Gơs ală bơta iơh tòm rai kis nisơna tus, lơi wơl dô nơm ơnih gợi ò gơs cau lơi kơp gơn. Bơta roh gơ coh, bulah cèng rup să lơi – bơta chơt, tuh bơcah, kop ji hala ală bơta mpau ò gơlik gơs ngăn – kung lơi wơl ală tềl.

Sồt kalke hôi sơnđăn măt. Di đap măt bol he la ală ngai klăm jơngo, rai tơnơ̆ gơlik gơs lu li, mơ nus he dơrcul digul ală sèng lup ò gơs sèng hơ. Mơ ya rai kis oă tơm gơl, sùm gơs măt dô Bơtau ò tơm gơl. Mơ Kơnràñ sùm la Bơtau dòn song lơh bềng ală tiah hut hơng tòm nus bol he.

Ngai do, ngai 12/02/2026, Bơta Hòi Dan Kòp Ngai dan ja ală ồng mò oh mi bơtê bal Jơnau Yàng kơ nơm di bơta dong kơl Courtney Johnson dê bơh tơnggume TỀL SỒT RMAÑ HƠ ĐĂNG KÒN TÊ.

“Yàng Tom Trồ la Bơtau ai jơh ală bơta nđàc neh hòi sac ală oh mi tus hơ bơta gơklŏ gam sùm sùm Kơnràñ dê tòm Bơtau Krist, tơnơ̆ mơ tŭ oh mi neh kong bòl glar jê sồt dô êt jŏ, gen să tòm Kơnràñ rơp lơh oh mi in gơlik wil tơl, kơ̆ nền, mơ bơtơl pràn oh mi in.” (I Piêr 5:10-11)

Mơ gen añ bàn wơl gơ – tềl sồt rmañ bồ hơđăng tê kòn đah kiau añ jê. Sên gơ ơm kuh mơ loh lang, lơh añ in lùp is lah ală cau gut dar gơs wềt sền gơ hala ò. A“Burnout” neh dồ sơmbiat tòm kòn tê dô tòm oă sơnăm, jŏ ir tian gơs gơ sơntơm gơlik dềt rlau mơ tê kon đah ma. Behơ̆ gen tŭ do, ò gơs sơmbiat ndai lơi tòm phăn bơka să añ jê rgơi di tòm kòn tê añ. Añ git loh bơta hơ̆, mơ añ neh pơnđơl jơh rau.

Bơh ngai bau añ yal kòñ bau mơ añ tòm hiu hôi dăn digah jơng grôi niam, hơđơm dô nơm chi pơng băliă, hơđăng kòn tê dô tŭ lơi kung dồ dô nơm sơmbiat. Bơh sơnrơp, gơ hang mơnĕ mơ sơmbiat lêt lŭ kas màng. Jơt kơnhai tơnơ̆, sơmbiat lùp tơmbau neh geh tơmgơl mơ sơmbiat tơmbau, mơ jơng mpang tê kiau añ jê hang niam ngăn. lŭ kas màng mơ mah gen niam, mơya bơta niam ngăn ò di lik bơh hơ̆. Kòn tê dô ceng tềl sơñio jơnau hơ pơgon añ ai dô nă cau klau in, jơl tus dê bơta chơt cah is, be jơnau hơ bol he neh bơtao lai diđap măt Yàng Tòm Trồ.

Gen bơta chợt ngăn neh cah is bol he. Mơ tŭ do añ găm dô nă lơm. Kòn tê gợi do gơlik gơs jơnau tơngkah bơh bơta roh gơcoh – bơh cau hơ̆, bơh ală nagi tơnơ̆ hơ̆, mơ bơh ală bơta kơp kờñ òhềt lơh sir. Ală sơmbiat hơ̆ ò di ming la mah wil, gơ la sơñio kis.

Oh mi rgơi dô nus bal mơ añ ò? Rgơi, oh mi kung gơs dô nơm kòn tê enh dồ sơmbiat tơmbau hala hơ pơgon bau, mơya tŭ do gen ò geh. Hala digơlăn, kơp tŭ sền tòm krơh, oh mi đăl git dô pơnah lơi tòm rai kis he ò găm be lai tai, bơh bơta kop ji, bơh bơta jê sồt, hala bơh dô bơta roh gơcoh ò rgơi đơs mơ bơr.

Drĕ drĕ, añ đăl git lah te kon gợi hơ̆ ò di ming tơngkah añ bơh bơta neh roh, mơ kung ràng tơlik bơta lu li bơh ngai tơnơ̆. Jơh ală bơh mơ añ neh neh rơndap rai kis he in tơmgơl jơh. Ur klau añ neh dô nus bal rong bơta gơn kơnơm, ală bơta kơp kơñ tòm ngai tơnơ̆ – ai bol he mơ ală kòn in. tŭ do, añ pal pơnđơl pràn să tờm is nàng kơlôi tus bơta hơ̆. Añ git Yàng Tòm Trồ ơm bal mơ añ, mơya nus añ găm ơs kol hwoai tom bơta rngòt rngơt diđap ală bơta ò git.

