Twb ze ze hnub koob tsheej Tswv Yexus yug, peb yuav txais tau txoj kev zoo siab thiab kub siab lug tshaj txhua yam. Tiamsis nyob rau ib qhov twg ntawd, ntawm tej tib neeg lom zem xauv npo ntawd, ntau zaug peb yeej hnov cuag tsis muaj dabtsi thiab qaug zog, tsis nkag siab koob tsheej Tswv Yexus yug tiag muaj lub ntsiab li cas rau yus. Thiab tej zaum zoo li ntawd, peb lub siab yuav tau chwv los ntawm ib yam dabtsi twg?

Hnub no, yog hnub 20/12/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Janet Ruth dhau ntawm Zaj kawm ROV QAB NRHIAV LUB NTSIAB HAUV KOOB TSHEEJ TSWV YEXUS YUG.

“Rau qhov Vajtswv hlub neeg ntiajteb kawg li, nws thiaj txib nws tib Leeg Tub los rau hauv ntiajteb. Tus uas ntseeg nws Leej Tub, tus ntawd yuav tsis tuag, tiamsis yuav tau txojsia ntev dhawv mus ibtxhis” (Yauhas 3:16).

Koob tsheej twb los ze. Tej pob khoom muab los tsab zam thaum lub caij nplooj ntoo zeeg twb tshem mus, zam chaw rau tej teeb cig lam lug, tsob ntoo lossis yawm laus Noel caij tus nees zag. Ntawm no yog lub caij ntawm rooj noj rooj haus, tej kev npaj hu nkauj thiab tej rooj sib ntsib ntawm tsev neeg. Tiamsis, tsis yog tus twg twb kub siab lug rau koob tsheej Tswv Yexus yug, tshwj xeeb nyob rau ntawm tus uas saib koob tsheej Tswv Yexus yug yog cov ntseeg tej kevcai xwb.
Ob peb xyoo dhau los, muaj ntau qhov chaw muag khoom loj nyob tebchaws mekas lawv yuam kom cov neeg muag khoom tsis tau cai hais “Nyob zoo koob tsheej Tswv Yexus yug’ tshuav cov tsev kawm ntawv ces lawv hu lub caij no ua lub caij “ntuj no” pauv qhov uas hais tias “lub caij so koob tsheej Tswv Yexus yug” ntau lub nroog thiab ntau cheeb tsam kuj tsis npaj koob tsheej. Koob tsheej Tswv Yexus yug cuag li tab tom ua poob lub suab npe thiab tsis nrov li yav dhau los. Muaj ntau yam ua rau tib neeg tsis nyiam koob tsheej Tswv Yexus yug. Ntawm cov tib neeg tsis muaj vajtswv, lawv saib Tswv Yexus yog ib tug neeg hauv keeb kwm. Tshuav cov neeg uas ntseeg lwm txoj kev ntseeg, Tswv Yexus cuag li tsis cuam tshuam txog lawv lub neej. Txawm yog nyob hauv cov neeg uas lawv cim civ lees hais tias lawv yog cov ntseeg Vajtswv, muaj ntau tus kuj tsis ntseeg tias Tswv Yexus yog Vajtswv los yug ua neeg, lossis saib qhov ntawd tsis tseem ceeb rau yus txoj kev ntseeg.

Twb yog vim qhov sib txawv nyob rau hauv txoj kev ntseeg ntawd, ntau tus thiaj nrhiav kev ua rau kom koob tsheej Tswv Yexus yug yooj yim rau sawv daws los ntawm siv tus neeg daus, tus yawm laus Noel lossis tej cim txawv los hloov rau daim duab lub dabzaub thiab Tswv Yexus. Tus yawm laus Noel thiab tus nees zag – yeej ib txwm tsis muaj dabtsi cuam tshuam txog cov ntseeg Vajtswv txoj kev ntseeg, tiamsis yim hnub ho yim tshwmsim ntau, tshuav Tswv Yexus, Malis thiab Yauxej tsis tshua muaj ntau. Tej zaug lub ntiajteb tab tom siv zog pauv koob tsheej Tswv Yexus yug dhau los ua ib lub “koob tsheej” rau txhua yam, qhov chaw uas tib neeg tuaj ua ke zoo siab, txais yuav tiamsis ho hnov qab Tswv Yexus, yog tus nruab nrab ntawm lub koob tsheej no. Vajluskub twb qhia rau peb paub txog qhov tseeb ntawm lub koob tsheej Tswv Yexus yug. Ntawd yog vim Vajtswv hlub tib neeg ntiajteb ntau. Yauhas 3:16 sau: “Rau qhov Vajtswv hlub neeg ntiajteb kawg li, nws thiaj txib nws tib Leeg Tub los rau hauv ntiajteb. Tus uas ntseeg nws Leej Tub, tus ntawd yuav tsis tuag, tiamsis yuav tau txojsia ntev dhawv mus ibtxhis” Tshuav Mathais 1:21 qhia paub tias Tswv Yexus los yug yog “tso peb dim ntawm peb tej kev txhaum.”

