòn in. Kòn ưnngai Yàng bơh bơta gơs mat mơ gơnoar pràn Yàng Hwềng Goh dê nàng tơm pơrgơl kòn tom bơta gơklọ̆ ryŭ ryơm Kơnràñ dê, nàng kòn in gơlik gơs ndròm be Kơnràñ sơlo rlau. Ơ Yàng, bulah kis digùl dunnia roh rĭng-lơngai, kòn kung joi geh bơta gơn kơnòm bơh dô ngai tơnơ̆ gơklŏ mơ Kơnràñ ai bol kòn in tom lơgar Kơnràñ dê. Digùl ală bơta kalkê rơp gơlik gơs tom ală ngai rơp tus, dan Yàng dong gar mat kòn mìng wèt hơ bơta koñ gơboh mơ jơnau ho Kơnràñ dê. Dan Hwềng Goh Kơnràñ dê dong kòn dòn kơnòm mơ dòn kơ̆ di jơnau ho Kơnràñ dê, geh dòp soh gơnap-gơnoar Yàng Hwềng Kơnràñ dê tô kis ceng wơl bơta niam digùl o cau, mơ rang tơlik bơta gơklọ̆ Kơnrañ dê. Kòn jơh nùs hòi dan tom sơnđan Yàng Jesu Krist, Amen.

Ơ jơh ală ông mò, oh mi koñ gơboh, bol he ò kis kung bè ală cau don Yàng lu-li digùl dunnia do, tai bơh Bơtau kis tom bol he la Yang Dọ̆ng bîng bơta gơklọ̆. Bulah rài kis oh mi dê mbe lơi, pal kah tĕ bơta gơklọ̆ mơ gơnap-gơnoar Yàng dê sùm ơm bal mơ gơs bơta kis tom bol he. Sơmbat prap tĕ jơnau ho Yàng dê, nàng bol he rgơi ntào di đap ală ngai di đap dô bă kơ̆ cê, mơ kis rang tơlik nùs nhơm jòng mang kung be bơta Yàng bơto. Ngai do, gơs bơta lơi lơh oh mi gam rngòt tom bơta rang tơlik bơta dòn he dê sơl, kơnòm tĕ Yàng Hwềng Goh ai bol he in gơnoar pràn nàng cơnđoà lòt dô bă pràn kơldang kung be ală cau lang bol lơgar Yàng Tom Trồ dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.