Bol he ngai di găm kis tơm pah rài lồi dut, tú bơta klăm jơngo jơm dơp jơh mơ Hìu Jum Goh Yang di sơ ngai sơ lơ kong kup kơyan bơh đah bơdih tus đah dơlam. Oă Hìu Jum Goh găm ơm tơm bơta bol glar bơh pơryoai bơh broă lơh, ală bơta bơđơl rơn dap tap sèng, hoi ja ơn phan, pơnjat bơta rơn dap, hala joi pơnah nàng “ kơp jơng” cau dờn Yang digul pah sơ ngai sơ lơ bơt bờtao do. Băl mơ tú hớ, cà rac ò tú lơi ơm mó mơ kứ dơp dơr mut di Hìu Jum Goh nàng cah is mpôl, sò tơm cau dong duh broă Yang, phà tơrlah ală bơta kwơ màng cau dòn Yang di tơm digul kon làng Yang….

Digul ală bơta hớ, jơnau đơs Yang di lơbơn lơbẹ ngan mơ bìng gơnap gơnoar đơs mơ bo he: “ Rlô bol té!” ò di là sang jơh ală bơta, mơya la jơnau hoi ja rê wơl tiah rloo bol ngan, tơm bơta tơlik mat, bơta bơtào wơl mơ gơnap gơnoar să tơm Yang di. Digơlan bol he kơlôi la tơm pah rài lồi dut do kung la tú pal bơđơl ntoat mhăr rlau. Mơya Yang găm hoi ja kon lang Yang di mut tơm bơta bơtào wơl mơ ai wơl ală bơta mơ Satan neh kơnau, nang bơh bơta rlô bol, Hìu Jum Goh rơp nhă ntào pran kơdăng rlau tai.

Ngai do, ngai 11/07/2025, Bơta Hòi Dan Kòp Ngai dan jà ală ồng mò oh mi kơlôi sơnưng bal Jơnau Yàng kơnòm dê bơta dong kơl Martha Noebel dê bơh tơnggume: BƠTÀO WƠL ALĂ BƠTA NEH KONG KƠNAU

Sră Goh: “Yàng Jehôwa rơp kư̆ tề lam bol mê sùm sùm;Kơnràñ lơh bol mê in hừh nùs ală bơta pal càng tòm dô nơm lơgar rañ rsơh,mơ lơh ntìng bol mê in pràn kơldang.Bol mê rơp gơlik gơs kung be dô nơm suơn geh tuh dà,be dô nơm dà croh ò gơs tŭ lơi soat.”(Esai 58:11)

Jơh ală bơta mơ Yang neh yăl tơlik geh lơh sir tơm Bơtau Krist mơ tơm Să Jan Yang di, hớ là Hìu Jum Goh. Tơm bơta hoi dăn tơm hìu jum, Digơna Yang ăn di neh dơp git la Yang găm ơn dô bơta yăl tơnggit tơm nus nhờm ồng di gơwet mơ nam pa rơp tus: hớ la “nam rlô bol”.

“Rlô bol”, iat gơ lơh buơn ngan mơ niam ngan. Mơya ăn neh kơlôi: digul bơta hoi ja bol he păl rcăng tơm pah rài lồi dut, gen lơh be lơi bol he geh tú nàng “ rlô bol” taih?

Tơm tú hớ, Yang neh lơbơn lơbẹ đơs mơ nus nhờm ăn la: ò di rlô bol nàng sang jơh ală bơta, mơ la “ rlô bol nang geh bơtào wơl”.

Ăn gơlơh krơi ngăn. Gen tàng “ rlô bol” tềng do ò di la gùi mó ò lơh bơta lơi, mơ la kơp gơn bơta bơtào wơl tus bơh Yang. Ăn ò tú lơi rlô kơlôi tus dunnia bơdih găm tơm lơh mơ bơta bol glar, mơ dơp git la tú rlô….jơh ală bơta cồng nha lơh broă rơp roh jơh. Tú he rlô bol jat nus kờn Yang Tơm Trồ di, bol he rơp bàn Yang ai lơngai bol he in tơm phan mơna, să jan, mơ git la tơm jơh pơnah tom rài kis he di, bol he ghe dơp git bơta pha lin rlau.

Ăn sơn tơm kơlôi tus Hiu Jum Goh geh dô ple bơh àn kơnjớ bơh ală bơta broă lơh, bơta hoi ja ală cau tus hìu jum, mơ ò tus mơ Jơnau Niam, tus mơ Jơnau Don Song Yang Jesu di.

Yang rơp tơm wơl Hìu Jum Goh in ală bơta mơ Satan neh kơnau: phan mơna, pran kơdăng, cau kờn gơboh, mơ bơta lơngai tơm hwing nus he di. Cau sò tơm he neh joi pơnah nang lơh he in bol glar tơm să jan he di, hìu nhắ mơ nus nhờm bol he di. Mơya Yang găm đơs: “ Tơl rau”.

