Rài kis ờ di tú lơi kung ring lơngai. Gơs tú kon mơnus pal tìp bơta kòp jê, chơt roh mơ rngòt rngơt. Tú bơta gơlòng tus, bol he pal kah lah Yàng Tòm Trồ sùm gơs mat; Yàng sùm gam lơh broă, ngui bơta jê sồt gơlik cồng nha bơta dờn, bơta gơnkơnòm mơ bơta kis pa. Ală bơta jê sồt gơlơh bè ờ kwơ mơya rgơi gơlik gơs tiah niam nàng bơta dờn geh hòn dờng, mơ gơlik cồng nha, mơ rlau tai, hớ la nàng bol he bơtê git pơnah jào phi jơh Yàng Tòm Trồ in, Bơtau sùm gam lơh broă bulah kon mơnus ờ sền gó.

Ngai do, 04/02/2026, Ngai dunia kah bơta tomdră mơ kòp ung thư, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bơh tơnggume CỒNG NHA TÒM BƠTA GƠLÒNG BÒL GLAR.

“Yàng Jehôwa rơp kư̆ tề lam bol mê sùm sùm; Kơnràñ lơh bol mê in hừh nùs ală bơta pal càng tòm dô nơm lơgar rañ rsơh, mơ lơh ntìng bol mê in pràn kơldang. Bol mê rơp gơlik gơs kung be dô nơm suơn geh tuh dà, be dô nơm dà croh ò gơs tŭ lơi soat.” (Esai 58:11)

Kơno cau bi ùr an mut tòm hìu sơnơm, an tus còp khai. Tơnớ mpồng ơdú hìu sơnơm, an sền gó khai sơnđìng bồ hơđang bơnì bau khai dê, tă nhơm, mơ mu mat ràng tơlik bơta jê kơn jơ ngan. Tú do, khai ơm tòm pơnah Ung Bướu hìu sơnơm dê mơ khai kalke ngan nàng tă nhơm, bơsiă gơlik mhàm.

An tus at tê khai, mơ khai đơs:

“Oh nggui tềng do, gơn bi dồ êt. Bi pal tus mơ cau ồng đah kiau. Ồng gam gơkòl kơn jơ ngan bơta kòp jê, mơya bồ tơngoh gam bè ờs, ồng rơp geh cèng rê wơl tòm hìu tòm àng drim do. Bi pal càng hòi dan ồng in”

Bau klau khai dê yờ mờ cèng khai tus tềng cơ nờng cau ồng mơ lơh cơng ồng do in. Nhơm tă khai dê kơn jớ ngan, mơya kòp jơnau đơs khai dê loh làng ngan. Bơh ngài, an mìng sền gó cau ồng kun bồ mơ nhềm mat tú cau bi hòi dăn ồng in. tơnớ cau bi rê wơl cơnòng bic, mơ dan să mơ an bơh neh lời a pal kơp khai. Cau bi đơs:

“Dilah ờ lơh cơng ồng in, rngòt ngan ờ gơs tú lơm pah tai, bi rngòt ồng chơt mơ ờ geh dong klàs, bi kờn ồng dờn dờp Yàng lài mơ tú ồng sang rài.”

Bulah ơm tòm bơta kòp jê kơn jớ ngan, mơya cau bi sùm ờ híu bơta kờn gơboh Yàng pà ai bi in. pơrlớ wơl, tòm lơmpah Yàng ai, khai sùm bơto yal bơta kờn gơboh mơ bơta dong klàs Yàng dê. Gơwèt mơ oă cau, kòp ung thư lơh cau in roh gơn kơnờm. Mơya gơwèt mơ cau bi, tú jơ git he kòp ung thư neh gơlik gơs tú jơ Yàng tồl tiăr bơta dờn, nàng bi rgơi đal git Yàng jrô ndơp oă rlau tai.

“Yàng Jehôwa rơp kư̆ tề lam bol mê sùm sùm; Kơnràñ lơh bol mê in hừh nùs ală bơta pal càng tòm dô nơm lơgar rañ rsơh, mơ lơh ntìng bol mê in pràn kơldang. Bol mê rơp gơlik gơs kung be dô nơm suơn geh tuh dà, be dô nơm dà croh ò gơs tŭ lơi soat.” (‭‭Esai‬ ‭58‬:‭11‬) cau bi sùm tơngkah sèng Sră Goh do tú tom pà ală broă Yàng lơh khai in tú tìp bơta gơlòng bòl glar.

