Digơlan oă cau tòm bŏl he neh găm kơno tus rnoas sền gar gơnoăr pràn gơs tơnggume lah “gơnoăr pràn ò gơlik gơs is kŭng ò gơs rọh is gơ, mơya mìng gơs tòmgơl bơh bơta do tus bơta ne.” Mơ gơnoăr pràn, bulah là bơta he òhềt sền gŏ, mơya òs sum tơlik mat mơ òs càng ngăn gơwèt ală pơnah tòmgơl trồ tiah plai ù, dunnia do di.

Rài kis đah hwing kon sau Yang kŭng behơ̆ sơl. Cau Don jat Yang kŭng càng tòm ryas gơnoăr pràn, càng pràn kơldăng gùng dà jat Yang he di ĭn. Mơ bŏl he kŭng gơs dô jơnau ho nàng rơp gơs dòn kơnòm mơ kơ̆ nùs, tồ git nền lah Yang òs rcang tòm ryas gơnoăr pràn pa tus ală cau gơn kơnòm Kơnrẵn.

Ngai do, ngai 10/02/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Brooke Keith dê bơh Tơnggume JƠNAU HO GƠWÈT MƠ CAU LƠI GƠN KƠNÒM YANG.

“Mơya cau lơi gơn kơnòm di Yàng Jehôwa gen rơp geh pràn pa, bol khai rơp pò pơnđar par jơnhoa hơđang kung be klàng bung; bol khai rơp ntoat mơ ò bòl glar, bol khai rơp lòt mơ ò lơgah lơgañ.” (Esai 40:31)

Gơs vau lơi chồl bơtrut he ĭn sơl, la dô bơta chồl bơtrut he ĭn tòm rài kis sơl? Gơwèt mơ ăñ, hơ̆ la Benji, kọn klau put he di. Benji là dô nă kơnòm ò jọng jơnhoa be oă cau, mơya kọn là dô nơm cơng tàng lọh lang bơta nđàc sơngit ĭn Yang Tom Trồ di.

Lài mơ tŭ Benji lik bơh kơndul, cau gơnoăr sơnơm ai tơnggit lah kọn dềt rlau jơh gơwèt mơ sơnăm glèng bŭn. Ăñ găm kah tŭ gơlơh nrơt nrơl tòm tŭ siêu âm hơ̆, tŭ git kơnòm klau mor tus di ngai deh mơya mìng njơ̆ òhềt tus 2kí mơ gơlơh be ò gơ rò jơng tê. Tŭ hơ̆, ur klau he mìng git họi dăn. Mơ Yang Tom Trồ neh lơh broă.
Àng drim ngai hìng, ăñ ri wơl hơ hiu sơnơm nàng siêu âm dô dơ̆ tai, rcang sir nùs nhờm tŭ broă păl reh mhăr nàng deh mo. Gơkrơi ngăn, muh măt dềt rhền Benji di tơlik hơđăng rùp sền. Tŭ do, sền kọn neh dờng rlau, gan sơnđoh jơng tê tai, tơ ‘ ai lah ală cau gơnoăr sơnơm kalke ngăn mo chụp geh rụp do.

Cau gơnoăr sơnơm đơs: “Ăñ gơlơh gơkrơi ngăn tài bơh òhềt gŏ bơta gơlik gơs be do” găm ăñ mìng ñŏ ho wơl : “ăñ gen ò gơkrơi. Ăñ git gơs oă cau neh họi dăn kọn ăñ ĭn, mơ Yang Tom Trồ neh iat kơno dòp jơnau họi dăn.

Tơnơ̆ tŭ siêu âm hơ̆, bŏl he ri wơl hiu mơ kơp gơn ngai kọn dềt deh. Mơya, tus măng deh kọn, ală broă gơlik gơs kơlôi rcang ir. Cau gơnoăr sơnơm lik mut mut lik, ală máy móc mơ che gen ơm gut dăr. Tŭ plai nùs Benji sơntom ò pràn tai, cau gơnoăr sơnơm đơs ăñ păl deh reh, mơya tòm nùs, ăñ don Yang Tom Trồ găm at bồ ală bơta. Mơya gen, mìng dô êt phuk tơnơ̆, tềl krơi neh gơlik gơs. Kọn ăñ neh lik bơh kơndul me tòm rùp să niăm hàng mơnĕ, rĭng lơngai wil tơl mơ pràn kơldăng.

Tŭ do, mor prau kơnhai sơnăm, Benji òs pơnđơl pràn is he ntào ñhă. Kọn sơnđòa lòt, òs mòng gơpừ bồng, mơya ò gơplơ̆ nùs. Mìng gơs cau dŏng kòl ntào guh, kọn ñă ntào wơl mơ. Bơta kŏng ơt hơ̆ lơh ăñ ĭn dòp git lah kơnòm dềt rơp bơtọ wơl ală cau dờng oă bơta.

Tŭ sền kọn, ăñ geh tơngkah tus jơnau Yang tòm sră Esai 40:30-31 “Bulah ơruh pơnu rơp bòl rơp glar, bulah ală klau pơnu rơp gơtup pừ. Mơya cau lơi gơn kơnòm di Yàng Jehôwa gen rơp geh pràn pa, bol khai rơp pò pơnđar par jơnhoa hơđang kung be klàng bung; bol khai rơp ntoat mơ ò bòl glar, bol khai rơp lòt mơ ò lơgah lơgañ.”

