Muaj tej lub sijhawm nyob hauv lub neej, peb tos ntev dhau tsis kam nqes tes, tiamsis kuj muaj tej lub sijhawm peb maj nroos nqes tes ua thaum uas tsis tau nrhiav Vajtswv lub siab nyiam. Qhov tseem ceeb yog Vajtswv xav kom peb tos nws. Thaum peb tos tus Tswv thiab vam khom Vajtswv, Vajtswv cog lus yuav pab thiab ntxiv zog nplua mias rau peb kom peb saj tau txoj kev ya siab zoo li tus dav yog li cas tiag.

Hnub no, yog hnub 02/01/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Diane Markins dhau ntawm Zaj kawm NYOB HAUV VAJTSWV TXHAIS TES YA SIAB SIAB.

“Tiamsis cov neeg uas cia siab ntsoov rau tus Tswv yuav muaj zog, lawv yuav nthuav tis ya ib yam li tus dav. Thaum lawv khiav lawv yuav tsis qaug zog, thaum lawv mus kev lawv yuav tsis tsaug leeg” (Yaxayas 40:31)

Tej zaug peb muaj coob tug tsis xav tos, vim tos ua rau muaj txoj kev txhawj, qaug zog. Peb kuj muaj cuab kav tos tej yam me me xws li tos ntsib ib tug neeg, lossis tos yuav ib yam khoom twg. Tiamsis kuj muaj tej yam yuam kom peb tos ntev dua: tos tus neeg “yus hlub”, tos yus tus menyuam los yug, lossis tos ib lub sijhawm tau nce ua haujlwm loj…. Tos yog yam uas peb zam tsis dhau hauv lub neej, tiamsis ntau zaug, twb yog vim tos ho coj tej yam zoo tshaj los rau peb.

Tseeb tiag muaj ntau tus hauv peb tsis txawj tos, vim qhov uas ua tsis tau siab ntev ntau zaug ua rau peb maj nroos ua tsis ua zoo xav. Tej zaug tsis yog kuv tib leeg xwb, tiamsis muaj ntau tus kuj poob rau qhov no, tas siv zog kho tsis raws li siab xav. Thaum ua sai dhau, peb yuav txais tau txoj kev khuv xim thiab qaug zog.
Yog li yuav ua li cas kom peb ua tau siab ntev tos? Vajluskub qhia rau peb paub txog lo lus teb, ntawd yog tos Vajtswv thiab ua haujlwm hauv Vajtswv txoj kev txawj ntse. Yaxayas 40:31 sau: “tiamsis cov neeg uas cia siab ntsoov rau tus Tswv yuav muaj zog, lawv yuav nthuav tis ya ib yam li tus dav. Thaum lawv khiav lawv yuav tsis qaug zog, thaum lawv mus kev lawv yuav tsis tsaug leeg”

“Tos Vajtswv” tsis tau txhais tias nyob twjywm tsis ua dabtsi, tsuas zaum cia Vajtswv lub zog tshiab cim civ ntws los rau hauv yus lub neej. Tsis tas li xwb, “tos Vajtswv” yog qhov uas nrhiav Vajtswv, ua tib zoo mloog Nws, ua neej pheeb rau Vajtswv lub zog pauv qhov uas pheeb rau peb lub zog. Yog peb hnov tias yus ‘qaug zog” thiab “tsis muaj zog” ntawd yog qhov uas peb tsis tau nrhiav lub zog tshiab ntawm Vajtswv xwb.

Ua ntej yuav txiav txim rau ib yam dabtsi twg tseem ceeb, pauv qhov uas ua kiag, peb yuav tau kawm kom paub tos Vajtswv lo lus teb los ntawm siv raws li peb txoj kev no:

Ib, nrog Vajtswv sib tham: xav saib vim li cas Vajtswv ho tso koj nyob rau lub caijnyoog tamsim, thiab ntseeg tias Vajtswv yuav siv txhua yam txawm yog tej kev txomnyem ntawd los ua kom muaj nqis rau koj lub neej.

