Koj tab tom mloog kev Thov Vajtswv Txhua Hnub saum xov tooj cua Oneway Radio dhau los ntawm tej zaj kawm Vajtswv txojlus uas ntau tus lub neej kawm tau, thiab muab ntawm phau ntawv CBN Devotional Daily. Peb thov kom koj yuav txais tau lub neej tshiab txhua hnub hauv koj lub neej caum tus Tswv qab
Peb tab tom ua neej nyob rau lub sijhawm yuav kawg, thaum qhov tsaus ntuj niaj hnub vij puag ncig thiab Vajtswv Pawg Ntseeg niaj hnub ntsib tej kev tawm tsam sab hauv thiab sab nrau tuaj. Muaj ntau Pawg Ntseeg tab tom qaug zog zis rau daim txheej txheem haujlwm uas yuav tau ua, tej kev tsim kho pab pawg, nrhiav nyiaj txiag, lossis nrhiav kev kom tuav tau cov ntseeg “ko taw” nyob rau tiam vam meej no. Nrog rau lub sijhawm ntawd, dab ntxwgnyoog kuj nkag los rau hauv Vajtswv Pawg Ntseeg ua rau Pawg Ntseeg muaj kev sib faib, tawm tsam tus neeg yug yaj tes haujlwm, rhuav tshem txoj kev ua zoo ntawm cov ntseeg txhua tus.

Nyob rau tiam uas zoo li no, Vajtswv lub suab hais mos muag nrog lub hwjchim rau peb: “Cia li so!” Tsis yog lam hais kom tas, tiamsis yog ib lo lus nqua hu kom tig rov qab los rau ntawm qhov chaw tau so tiag, nyob hauv Vajtswv thiab rov qab tau kho dua tshiab los ntawm Vajtswv lub hwjchim. Tej zaug peb xav tias tiam ntiajteb yuav kawg yog lub sijhawm yuav tau khiav kom sai dua. Tiamsis Vajtswv ho caw kom Vajtswv haiv neeg nkag los rau lub caij so kom muaj zog thiab txais tej uas xatas tau txeeb lawm, kom pib ntawm qhov chaw so ntawd, Vajtswv Pawg Ntseeg yuav sawv tsees khov kho heev tshaj qhov qub.

Hnub no, yog hnub 11/07/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Martha Noebel dhau ntawm Zaj kawm ROV QAB KHO DUA TXHUA YAM UAS TWB RAUG TXEEB MUS LAWM

Vajluskub: “Kuv yuav ua tus coj nej kev mus ibtxhis thiab pub txhua yam zoo rau nej kom txaus nej siab. Kuv yuav pub nej muaj zog thiab noj qab nyob zoo. Nej yuav zoo ib yam li lub vaj uas muaj dej ywg tsis tseg thiab ib yam li tus dej uas ntws tsis paub nqhuab li.” (Yaxayas 58:11)

Tag nrho tej uas Vajtswv nthuav qhia puav leej muaj tiav nyob hauv Yexus Khetos thiab hauv Nws lub cev, uas yog Pawg Ntseeg. Muaj ib zaug thaum thov Vajtswv hauv Pawg Ntseeg, kuv tus xibhwb hnov tias zoo li Vajtswv tab tom tso rau hauv nws lub siab txog tej haujlwm xyoo tom ntej: ntawd yog “xyoo so”.

“So”, hnov cuag li yooj yim puas yog. Tiamsis kuv ho ua xyem xyav: nyob rau lub sijhawm uas peb tau hu los npaj tus kheej rau tiam ntiajteb yuav kawg, yuav muaj sijhawm qhov twg “los so”?

Tamsim ntawd, Vajtswv maj mam hais rau kuv lub siab tias: Tsis yog so tas tsis quav ntsej, tiamsis yog “so kom rov qab muaj zog.”

Kuv cia li ras dheev. Tseeb tiag “so” ntawm no tsis yog zaum twj ywm tsis ua dabtsi, tiamsis yog so kom rov qab muaj lub zog hauv Vajtswv. Kuv xav txog lub ntiajteb no tab tom sib tw khiav nrog txoj kev qaug zog, thiab nkag siab tias thaum so… txhua txoj kev siv zog kev khwv yuav xaus. Thaum so raws li Vajtswv lub siab nyiam, peb yuav pom tias Vajtswv foom koob hmoov rau peb hauv nyiaj txiag, sab ntsujplig, nqaij tawv, thiab paub tias txhua feem hauv lub neej, peb yuav saj tau txoj kev muaj yeej.

Kuv pib xav txog txhua lub Pawg Ntseeg uas tau tso dim ntawm lub nra nyav ntawm tej kev lis kev cai, kom rub tau sawv daws tuaj hauv tuam tsev, uas ho tsis yog lawv tuaj vim txoj moo zoo, lossis vim qhov tseeb hauv Tswv Yexus tiag tiag.
Tswv Yexus yuav pauj tag nrho txhua yam rov qab rau Pawg Ntseeg txog tej uas Xatas tau txeeb mus lawm: nyiaj txiag, dag zog, tej txheeb ze, thiab kev kajsiab hauv lub hlwb. Yeebncuab twb nrhiav kev ntaus kom peb swb hauv peb lub cev, peb tsev neeg thiab peb lub siab. Tiamsis Vajtswv hais tias: “Txaus lawm”

Vajtswv txojlus nyob hauv Yaxayas 58:11-12:
“Kuv yuav ua tus coj nej kev mus ibtxhis thiab pub txhua yam zoo rau nej kom txaus nej siab. Kuv yuav pub nej muaj zog thiab noj qab nyob zoo. Nej yuav zoo ib yam li lub vaj uas muaj dej ywg tsis tseg thiab ib yam li tus dej uas ntws tsis paub nqhuab li. Nej haivneeg yuav rov txhim kho tej vajtse uas thaum ub twb puastsuaj tas lawm, thiab yuav rov ua vaj ua tsev rau tej qub chaw. Luag yuav hu nej hais tias yog cov neeg uas txhim kho ntsayeej dua tshiab, thiab yog cov kho tej vajtse uas twb raug puastsuaj tas lawm.”

