Gơs tú tòm rài kis, bol he nisơna pal àn ơnòng dồ bơta ờ di bơh broă he lơh. Dồ cồng nha ờ niam kung ờ di bơh broă he lơh. Dồ bơta ơnòng kơn jớ dù hơđang bol he tài bơh he la cau gơs mat, cau git jơnau, hala oă dớ la he ờ rgơi lời.

Tòm ală tú bè hớ, bơta ờs mờng he dê la pleh ngài, hala lùp is: “Nchi bơtài la an taih?” Mơya, Sră Goh yal he in dồ broă bơh dồ nă cau ùr neh chò nùs àn ơnờng kơnjớ , mơ bơh bơta do neh dong tă dồ hìu nhă, kup kơryan bơta tomlơh.

Ngai do, 11/02/2026, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bơh tơnggume CHÒ NÙS ÀÑ ƠNÒNG BƠTA KƠNJƠ̆

“Behơ̆ tŭ do git tĕ bơta hơ̆ mơ sền sơwì ñchi mò pal lơh…” (‭‭I Samuel‬ ‭25‬:‭17‬)

Kon ùr tơm mpồng, ntoat mut, muh mat chò hòp, “ơ mẹ, cau pờ nhàr lơgar rau mơ pà kon in rgơi mut bơtê, kon pa dờp email, sră pơyoa ai gơnoar cau Đại sứ quán dê”. Chò hòp ngan, nùs nhơm an dê gơwèt mơ kon an dê.

Di đap bơta chò hòp kon dê, an neh mhar đơs: “ờ git lah mang ti kon neh lơh mẹ in kơlôi rcang oă ngan”. Kon ùr an dê khai ntào dê đap mpồng, wơlke sền, mơ đớ mơ an: “git bè do kon neh ờ đơs nàng mẹ ờ kơlôi”. Jơnau đơs do lòt jat an oă ngai tơ nớ.

Kah wơl tú jơ bal mơ cau gơnoar bơto ntào tòm tơnao baptem dong kon ùr an nhơp tòm dà, an neh lơh nền jat bơta cau gơnoar bơto đơs: “mò rơp bal mơ Tường Vi cơn đoà lòt tòm gùng đah hwềng sơl ơ?” bè hớ mơ tú do, tơnớ dồ măng hòi dăn bơh bơta jê sồt kon ùr dê, bơh broă rơp gơkòl cau sang bơta bơtê tài bơh ală rnoas dờp khà làng bol dê tòm pah gơtip Covid, an lùp is să tờm an lah “Ngan an gơs tơl pràn nàng pơnjat tề lăm ròng siam kon an sơl ơ?. An pin wil wơl mơ roh nùs.

Jơnau yal yau bơh cau ùr Abigain geh Sră Goh cil wơl tòm 1 Samuel 25, lơh an in jê nùs bal mơ bơta kơlôi sơnơng an dê. Dê gùl broă pal càng mơ broă rơp gơ tơntus bơta ờ niam tus dê jơi bơtiàn tài bơh broă tìs bau klau la ồng Nabanh, mò Abigain neh ntào, dờp broă, tiah do di ngan la bau klau khai dê, cau nàng sền gàr hìu nhă, mơ bơta kis hìu nhă khai dê.

“Mơya gơs dô nă cau duh broă neh yal wơl Abigail,… Behơ̆ tŭ do git tĕ bơta hơ̆ mơ sền sơwì ñchi mò pal lơh, bơh bơta iơh neh geh lơh nền tòmdră mơ cau tòm he dê mơ jơh hìu nhă khai dê. Khai ngan la dô nă cau gơs nùs nhơm iơh, ò gơs dô nă cau lơi rgơi đơs mơ khai.” (‭‭I Samuel‬ ‭25‬:‭14‬, ‭17‬)

Cơn đoà lòt bal mơ jơnau Sră Goh cih wơl, an sề gó bơta lơh nền, kớ cê mò Abigain dê, tòm pơnah rcang ală broă pal càng, pơnah mò at bồ, cah is ală broă, tề lăm ơ hò hìu nhă dê lòt gan broă kalke:

“Gen Abigail sơrbac sơrbang mơ ai bàr rhiang nơm piang lă, bàr nhồng gơltau tơrnòm, pram nơm belàt neh lơh poac, pram thùng gar ceh, dô rhiang nơm ƀañ plai ño mơ bàr rhiang nơm ƀañ plai ƀal ro. Khai dap jơh hơđang ngkòi alàng” (‭‭I Samuel‬ ‭25‬:‭18)

Abigain neh dờp jơnau yal tơngit dồ bă mhar ngan, lơh broă dồ bă sơrbac sơrbang. Jơh ală broă do ờ di la nisơna, ờ di jat nùs poac să is, mơ la cồng nha tòm gùng lòt jat mơ gơn kơnờm Yàng dê, neh sền gó pơnah Yàng Tòm Trồ lơh broă gơnap gơnoar hơđang làng bol mò dê. Bơta do neh ràng tơlik dồ bă kràn cê tòm jơnau mò đơs mơ bơtau David: “Yàng Jehôwa rơp bơtào kơ̆ jơi bơtiàn cau tòm añ jê tài bơh kơnràñ tòmlơh ală bơta tòmlơh Yàng Jehôwa dê” (sèng 28).

