Lub caij Koob Tsheej, peb pheej nco txog Ma-lis yog ib tug mos muag, muaj kev thaj yeeb, puag Tus Menyuam Vaj Yexus rau hauv nws txhais npab.Tiam sis muaj tsawg leeg tig los xav txog tus poj niam ntawv lub neej tom ntej, yog ib lub neej muaj kev sim siab, tu siab thiab lub kua muag. Tej zaum “koob hmoov” uas Vaj Tswv pub tsis yog zoo li ib txoj kev uas puv nho tej paj zoo nkauj, tiam sis yog ib txoj kev me thiab nqaim uas ntxhab thiab nce toj tsis yooj yim mus. Qee zaus, yog tej lub sij hawm uas yus quag zog thiab muaj kev nyuaj siab tshaj plaws, peb thiaj li paub txog tias yus yog ib tug uas txais tau koob hmoov thiab muaj kooob hmoov, vim Vaj Tswv yeej nyob nrog nraim peb.

Hnub no, yog hnub 21/12/2025, peb kev Thov Vaj Tswv Txhua Hnub caw koj los nrog peb kawm thiab mloog Vaj Tswv Txoj Lus ntawm tus sau Kay Camenisch lub ntsiab TAU KOOB HMOOV THIAB MUAJ KOOB HMOOV.

“Tus uas tau txais kev hlub ‘e, koj cia li noj qab nyob zoo. Tus Tswv nrog nraim koj.” (Lu-kas 1:28)

Tus tubtxib saum ntuj los hais rau Maivliag tias, “Tus uas tau txais kev hlub, nrog koj zoo siab! Vaj Tswv nrog nraim koj!” (Lu-kas 1:28). Tom qab ntawd, Elixanpe uas yog Yaus-has niam kuj hais rau Malis: “Hauv ib tsoom pojniam koj tau hmoov zoo” (Lu-kas 1:42). Thaum Vaj Tswv hais li ntawd lawm, leej twg yuav kam los tawm tsam Nws? Txawm yog li ntawd los, kuv pheej rov nug kuv tias: Xyov Malis puas hnov tseeb tias yus “tau txais koob hmoov” thiab “muaj hmoov” tiag?
Yeej tsis muaj leej twg yuav tsis lees tias, tau xaiv los ua niam ntawm sab cev nqaij daim tawv ntawm Vaj Tswv Leej Tub yog ib qho muaj koob meej thiab koob hmoov loj kawg nkaus. Tiam sis Malis lub neej yeej tsis muaj ib qho yooj yim lossis “tau txais kev pab tshwj xeeb” li.

Vaj Tswv Txoj Lus qhia peb paub tsawg tsawg ntawm Malis xwb los, tiam sis qhov uas Malis nws teb tus tim tswv lo lus twb txaus qhia rau peb paub tias nws yog ib tug hwm Vaj Tswv, muaj lub siab mos muag thiab muaj lub siab mloog lus. Tseeb tiag neeg zej zog yeej tsis xav tias Malis lub cev yuav “xeeb tub li ntawd.” Qhov uas tias yog “koob hmoov” tau ua rau Malis muaj lub suab npe tsis zoo, thiab tag nrho nws lub tsev neeg raug lub npe ntawd thiab txaj muag.

Tej xwm yeej tsis tau li ntawd. Malis tau raug nrog Yau-xej mus txoj kev deb, zaum saum tus nees luav lub nraub qaum thaum uas twb yuav txog nws lub caij yug me nyuam. Vim tias nrhiav tsis tau chaw so, Malis tau yug me nyuam rau hauv lub nkuaj tsiaj, tso tus me nyuam pw rau hauv lub dab zaub. Koj sim xav seb thaum ntawd Malis puas tseem hnov tias yus yog tus tau txais koob hmoov?

Tsis tau tas thiab, tom qab nyuam qhuav yug me nyuam, nkawv yuav tsum tau khiav rau thaum yav tsaus ntuj, mus txawv teb chaws, kom yuav tiv thaiv tau tus me nyuam Yexus txhob raug tua pov tseg.

