Hnub no yog hnub kawg ntawm xyoo 2025, thiab tsis ntev xwb, lub qab ntuj no yuav sib nrog suav sijhawm hla mus rau lub xyoo tshiab 2026. Xyoo laus xaus mus, ua rau peb muaj ntau kev xav. Lub xyoo tag los, ntshe peb twb ntsib dhau ntau kev sim siab, txomnyem, peb txhais taw muaj qee zaug tau ntog ntawm txojkev mus hauv lub neej. Yog li thaum hla mus rau xyoo tshiab lawm, koj ntshaw yam dabtsi tshaj? Kev sim siab thiab kev txomnyem kuj tseem nyob ntawd, tiamsis peb tsimnyog paub meej yam dabtsi kom ua tau lub siab ruaj khov mus rau tom hauv ntej?

Hnub no, yog hnub 31/12/2025, kev thov Vajtswv txhua hnub thov caw sawvdaws nrog kawm Vajtswv txojlus ua ke nrog tus qhia Anne Ferrell Tata dhau zaj kawm:
RUAJ SIAB RAU XYOO TSHIAB.

“Tiamsis nej yuav tsum xub nrhiav Vajtswv lub Tebchaws thiab ua raws li Vajtswv lub siab nyiam tso, Vajtswv mam muab tej no ntxiv rau nej” (Mathais 6:33)

Nyob rau lub Koobtshej tag los no, ntshe peb yeej tau ntuas tau txog ntu Vajluskub hauv Mathais 1:23 tias: “Saib maj, ib tug ntxhais hluas dawb huv yuav xeeb mivnyuas hab yug tau ib tug tub, hab puab yuav tis lub npe hu ua Emanu‑ee.” Mathais rov sau txog Yaxayas cov lus hais ua ntej ntau puas xyoo txog tus Tswv Yexus, yog tus tau hu ua Emanu-ees, txhais tias “Vajtswv nrog peb nyob”. Nqe Vajluskub no tsi yog tsuas tau nyeem rau lub sijhawm koobtsheej xwb, tiamsis rau thaum uas yuav hla rau lub xyoo tshiab, ua rau peb muaj kev cia siab, rau qhov peb paub tseeb ib qho tsis hloov pauv, ntawd yog “Vajtswv nrog peb nyob. Tseeb tiag, Vajtswv twb nrog peb nyob lub sijhawm yav tag los, thiab peb ruaj siab tias Tus Tswv kuj tseem yuav nrog peb nyob rau lub xyoo tshiab no.

Tsis ntev los no, kuv tau ntuas los ntawm lub ntsiab lus no thaum paub tias kuv tej haujlwm yuav hloov pauv rau lub xyoo tshiab. Tej zaug kuv yuav ua haujlwm nrog ib tug thawjcoj tshiab thiab ntsib tej kev sim siab tshiab. Kuv hnov txhawj thiab nyuaj siab, rau qhov tej ntawd puav leej tshiab rau kuv tug kheej. Tej lus nug “yog tias” tau tshwm los hauv kev txojkev xav “Yog tias kuv ua tsis zoo ces yuav ua cas? Yog tias kuv ua tsis tau raws li luag lub siab nyiam ne?” Kuv paub tias tej kev xav ntawd yeej tsis pab tau dabtsi, tsuas ua rau kuv txhawj ntau xwb.

Peb leejtwg los yeej muaj kev txhawjxeeb. Vajtswv paub peb mus tsis tau ib leeg, thiab Nws xav nrog peb mus uake txhua hnub. Yog li Tswv Yexus thiaj ntuas peb hauv Mathais 6:34 tias “…nej tsis txhob txhawj rau tagkis, rau qhov tagkis yeej muaj kev txhawj txaus rau tagkis lawm…” Tus Tswv qhia tias Leejtxiv saum ntuj twb paub ua ntej tag txua yam uas peb cheemtsum. Tus Tswv samhwm: “Nej Leej Txiv tus uas nyob saum ntuj ceebtsheej yeej paub hais tias nej yuav tsum muaj tej no” Tus Tswv txhawb peb tsis txhob txhawj rau tagkis tiamsis yuav tsum xub nrhiav Vajtswv lub tebchaws ua ntej: Tiamsis nej yuav tsum xub nrhiav Vajtswv lub Tebchaws thiab ua raws li Vajtswv lub siab nyiam tso, Vajtswv mam muab tej no ntxiv rau nej.”