Jơnau Sră Goh cih tơm Esai 58: 11-12:
“Yàng Jehôwa rơp kư̆ tề lam bol mê sùm sùm;Kơnràñ lơh bol mê in hừh nùs ală bơta pal càng tòm dô nơm lơgar rañ rsơh,mơ lơh ntìng bol mê in pràn kơldang.Bol mê rơp gơlik gơs kung be dô nơm suơn geh tuh dà,be dô nơm dà croh ò gơs tŭ lơi soat. Bol mê rơp bơt wơl ală tiah tơrlah tơrlơm lài òr;mê rơp bơtào wơl ală mơnàng bơh ală rài yau dê;bol mê rơp geh sơnđan la cau rcang wơl ală tiah neh tơrlah tơrlơm,mơ la Cau Bơt Wơl ală gùng lòt tiah cau in ơm.”

Do la jơnau hơ pơgòn niam ngan. Yang hơ rơp tề lam, ai lơngai, bơtào wơl, mơ bơt wơl Hìu Jum Goh Yang di. Hiu Jum Goh tơm pah rài tơ nớ la dô nơm Hiu Jum Goh pran kơdăng, geh lơh oă broă rlau mơ ò càng bơđơl bol glar nàng bàn cồng nha. Tài bơh cồng nha ơm tơm tê Yang, să tơm Yang la Bơtau lơh sir ală broă.
“Dilah Yàng Jehôwa ò bơt bơtào hìu,Gen ală cau chài bơt hìu lơh broă bòl glar ò kwơ.Dilah Yàng Jehôwa ò sền gàr ƀòn dờng,Gen cau drơng mang kơp gàr ò kwơ.”(Đơs Crih 127:1)

Iat bơta hớ gơ lơh ò buơn dòn. Ăn git! Mơya ăn neh dòn bơta hớ. Bơh Yang Tơm Trồ la Bơtau bol he duh khoai la Bơtau ai lơngai sơ lơ rlau, la Bơtau neh iat bơta he hoi dăn mơ lơh sir jơnau Yang neh hơ.

Gen tàng oh mi geh kờn băl mơ ăn dòn la Yang neh lơh ală broă dờng, krơi is tơm tú jơ tơ nớ sơl? Kơp gơn té ală broă gơnap gơnoar mơ krơi is Yang rơp lơh ăn in, oh mi in, mơ Hiu Jum Goh Yang di!

Dan jà bol he dô nùs bal tòm bơta hòi dan:
Khoai Yang kờn gơboh, ngai do kon tus di mpang jơng Yang di mơ rlô tơm bơta don song Yang di. Dăn Yang bơtào wơl ală bơta mơ cà rac neh kơnau, phà tơrlah, tơn roh jơh tơ rài kis kon di mơ tơm Hìu jum Goh Yang di: hớ la bơta lơngai, bơta chờ hợp, bơta pran, mơ ală bơta tơm klac dêt mêr….kon don lah Yang găm lơh broă, jơh di tú kon ò rgơi bàn. Dăn ai kon in nus dòn kơ dơn nàng kơp gơn broă lơh bơt bơtào wơl Yang di tơm rài kis kon mơ hơ đăng iu Jum Goh Yang di. Nàng bol kon geh bơta rlô bol ngan tơm mpang tê kờn gơboh Yang di, bơh gơnap gơnoar tơm bơta bơtao wơl Yang di, bol kon lik gơs cồng nha Yang in rlau tai tơm pah rài lồi dut do. Kon ai sơn đăn Yang Jesu Krist, Amen.

Ơ ală ồng mò oh mi kòñ gơboh, Hiu Jum Goh Yang di găm mut tơm kơnhai pha is, Ò di la kơnhai ntoat pơrlong mơ bơta rcăng hala broă lơh, mơ la kơnhai geh bơtao wơl bơh bơta rlô bol mơ ơm tơm bơta tơlik mat Yang Tơm Trô di. Tú dunnia bol glar bơh tơm lơh tơm pit, Yang hoi kơp nă bol he rê wơl tiah ai bol he in lơngai, bơh tú hớ Yang ai wơl bol he in bơta hon chờ tơm bơta tơm klac dêt mêr mơ Yang, bơta duh khoai bơh hwing nus mơ Joanu Song, gơnap gơnoar tơm jơnau hoi dan, mơ bơta don ò tú lơi tơm gơl.

Digơlan oh mi ò di là cau bơto hala cau at bộ, mơya oh mi la dô pơnah tơm Să Jan Bơtau Krist di, mơ Yang kờn oh mi lơh broă bơh să tơm oh mi. Yang găm joi ală hwing nus git dòn bơr, nang lơh sir bơta bơta bơtào wơl Hiu Jum Goh, ò di bơh pran is kơp nă di, mơ bơh gơnap gơnoar Yang Hwing Goh di.

Sơn tơm té bơh nus don bơr mơng os: lời tú jơ nang ơm Yang, hoi dan Hiu Jum Goh in, don kơ nom bơh bơta tề lam Yang di, mơ lot jat tơm bơta dòn. Tú rlô bol tơm Yang, bol he ò ơm mó, mơ găm nhắ tơm bơta tơm lơh đah hwing bơh bơta lơngai tus bơh Yang. Mơ bơh tú hớ, Yang neh lơh broă.

Rcăng té, bơh kơnhai bơt bơtao wơl rơp tus. Mơ kơp nă bol he geh gơs pơnah tơm kơnhai hớ!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.