Muaj tseeb tias Tus Tswv Cawm Seej Yexus yog ib tug me nyuam zoo tshaj plaws, tiam sis kuv rov nug kuv tias, puas muaj lub sijhawm twg uas Nws cov kwv tij hnov khib siab, ua rau hauv lub tsev neeg tsis muaj txoj kev siab haum xeeb? Thiab thaum uas Tus Tswv Yexus tau 12 xyoo, Tswv Yexus tau nyob hauv tsev lub Tuam Tsev tau peb hnub tsis qhia rau Nws niam Nws txiv paub, ua rau Malis txhawj xeeb thiab mob siab kawg. Lub sij hawm ntawd yeej tsis zoo li qhov uas tau “koob hmoov” hlo li.

Tab sis tej zaum cov xwm txheej ntawd ua rau Malis muaj lub siab xav nyob ze nrog nws tus tub heev dua. Mus txog thaum uas nws pom tim ntsej tim muag Tswv Yexus raug liam, raug thuam, raug plawm thiab raug ntsia saum ntoo khaub lig, txoj kev mob siab ntawd yeej tsis muaj leej twg tiv taus. “Tau txais koob hmoov? Thiab muaj hmoov?” Yeej tsis yooj yim thaum uas koj tab tom sawv hauv qab tus ntoo khaub lig, saib nws tus tub tuag rau txoj kev tsis ncaj ncees.

Txawm li ntawd los… Malis yeej yog tus tau txais koob hmoov thiab muaj koob hmoov tshaj plaws ntawm cov poj niam. Nws tau raug xaiv los yug Tus Tswv Cawm Seej. Txawm li ntawd los, lub suab npe ntawd kuj nrog nraim txoj kev mob siab. Thiab qhov “koob hmoov” ntawd thiaj yog qhov pib ntawm kev mob siab.
Saib ntawm Malis lub neej, kuv nco dleev tias txhua zaus uas kuv thov Vaj Tswv foom koob hmoov, kuv tsuas xav txog tej qhov zoo rau kuv tus kheej: Nyiaj txiag, koob meej, tej kev yooj yim lossis txhua yam zoo hauv lub neej. Kuv twb tsis nco qab tias koob hmoov Vaj Tswv pub tsis yog los pab yus lub hom phiaj xwb, tiam sis yog los ua kom Vaj Tswv lub hom phiaj tiav. Thiab tej zaum, tej koob hmoov ntawd nrog rau tej kev sim siab.

Puas muaj lub sijhawm uas peb xav tau koob hmoov tiam sis tsis xav kom raug tej kev txom nyem? Tiam sis rov qab nug tias, tus neeg loj ntawm sab kev ntseeg hauv Vaj Tswv Txoj Lus tsis tau raug txoj kev sim siab twg li lov? Kev txom nyem yog ib qhov yuav tau ntsib thaum koj nrog Tus Tswv mus. Tswv Yexus los kuj hais tias peb yuav raug tej kev txom nyem. Thaum uas peb hla dlau tej kev txom nyem, peb yuav tau loj hlo ntawm txoj kev txawj ntse, thiab ua neej qhia tshwm tau tus yam ntxwv ntawm Tus Cawm Cawm Seej.

Yog peb pheej caum lub neej yooj yim, peb yuav tsum nco txog cov lus uas tus tim tswv hais rau Malis: “Vaj Tswv nrog nraim koj!” Yog peb sib koom tes rau hauv Vaj Tswv tes hauj lwm, tsis yog peb caum yam uas peb xav tau, ces peb yuav tau txais koob hmoov tiag tiag. Thiab thaum uas tej koob hmoov nrog rau tej kev sim siab, peb thiaj paub tso siab rau Nws lub hwjchim thiab kev pub txhua yam. Tseem tshuav ib yam tseem ceeb thiab, ntawd yog qhov uas yus yuav tsum paub tseeb tias yus kuj tau koob hmoov thiab muaj hmoov. Yog koj tso siab rau Tus Tswv Yexus, ces Nws nyob hauv koj. Zoo yam li Malis, peb los kuj tau xaiv los ris Nws txoj sia ntawm Vaj Tswv Leej Tub mus rau lub ntiaj teb.