Ob, nrhiav Vajtswv tej lus: tseg sijhawm nyeem Vajluskub kom pom txoj kev Vajtswv coj cov neeg uas ua siab ntev tos Vajtswv, thiab ua haujlwm hauv txoj kev mloog lus.

Thaum kawg, nrhiav kev txhawb zog los ntawm cov neeg loj hlob sab ntsujplig, thov lawv nrog koj thov Vajtswv, pub cov lus txhawb zog rau koj.

Thaum cov neeg Yixalayees tab tom nyob rau txoj kev ua qhev txomnyem, lawv pom cuag li Vajtswv ua twjywm rau lawv. Tiamsis Vajtswv tsis nyob twjywm thiab cog lus tias yuav ntxiv lub zog tshiab. Lub zog ntawd yuav zoo li tus dav ya siab, thiab ruaj khov mus li.

Niaj hnub no, txawm yog peb tsis raug poob mus ua qhev li cov neeg Yixalayees thaum ub lawm los, hauv txoj kev nrog tus Tswv mus, kuj muaj ntau zaug peb ntog, qaug zog rau tej nra nyhav hauv lub neej, ntawm sab nqaij tawv thiab ntsujplig tib si. Kuj muaj tej lub sijhawm peb maj nroos tsis tos Vajtswv. Yog li, yam uas peb yuav ua yog tos Vajtswv, nyob rau lub sijhawm tos ntawd, peb yuav saj tau lub zog tshiab hauv Nws.

Thaum paub tos Vajtswv lub sijhawm thiab ua raws li Vajtswv lub siab nyiam, tej paj txiv yuav yog kev txua siab. Cia siab tias koj lub neej yuav paub tos Vajtswv kom yog Vajtswv lub sijhawm thiab pom tej yam zoo thaum paub ua raws li Vajtswv ua tus coj kev. Thov kom xyoo tshiab no, txhua hnub koj yuav tau Vajtswv ntxiv zog tshiab, kom koj zoo li “tus dav uas ya siab siab” rau txhua feem hauv lub neej.

“Nej tsis tau paub dua li los? Nej tsis tau hnov dua li los? Tus Tswv yog Vajtswv tus uas muaj sia nyob mus ibtxhis, nws tsim tagnrho lub ntiajteb no. Nws ibtxwm tsis tsaug leeg lossis qaug zog ib zaug li. Tsis muaj leejtwg paub txog nws lub siab xav hlo li. Nws ntxiv zog rau tus uas qaug zog thiab tus tsaug leeg kom tus ntawd rov muaj zog tuaj.” (Yaxayas 40:28-29).

Thov caw nrog kuv peb thov Vajtswv ua ke: Tus Tswv, Koj yog tus pub lub zog rau tus neeg qaug zog, thiab ntxiv zog rau tus tsis muaj zog. Nyob hauv tej kev taug hauv lub neej, thov qhia kom kuv paub tos Koj, tsis cim civ nrhiav kev taug rau tus kheej, tiamsis mloog raws li Vajtswv lub siab nyiam. Thov qhib kuv lub qhov muag kom ntsia pom Vajtswv ua tus coj kev rau xyoo tshiab no. Kuv thov hauv Tswv Yexus Khetos lub npe, Amees.

Cov kwv tij, koj tab tom tos Vajtswv lub siab nyiam rau seem twg hauv lub neej? Tej zaug yuav yog lub neej txij nkawm, haujlwm, lub neej tom ntej lossis dag zog? Txhob maj rawm qaug zog lossis tws kev tiamsis nco ntsoov Vajtswv muaj ib lub homphiaj zoo rau koj lub neej, thiab txhua hnub Vajtswv yeej pub lub zog tshiab nplua mias rau tus uas nrhiav Nws.

Hla mus rau xyoo tshiab no, cia li thov Vajtswv pab koj saj tau Vajtswv tej lus cog tseg zoo, kom koj “khiav tsis sab, mus tsis nkees” nyob rau txhua lub caijnyoog tom ntej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.