Lub sijhawm ntawm xyoo qub twb xaus mus, thiab hnub no yog thawj hnub ntawm lub xyoo tshiab. Xyoo tshiab muaj txoj kev pib tshiab, sijhawm tshiab, tiamsis kuj muaj ntau qhov kev txomnyem thiab sim siab. Tiamsis yog ib tug ntseeg Vajtswv, peb tsis tas yuav txais xyoo tshiab nrog tej kev txhawj lossis ntxhov siab vim peb paub tus uas peb tab tom pehawm yeej tswj rawv ib puas tsav yam.

Hnub no, yog hnub 01/01/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia giả Leah Adams dhau ntawm Zaj kawm XYOO TSHIAB NYOB HAUV VAJTSWV TXHAIS TES.

“Vajtswv yuav kav mus ibtxhis, thiab nws lub tebchaws yuav nyob ruaj nrees mus tsis paub kawg.” (Daniyees 4:34b) 

Yog koj yog ib tug neeg pheej nyeem xov xwm, tej zaug koj yuav pom tias lub ntiajteb uas peb nyob no tabtom muaj ntau txoj kev ntxhov nyho: cua daj cua dub, dej nyab, kab mob kev nkeeg, kev tsov kev rog, sib ntaus hauv tsev neeg, kev lag luam poob zuj zus… thiab ntau yam txawv ntxiv. Tej teeb meem no tshwmsim tsis tseg, txog qhov uas ntau zaug peb yuav tau cim civ nug tias leej twg tab tom tswj lub ntiajteb no.

Yog ib tug ntseeg Vajtswv, peb yeej ntseeg tias muaj tus Tswv tswj txhua yam – Nws yog El Elyon, Tus Vajtswv uas muaj hwjchim loj. “El Elyon” yog Vajtswv ib lub npe hu nyob hauv Vajluskub, txhais tias tus muaj hwjchim loj. Yeej tsis muaj ib tug vajtswv, ib lub hwjchim lossis ib yam twg uas tau tsim los yuav piv tau nrog Vajtswv. Vajluskub hais ntau txog lub npe no ntau zaug.

Thawj zaug lub npe El Elyon tshwm hauv Chivkeeb 14, tham txog zaj xwm txheej ntawm Lauj, uas yog Aplas tus xeeb ntxwv, raug ntes nyob rau ntsus kev tsov rog nrog cov vajntxwv Kana-as. Aplas txiav txim mus cawm Lauj thiab muaj yeej rov los. Thaum ntawd, Mekhixedes, yog tus vajntxwv hauv lub nroog Xaloos, kuj yog Vajtswv tus pov thawj hlob, tau nqa ncuav thiab cawv tuaj tos Aplas. Txawv cov vajntxwv pe mlom nyob hauv Kana-as ib ncig ntawd, ces vajntxwv Mekhixedes tuav Vajtswv lub npe uas muaj hwjchim loj kawg nkaus foom hmoov rau Aplas li no: “Thov kom Vajtswv tus uas muaj hwjchim loj kawg nkaus, tus uas tsim lub ntuj thiab lub ntiajteb foom koob hmoov rau Anplas!” (nqe 19-20). Dhau ntawm cov lus foom hmoov no, Mekhixedes hais meej rau Aplas paub tias nws txoj kev muaj yeej ntawm no tsis yog los ntawm tib neeg lub zog, tiamsis los ntawm El Elyon- Vajtswv tus muaj hwjchim loj kawg nkaus lub hwjchim.

Txuas ntxiv, nyob hauv Daniyees 4, peb pom vajntxwv Nenpukanaxales tau ntsib Vajtswv tim ntsej tim muag. Nenpukanaxales yog ib tug vajntxwv khav theeb, ib txwm khav txog nws lub hwjchim thiab tej uas nws ua tau. Yog li, Vajtswv thiab cob yawg kom yawg paub tias muaj ib tug muaj hwjchim dua yawg. Nyob rau xya ntu, vajntxwv Nenpukanaxales raug ntiab tawm hauv tib neeg mus, ua neej zoo li tej tsiaj, noj zaub li nyuj, lub cev ntaj ntsug ntsu lwg, plaub ntev li plaub dav, rau tes rau taw zoo li noog. Ntawm no yog lub sijhawm cia vajntxwv Nenpukanaxales tau txo hwjchim, tsim los thiab pom tias muaj ib tug muaj hwjchim nyob ntawm yawg xub ntiag. Thaum lub sijhawm ntawd xaus, vajntxwv hais tias: “Thaum dhau xya lub xyoo lawm, kuv tsa qhovmuag ntsia saum ntuj. Kuv rov feebmeej, kuv thiaj ua tus Vajtswv uas muaj Hwjchim Loj kawg nkaus tsaug. Kuv qhuas thiab ua rau tus Vajtswv uas muaj sia nyob mus ibtxhis tau koob meej. “Vajtswv yuav kav mus ibtxhis, thiab nws lub tebchaws yuav nyob ruaj nrees mus tsis paub kawg” (Daniyees 4:34).