Thiab ib yam li Malis, peb kuj muaj lo lus cog tseg ruaj khov tias: Tus Tswv nrog peb nyob. Nws pub koob hmoov rau peb txhua hnub. Txawm tias lub neej tsis yog thaum twg kuj yooj yim, Tiam sis Nws tau cog lus tias yuav tsis muaj hnub tso lossis tsi nco qab Nws cov me nyuam li.

Txawm tias peb tab tom ntsib kev sim siab twg, cia li tso siab tias Tus Tswv yuav ua rau txhua yam kev sib koom tes muaj nqis rau cov uas hlub Tus Tswv thiab tau hu raws li Vaj Tswv lub hom phiaj. Malis txoj kev mob siab loj kawg nkaus, tiam sis sim xav seb: twb yog vim raug kev tsim txom ntawd, tag nrho tib neeg ntiaj teb tau txais txoj moo zoo zoo tshaj plaws.

Yog li ntawd, thaum peb ua koob tsheej nco txog Tus Tswv Cawm Seej Yexus, cia li zoo siab txawm tias peb yuav nyob rau hauv tej kev sim siab, vim peb kuj yog ib tug neeg tau txais koob hmoov thiab muaj koob hmoov.

Thov caw nrog kuv peb thov Vajtswv ua ke: Vaj Tswv Tus uas kuv hlub! Vaj Tswv aw, tej zaum nyuam yaus cia li muab tej koob hmoov nrog rau tej kev yooj yim nyob rau hauv lub neej no, thiab kub tsis nco qab tias koob hmoov tiag tiag yog los ntawm Koj los, los ntawm Koj lub hwj chim puv npho rau hauv nyuam yaus lub siab. Thov Tus Tswv pab kom nyuam yaus yuav nco tau tias Vaj Tswv yeej nyob nrog nraim thaum nyuam yaus ntsib tej kev txhawj xeeb hauv lub neej. Txawm tias nyuam yaus yauv qaug zoo los, nyuam yaus tseem yuav hais tias, nyuam yaus yog ib tug tau txais koob hmoov thiab muaj hmoov, vim Vaj Tswv twb tau xaiv nyuam yaus, thiab Vaj Tswv yeej tsis muaj hnub tso nyuam yaus tseg. Nyuam yaus taij thov thiab koom siab ntawm Tus Tswv Yexus khiav tos lub npe, Amees.

Cov kwv tij, lub koob tsheej xyoo no, tej zaum koj tab tom nyob rau hauv ntu sij hawm raug txom nyem hauv lub neej, li thaum uas txhua yam khiav tsis tau zoo raws li yus siab xav, thiab kev thov Vaj Tswv zoo li tsis hnov Vaj Tswv teb. Tiam sis cia li nco ntsoov tias, koob hmoov tseeb tsis yog txhua yam yuav khiav mus tau zoo raws li yus siab xav lossis txhua qhov tau txais raws li yus siab xav. Kuj zoo sia Malis thaum ub, thaum uas peb tau xaiv los coj Nws txoj kev kaj, kev cia siab thiab kev khuv leej ntawm Tus Tswv Cawm Seej rau lub ntiaj teb. Nyob rau Koob Tsheej xyoo no, cia li qee koj lub sij hawm los mloog Vaj Tswv lub suab plij koj lub siab, yam li Malis thaum ub: “Tus uas tau txais kev hlub ‘e, koj cia li noj qab nyob zoo. Tus Tswv nrog nraim koj.” Thiab tsuas li ntawd xwb, tsuav Vaj Tswv puv npho xwb, peb txhua tus yog neej tau txais koob hmoov thiab muaj koob hmoov lawm!
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.