Tòm ală pơnah gơnoăr broă lơi, bŏl he păl lòng tiar ò dơh gen rơp geh dờng mơ wil tơl. Bơta dòn kŭng behơ̆: koñ geh dờng gen păl lòt găn bơta lòng. Yang ai bŏl he ĭn ală “bơta bơtê kalke” nàng lòng tiar bơta dòn geh krăñ, kơ̆ cê. Mơ bơh tòm ală bơta gơlik gơs tồn be rlau bơta pràn ir, bŏl he rơp gŏ lọh Kơnrẵn găm tề lăm he kòp cơnđòa lòt, ndrom be dô nă cau bơyô lòt băl òs sum rcang sir yò đo bŏl he ntào kơ̆.

Ngai do, ngai 03/02/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Abigail Shaffer dê bơh Tơnggume TÒMYA BƠTA DÒN DÊ.

“Bơh git lah bơta lòng bơta dòn oh mi dê gơlik gơs bơta kơ̆ nùs. Mơ bơta kơ̆ nùs pal gơlik cồng nha wil tơl tồ oh mi in geh dờng wil tơl, ò siơ̆u dô bơta lơi.” (Jakơ 1:3-4)

Ăñ dềt mềr mơ tòmya ba-lê bơh kơnòm să. Bơh tŭ găm là dô nă cau kơnòm ur, ăñ neh kơp koñ dô bơta mpau gơlik gơs dô nă cau chài rgơi tòmya ba-lê. Tus di tŭ do, tŭ geh dờng, ăñ găm pơnđơl bơtê mơ gơboh pơrlòng tòmya do be ngai sơnrờp. Gơs dô bơta niăm pha is, sŏng rĭng ngăn tom tòmya do,ơ bơh bơta hơ̆ òs hwài nùs ăñ ri wơl mơ Bơtau Crơng Gơs. Gơlơh be ală bơta tòmya lơbơn niăm hơ̆, ăñ bơsùt be ală jơnau yăl tơnggit Yang ai gơwèt he ĭn.

Oă dơ̆ lơh ală bơta bơtê tơndŏ sơnoàn, ăñ dòp git dô bơta tồn là buơn ngăn mơya gơ rơp dờng màng ngăn, hơ̆ la tòmya niăm her, cau lơh tòmya păl lơbơn. Mơ ò gơs bơta lơi nàng sơmbat geh bơta lơbơn niăm, să jan gơ uyển chuyển ò khin tơnrò să jan dô êt lơi tai, lòt găn rlau ir mơya he gơlơh hừh hơh, tian gơs rơp pơnji pơnkôr. Bơh ală bơta bơtê dềt lơh hơ̆ jơl tus di ală sơnđoh kalke, jơh ală bơta păl càng nùs nhờm chò nùs lòt ngai rlau.

Tòm gùng dà jat Yang kŭng behơ̆. Bŏl he òs kơlôi lah ală bơta kơlôi sơnơng, kơp koñ mơ ală bơta rơndăp he di là niăm rlau jơh. Mơya mìng tŭ lơi khin cơnđòa lik lòt tiah gơlơh rĭng lơngai, khin jào phi Yang ĭn, bŏl he rơp gŏ lah bơta rơndăp Kơnrẵn di òs dờng ơnang mơ niăm her rlau ală bơta he kơlôi tus. Bơta dòn ò geh tih dờng dilah bŏl he mìng ntào dô bă tiah.

Tŭ ală cau lòt sền tòmya ba-lê, bŏl khai mìng gŏ ală tòmya niăm mơ ngkòc ngkòr. Êt cau git lah ngkơi ală broă hơ̆ la dô nơm gùng bŏl glăr. Gơs ală tŭ bơtê, tŭ hồ khŏ jă cồng jơng kơldăng, ăñ pơnji pơnkôr tian gơs sơwì lùp is: Dipăl hala ò? Mơya tơnơ̆ sèng hơ wơl lah: “dipăl!” “No pain, no gain” hala “Ồs lòng màh, bŏl glăr lòng pràn”. Bơh ală cồng nha, ală bơta niăm hàng mơnĕ mơ kơ̆ wền hơđăng ù do păl càng ngăn bơta kŏng ơt mơ pơnđơl pràn ngăn.

Sră Goh kŭng bơtọ bŏl he behơ̆. Jakơ 1:3 đơs lah tŭ bơta dòn geh lòng, bơta kơ̆ nùs rơp geh tŭ lơmpah geh dờng wil tơl. Dilah rài kis jat Yang mìng là broă buơn lơm, gen mìng càng dô nơm broă lòng dềt là bŏl he gơtup pừ rau. Yang ngùi ală bơta gơlòng nàng lòng tiar đah hwing bŏl he, kŭng be ba-le hwài dŏ să jan. Bulah pơnji pơnkôr, mơya càng dipăl ngăn. Bulah kalke, mơya bơh hơ̆ gơlik gơs kwơ màng ngăn.

