Lu bơ̆n oei arih lăm năr hơtuch, kơplah măng mu nhen thoi krôp gom Hnam Akŭm Kră Yang rai đunh rai trăp trĭn đơ̆ng gah lăm păng đơ̆ng pah ‘ngoaih. Ưh kơ tŏ sĕt Hnam Kŭm gleh lap yua kơ yak năm kiơ̆ tơdrong tơdă lơ tơdrong jang, dôm kơ adrin đơ̆ng tơpôl, pơjing jên tơmam, bơwei tơdrong oei bơ̆jang athei chơchă wă kơ “bơwei” bơngai lui kơplah chăl arih bơ̆jang hăm điê̆n thoăi, hăm kơ măy tinh. Kư̆m kơplah noh, yang kơnê̆ chơchă trong mơ̆t tơ lăm Hnam Akŭm pơm kơ jơhngơ̆m klai gar tơklah dih băl, pơrăm tơdrong jang bơngai wei triu, pơrăm dôm kơ tơdrong gĭt kăl lăm khŭl bơngai lui kơ Kră Yang …

Lăm kơplah đei tơdrong noh, nơ̆r pơma khan đơ̆ng Kră Yang rơngơp mă lei đei bưng tih hăm lu bơ̆n: “Athei pơdơh!” ưh kơ sĭ achăng lê̆, mă noh nơ̆r krao athei brŏk tơ anih tơpă, đei Sư oei hơdai, tơdrong pơklaih păng tơdrong mơsêh mơyang đơ̆ng Sư. Rŏ lăng lu bơ̆n ngeh kơ chăl hơ tuch noh kơplah lu bơ̆n adrin kơdâu mă tĕnh hloh. Mă lei Kră Yang oei krao kon pơlei Sư mơ̆t tơ bơyan wă pơklaih păng iŏk ming dôm tơdrong Satan tơtông iŏk, wă kơ đơ̆ng anih pơdơh, Hnam Akŭm gô pran hloh kơ ki sơ̆ dơ̆ng.

Năr ‘nâu, ‘năr 11/07/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Martha Noebel kơ̆l ‘bai IŎK DƠ̆NG TÔM TƠDRONG ĐÊL HIONG.

Sơ̆p Hla Bơar ‘Bok Kei-Dei: : “Kră Yang ling-lang gô chông ba ih ăn kơ ih tôm mah lăm anih teh hrĕng kro, pơm ăn kơ akâu jăn ih pran jăng. Ih thoi lĕ pơgar đe ruh đak ling-lang, thoi tu đak glung ưh kơ đei layơ hrơ̆.” (Êsai 58:11)

Tôm tơdrong mă ‘Bok-Kei-Dei đei tơ’bôh noh jơ̆ đei bơih đơ̆ng lăm Yang Yêsu Krist păng lăm Akâu Jăn Sư, noh jơ̆ Hnam Akŭm. Lăm minh pơge hăm khŭl krao khan tơ lăm hnam akŭm, ‘Bok Pơtho đei mơn Kră Yang đei dan lăm jơhngơ̆m sư lăm sơnăm tơ anăp: noh jơ̆ “sơnăm pơdơh”.

“Pơdơh”, mơ̆ng rŏ kơ ‘bônh đĕch păng hiôk tơpă. Mă lei inh đei tơtăm: tŏk bŏk lu bơ̆n oei krao wă hơmet ăn chăl arih hơtuch ‘nâu, na thoi yơ đei jơ năr “pơdơh”?
Kơplah jơ noh, Kră Yang đei nơ̆r rơngơp khan lăm jơhngơ̆m inh: ưh kơ sĭ pơdơh wă achăng lê̆, mă noh “pơdơh wă pơklaih thoi đêl”.

