Koj puas tau hnov txaj muag tsis kam qhib yus lub suab hu nkauj qhuas Vaj Tswv, tsuas yog vim xav tias yus hu nkauj tsis zoo? Koj hu nkauj nrov me me thaum pehawm Vaj Tswv, lossis tsuas yog hu hauv siab xwb vim ntshai tsam ua tab kaum rau lwm tus. Hu nkauj qhuas Vaj Tswv peb yuav tsum muaj lub suab zoo, tiam sis Tus Tswv kuj niaj hnub nrhiav ib lub siab ncaj ncees. Thaum koj kam tsa lub suab hu nkauj, ces lub sijhawm ntawd, tag nrho ntuj ceeb tsheej tab tom koom nrog koj ua ke hauv txoj kev zoo siab pehawm Vajtswv.

Hnub no, yog hnub 29/12/2025, peb kev thov Vaj Tswv Txhua Hnub caw koj los nrog peb mloog thiab xav txog Vaj Tswv Txoj Lus ntawm tus sau Bill Gaultiere dlau lub ntsia lus FIJ VAJ TSWV LOS LUS QHUAS.

“Nej ib tug yuav tsum qhia ib tug raws li tej lus uas nyob hauv Daviv phau nkauj, tej zaj nkauj qhuas Vajtswv thiab tej zaj nkauj uas cov ntseeg hu ua Vajtswv tsaug. Thaum nej hu tej zaj nkauj ntawd, nej yuav tsum hu ntawm lub siab xyivfab hlo.” (Efexaus 5:19)

Ob peb xyoos dhau los, kuv tau ua ib yam uas kuv tsis tau ua dua li yav tas los: qhuas Vajtswv los ntawm cov ntsia lus hauv Phau Ntawv Nkauj! Kuv yeej xav tsis thoob thaum kuv pom tias qhov ntawd coj tau koob hmoov loj npaum li cas. Kuv tus ntsuj plig mus cuag tau Vajtswv, kuv lub neej thov Vajtswv tau tob dua qub, kuv lub hlwb qhib txog txhua yam tshiab ntawm sab ntsuj plig, thiab kuv lub ntsej muag yeej ib txwm muaj kev luag ntxhi!

Kuv pom tias thaum kuv hu nkauj raws cov ntsiab lus hauv ntawv Phau Ntawv Nkauj, txawm yuav nyob qhov twg los tau – txawm yog hauv chav tsev da dej, thaum tab tom taug ntaiv, tsav tsheb, taug kev hauv vaj, lossis yog thaum tab tom sawv ua kab tos txog yus – txhua qhov chaw ntawd muaj peev xwm hloov ua ib ‘lub tuam tsev’ uas puv npo kev zoo siab thiab qhuas Vajtswv! Thiab qhov no tseem yog txawm tias thaum kuv tab tom poob siab, txhawj xeeb, ntxhov siab, chim siab lossis kho siab.

Kom koj to taub tias kev hu nkauj qhuas Vajtswv ntawm cov ntsiab lus hauv Phau Ntawv Nkauj muaj nqis rau kuv npaum li cas, koj yuav tsum paub tias yav tas los kuv yeej txaj muag thiab ntshai heev thaum ua qhov no, vim kuv tsis paub hu suab nkauj raws lub suab taub. Kuv yog hom neeg uas tsuas kam hu nkauj me me hauv lub tuan tsev xwb, rau siab ua raws li lwm tus lub suab hu kom txhob ua tab kaum rau leej twg thaum pehawm Vajtswv. Thiab thaum kuv nyuam qhuav pib hu nkauj nrov tuaj, kuv yeej dov ntsiab muag tig saib txhua qhov chaw ib ncig ntawd kom paub tseeb tias tsis muaj leej twg nyob ze kuv li ib puas tshim!

Tej zaum koj kuj to taub zoo txog txoj kev xav – yuav tsum hla dhau qhov kev txaj muag ntawd. Kuv txiv mas to taub qhov no heev. Thaum nws kawm qib rau, pab hu nkauj tab tom npaj hu nkauj qhuas Vaj Tswv rau hnub Yexus los yug. xhua tus puav leej zoo siab thiab xav tau koom tes hauv txoj kev ua koob tsheej xyoo ntawd! Kom yuav hu tau zoo, tus xibfwb qhia yuam cov menyuam ib tug zuj zus sim hu nkauj. Thaum txog kuv txiv lub sijhawm, nws hu nkauj nrog kev zoo siab heev, tab sis tus xib fwb tsa muag ntsia thiab hais tias: ‘Koj yuav tsum mus rau pab hu nkauj hu ua “Tsis Muaj Ntaus Suab” !

Qhov ntawd yeej tu siab heev, txij thaum ntawd los kuv txiv thiaj li ntseeg tias nws lub suab hu nkauj tsis ua rau Yexus Khetos txaus siab, ces nws tsis kam hu nkauj ntxiv lawm. Tab sis qhov tseeb mas, Tswv Yexus yeej tsis ua li ntawd! Nws yeej tsis tau muab leej twg txo mus rau pab ‘Tsis Muaj Ntaus Suab’ li. Koj tsis txhob saib qhov uas nws siab thiab zoo nraug xwb. Kuv tsis yuav tus ko, rau qhov kuv tsis saib neeg li noobneej saib. Neeg saib lub cev ntaj ntsug, tiamsis kuv saib neeg lub siab (1 Xamuyees 16:7). Thaum peb hu nkauj qhuas Vajtswv, Nws tsis ntsuas peb lub suab hu nkauj. Tab sis Nws mloog peb lub siab, thiab Nws zoo siab txais txoj kev hlub uas peb qhia rau Nws (Yaxayas 29:13). Thaum peb tsa peb lub suab ua tsaug thiab qhuas Vajtswv lub npe, qhov ntawd ua rau Nws zoo siab – tseeb tiag qhov ntawd mus txuas tau Tus Tswv lub siab!