Mơya bulah behơ̆, jơh tŭ do tus tŭ nê, Bèp Hơđăng Rlau Jơh tơngkah ơm ală jơnau hơ Kơnràñ tơm nùs añ: “ Kon ur Àñ jê, ngăn behơ̆, dô la bơta je sồt kòn pal ceng, mơ ngăn la ală bơta neh tơmgơl gơwet mơ kòn. Mơya Àñ gen ò tŭ lơi tơmgơl.”

Tòm Yal Wơl Bơta Boh Lăm 31:8, bol he geh tơngkh lah: “Să tòm Yàng Jehôwa rơp lòt di đap bol mê mơ rơp ơm bal mơ bol mê, Kơnràñ rơp ò tŭ lơi sang bol mê hala lòi bol mê. Bañ rngòt; bañ gơplơ̆ nùs.” Yàng Tòm Trồ mơ añ duh khoai la Bơtau ò tŭ lơi tơmgơl mơ sùm don song gơ wet mơ ală phăn crơng gơs Kơnràñ dê. Kơnràñ găm la Bơtau ngai or, ngai do mơ jơl sùm sùm ò tơmgơl, mơ Kơnràñ rgơi ngui să tòm ală bơta gơlik gơs jê sồt tòm rai kis nàng lơh sir ală tơnggu hơđăng jong Kơnràñ ai añ in.

Kon tê gợi jơ do kung ceng dô nơm gơtha ndai. Mơ añ dòn lah tus dê tơm toh tŭ jơ, să tơm Yàng rơp lơh bềng wơl tềl sồt hơ̆. 1 Piêr 5:10-11 đơs nên: “Yàng Tom Trồ la Bơtau ai jơh ală bơta nđàc neh hòi sac ală oh mi tus hơ bơta gơklŏ gam sùm sùm Kơnràñ dê tòm Bơtau Krist, tơnơ̆ mơ tŭ oh mi neh kong bòl glar jê sồt dô êt jŏ, gen să tòm Kơnràñ rơp lơh oh mi in gơlik wil tơl, kơ̆ nền, mơ bơtơl pràn oh mi in. Dan gơnap gơnoar gơrê bal mơ Kơnràñ sùm sùm ò lồi! Amen.”

Ò gơs bơta siơ̆u gợi lơi mơ gơnăp gơnoăr Yàng ò rgơi lơh tơn bềng wơl. Tŭ tŭ jơ Kơnràñ tus, kòn tê gợi añ jê rơp ò găm là têl sơñio bơh roh gơprah hala ò lơh nên tai. Ala ting hơ̆, Yàng rơp tơmgơl gơ gơlik gơs ồs đèng digah dàlềng bơta chò hơp dê mơ gơn kơnơm tơm Kơnràñ. Bơta Yàng Tòm Trồ rgơi lơh añ in, Kơnràñ kun rgơi lơh să tơm oh mi in ngai do.

Dan jà bol he dô nùs bal tòm bơta hòi dan: Khoai Bèp kờñ gơboh, Kơnràñ git loh tiah gợi tòm nùs kòn, ală bơta kòn neh roh, mơ jơh ală bơta rngòt rngơt bơh ală ngai tơnơ̆ hơđap. Ưnngai Kơnràñ bơh digul jơh ală bơta ò dơh tơmgơl, ming Kơnràñ la Bơtau ò tŭ lơi tơmgơl. Dăn Bèp tus mơ lơh bềng ală tiah gợi tòm hwềng nùs kon mơ bơta lơngap lơngai mơ bơta gơn kơnơm tòm Kơnràñ. Dăn sơmbơi ală tềl sồt kòn cèng, yò đơ mơ bơtao wơl kòn tòm toh dê tŭ jơ niam Kơnràñ dê. Kòn dăn jao phi rai kis tơnơ̆ kòn dê tòm tê Yàng. Kòn jơh nùs hôi dăn tòm sơnđăn Yàng Jêsus Krist, Amen.

Ơ ală ồng mò oh mi kòñ gơboh, digul ală bơta roh gơprah mơ ò git pal lơh nền tờm rai kis do, Yàng găm ơm lơh broă bơtao wơl Kơnràñ dê. Kơnràñ sền gŏ ală tiah gợi tòm nùs bol he, mơ Kơnràñ rơp ò lơi bol gơ ơm wi wơ. Tus dê tŭ lơm pah wil tơl. Kơnràñ rơp ai bơntơl wơl, sơmbơi, mơ lơh pa wơl ală bơta gơlơh be ò rgơi wơl til. Mơ ală bơta lơi neh la tềl sơñio bơta jê sồt dê gen rơp gơlik gơs cơng tang bơta gơn kơnơm dê. Mơya bơta sơntơm tòm bơta bơcah gơpừ, Yàng rơp lơh sir tòm bơta bơtao wơl.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.