Akâu inh hơdrôt. Mă tơpă “pơdơh” ‘nâu ưh kơ ngôi minh ‘bôt pă đei pơm kiơ, mă noh jơ̆ pơdơh wă sơng iŏk tơdrong pơklaih thoi đêl đơ̆ng Kră Yang. Inh ưh kơ đei tơchĕng kơ tơdrong arih tơ ‘ngoaih to oei tơblah hăm jơhngơ̆m gleh lap, păng mơn băt kơplah pơdơh … dôm kơ tơdrong adrin gleh lap pă đei bơih. Kơplah pơdơh kiơ̆ kơ ‘Bok-Kei-Dei wă, lu bơ̆n gô ‘bôh Kră Yang ăn pŭn hiôk kơ lu bơ̆n lăm jên tơmam, bơhngol, akâu jăn, păng băt kơ dôm tơdrong lăm chăl arih, lu bơ̆n gô hlôi mơn kơ tơdrong kĕ jei.

Inh kư̆m đei wă hlôh kơ gah Hnam Akŭm đei hlôi đơ̆ng pŭ trăp kơ dôm tơdrong bơ̆jang, wă kơ dui ba lơ bơngai năm tơ hnam akŭm, tơplih kơ năm tơ Nơ̆r ‘Bok-Kei-Dei, năm hăm tơdrong tơpăt đơ̆ng Yang Yêsu.

Kră Yang gô pơdrâu ăn kơ Hnam Akŭm tôm tơdrong mă đêl Satan tơtông iŏk: jên tơmam, jơhngơ̆m pran, buăl juăt, hăm tôm tơdrong hiôk hian lăm jơhngơ̆m đon. Ayăt chơchă wă pơrăm lăm akâu jăn, hnam dơnŏ păng jơhngơ̆m lu bơ̆n. Mă lei Kră Yang oei khan: “Tôm bơih.”

Nơ̆r ‘Bok-Kei-Dei đei chih lăm Êsai 58:11-12:
“Kră Yang ling-lang gô chông ba ih ăn kơ ih tôm mah lăm anih teh hrĕng kro, pơm ăn kơ akâu jăn ih pran jăng. Ih thoi lĕ pơgar đe ruh đak ling-lang, thoi tu đak glung ưh kơ đei layơ hrơ̆. Lu adrĕch adrung ih gô tơiung hơmet dơ̆ng anih sơ̆ đĭ pơchah tơphĕ. Iĕm gô hơmet dơ̆ng lu hơnă so đơ̆ng lơ kơ jơhnơr adrol sơ̆. Đe gô jô̆ pôk iĕm bơngai hơmet ming dur pơlei mă đĭ păk pơchah hơmet ming trong pơlei ăn kơ lu kon pơlei oei.”

‘Nâu nơ̆r tơtă ‘nâu hơ iă tơpă. Kră Yang tơtă gô chông anhăk, ăn pŭn hiôk, pơklaih jing thoi đêl, păng pơjing ming Hnam Akŭm Sư. Hnam Akŭm tơ anăp noh Hnam Akŭm gô pran jăng, pơm lơ tơdrong jang hloh mă ưh kơ kăl kơ adrin pơmat tat ‘mơ̆i na đei. Yua kơ gô đei noh lăm tơpang ti Kră Yang, tơ’ngla pơjing tôm tơdrong.

“Tơdah Kră Yang ưh kơ đei pơm hnam, Lei lu thơ̆ jang man hnam ưh kơ đei kơ yua. Tơdah Kră Yang ưh kơ wei pơlei. Lu bơngai gak kral kơmăng kư̆m tơdrong kơ đei.” (Hơriso 127:1)

Mơ̆ng nhen thoi ưh kơ gan lui ngeh. Inh băt! mă lei inh lui ngeh kơ tơdrong noh. Yua kơ ‘Bok-Kei-Dei mă lu bơ̆n kơkuh noh jơ̆ Tơ’ngla tuh ăn tơdrong pŭn hiôk rai lơ hloh dơ̆ng, Sư jơ̆ mơ̆ng nơ̆r krao khan păng gô pơm thoi nơ̆r Sư đei tơtă.
Lei buăl hăm ‘maih wă hăm inh lui gơnang kơ Kră Yang gô pơm tơdrong tih hloh, ‘bôh chrêu tơ anăp ưh? Athei chang gô lăng dôm tơdrong jang mơsêh mơyang mă Kră Yang tuh ăn kơ inh, hăm buăl, păng tuh ăn kơ Khŭl Bơngai Lui Sư!