Yog li ntawd ua cas ib tug uas “Tsis Muaj Suab Taub” zoo li kuv ho muaj peev xwm hu cov ntsia nkauj hauv phau Ntawd Nkauj rau pem hauv ntej coob leej tau hnov? Kuv hla dhau kev ntshai thiab kev txaj muag ntawd li cas? Kuv yeej tau raug luag thuam thiab luag vim hu nkauj tsis zoo, tab sis nim no kuv yeej txaus siab txais tos cov ntawd, vim kuv paub tseeb tias yam kuv tab tom ua ntawd ua rau Vajtswv zoo siab. Yam dab tsi ua rau kuv muaj lub siab khov kho tsa lub suab hu nkauj qhuas Vaj Tswv txhua hnub?

Kuv ua tau qhov ntawd thaum uas kuv ntsib cov lus puag thaum ub. Xyoo 1728, tus xibhwb William Law tau sau cov lus uas tob kawg nkaus, tau hloov pauv tag nrho kuv txoj kev thov Vajtswv thiab hu nkauj hauv phau Ntawv Nkauj.

“Tsis muaj ib yam dab tsi pab rau koj lo lus thov Vajtswv muaj sia thiab ncaj ncees tshaj li, kev hu nkauj qhuas Vajtswv nrog cov ntsiab lus hauv Phau Ntawv Nkauj. Qhov ntawd thiaj ua rau lub siab uas txias zias rov sov taus, sab ntsuj plig tau ntxuav tshua yam kev xav tsis ncaj ncees, thiab qhib lub qhov rooj coj koj los ze dua hwjchim ci ntsa iab saum ntuj ceeb tsheej. Thaum koj hu nkauj, lub siab cia li zoo siab hauv Tus Tswv, tej kev ntshaw dawb huv tau sawv rov los, koj kawm tau yam uas thov raws li Vaj Tswv lub siab nyiam, thiab kuj ua rau Vaj Tswv zoo siab thiab nchuav koob hmoov rau koj. Cov ntsiab lus ntawd ua hluav taws cig rau hauv koj sab ntsuj plig, hloov koj lub siab ua lub thaj dawb huv teev tiam Vaj Tswv, ua rau koj lo lus thov Vaj Tswv hla ua tej pa tsw qab fij rau Vaj Tswv.”

Nyob rau 3000 xyoo los, Vajtswv haiv neeg tau thov Vajtswv thiab hu nkauj cov ntsiab lus hauv Phau Ntawv Nkauj txhua hnub. Lawv tau ua hla dhau tag nrho 150 zaj Nkauj hauv ob lub hlis lossis tsawg dua thiab. Tab sis yam zoo kawg nkaus ntawd, tab tom ploj zuj zus mus nyob rau tiam neeg niaj hnub nim no.

Cia li sim ua ntawd. Cia li thov Vaj Tswv los ntawm cov ntsiab lus hauv Phau Ntawv Nkauj. Cia li tsa koj lub suab hu nkauj qhuas Vaj Tswv! Koj yuav pom koj lub neej ntawm kev thov Vaj Tswv mus tau tob thiab muaj nqis. Koj yuav hnov tau txoj kev sib raug zoo nyob ze nrog Tus Tswv Yexus, vim Tus Tswv nyob hauv txhua zaj hauv Phau Ntawv Nkauj – dlau cov lus ntawm cov cev lus hais txog Tus Tswv, los ntawm txhua yam uas Tus Tswv tau hla dlau li tib neeg, thiab dlau ntawm Tus Tswv lub siab ncaj ncees.

Thov caw nrog kuv peb thov Vajtswv ua ke: Tus Tswv uas muaj kev hlub, thov pab kom nyuam tsis yog tsa suab hu nkauj dlau ntawm nyuam yaus lub qhov ncauj xwb, tiam sis yog hu los ntawm lub siab ncaj ncees. Txawm nyuam yaus lub suab hu yuav tsis raws lub suab taub, lossis tshee tshee, thov Tus Tswv Koj zoo siab txais tos zoo yam li qhov khoom plig haum Koj lub siab nyiam. Thov qhia nyuam yaus paub hu nkauj qhuas Koj txhua lub sijhawm thiab txhua qhov chaw, thiab nrhiav pom Tus Tswv Koj hauv nyuam yaus lub neej hauv ntiaj teb txhua sijhawm. Nyuam yaus thov hwm thiab koom siab ntawm Tus Tswv Yexus lub npe, Amees.

Cov phooj ywg, tsis txhob cia kev ntshai lossis kev txaj muag ua rau nej nyob twj ywm, tsis kam tsa yus lub suab hu nkauj qhuas Vajtswv. Vaj Tswv tsis ntsuas peb lub suab hu nkauj los ntawm hu tau siab lossis lub suab seev, tiam sis yog Vaj Tswv ntsuas ntawm txoj kev hlub uas koj tau muab rau hauv koj lub suab qhuas Nws. Cia li sim hu nkauj raws cov ntsiab lus hauv Phau Ntawv Nkauj, nrog lub siab ncaj ncees fij rau Vajtswv, lub siab paub Nws kev txiaj ntsig. Cov suab seev yooj yim ntawd yuav dhau los ua ib qho khoom fij uas muaj ntxhiab tsw qab ntxiag fij pub rau Leej Txiv, thiab ua rau Nws zoo siab heev.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.