Cau dòn Yàng ò di la rơp ò gơs bơta gơlong bol glar. Dilah Yàng ai gơnoar bơta bol glar tus, gen Kơnràn rơp gơs bơta rơndap tap seng niam bol he in tòm ală bơta gơlong bol glar hớ. Gơs tú Kơnràn kỡn tiar mòn bol he gơlik gơs pràn kơldang rlau tai. Bulah kis digul pah rài oă bơta bol glar kal ke, broă he pal lơh mơ dòp git Yàng sum ơm bal mơ he, mơ bol he pal kớ nùs.

Ngai do, ngai 08/02/2026, rơndap bơta hòi dăn kòp ngai hòi jà ồng mọ oh kơlôi sơnơng Jơnau Yàng bal mơ Eddie Jones bơh tơnggume KƠ̆ TĔ NÙS!

“Yàng Jesu đơs mo mơ bol khai lah: “Kơ̆ tĕ nùs; Añ do, bañ rngòt.”” (‭‭Mathiơ‬ 14‬:‭27‬)

Tòm kơnhai lài, ẵn gơs tú ntào digal cau dòn Yàng gơs tiơng pơnro ngan la Bruce Wilkinson tòm dô bơta jơnum, tú ồng ơm kơp nàng ntao hơđang. Tòm tú hớ, bàr nă bol he ơm mó mó lơm, mơya tòm tú hớ, ẵn gó bol he gơs dô bơta ndròm bal. Hớ la bol he neh kơno jơnau đơs Yàng dê, mơ he pal sang ală bơta nàng cơnđoà lòt jat jơnau hòi já hớ, tòm ală bơta gơlong bol glar mơ kal ke.

Tú Bruce ntào hơđang, sră ồng cih tòm ală ngai sơnròp neh ò rgơi pơnjat tai bơh ming bàr pe dớ tac. Bơta hớ lơh ông kơlôi lah ồng ò rgơi pơnjat lơh broă tai. Mơya, tòm dô êt jó, ồng pơnjat lơh broă. Nam 1978, ồng cih sră “Daily Walk”, bơh hớ ồng pò mục vụ “Bộ hành qua Kinh Thánh – Walk Thru the Bible”. Bruce đơs lah, dilah bơh sơnròp gơs công nha niam gen buôn ngan nàng ồng in tồn lah ồng rgơi lơh ală bơta kơnòm di bơta chài rgơi is ồng dê. Mơya bơh công nha ò niam hớ dong ồng rgơi sên gó Yàng Tòm Trồ la Bơtau di pal dòp geh bơta gơkló, ò di la să tòm ồng.

Tú kơno, ẵn gó gơs mat ẵn tòm bơta yal yau ồng dê. Ẵn kung sang oă ngan jên priă tòm bơta cih mơ tac sră. Ẵn dòn lah ẵn neh lòt jat nùs kỡn Yàng dê, mơya tòm ẵn gơs bơta pin wil wơl mơ dồs oă ngan. Tòm tú behớ, ẵn kơlôi sơnơng lah, ẵn neh dòn bơr Yàng, nchi bơh tài ẵn kol dồs mơ broă lơh nchi bơh tai ò gơs công nha taih?

Tú bol he lơh tòm toh mơ bơta rơndap tap seng Yàng dê, nên cê bol he rơp dòp geh công nha niam tòm toh di tú jơ Kơnràn kỡn. Mơya bơta hớ ò di la he rơp rgơi pleh bơh ală bơta ò niam. Gơs tú bol he pal ơm tơm “blang bràs”. Ơm tòm “blang bràs” la pal cang ngan mơ Yàng ngui ală bơta hớ nàng rcang bol he in ală bơta dơng rlau. Bơh bơta long tiar, bơta dòn he dê geh têh dơng, nàng he in gơlik gơs cau dí lơbơn niam mơ dòn song, rgơi lơh ală bơta dờng Yàng in. Tòm bơta tiar mòn tòm “blang bràs”, he pal gơs bơta dòn kơnòm tòm Yàng tòm tú he gó he ò rgơi dòn kơnòm tai.

Ẵn neh roh oă ngan jền tòm bơta in sră mơ tac sră mơ ẵn lơh nền is lah ò lơh broă do tai. Mơya, pe jơt nam tơnớ, ẵn neh gam lơh broă hớ.