Tus sau Kay Arhur tau sau txog Vajtswv lub npe zoo kawg nkaus no li no: “… Yog Vajtswv tsis muaj hwjchim siab, yog txhua yam tsis nyob qab tswjhwm ntawm Vajtswv, ces Vajtswv tsis yog tus muaj hwjchim loj thiab thaum ntawd, koj thiab kuv tsuas paub muab yus fij rau txoj hmoo tsis paub dabtsi, lossis raug txiav txim los ntawm tib neeg ntau zaug tseem yog dab ntxwgnyoog.”

Yog li, hla mus rau xyoo tshiab peb puas tab tom ua lub neej hauv txoj kev paub tias Vajtswv yog tus muaj hwjchim loj thiab Vajtswv tab tom tswj txhua yam? Txawm lub ntiajteb puv npo teeb meem thiab tsis muaj kev tso siab, los Vajtswv yeej tswj, yeej tsis muaj ib yam dabtsi tshwmsim tuaj uas Vajtswv tsis tso cai.

Thaum paub txog qhov no, peb yuav kawm ua lub neej txo hwjchim, zoo siab hlo muab txhua lub homphiaj txhua txoj kev, txhua txoj kev npau suav thiab tag nrho tej kev txhawj hauv yus txhais tes tso rau Vajtswv. Peb nkag siab tias txhua yam uas peb muaj tsuas yog los ntawm Vajtswv tus muaj hwjchim loj pab xwb, tsis yog los ntawm yus lub zog. Vajntxwv Nenpukanaxales thaum ub nws tsis paub qhov no. Tsuas yog thaum nws ntsib dhau Vajtswv txoj kev cob lawm, yawg thiaj lees tias txhua yam nws muaj: lub tebchaws, tej vaj tsev, tej chaw ua si txog rau tej uas nws ua tau… puav leej tsis muaj dabtsi. yog tsis muaj Vajtswv tus muaj hwjchim loj. Kuj ib yam li ntawd, kev hwm Vajtswv pib thaum uas peb paub tias peb yog leej twg, thiab Vajtswv tus muaj hwjchim nws loj npaum cas. Peb yuav tau thooj siab nrog tus sau Ntawv Nkauj 47:1-2 qhuas Vajtswv tias: “Ib tsoom pej xeem sawv daws nej cia li npuaj tes zoo siab Hu nkauj nrov nrov qhuas Vajtswv. Tus Tswv tus uas muaj hwjchim loj tshaj plaws, yog tus txaus ntshais heev, nws yog tus vajntxwv uas muaj hwjchim loj kawg nkaus, nws kav tagnrho lub ntiajteb no”

Thov caw nrog kuv peb thov Vajtswv ua ke: Vajtswv tus muaj hwjchim loj! Nyob rau hauv thawj hnub xyoo 2026 no, kuv lub siab ua Koj tsaug vim paub tias koj tab tom tswj txhua yam. Thov kom kuv lub siab tsis tshee nyo lossis ntshai tej yam uas nyob ntawm qhov muag, tiamsis ruaj siab ntseeg koj lub hwjchim mus ib txhis. Thov qhia kom kuv paub ua neej txo hwjchim thiab hwm Vajtswv nyob rau tej hnub luv luv nyob hauv ntiajteb, thiab ua lub neej kom tsimnyog yog koj tus menyuam. Kuv thov hauv Tswv Yexus Khetos lub npe, Amees.

Cov kwv tij txhua tus, peb tsis paub dabtsi yuav tshwmsim tuaj rau peb xyoo no, tiamsis peb puv npo kev kaj siab thaum paub tus muaj hwjchim tab tom saib ntsoov thiab tu peb. Nyob rau lub caijnyoog ntawm xyoo tshiab, cia li muab tej lus taij thov los thov Vajtswv ua tus tswj thiab nrog koj txoj kev tom ntej, tib txhij ntawd thov Vajtswv pub kev kaj siab rau lub ntiajteb, rau lub tebchaws nyob laj, rau Pawg Ntseeg thiab koj tsev neeg. Ntawm no kuj yog lub sijhawm tseg rau koj tshuaj koj lub neej. Sau tej yam uas koj yuav tau hloov lossis tso tseg kom ua lub neej tsimnyog yog tus Vajtswv muaj hwjchim loj kawg nkaus tus menyuam.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.