Tòm rài kís, gớs oă broă gơlik gớs mờ he păl sak rơ hoah he păl ơm đah lơi, bè tòm dồ bơta pơr lòng. Mơya, hơ̆ mìng là bơta sak rơ hoa ing lơm. Kờp nă tòm bol he păl tòm toh mat mờ dồ bơta lùp dờng rlau jơh, hơlà bơta sak rơ hoa păl ơm tềng đah lơi tòm rài găm sùm bol he dê. Tòm tŭ hơ, bol he neh rcăng jơnau hơ he dê sơl?

Ngai do, ngai 09/02/2026, Bơta Hòi Dan Kòp Ngai dan jà ồng mò oh mi bơtê bal Jơnau Yàng bơh kơnòm dê bơta dong kòl Shadia Hrichi bơh tơnggume BOL HE ƠM DÊ ĐAH LƠI?

“Mơya ưnngài Yàng Tom Trồ, Kơnràñ ai bol he in bơta pha lin rlau bơh Yàng Jesu Krist la Yàng bol he dê.” (‭‭I Kôrintô‬ ‭15‬:‭57)

Tòm tiah Hoa Kỳ, lài mờ tŭ gơs bơta bơr lòng dơ̆ dut plai bầu dục , bơta hòn chò gŏ làm tiah. Ala cau soh dê ồi ào mpồl he koñ gơboh, bơh đang mạng xã hôị tus dê bơta yăl tơnggit tòm tivi kung đơs tus. Dê tiah lơh broă, dê gùng dà, tòm hìu jum kung kơno iat bơh bơta bơr lòng mờr tus hơ̆. Oă hìu nhă neh rcăng tiah sền tòm hìu, tòm hìu drà dờng gơs oă ngăn cau bơh cau lơi kung koñ blơi phăn să, phăn hùc bơh bơta hơ̆ rau.

Đớs ngăn lah añ là cau ò gơboh thể thao. Añ ò kung git oă mpồl đá plai hala cau nhơl jak gơs cơng pơn rơ. Mơya gớs dồ bơta añ dòp git lah bơta kơp koñ geh pha đwơn ngăn gơ rơ sìh. Kung bè dồ nă cau ò tŭ lơi sền thể thao kung gơ tơmut tòm bơta hơ̆? Ñchi bơh tài bè hơ̆? Hơ̆ là bơh kòn mơnùs sùm gơs bơta koñ geh pha.

Tŭ bơta bơr lòng dơ̆ dut neh tús gơñ, ala cau koñ gơboh bàr mpồl dòn nền mpồl he dê rơp geh pha. Mơya tŭ lơi bơta bơr lòng jơh, hơ̆ là tŭ rơp git cồng nha. Oă cau ơn bơta dòn he dê dồ mpồl đá. Mơya tŭ mpồl đá hơ̆ ờ pha, bol khai gớs bơta moat jrùng.

Tòm rài kís, kòp nă tòm bol he rơp păl tòm toh măt dê dŭ tŭ dờng màng, hơ̆ là tŭ bol he păl hơ wơl jơnau lùp bơh rài kís he de. Rài kis hơ̆ rơp gơlik gơs bè lơi là gơ rê “tềng đah” mờ bol he găm ntào. Bol he rơp sak ntào đê đah mờ Yàng Jê-su hala dunnia, bơta kis hala bơta chơt, bơta phalin hala bơta chơt? Bol he git loh làng ngai, tŭ jơ dồ bơta bơr lòng, mờ ya ò dồ nă lơi tòm bol he git tŭ lơi bol he rơp ntào đê đap măt Yàng mờ tòm toh rài sùm sùm. Gen tàng, bơta sak rơ hoa là ờ chài lời nhờt. Dê tòm ngai do, bol he păl gớs bơta sak ntào dê đah phalin, hơ̆ là Yàng Jê-su.