Tơnớ mơ bơta jơnum să neh lồi, ẵn gơs tú jơ nàng guh hơđang nơmơm. Ntào ting hớ mơ sên hơđơm, ẵn gó gơs nơmơm ro rẵn. Càl dơng khồm lơh ẵn in mor duh hơđơm. Tú hớ tơng kah ẵn kah tus bơta rngòt rngơt kon mơnùs dê: rngòt ò gơs cồng nha, rngòt gơplớ gơhùs, rngòt dơh wơl ală bơta. Bol he sùm gơs bơta kơp kỡn, mơ he ò gơs bơta lơi tài bơh bol he rngòt rngơt. Bruce đơs lah: “Tòm Hiu Jum Goh gơs oă ngan cau dòn rngòt rngơt ò gơs cồng nha. Mơya, ala mơ lơh bơta rngòt rngơt roh thit, Yàng Tòm Trồ kỡn he gơlik gơs pràn kơl dang mơ khin cha oă tai.”

Sră Goh neh cih wơl lah tòm tú ală cau bơtê Yàng Jesus ơm digul dà lêng gen gơs cal rbut dơng ngan, càl khồm sơrlớu gen tàng ryà dà lơnggac ơhò, gen Yàng Jesus lòt hơđang nha dà lêng nàng tus hơ bol khai. Ală cau bơtê rngòt rngơt mơ tồn lah cà. Mơya Yàng Jesus đơs lah: “Kơ̆ tĕ nùs; Añ do, bañ rngòt.” (Ma-thi-ơ 14:27).

Tòm cal rbut, Yàng Jesus gam ơm mơ ală cau bơtê, bulah bol khai dơrcul lơnggơr mơ rngòt rngơt ngan, bulah bol khai ò sên gó gah ne dà lêng, tú bol khai kơlôi sơnơng tis bơh Yàng. Ngai do, bol he gam lòt jat Yàng, bơta hớ ò di la he rơp ò gơs ală cal rbut. Mơya bol he gam sên gó lơngap lơngai bơh gơs dô Bơtau sum gơs mat mơ he mơ đơs lah “Kơ̆ tĕ nùs” bulah tòm tí he ò hềt gó gah ne dà lêng, tú bol he ò git ngai hing rơp gơlik gơs mbe lơi mơya jơnau đơs Yàng dê la tơl bol he in nàng he pơnjat cơnđoà lòt, pơnjat “hao hơđang ơhò” mơ pơnjat dòn kơnòm di Kơnràn.

Dan jà bol he dô nùs bal tòm bơta hòi dan: Khoai Bèp gơboh, digul ală bơta ò gơs công nha niam hala digul càl rbut dơng, dan ai kon in sum dòp git lah Kơnràn sum ơm bal mơ kon. Dan jơnau đơs “Kơ̆ tĕ nùs” Kơnràn dê rơp pơndòm pơniang kon, wàs sàn ală bơta kơlôi rcang, rngòt rngơt mơ roh bơta gơn kơnòm. Dan Yàng ai kon in bơta kớ nùs nàng kừ pơnjat cơnđoà lòt jat Yàng. Dan ai kon gar mat ò di sên di bơta bol glar kal ke gùt dar kon, hala ò di sên tai bơh ală ngai ò gơs tiah gơn kơnòm, mơya dan ai kon in sum sên di Kơnràn mơ jòi bàn bơta ring lơngai tòm Kơnràn. Kon hòi dan, ai sơnđan Yàng Jesus Krist, Amen.

Ơ ală ồng mò oh mi kỡn gơboh, gơs càl rbut lơi, bơta pin wil wơl lơi hala bơta gơtup pừ lơi gam ơm kơp nàng tơn kram ồng mò oh mi sơl? Gơs bơta rngòt rngơt lơi lơh ồng mò oh mi in dơh wơl, ò khin nàng lòt jat Yàng tai sơl? Gơs tú bol he gơplớ gơhùc bơh he sên gó he cơnđoà lòt jat Yàng, duh broă Yàng mơ oă ngan bơta kal ke. Ngai do, bol he lòi té nùs he kơlôi tus dê jơnau đơs Yàng dê: “Kơ̆ tĕ nùs; Añ do, bañ rngòt.” nàng ò rngòt rngơt mơ pơnjat cơnđoà lòt tai mơ lơh sir ală bơta Yàng kỡn he lơh. Kòp ală bơta tiar mòn bơta dòn, bol glar kal ke rơp lơh he in git lam Yàng oă rlau tai, mơ rcang sir gơs công nha oă rlau tú he ơn nùs nhơm he tòm jơnau hơ lơngap lơngai Yàng dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.