Tom rài kis kờp ngai, bọ̀l he buôn-ngăn tìp ală cau ntào di đap bơta gơlòng bọ̆l-glar. Digơlăn la dô nă bàp yo, dô nă oh dềt siău-siar, hala dô nă oh mi tom Hiu Jum Goh mơ bọ̀l he tìp tŭ kòp-jê. Tom tŭ ntào di đap ală bơta hơ̆, Yàng kòñ bòl he gơs nùs nhơm mbe lơi?

Ngai do, ngai 05/02/2026 Bơta Hoi Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl D.Leon Pippin bơh tơnggume GƠS NÙS NĐÀC SƠNGÌT

“Mơya gơs dô nă cau Samari kung lòt gùng hơ̆, tus di tiah khai bic, gŏ khai gen gơs nùs nđàc sơngit. Gen khai lòt tus rềp ai mơñà mơ alak bong di tiah jê sồt, pùt, gen tơnhào cau hơ̆ hơđang phan poan jơng khai dê, pơdiang tus hơ hìu ơpah bic mơ dong gàr khai.” (Luka 10:33-34)

Tom dô àng drim ne, tom tŭ hao rơndeh tus tiah lơh broă, añ sền gọ̆ dô nă cau klau bơñùl ñô sơwìng bồ di gah gùng. Dồ ềt tai gen añ neh đơs: “Ưnngai Yàng tài bơh kọn ò dròm bè cau klau hơ̆.”

Mơ ya tom jơh dô ngai hơ̆, añ ò rgơi kơlôi sơnơng broă lơh lơi. Rùp cau klau hơ̆ kư gơ ơm sùm tom bồ dơngoh añ jê. Añ kơlôi: “Di ngan añ pal bơdơh wơl mơ dong kơl ồng rê tom hiu? Mìng dồ ềt phuk lơm, ñchi bơh tai añ ò lơh taih?”

Añ gơkòl lah pơrhơng bơh broă lơh he dê. Jơl tus di rlô sa klong ngai añ kung ò rgơi sa. Añ hòi dan mơ Yàng dong añ băñ gơs nùs nhơm kung be cau Pharisi, tài bơh añ đal git añ mơ cau Pharisi gơs bơta lơi hơ̆ drom bal tom pơnyơu Yàng Jesu dê:

“Gơs bàr nă cau guh hơ hìu duh khoai nàng hòi dan, dô nă cau Pharisi mơ dô nă cau dar dia. Cau Pharisi ntào hòi dan òm be do: ‘Khoai Yàng Tom Trồ, añ ưnngài Kơnràñ bơh añ ò di be cau ndai, sa kwà, ò song ring, rềs àr bơrnàn, kung ò di be cau dar dia ne.” (Luka 18:10-11)

Mhọ ngai hơ̆, tơnơ̆ mơ tŭ rê bơh lơh broă, añ hao rơndèh rê hiu. Tom gùng, añ ntoàt tus tomtoh di tiah cau klau ne neh ntào. Tom dơngoh kơlôi añ jê kư gơs sùm rùp cau klau bọ̆l glar hơ̆. Añ nggui ting hơ̆, gar mat ò git sền bơta lơi mơ kơlôi tus tŭ ồng gơpừ, khar tơrnòm gơdùh bơh tê, bơcah lề-làc di gùng, tơrnòm hòr bềng mat gùng. Mìng kơlôi tus behơ̆ lơm mơ nùs añ jê-sồt. Tŭ hơ̆, añ mìng kòñ đơs: “Khoai Yàng, kơp kòñ ală bơta do ò gam tai tom dơngoh kơlôi kọn dê.”
Añ neh ò ơm bơdơh wơl nàng dong kơl ồng mìng tài bơh rngòt cau ndai rơp sền gọ̆ mơ añ rơp gơkòl wờng tìs. Añ ƀassil tom tŭ kơlôi añ rgơi kung be cau gơnoar lăm bồ ơn phan duh khoai mơ cau Lebi tom bơta yal yau cau Samari lơbơn niam, tom tŭ bọ̀l khai lòt gan cau gơtìp bọ̀l glar mơ ya kư du-pleh: “Yàng Jesu ho lah: “Gơs dô nă cau ne bơh Jerusalem mù hơ Jerikô, gơtìp mpồl cau phà kơñau; bol hơ̆ hồ sơmbrơt jơh ồi ào khai, pù lơh khai, gen lòt, lòi khai mòr chơt. Gơs dô nă cau gơnoar ơn phan duh khoai kung lòt tòm gùng hơ̆, gŏ cau hơ̆ gen pleh đah ne mơ lòt gan. Kung behơ̆ sơl, gơs dô nă cau Lebi lòt tus, gŏ cau hơ̆, gen pleh đah ne mơ lòt gan. Mơya gơs dô nă cau Samari kung lòt gùng hơ̆, tus di tiah khai bic, gŏ khai gen gơs nùs nđàc sơngit. Gen khai lòt tus rềp ai mơñà mơ alak bong di tiah jê sồt, pùt, gen tơnhào cau hơ̆ hơđang phan poan jơng khai dê, pơdiang tus hơ hìu ơpah bic mơ dong gàr khai. Àng drim hìng, khai ai bàr dơnie tong cau tòm hìu ơpah bic in mơ nting lah: ‘Dong gàr tĕ cau do; dilah ngui lin rlau, tòm tŭ añ rê wơl gen añ rơp tơm wơl.’” (Luka 10:30-35)