Kung bè tòm jơnau mò dan: “Mơ tòm tŭ Yàng Jehôwa neh lơh gơlik gơs ală bơta niam hơ̆ cau tòm añ in, gen dan kah wơl cau duh broă ồng dê.” (sèng 31)

Kòp jơnau cih tòm Sră Goh lơh nùs nhơm an duh hul. Nùs dờn nền tòm Yàng Tòm Trồ mò Abigain dê neh dong tă jơh hìu nhă, dong tă jơh ală cau ơm dí tòm hìu nhă, mơ kung dong David lik klàs bơta lơh roh mhàm cau ờ gơs glài dê.

Tom jơ fuk hớ, an cùn gơltang, ờ ai să tờm an pơrwài tai, dờng jơnau hòi dăn, “Khoai Yàng, kon ờ ruc wơl, kon sùm kờn cơnđoà lòt bal mơ kon ùr kon dê, tòm tú chờ hòp hala moat jrung, nàng kon ùr an dê rgơi sền gó mpàng tê niam rlau jơh Yàng dê. Kon dan Yàng tol glài tú kon gơplớ bơta dờn, neh kơlôi rcang tài bơh híu bơta at bồ Yàng dê. Tú do, kon dờn kơnòm Yàng bơtơl pràn kon in”

Mơ Yàng Tòm Trồ sùm dờn song. Kon ùr an dê lòt bơtê ngài mơ rê còp hìu oă dớ. Mơ gơs dồ dớ, sền gó kon ùr tơlik bồ dê mpồng mơ đơs, “O mẹ, kon tom boh bơr mơ mẹ dồ ết di sơl?”, an ai lơh krơi, “kon ờ hềt bic sơl?”. Bal mơ mpồl bơtê Sră Goh wă rò nam pa, an gơlơh bòl mơ rê bic, mơya tú kơno kon ùr an đớ: “kon kơp mè jó rau, kon kờn tom boh bơr mơ me” gen lơh an in ờ gơdan bic tai. Sền gó bau klau neh bic bơh dồ ngai bòl glar, an kal đèn mơ lik bơh ơdú bic. Tơnớ an nggui bal mơ kon ùr tòm ơdu bic khai dê, tơnớ mơ ơm mo mó, kon ùr an dê nisơna lùp an: “mẹ hòi dan kon in di sơl?”

An hòi dăn kon in dê gùl trồ măng ngềt ngơt hớ, mơ gó kon ùr an chò nùs, mơ muh mat niam tú tơngac an rê bic, tòm nùs an dê chò nùs ừn ngài Yàng. Yàng neh ai an in sơntờm dồ nam pa dồ broă dờng rlau bơta kơlôi sơnơng an dê. Gơnoar broă dờng màng dồ nă cau mẹ dê, gơlơh bè broă ờ rgơi lơh, tú do Yàng neh tơngkah an chò nùs àn ơnòng, tài bơh git lah Yàng sùm lòt bal, sòl pơnđàng mơ at bồ.

Cau lơi tòm bol he rơp gơs tú pal at broă. Hớ digơlan la broă cau hala broă tờm he dê. Ală tú tìp broă bè hớ, dan Yàng chồl bơtrut bol he gơlik gơs cau àn ơnòng broă, nàng bơh hớ, ală cau gùt dar he rơp geh lơngap lơngai, mơ bol he rơp dờp git pơnah Yàng at bồ jơh ală broă tòm bơta song ring Yàng dê.

Dan jà bol he dô nùs bal tòm bơta hòi dan: Khoai Yàng Tòm Trồ, Bèp kờn gơboh, dan Yàng toh glài kon in tài bơh oă dớ kon lơbơn, ờ mhar àn ơnòng gơnoar broă Yàng jào. Dan Yàng pà ai kon in bơta jak chài, mơ nùs nhơm mhar nàng Yàng ngui, nàng cèng bơta ring lơngai tus dê cau gùt dar kon, mơ bơta song ring Yàng dê geh ràng tơlik. Kon jơh nùs hòi dan ai sơnđan Yàng Jêsu Christ, Amen.

Ơ ală ồng mọ oh mi kờn gơboh, Yàng sùm gam jòi ală cau bè mò Abigain, ală cau git ơm wơl, kơlôi sơnơng mơ mhar lơh broă tòm bơta duh rngòt Yàng Tòm Trồ. digolan tòm hìu nhă, tòm tiah lơh broă, hala di gùl cau ndai, taih Hìu Jum Goh hala ală mpồl, Yàng gam ơn bol he tòm tiah ờ buơn he in, dồ bơta kơnjơ gơlơh bè ờ gơrê mơ he. Mơya tềng tiah hớ, Yàng hòi jà bol he cơn đoà lòt tòm bơta dờn, ban ruc wơl, mơ ya chò nùs ành ơnòng bal mơ nùs dơn kơnòm dê bơta at bồ Yàng dê. Dan Yàng pà ai bol he in bơta jak chài nàng git lơh broă pal lơh. Dan Yàng pà ai bol he in bơta khin cha nàng khin ntào, mơ nùs nhơm lơbơn niam nàng lơh broă tòm bơta kờn gơboh. Tú bol he dờn bơr cơn đoà lòt bal mơ Yàng, Yàng rơp ngui bơta dờn bơr hớ nàng cèng bơta ring lơngai, bơta kis, mơ bơta lơngap lơngai tus dê oă cau gùt dar bol he dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.