Bơta kơlôi rcăng, ò gơs ring lơngai neh gơlik mờng òs tòm rài kis ngai do, tŭ ala bơta gut dăr sùm tòm gơl mờ ò ring lơngai. Mơya, rài kis ngăn gơlik rngòt ngăn bè bol he sền gŏ sơl? Jơnau Yàng bơtê bol he in păl gơs bơta kơlôi bè lơi tŭ tìp ala kơn jơ̆ tòm rài kis?

Ngai do, ngai 01/03/2026, Bơta Hòi Dan Kòp Ngai dan jà ồng mò oh mi bơtê bal Jơnau Yàng bơh kơnòm dê bơta dong kòl Jennifer E. Jones bơh tơnggume BAÑ KƠLÔI RCANG!

“Bañ kơlôi rcang bơh bơta lơi, mơya tòm jơh ală bơta ai tĕ jơnau hòi dan, rac dan, mơ bơta ưnngài mơ yal tơlik ală bơta kòñ dan he dê Yàng Tom Trồ in git.” (Philip‬ ‭4‬:‭6‬)

Hơ̆ là dồ bơta mpau lơh añ in păl guh gùl măng, nùs añ gơ pyah sùm mờ pal dồ yoa sồng añ đăl git añ gơm tềng lơi. Bơta mpau hơ̆ gơlơh ngăn tian gơs añ koñ dồ êt tŭ nàng rê wơl mờ tah nhơm jrô.

Bơta mpau yơh hơ̆ là cồng nha ala ngai añ kơlôi rcăng mờ kơnjơ̆ ngăn. Tòm mpau, añ bè là kis di gùl tòm bơta rngòt añ dê. Gen gờch ngăn tŭ añ kah rngăl mờ đăl git hơ̆ mìng là bơta mpau. Mơya kung ờ gớs bơta lơngai tŭ añ git bơta ngăn lah bulah là dồ nă cau dòn Yàng tồn lah he neh geh dờng, añ găm gơs bơta kơlôi rcăng mờ ờ jơh nùs jào ala bơta kơnjơ he dê Yàng in.

Bol he neh geh tŭ lơi lòt găn bơta hơ̆ sơl? Gen là bơh dồ bơta mpau hala dồ bơta gơ tìp tòm rài kis he, he bè rơt đăl git bơta dòn he dê ò tơl pràn bè he neh kơlôi.

Tŭ ơm tòm tŭ hơ̆, bol he ò càng ba sìl hala yoam is să tòm. Bơh gơs tŭ, Yàng Tòm Trồ ai gơnoăr ala broă hơ̆ gơlik gơs nàng tơng kah bol he bơta kơlôi rcang mờ bơta rngòt găm ơm oă tòm nùs he dê, mờ neh tus dê tŭ bol he păl jào phi gơ Kơnràñ in.

Yàng Je-su neh lùp ala cau bơtê mờ mpồl găl làng bol tus kơno Kơnràñ bơtê lah: “Gơs cau lơi tòm bol mê bơh kơlôi rcang mơ rgơi bơtơl rài kis he dô êt phuk sơl ơ?”(Mathiơ‬ ‭6‬:‭27). Kơnràñ lùp bè hơ̆ bơh Kơnràñ git kòn mơnus sùm kơlôi rcăng, belah bơta kơlôi rcăng hơ̆ rơp rgơi lơh sir jơh tơl bơta. Bol he kơlôi lah dilah rcăng nền cê, wil tơl mờ bờ gàr kơ̆, rơp rgơi pleh ala bơta yơh, mờ ò gơs broă lơi rlau mờ bơta pràn he dê.

Mơya, kơlôi rcăng hơla sơñio bơta rngòt mờ ò gơs ring lơngai tòm bồ tơ ngoh, mờ ngăn gơ ò cèng cồng nha ñiam lơi. Rngòt ò lơh rài kis he geh ñiam rlau mờ ya rơp lơh syar bol he kòp ngai lòt găn. Tŭ kơlôi rcăng, bol he rơp kơlôi dê dồ bơta ờ niam ngăn bè là ò gơs Yàng Tòm Trồ tòm rài kis he dê.