Ntawm no yog ib lo lus cog tseg zoo. Vajtswv cog lus yuav coj peb kev, foom hmoov thiab tsim dua tshiab, thiab rov qab txhim kho Vajtswv Pawg Ntseeg. Pawg Ntseeg tom ntej yuav yog ib Pawg Ntseeg muaj zog, ua tau ntau txoj haujlwm dua thiab tsis tas yuav siv zog ua kom tas zog thiaj pom tawg paj txi txiv. Vim tej paj txiv nyob hauv Vajtswv txhais tes, thiab Vajtswv yog tus uas ua kom tiav txhua yam.

“Yog tus Tswv tsis ua tsev, ces cov neeg ua tsev tes haujlwm tsis muaj qabhau dabtsi; yog tus Tswv tsis tiv thaiv lub nroog, ces txawm yuav tso tubrog zov khov kho, los yeej tsis muaj qabhau dabtsi (Ntawv Nkauj 127:1).

Mloog cuag li tsis txaus ntseeg. Kuv paub! Tiamsis kuv ntseeg qhov ntawd. Vim tus Vajtswv uas peb pehawm yog tus yim hnub yim foom koob hmoov, yog tus mloog peb tej lus thov thiab ua kom tiav nws tej lus uas nws tau cog lus tseg lawm.

Yog li koj puas xav nrog kuv ntseeg tias Vajtswv yuav ua kom tiav tej yam loj, xav tsis thoob nyob rau lub sijhawm tom ntej? Cia li tos Vajtswv tej haujlwm uas muaj hwjchim zoo uas Vajtswv yuav ua pub rau kuv, rau koj, thiab rau Vajtswv Pawg Ntseeg!

Thov caw nrog kuv peb thov Vajtswv ua ke
Tus Tswv uas muaj kev hlub, hnub no kuv los ntawm Koj xub ntiag thiab so hauv Koj txoj kev ncaj ncees. Thov rov qab tsim kho dua tej yam uas dab ntxwgnyoog tau txeeb thiab rhuav tshem hauv kuv lub neej thiab koj Pawg Ntseeg: uas yog txojkev kaj siab, zoo siab thiab yog lub zog nrog rau tej kev sib raug zoo… kuv ntseeg tias koj yeej tseem tab tom ua haujlwm, txawm yog kuv ntsia tsis pom. Thov pub kom kuv muaj lub siab ntseeg ruaj khov tos Koj tej haujlwm tsim kho kuv lub neej thiab Koj Pawg Ntseeg. Kom peb tau so rau hauv Leej Txiv Koj txhais tes, dhau los ntawm Koj lub hwjchim, peb yuav tawg paj txi txiv rau koj nyob rau tiam ntiajteb yuav kawg no. Kuv thov hauv Tswv Yexus Khetos lub npe. Amees.

Cov kwv tij txhua tus, Vajtswv Pawg Ntseeg tab tom nyob rau ib lub caij uas tshwj xeeb heev, tsis yog ib lub caij sib tw khiav nrog tej tswv yim, tiamsis yog ib lub caij rov qab kho dua tshiab thiab tau so hauv Vajtswv. Thaum lub ntiajteb no qaug zog zis rau txoj kev sib tawm tsam, Vajtswv nqua hu kom peb txhua tus rov qab los rau qhov chaw so, kom dhau ntawm Vajtswv pub rau peb muaj kev kaj siab hauv txoj kev sib raug zoo ua ke nrog Vajtswv, pehawm Vajtswv los ntawm ntsujplig thiab qhov tseeb, lub hwjchim hauv tej lus thov Vajtswv, thiab txoj kev ntseeg uas tsis yoj yees.

Tej zaug koj tsis sawv saum sam thiaj ntawm lub rooj qhuab qhia lossis tsis tuav ib lub meej mom ua thawj coj twg, tiamsis koj yog ib feem nyob hauv Yexus Khetos lub cev, thiab Vajtswv xav ua haujlwm dhau ntawm Koj. Nws tab tom nrhiav cov uas muaj lub siab paub hwm Nws, kom ua tiav tes haujlwm tsim kho Pawg Ntseeg, tsis yog los ntawm txhua tus lub zog, tiamsis yog los ntawm Vaj Ntsujplig lub hwjchim.

Cia li pib los ntawm txoj kev mloog lus: tseg sijhawm nyob hauv Vajtswv, thov Vajtswv rau Pawg Ntseeg, tso siab rau Vajtswv ua tus coj, thiab mus nrog txojkev ntseeg. Thaum so hauv Vajtswv, peb yuav tsis nres twb ywm, tiamsis tab tom nyob rau hauv ntsus kev tsov rog ntawm sab ntsujplig dhau los ntawm lub chaw so ntawm Vajtswv los. Vajtswv yuav nqeg tes ua haujlwm.

Cia li npaj kom txhij, vim lub caij rov qab tsim kho dua twb los txog lawm. Thiab peb txhua tus puav leej muaj feem nyob hauv lub caij ntawd.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.