Tom pơnyơu Yàng Jesu dê, gơs pe nă cau lòt tom gùng bơh Jerusalem mù hơ Jerikô, hơ̆ la cau gơnoar lăm bồ ơn phan duh khoai, cau Lebi mơ cau Samari. Gùng lòt hơ̆ pơnro sơrbơng roh tài bơh òs sùm gơlik gơs bơta ntung kơñau. Cau gơnoar lăm bồ ơn phan duh khoai mơ cau Lebi la ală cau geh sền la dờng mang mơ gơs nùs nhơm niam tom cau Juđa, mơ ya bọ̀l khai sang-loì cau gơp ƀòn he. Digơlan bọ̀l khai gơs oă tơnggu nàng ò ơm bơdơh wơl. Digơlan bọ̀l khai kơlôi: “Gùng do sơrbơng roh ngan, añ pal lòt mhar. Digơlăn cau do mìng lơh blàc nàng kơñau phan he dê ơ? Rơp gơs cau ndai dong kơl khai ….

Tom bơta kơlôi sơnơng be òs, bọ̀l he đơs lah ală cau gơrê mơ gùng duh khoai gen rơp la cau sơnròp ai tê nàng dong kơl. Mơ ya, cau Samari la làng bòl gơkòl cau Juđa sền òsơp mơ sền be cau sò-tom neh ai tê nàng dong kơl. Cau Samari “gơs nùs nđàc sơngìt” di đap cau gơtìp bọ̆l glar gơtup gơtơl, rcang sir nàng dong kơl, ò kờp tus jền prĭa hala pràn.

Nùs nđàc sơngit ngan ò ơm bơdơh wơl tom bơta rngoh rngàc hala jơnau đơs mơ ya pal lòt bal mơ broă lơh loh làng. Cau Samari lòt tus rềp, pồt tiah sồt, ơn khai hơđang alàng, ceng tus hơ hiu ơpah, dòp jền nàng sền gar, sơmbơi mơ kung ho lah rơp wơl wơl tài.

Tom pơnyơu Yàng Jesu dê, cau tìp bọ̀l glar gơkòl pơng pù tiàn gơs “nggùl kis nggùl chơt”. Ai tom bơta yal yau añ jê, cau klau ne gơkòl tơrnòm lơh bọ̀l glar tiàn gơs roh jơh dơngoh jak, ò rgơi đal git. Añ neh loì roh tŭ lơmpah nàng rang tơlik nùs nđàc sơngit mơ rùp sơniọ Yàng Jesu dê ai dô nă cau roh gơn kơnòm mơ pal cang dong kơl.

Añ tò-să ìs lah añ giga ngan mơ găm oă broă pal cang lơh. Mơ ya bơh dơlăm nùs, añ git lah añ siău nùs nđàc sơngìt mơ kơlôi tus cau ndai. Nggui tom rơndeh, añ mìng rgơi đơs mơ Yàng: “Khoai Yàng, dan tọh glài kọn in.”

Mơ ho ìs mơ să tòm lah dilah dô ngai lơi hơ̆ añ tìp dô nă cau pal cang bơta dong kơl, añ rơp bơdơh wơl mơ lơh bơta añ rgơi, kung be cau Samari lơbơn niam neh “gơs nùs nđàc sơngit”, “pồt tiah sồt”, mơ ceng cau gơtìp bọ̀l glar tus “hiu ơpah” nàng sền gar, dong kơl. Tài bơh dilah ò gơs nùs nđàc sơngit Yàng dê, añ kung rgơi drom kung be cau klau gơkòl sang loì di gah gùng ngai hơ̆.

Dan jà bol he dô nùs bal tòm bơta hòi dan: Khoai Yàng kòñ gơboh kọn dê, dan Yàng ai kọn in dô nùs nhơm sùm dờng ơnàng nàng git kòñ gơboh mơ git wă bal mơ ală cau gùt dar. Dan Yàng dong kơl kọn ò ñềm mat digùl bơta pal cang bọ̀l khai dê, mơ ya rcang sir dong kơl bal mơ jơh ală bơta lơi Yàng ai kọn in. Dan bơta kòñ gơboh mơ nùs nđàc sơngit Yàng dê bềng liu hơđang kọn tiàn gơs hòr lik dô bă tơngkah tơngkañ jơh ală cau mơ Yàng ơn gùt dar kọn tài. Kọn jơh nùs hòi dan tom sơnđăn Yàng Jesu Krisst, Amen

Ơ jơh ală ồng mò, oh mi kòñ gơboh, gùt dar bọ̀l he ò git nđò nă cau pal cang bơta dong kơl, yò-đo, gơs cau ơm tom bơta kòp jê, gơs cau gơtìp bọ̀l glar bơh jền prĭa, kung gơs cau lơbơn lơñọ tom đah hwềng. Dilah oh mi gơs tŭ lơmpah geh tìp ală oh mi behơ̆, Yàng kòñ oh mi băñ tĭl mpồng nùs, mơ ya rang tơlik tĕ rùp să mơ bơta kòñ gơboh Kơnràñ dê bọ̀l khai in mơ ală broă lơh loh lang, digơlăn la dô jơnau lùp còp, dô ềt tŭ jơ, hala dong kơl jền prĭa jat pràn oh mi rgơi. Tài bơh Yàng neh nđàc sơngit bọ̀l he lài, gen tang bọ̀l he kung pal yal tơlik bơta hơ̆ jơh ală cau gùt dar he.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.