Tseeb tiag, xub nrhiav Vajtswv lub tebchaws yuav tsum yog peb qhov haujlwm xub thawj. Peb tsis tag yuav cim civ siv zog ua txhua yam, rau qhov Leejtxiv saum ntuj yeej paub meej yam peb cheemtsum. Nws hlub thiab muaj homphiaj zoo rau peb txhua tug. Nws tau txib Nws tib leej Tub, tus uas tau hu Emanu-ees los ntuas peb tias Tus Tswv tseem nyob ntawd, txawm lub sijhawm yuav zoo li cas.

Thaum rov tig mus saib lub sijhawm dhau los, Vajtswv ntuas kuv tuas puas muaj thaum twg Vajtswv ua rau kuv tu siab? Puas muaj thaum twg tus Tswv tso kuv tseg? Yog tamsim no txhua yam hloov pauv, Vajtswv puas tseem nrog kuv nyob. Txawm yog thaum ntsib qhov zoo lossis qhov phem, Vajtswv yeej nyob ntawd nrog nraim kuv txhua kaujruam.

Sijhawm no, thaum peb yuav xaiv txhua txojkev thiab tig mus saib yav dhau los, kuv lub siab tau tso siab lug. Kuv yuav mus rau hauv lub xyoo tshiab los ntawm lub siab zoo siab, rau qhov kuv paub tias Tus Tswv yeej nrog nraim kuv thiab cob qhia kuv. Nws txojlus hais tias: ““Nej cia li mus sawv tom kev tshuam ntsia thiab nug luag hais tias tej qub kev thaum ub nyob qhov twg thiab txojkev uas zoo dua ntais yog txoj twg? Nej cia li taug txoj ntawd, nej thiaj yuav tau nyob kaj siab lug.” (Yelemis 6:16)

Thaum yuav mus rau xyoo tshiab, peb tsis txhob hnov qab sojnruam yus txoj qub kev, saib txoj twg yog txoj zoo thiab uake mus rau ntawm txojkev zoo ntawd. Txhob txhawj ntau txog tagkig tiamsis xub nrhiav Vajtswv lub tebchaws ua ntej. Cia li zoo siab rau qhov Vajtswv tabtom nrog peb nyob.

Thov caw nrog kuv peb thov Vajtswv ua ke: Kuv Leejtxiv siab zoo, yog Tus Tswv muaj kev khuvleej thiab nyob nrog kuv ib xyoo tag los. Thaum yuav hla mus rau lub xyoo tshiab no, kuv ntseeg tias Koj yeej nrog kuv mus thiab yuav foom koob hmoov rau kuv. Thov qhia kom kuv paub txo hwjchim thiab muab kuv lub neej fij tagnrho rau Koj ua tug tuav. Kuv ntseeg siab rau Koj txawm txhua hnub kuv taug yuav txomnyem lossis tau zoo. Kuv thov txhua lo lus los ntawm Tswv Yexus Khetos lub npe, Amees.

Ib tsoom phoojywg, nyob rau hnub kawg ntawm xyoo 2025 no, peb cia li siv sijhawm los ua tsaug thiab nco txog txhua yam Vajtswv tau ua rau peb rau ib lub xyoo dhau los; tsis tag, cia li ua siab khov kho mus ntxiv rau ib lub xyoo tom ntej vim muaj Vajtswv tej lug cog tseg nrog nraim peb. Txawm xyoo 2025 tag los yog kev zoo siab lossis nyuaj siab, tiamsis txhov hnov qab tias Vajtswv tseem hlub tseem nrog nraim peb mus. Lub sijhawm tshwjxeeb no, thov caw nej txhua tug nrog peb tsa suab qhuas thiab ua tsaug rau Vajtswv tej koob hmoov uas ntws los rau peb txhus tus tsis tu.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.