Sră 2 Ală Bơtau tap 5 neh geh đơs tú dồ nă kon ùr dí tòm dồ broă krơi is. Kon ùr do kis tòm tú làng bol Israel mơ Aram sùm tom dră bal. Bơta tom lơh sùm gơs dê gùl nhàr lơgar, làng bol gơkòl cau kup lơh dí, mơ să tờm kon ur do la dồ nă cau gơkòl kup bơh bơta tom lơh do. Dêgul dà lơgar Israel, kon ủr do neh kis tòm bơta rngot rngơt bơh bơta tomlơh sùm sùm, làng bol roh bơta ring lơngai, bơta jê gloh rung oă ngan. Tus dồ ngai, kon ur gơkòl ling Aram kòl kup, pal ngài bơh hìu nhă, làng bol mơ tiah ơm, mơ gơlik gơs cau dí duh broă tòm nhìu nhă cau sò tơm, la ồng Naaman.

“Naaman, kwang dờng at bồ mpồl ling bơtau Aram dê, la dô nă cau gơs gơnoar mơ geh dờng ryŭ di dap cau tòm khai, bơh khai Yàng Jehôwa cèng bơta pha lin cau Aram in.” (‭‭II Ală Bơtau‬ ‭5‬:‭1) tú git ồng Naaman tìp kòp dun, la bơta kòp ờ rgơi sơm bòi tòm pah rài yau. Kon ur dí tus mơ đơs mơ cau mò at bồ lah: “Khai đơs mơ mò cau tòm khai lah: “Dilah cau tòm añ lòt tus hơ cau gơnoar hwơr tòm Samari! Khai rơp dong tă cau tòm añ bơh kòp dun.” (‭‭II Ală Bơtau‬ ‭5‬:‭3‬)

Bulah ơm dí, pal kis ngài mơ hìu nhă mơ roh bơta khat gơboh, mơya khai neh lơh broă niam tus dê cau tờm khai dê. Khai kờn ngan ồng Naaman geh sơm bời, mơ oă rlau tai, khai kờn tề lăm cau tờm tus mơ Yàng Tòm Trồ. digơlan kon ur do neh kis dồ rài kis song ring mơ dờn song tian gơs jơnau lơh cơng khai dê neh geh dờp mơ pờ dồ nơm gùng nàng dong tă cau ồng at bồ mpồl ling.

“Behơ̆ Naaman lòt yal mơ cau tòm khai in ală jơnau kòn ùr bơh Israel neh đơs.” (‭‭II Ală Bơtau‬ ‭5‬:‭4)

Pal càng kơlôi sơnơng oă ngan tú cau ồng Naaman neh kơno iat jơnau kon ur di Israel dê, la cau duh broă bau ur ồng dê. Mơ bơh tú hớ, gùng nàng sơm bời ồng Naaman sơn tờm. Ồng lòt tus Samari nàng tìp gơnoar hwơr Elise. Tềng hớ, ồng neh geh sơm bời dê gùl oă cau sền gó.

Sră Goh ờ đơs tai dồ jơnau lơi bơh rài kis kon ur dí do. Bol he ờ git khai neh geh pà ai bơta khat gơboh hala ờ, rgơi rê wơl mơ hìu nhă hala ờ, hala geh dờp dồ phan bàn lơi hala ờ. Mơya bol he git “Gen khai rê wơl tus hơ cau Yàng Tom Trồ dê, bal mơ jơh ală cau lòt bal mơ khai; tus ntào di đap Elise, mơ đơs lah: “Tŭ do añ đal git lah tòm làm jơh lơgar dunnia ò gơs yàng lơi ndai rlau mơ Yàng Tom Trồ tòm Israel.” (‭‭II Ală Bơtau‬ ‭5‬:‭15‬) gen Naaman đơs tai mơ Elise: “Gen Naaman đơs lah: “bơh do dĭ gơna ồng dê rơp ò tai ơn phan chu hala phan ơn pơdơng ală yàng lơi ndai in rlau mơ Yàng Jehôwa.” (‭‭II Ală Bơtau‬ ‭5‬:‭17‬).