Ăñ găm òs đơs bơsèl lah ba-le ngăn lah “tòmya bơta dòn dê”. Bơh ală cau lơh tòmya êt nă tòmya dô nă. Bŏl he păl dòn kơnòm cau bơyô he, dô mpồl cau nàng dô nùs băl kơrmap gar nhịp, gar mpồl. Dilah ò dòn kơnòm băl, tòmya rơp ò wil tơl mơ pơlơ̆u pơrlă. Dilah gơs broă gơlik gơs, he kŭng rơp ò geh cau dŏng kòl.
Bơta dòn tòm Yang kŭng ndrom behơ̆ ya. Bŏl he geh họi jà dòn kơnòm tĕdi Kơnrẵn, Bơtau tề lăm kòp cơnđòa lòt bŏl he. Mơya gơs dơ̆, bŏl he sền wơl gùng dà jat Yang be dô nă he lòt gòi: pơnđơl pràn is, kơlôi rcang is mơ dô nă tòm pơndăng băl mơ ală bơta. Mơya lah, Yang ò tŭ lơi koñ bŏl he pơnđơl pràn is dô nă.

Tŭ ăñ sền wơl, ăñ gŏ rài kis jat Yang kŭng ndrom be “tòmya bơta dòn dê”. Gơs ală tŭ lơbơn lơbè, gơs ală tŭ ò suk ơm, gơs ală tŭ “sơnđoh” lơh ăñ ĭn rngòt rngơt ò git mù wơl mbe lơi. Mơya kŭng gơs ală tŭ niăm ngăn, tŭ ăñ đal git lọh lang Yang yò đo ăñ, tề lăm ăñ. Bơh bơta lòt băl hơ̆ Kơnrẵn di hen rơp lah bơta lơh gơlik gơs gùng dà niăm her ngăn, lòt găn rlau bơta niăm her tòmya ba-lê di.

Dan jà bol he dô nùs bal tòm bơta hòi dan: Khoai Yang, kọn ưnngai Yang tài bơh Kơnrẵn òs ơm băl mơ kọn tòm ală gùng dà, tơ’ai lah ală tŭ bơtoah kŭng be ală tŭ bềng bơta gơlòng bŏl glăr. Dăn bơtọ kọn git kŏng ơt mơ dòn bơr be cau lơh tòmya kŏng ơt bơtê, nàng bơta dòn kọn dê sơlơ ngai geh kơ̆ mơ geh dờng jat nùs koñ Kơnrẵn. Tŭ kọn gơlơh bŏl glăr hala gơplơ̆ nùs, dăn tơngkah kọn lah Kơnrẵn găm ơm băl, yò đo mơ tề lăm kọn kòp cơnđòa. Kơp koñ rài kis kọn gơlik gơs dô bơta tòmya niăm her bơta dòn dê, pơnđăng gơklŏ Kơnrẵn! Kọn jơh nùs họi dăn, ai sơnđăn Yang Jesu Krist, Amen.

Ơ ală ồng mọ ọh mi koñ gơboh, bơta dòn kòp nă bŏl he tòm Yang rơp ngăn lah tòmya niăm hàng mơnĕ, lơbơn her ràng tơlik dô nơm phăn niăm hàng mơnĕ gen Kơnrẵn neh còr sơl? Kòp cơnđòa lòt, kòp dơ̆ sơnđọh, kòp broă lơh hala nhờm jrô diđap bơta bơtê kalke tòmya hơ̆ rơp hwài bŏl he tus rềp rlau tòm bơta git lăm Bơtau Crơng Gơs òs sền gar, kơnđu rài kis kòp nă bŏl he sơl? Bơta dòn kòp nă bŏl he găm gơs geh lòng tiar kơp ngai, bơh ală gùng dà geh dờng rlau tòm Yang sơl? Mơ ală cau, ală cau gut dăr bŏl he rơp sền gŏ dô “tòmya” niăm bơta dòn di Yang bơh rài kis bŏl he di sơl?

Ngai do, kòp nă bŏl he hơ wơl sŏng ngăn ală sèng lùp do, mơ ntoat tus mơ Yang nàng dòn kơnòm Kơnrẵn, Bơtau chò nùs yò đo kòp nă bŏl he tòm gùng dà bơta dòn cơnđòa lòt băl mơ Yang, dô gùng dà “guh di tiah jơnhoa rlau” jrô ndơp rlau, hừh nùs rlau.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.