Sră Goh neh tơng kah oă ngăn bol he bañ rngòt. Bol he păl cèng jơh bơta kơn jơ̆ hơ̆ jào phi Yàng in. Tòm Sră pơyoa Philip 4:6-7, ồng Pol neh tơng kah bol he rlau mờ bơta kơlôi rcăng bơh ala broă mờ bol he ò rgơi lơh tờm, gen hòi dăn té: “Bañ kơlôi rcang bơh bơta lơi, mơya tòm jơh ală bơta ai tĕ jơnau hòi dan, rac dan, mơ bơta ưnngài mơ yal tơlik ală bơta kòñ dan he dê Yàng Tom Trồ in git. Gen bơta lơngap lơngai Yàng Tom Trồ dê, la bơta jòng rlau jơh ală bơta git wă, rơp sền gàr nùs mơ bơta kơlôi sơnơng oh mi dê tòm Yàng Krist Jesu.” (Philip‬ ‭4‬:‭6‬-‭7)‬ ‭

Hơ̆ ò di là dồ jơnau song mờ ñiam ngăn sơl ờ? Bol he jào jơh Yàng in bơta rngòt he dê, mờ Kơnràñ ai wơl bol he bơta ring lơngai.

Tŭ kah wơl bơh bơta mpau, añ pờ mơ Sră Goh mờ đọk tòm Sră Esai 26: 3:

“Ală cau kơ̆ nùs Yàng rơp prap gàr tòm bơta lơngap lơngai, tài bơh khai dòn kơnòm di Kơnràñ.”

Jơnau Yàng lơh nùs añ geh pơndờm pơn yang mờ geh pa. Bơh añ git ò càng lơi ala bơta kơnjơ̆ geh ơm tai tòm rài kis añ, mờ bol he kung bè hơ̆ sơl. Bol he kơlôi sơnơng té Jơnau Yàng mờ lời bơta koñ gơboh băl mờ bơta niam lơhơn Kơnràñ dê tơl bềng tòm rài kis bol he kờp ngai.

Dan jà bol he dô nùs bal tòm bơta hòi dan: Khoai Bèp koñ gơboh kòn dê! Kòn dăn Yàng toh glài kòn in bơh oă tŭ dơ̆ kòn neh lơi bơta kơlôi rcăng mờ bơta rngòt bềng tòm hwềng nùs kòn. Tòm ngai do, kòn dăn ơn Yàng in jơh tơl bơta kơnjơ̆ kòn dê. Dăn Yàng dong kòn rgơi lòt găn bơta ring lơngai Kơnràñ dê, hơ̆ là bơta ring lơngai rlau mờ bơta git wă kòn dê. Kòn jơh nùs hòi dăn tòm sơnđăn Yàng Je-su Krist, A-men.

Ơ ala ồng mọ, oh mi koñ gơboh, bol he găm ơm tòm bơta kơlôi rcăng lơi taih? Gen kah té jơnau Yàng bơtê “Bañ kơlôi rcăng” kòp tŭ he ơm tòm bơta kơlôi rcang mờ ò gơs ring lơngai. Yàng Tòm Trồ bol he duh khoai là Bơtau sùm chò nùs kơno iat mờ añ jơh bơta kơlôi moat jrùng bol he dê. Gen rac dăn té nàng Yàng dong kòl bol he sùm đăl git bơta gơs sùm Kơnràñ dê, lòi té bồ tơ ngoh bol he dê git gơn kơnờm dê Kơnràñ tòm kòp bơta he tìp tòm rài kís. Tòm ngai do, tŭ bơta kơlôi rcăng teh mpồng, gen hơ té gơ mờ sră Philip 4:6, mờ jơnau hòi dăn, yăl jơh ala bơta mờ Yàng kơñ gơboh.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.