Apĭnh đĭ đăng krao khan hơdai:
Kơkuh kơ Kră Yang mă ‘mêm, năr ‘nâu kon năm ‘bơ̆t anăp jơ̆ng Ih păng pơdơh ‘bơ̆t tơdrong ‘lơ̆ng tơpăt Ih. Apinh pơklaih thoi đêl kơ dôm tơdrong kiơ mă yang kơnê̆ đei pơrăm, tơtông iŏk lăm chăl arih kon păng lăm Hnam Akŭm Ih: noh jơ̆ tơdrong hiôk hian, jơhngơ̆m chơt hiôk, jơhngơ̆m pran jăng, tơdrong pơgơ̆p hăm bôl buăl … kon lui ngeh Ih oei bơ̆jang, mă khan kon lăng ưh kơ ‘bôh. Apinh ăn kơ kon jơhngơ̆m đon lui kơjăp wă răp gô tơdrong pơklaih thoi đêl đơ̆ng Ih lăm tơdrong arih kon păng lăm Hnam Akŭm Ih. Wă kơ lu nhôn đei tơdrong pơdơh hiôk tơpă lăm pơnăr ‘Bă mă ‘mêm, yua kơ đơ̆ng tơdrong mơsêh mơyang pơklaih đơ̆ng Ih, lu nhôn gô pơm keh ăn kơ Ih rai hloh lăm chăl arih tuch luch ‘nâu. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, Hnam Akŭm Kră Yang oei yak năm lăm bơyan gĭt kăl tơpă, ưh kơ sĭ bơyan wă kơdâu pơthi hăm chơchă tơdrong jang dah pơm gah ‘ngoaih đĕch, mă noh jơ̆ bơyan pơklaih thoi đêl đơ̆ng lăm tơdrong jang pơdơh hiôk păng pơdơh lăm ‘Bok-Kei-Dei. Kơplah lăm teh đak gleh lap yua kơ pơjei băl, Kră Yang oei krao rim ‘nu lăm lu bơ̆n brŏk tơ anih pơdơh, wă kơ đơ̆ng noh Kră Yang ăn kơ lu bơ̆n jơhngơ̆m chơt hiôk lăm tơdrong pơgơ̆p hăm Kră Yang, tơdrong kơkuh hăm jơhngơ̆m păng kơkuh hăm tơdrong Tơpă, tơdrong mơsêh lăm krao khan, păng đon lui huay kơ ngĭl ngŭl.

Rŏ lăng buăl huay kơdơ̆ng pah rŏng kơ anih bơtho dah chĕp tơdrong pơgơ̆r, mă buăl jơ̆ mĭnh lăm akâu jăn Yang Yêsu Krist, păng Kră Yang ‘maih wă bơ̆jang đơ̆ng lăm buăl. Kră Yang oei chơchă dôm kơ jơhngơ̆m băt kơ chu yom, wă kơ pơm pơkeh tơdrong pơklaih Khŭl Lui, ưh kơ hăm jơhngơ̆m kơdih mă noh hăm tơdrong mơsêh đơ̆ng Yang Bơhnol ‘Lơ̆ng.

Athei pơtơm ‘blŭng a hăm jơhngơ̆m chu yom: ‘măn jơ năr oei lăm Kră Yang, krao khan ăn kơ Khŭl Lui, lui gơngang kơ tơdrong chông anhăk đơ̆ng Sư, păng yak năm hăm đon lui. Kơplah pơdơh lăm Kră Yang, lu bơ̆n ưh kơ dơ̆ng minh ‘bôt, mă oei dơ̆ng lăm tơdrong tơblah lăm bơhngol hăm tơdrong pơdơh đơ̆ng Kră Yang. Păng yua kơ đơ̆ng noh, Kră Yang gô bơ̆jang. Athei krăng răng, yua kơ bơyan pơklaih thoi đêl truh bơih. Păng rim ‘nu lu bơ̆n gô đei hơdai tơnoh lăm bơyan noh!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.