Esai 40 là pơnah Sră Goh đơs bơh bơta pơndòm pơniang Yang Tom Trồ di gơwèt ho làng bŏl Kơnrẵn tòm tŭ kŏng lơh dĭ. Tŭ tìp bơta ji sồt mơ rọh bơta gơn kơnòm, bŏl khai kơp gơn dô bơta gơn kơnòm geh dŏng tơwài. Cau gơnoăr hwơr Esai ngùi rùp sơñio “ơruh pownu” mơ “ală cau klau pơnu” – la ală cau găm gơs sơnăm gơs sơnăm pràn kơldăng rlau jơh, nàng đơs lah bulah bơta pràn hơ̆gơs dờng mbe lơi, gen kŭng mìng gơs rnoas gơ di, gen gơs tŭ “bŏl glăr lơbơn ò sô” mơ “gơtup mơ pừ”. Mơya jơnau Yang di ho là dilah cau lơi “gơn kơnòm” di Kơnrẵn gen “rơp geh pràn pa”. Sră Goh ò đơs “digơlan gơs pràn pa” mơya “ là rơp geh pràn pa”. “Pràn pa” hơ̆ la pràn tus bơh Yang Tom Trồ, òs sum pràn tơl, dong bol he kơ̆ dòn kơnòm Kơnrẵn. Kŏng ơt gơn kơnòm digul ală broă gơlik iơh tus mơ moat jrung tus tòm rài kis.

Benji găm dềt rhền ngăn mơ lơbơn pràn, mơya kon là cau cèng tus bơta chồl bơtrut ăñ ĭn kòp ngai. Kọn la jơnau tơngkah nàng ăñ ntào jai tŭ gơtup pừ, hòn chò tŭ ò bơtoah, mơ sơlơ dòn kơnòm Yang Tom Trồ. Kơnrẵn găm at bồ, găm bềng bơta gơnap gơnoăr, găm iat kơno jơnau họi dăn ăñ ji.

Tŭ kọn sơmbat tê ăñ, mpang tê dềt rhền kọn di koar kơ̆ kọn tê ăñ ji, ăñ họi lùp is lah kọn gơs git lah ăñ kŭng găm sơmbat mơ kơñ gơboh kọn bơh jơh nùs hala ò. Ăñ gơn kơnòm kọn geh dờng, kọn rơp wă lọh he neh lik bơh kondul me mơ geh dờng dô bă krơi is mbe lơi. Kơnòm bơh kọn, ăñ neh git lăm jơnau ho pơgon Yang Tom Trồ mbe lơi, kŭng be broă Kơnrẵn ràng tơlik bơta koñ gơboh mơ gơnap gơnoăr kọn klau ăñ ĭn sơl, mơ jơh tơl nă cau, ală cau kơp gơn di Kơnrẵn.

Dan jà bol he dô nùs bal tòm bơta hòi dan: Khoai Yang la Bơtau ai pràn pa hơđăng kon. Kon ưnngai Kơnrẵn tài bơh găm at bồ mơ iat kơno jơnau họi dăn kon di. Ơ Yang, tŭ kọn bŏl glăr tòm gùng dà jat Kơnrẵn, tŭ kọn rọh jơh gơnoăr pràn kis, tŭ kọn bíc jŏ jọng tòm bơta ơm is dô nă, siơ̆u rọh bơta gơn kơnòm, tŭ Kơnrẵn dŏng kọn git gơn kơnòm Yang, dòn kơnòm di jơnau ho pơgon Kơnrẵn di, sơnding bơta nđàc mơ gơnap gơnoăr Kơnrẵn digul ală kalke mơ ji sồt moat jrung. Dăn bơtào wơl kọn jơnhoa mơ pò pơnđar par jơnhoa, kŭng be git lăm tòm ryas gơnoăr pràn pa Kơnrẵn di tòm kòp ngai rài kis di. Kon jơh nùs họi dăn, ai sơnđăn Yang Jesu Krist, Amen

Ơ ală ồng mọ ọh mi koñ gơboh, tòm ngai do he găm gơs gơn kơnòm bơta ho wơl, bơta bơtơl pràn, bơta pò gùng Yang di gơwèt hơ rài kis he di sơl? Gơs dơ̆, bulah gơnoăr pràn kọn mơnùs di pràn kơldăng mbe lơi, gen kŭng gơs dơ̆ gơtup pừ mơ bŏl glăr. Gen behơ̆, digul ală ngai kalke rlau jơh, bulah tòm ală ngai òs mòng, kòp tŭ, kòp bă tiah, bơtê git gơn kơnòm tĕ mơ kơp gơn di Yang. Ò di ngai ndai ò, mơya tòm ngai do, he geh họi jà tus bơh tòm ryas pràn pa Kơnrẵn di! Kơp koñ bŏl he sơmbat kơ̆ jơnau ho Yang di! Kơp koñ ală cau gơn kơnòm Yang Jehôwa rơp ò basil. Kơp koñ bŏl he rơp git lăm tòm ryas pràn pa bơh di Yang, rơp pò pơnđar par hơđăng jơnhoa, lòt găn ală bơta bŏl glăr, lơgah lơgañ.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.