Qhov tseeb tiag tsis yog cov tsis ntseeg thiaj ua poob lub ntsiab tiag ntawm koob tsheej Tswv Yexus yug xwb, tiamsis ntau zaug cov ntseeg Vajtswv los kuj ib yam li ntawd, twb yog vim li no txhua zaug koob tsheej Tswv Yexus yug los txog peb lub siab thiaj yuav tau ntuas txog Vajtswv txoj kev hlub tias Vajtswv hlub txog tib neeg thiab peb tus kheej. Peb nyob hauv txoj kev “puas tshuaj” tiamsis thaum no tau “dim hauv kev txhaum los”. Dhau los ua Vajtswv tus menyuam. Thiab los ntawm Vajtswv txoj kev hlub uas Vajtswv cog lus tias “yog leej twg ntseeg” Nws tus tub yuav tau txojsia ntev dhauv mus ib txhis.” Paulus txais tau Vajtswv txoj kev hub loj mus txog qhov uas yeej tsis muaj ib yam dabtsi yuav cais tau yawg tawm hauv txoj kev hlub ntawd. Yawg sau: “Rau qhov kuv paub tseeb hais tias tsis muaj ib yam dabtsi yuav cais tau peb ntawm Vajtswv txojkev hlub, tsis hais tuag lossis kev ua neej nyob, cov timtswv lossis cov uas muaj hwjchim kav saum nruab ntug, nimno lossis yav tom ntej saum nruab ntug lossis hauv nruab tivtxwv, lossis ib puas tsav yam uas yog Vajtswv tsim yeej tsis muaj ib yam dabtsi cais tau peb ntawm Vajtswv txojkev hlub uas nws pub Yexus Khetos uas yog peb tus Tswv los tuag theej peb lub txhoj” (Loos 8:38-39).

Thiab thaum uas tau paub Vajtswv txoj kev hlub tiag lawm, peb thiaj hnov nco Vajtswv tshav ntuj thiab tsis muaj txojkev tsis txaus siab txog koob tsheej Tswv Yexus yug. Peb kuj tsis tas yuav siv zog ua rau kom koob tsheej yooj yim txav mus ti los ntawm ua rau lub ntsiab lus ploj zuj zus, rau qhov tsis yog tias txhua tus puav leej yuav zoo siab txais yuav qhov khoom plig cawmdim los ntawm Vajtswv los. Nyob ntawm cov neeg uas tsis tau ntseeg Vajtswv, koob tsheej Tswv Yexus yug tej zaug tsuas zoo li txhua hnub, tsuas txawv qhov uas muaj kev zoo siab dua me ntsis. Twb yog vim li no, yog ib tug ntseeg, yog peb tsuas hais lo lus “Nyob zoo koob tsheej Tswv Yexus yug” lossis “Koob tsheej tau txais kev kaj siab lug” tsis kam qhia Vajtswv rau lawv, peb kuj tsis txawv qhov uas hais rau lawv tias yuav ncuav noj mas, tshuav lawv tab tom pluag tsis muaj abtsi noj. Yog li, pauv qhov uas hnov nyuaj siab thiab tag kev cia siab rau cov neeg uas tsis tau nkag siab txog lub ntsiab ntawm koob tsheej Tswv Yexus yug, koj cia li mus cuag Vajtswv thiab ua tim khawv qhia rau lawv. Tej zaug lawv kuj yog cov neeg tab tom “pluag” hauv sab ntsujplig, tab tom nrhiav kev cia siab thiab kev kaj siab uas tsuas yog Vajtswv xwb thiaj muaj cuab kav pub tau rau lawv. Thiab tsis muaj leej twg txawv, Vajtswv tab tom siv koj los hais qhia rau lawv paub txog Vajtswv!

Thov caw nrog kuv peb thov Vajtswv ua ke: Tus Tswv, thov pab kom kuv tsis muaj hnub hnov qab koj txoj kev hlub loj uas koj tseg rau kuv. Txawm yog kuv yuam kev thiab puas tshuaj los koj yeej hlub tshua thiab cawm kuv. Thov kom dhau ntawm koob tsheej Tswv Yexus yug xyoo no, kuv lub siab yuav hlub koj dua, thiab txiav txim siab qhia koj rau tej neeg ib ncig kuv. Kuv thov hauv Tswv Yexus Khetos lub npe, Amees.

Cov kwv tij, tseem tshuav yam dabtsi zoo dua thiab thaum uas peb xav txog Vajtswv txoj kev hlub thiab tau tshoov siab kom tawm mus ua tim khawv txog Vajtswv rau lub koob tsheej Tswv Yexus yug xyoo no! Yog li, cia koj lub siab xav txog lub ntsiab tiag ntawm koob tsheej Tswv Yexus yug thiab pib thov Vajtswv rau ib tug neeg twg uas tsis tau ntseeg Vajtswv uas koj paub. Ua siab tawv qhia txojmoo zoo rau tus neeg ntawd hauv thiv no, kom dhau ntawm ib pluas noj, ib txoj kev sib tham, lossis ib lo lus caw tuaj koom Pawg Ntseeg ua koob tsheej. Txawm yog los ntawm txoj kev twg, los yuav nthuav tawm lub ntsiab lus ntawm txoj kev hlub thiab kev cia siab nyob rau tej hnub tshwj xeeb no. Vim koj twb txais tau txoj kev hlub lawm, yog li yuav tau qhia txoj kev hlub ntawd rau lwm tus.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.