Sang sơbì bơta bàssil bơh la cau dí, kon ur do dờp git pal đơs nàng Naaman dờp git gơnap gơnoar sơm bời Yàng TÒm Trồ mơ khai neh duh khoai, bơh gơnoar hwơr Elise tềng Samari. Mìng bơh jơnau đơs kon ur dí dê, mơya tòm hớ ràng tơlik bơta dờn pràn kơl dang dê Yàng Tòm Trồ, bơta git nền bơh gơnap gơnoar Yàng dê, mơ dờng rlau jơh la dồ nus nhơm bềng bơta kờn gơboh mơ gơjran. Bơta lơi neh chồl chao kon ur do neh lơh cơng bơh bơta sơm bời kòp jê ồng Naaman taih? Digolan, tú sền gó bơta jê kơnjo ồng dê mơ bơta chơt neh tus rềp, tòm nus nhơm khai chồl chao dồ bơta: pal đơs, nàng ồng geh sơmboi, pal đơs nàng ồng ờ tìp bơta chơt, mơ pal đớs nàng gơnap gơnoar Yàng Tòm Trồ dê geh ràng tơlik.

Rê wơl mơ broă cau bi ur. Tòm 6 nam lòt gan tú tìp bơta ung thư, cau bi neh mut tòm hìu sơnơm oă dớ, só sơlơ ngai gơjrùh oă, jơng gen jê mơ lơbơn. Mơya, tú Yàng sơm bời bi in, bơtơl pràn, gen khai neh lơh cơng bơh ală broă mơ Yàng neh ơ gam lơh tòm rài kis bi dê. Cau bi neh gơkòl hìu nhă kup kơryan, sền ờ sơp tú sền bơta kòp jê khai la cồng nha bơta dờn ơn ờ di tiah. Mơya gơwèt mơ bi, hớ la tú lơmpah Yàng ai khai in tú lơh cơng dồ bă pràn kơl dang rlau jơh hìu nhă khai dê. Khai kớ dơn tòm bơta dờn, bulah git gùng do ờ di la buơn. Bơta kòp jê sùm yò tơnguh, mơya Jơnau Niam sùm geh lơh cơng., bơta jê sùm gam gơs tòm să jan, mơya bơta ring lơngai Yàng dê sùm at bồ tòm hwềng nùs. Di gùl bơta gơlòng bòl glar, rài kis bi dê sùm gơlik cồng nha.

Bơta gơlòng bol he dê la bơta lơi taih? He tìp bơta gơlòng mbè lơi taih? Sac té lot bal mơ Yàng tòm bơta gơlòng bòl glar. Tềng tiah hớ, he rơp jòi bàn bơta gơtha rài kis mơ gơlik cồng nha Yàng in.

Dan jà bol he dô nùs bal tòm bơta hòi dan: Khoai Bèp kờn gơboh, Yàng git loh làng ală bơta jê tòm să jan, ală bơta kơn jớ tòm hwềng nùs mơ ală bơta gơlòng kon tìp. Oă dớ, kon lơbơn lơnio, bòl glar, mơ gơlơh bè ờ rgơi cơn đoà lòt tai. Dan bơtê kon in git gơn kơnòm dê Yàng, mơ git lơh cơng bơh bơta kờn gơboh, bơta dong klàs Yàng dê. Kon jơh nùs hòi dăn ai sơndan Yàng Jêsu Christ, Amen.

Ơ ală ồng mọ oh mi kờn gơboh, he gam tìp bơta gơlòng bòl glar tòm rài kis sơl ơ? Digolan la bơta kòp jê, bơta chơt roh, bơta rồn bơklơn bơh hìu nhă, hala ală bơat kalke mơ he ờ git tòm pà mơ cau lơi. Digul bơta hớ, ban kơlôi la Yàng sang lời he. Digul bơta gơlòng, Yàng sùm ơm rềp, kơnơ iat mơ dờp git jơh ală bơta.
Dilah ngi do he ờ jòi bàn gùng lik, dan sơmbat tê Yàng, jào phi jơh ală boăta Yàng in. gen he rơp dờp git lah, bulah ală bơta ờ hềt tom gơl, mơya nùs nhơm he rơp geh tom gơl. Mơ digul ală bơta hớ, Yàng rơp ngui rài kis he dê nàng cèng bơta gơn kơnờm, bơta sơm bời, mơ bơta kờn gơboh Yàng dê tus dê cau ndai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.