Sră Goh yăl bol he in git Yàng Jê-su là Bơtau Phalin. Kòp nă cau lơi dòn dòp Kơnràñ gen rơp geh dong klàs mờ geh bơta kís găm sùm sùm: “Bơh Yàng Tom Trồ kòñ gơboh dunnia, tian gơs neh ai Kòn Dùl Kơnràñ dê, tồ cau lơi in dòn Kơnràñ, gen ò kòl roh rui, mơya geh bơta kis gam sùm sùm.”(Jang‬ ‭3‬:‭16)
Tŭ sền dê chi pơng, tŭ cau pơng đìn Yàng Jê-su, Jơh ala broă bè là neh ò geh pha. Mơya Yàng Tòm Trồ neh lơh Yàng Jê-su in kís wơl bơh bơta chơt, mờ tòm bơta kis wơl gơklŏ hơ̆, Kơnràñ neh pha lin ala cau tòm dră lồi dut, hơ̆ là bơta chơt.
“Ơ bơta chơt, ntềng đah bơta pha lin rlau mê dê taih? Ơ bơta chơt, ntềng đah bơta bih khih mê dê taih?” Bơta bih khih bơta chơt dê la tồi glài, gơnap gơnoar tồi glài dê la bơta boh lam. Mơya ưnngài Yàng Tom Trồ, Kơnràñ ai bol he in bơta pha lin rlau bơh Yàng Jesu Krist la Yàng bol he dê.” (‭‭I Kôrintô‬ ‭15‬:‭55‬-‭57‬)

Ồng Pol ai bol he in git bơta chơt là bơh tồi glài gơlik gơs, mờ bơta boh lăm lơh tồi glài gơlik loh làng rlau tai. Bơta boh lăm là ờ rgơi dong klàs kòn mơnus in. Dilah kơnờm bơh bơta pràn is mờ bơta song ring să tòm he, bol he rơp ò gơs bơta phalin lơi. Mơya Yàng Tòm Trồ neh lơh broă là tŭ Kơnràñ ai Yàng Jê-su bol he in. Bơh bơta chơt mờ bơta kis wơl Yàng Jê-su dê, gơnoăr boeta chơt neh geh lơh bơcah, mờ bol he neh geh phalin. Gen tàng bơh hơ̆ mờ ồng Pol neh hòn chò mờ đơs lah: “Ưn ngài Yàng Tòm Trồ neh ai bol he bơta pha lin rlau.

Gen tàng, bơta lùp ai kòp nă bol he in tòm ngai do lah bol he ơm tềng đah lơi, mờ bol neh rcang nàng ơm băl dê dồ bơnah mờ Yàng Jê-su hala ò?

Dan jà bol he dô nùs bal tòm bơta hòi dan: Khoai Yàng kòn dê! Kòn ưn ngài Yàng bơh kòn gơ rê băl mờ Kơnràñ, bơh kòn neh geh dong klàs ò di bơh broă lơh hala bơta pràn ís kòn dê, mờya là bơh bơta kong chơt nàng geh tơ wài glài Kơnràñ dê. Dăn ai kòn it dòp git bơta koñ gơboh jrô ờ nàng Kơnràñ nàng ai kòn in kơnùs ntào đê đah mờ Kơnràñ bulah tìp bơta lơi. Dăn Yàng tề lăm kòn tòm kòp bơta kơlôi sơnơng, jơnau đớs mờ broă lơh nàng kòn rgơi ràng tơlik là kòn gơ rê mờ Kơnràñ dê ala cau gut dăr. Kòn jơh nùs hòi dăn tòm sơnđăn Yàng Jê-su Krist, A-men.

Ơ ồng mọ oh mi koñ gơboh, kòp ngai lòt găn, kòp tŭ sak rơ hoa, kòp bơta kơlôi sơnơng, kòp broă lơh bol he dê là ràng tơlik bol he găm ntào đah lơi. Dê gùl dunnia bềng bơta gơlòng, Jơnau Yàng hòi jạ bol he păl khin cha ntào dê đah mờ Yàng Jê-su, ntào dê pơnah ala bơta di, song ring mờ sàng goh, ò di ntào băl mờ ala bơta gơrê mờ tồi glài mờ poăc să. Dăn kòp nă bol he lòt găn bơta pha lin Yàng Jê-su tŭ bol he sak cơn đoà lòt tòm bơta đềt mềr mờ Kơnràñ kòp ngai.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.