Tŭ dô nă cau ntao diđap bơta kis mơ bơta chơt, digơlăn bol khai rơp ò tŭ lơi sền rai kis be yau tai. Ală bơta gơlơh be dơng ngăn nisơna gơlik gơs dềt lúi. Ală bơta rơndăp, kơlôi sơnưng mơ kơlôi rcăng rai kis dê roh jơh. Tŭ bơta kis liah ngăn geh ràng tơlik loh lang behơ̆, nùs kòn mơnus ơs ri wơl mơ Yàng – Cau i hwềng soan, Bơtau ming dul sơmbăt bơta kis, mơ la tiah ming dul bol he rgơi gơn kơnơm.

Ngai do, ngai 02/03/2026, Bơta Hôi Dăn Kơp Ngai dăn jà ală ồng mò oh mi bơtê bal jơnau Yàng kơnơm dê bơta dong kơl Bob Segress bơh tơnggumê BƠTA KIS LIAH NGĂN.

“Mơya oh mi ò git ngai hìng rơp gơlik be lơi! Bơta kis oh mi dê la ñchi taih? Bơh oh mi be dà tŭ, gơlik tòm dô êt jŏ gen roh thit.” ( Jakơ 4:14)

“Bơh oh mi be dà tŭ, …” ( Jakơ 4:14)

Tŭ dô nă cau geh kis tơnơ̆ mơ bơta kop ji gơpừ kơnjơ̆, cau hơ̆ rơp bơtê geh oă bơta bơh bơta kis. Tòm tŭ lơmpah hơ̆, bồ dơngọh ò găm lơh broă be ơs tai. Ò găm kơlôi, ò găm ală sèng lup, ming la dô nơm tiah gợi wil tơl – be ală bơta kol kăl jơh – mơ să jăn gen ò găm bơkoat mơ bơta kơlôi sơnưng.

Rềp do, dô nă cau gơnoăr sơnơm lup lah añ gơs rngòt rngơt ò tòm tŭ gơduh tòm bơta gơlơh rhung rhăng hơ̆, tŭ ò rgơi lơh lòt hala kơlôi sơnưng bơta lơi tai. Añ hơ wơl lah ò. Tai bơh tŭ oh mi ngăn bư tus bơta gơlik ngăn nus nhơm kòn mơnus dê – git he la ñcau, mơ git bơta mơ bắt hala gỡn cau lơi kung rơp lòt găn – gen ò găm tiah lơi bơta git lam in hala kơlôi sơnưng tai.

Yàng Tòm Trồ Gơnap Gơnoăr neh tơngkah kơp nă bol he loh lang ngăn tòm Sră Goh:

“Mơya oh mi ò git ngai hìng rơp gơlik be lơi! Bơta kis oh mi dê la ñchi taih? Bơh oh mi be dà tŭ, gơlik tòm dô êt jŏ gen roh thit. Di ngan oh mi pal đơs lah: “Dilah Yàng kòñ mơ bol hi gam kis, gen bol hi rơp lơh broă do broă ne.” (Jakơ 4:14-15)
Tơnơ̆, ală cau gơnoăr sơnơm reh neh ai dô nơm ntol mham dơng ngăn tòm khùh añ jê mơ dô nơm che tơmut bơh tiah tuh dih. Añ rhơi rhơi guh wơl til, bulah oă ngai tơnơ̆, bồ dơngoh añ gơlơh ní rhung rhang lúi.

Añ git ưnngai Yàng ngăn bơh ngai dô he rgơi tòm pà bơta git lam dô. Gùng lòt hơ̆ ò nggờc nggơr: sồt klơm soh kơnjơ̆ tian gơs choh mham, lòt găn bơta gơtup pừ kơnjơ̆, gen pơnjat la gung ntoat klơm soh gơ kal. Oă cau hôi bơta hơ̆ la “bơta cahrña tơnchơt geh lơi wơl dô bă crih crai” – bal mơ ală cau gơnoăr sơnơm añ jê cung đơs behơ̆. Dô nă cau gơnoăr sơnơm đơs song mơ añ: “añ neh lìp tê oă sră cơng tang bơta chơt bơh dê bơta gơkol gùng lòt klơm soh hala gơtup pừ kơnjơ̆. Broă bi dê ngăn la dô bơta krơi”.Bơh hơ̆ tus jơ do, añ sền rai kis pha is ngăn. Tai bơh añ neh “roh thit be dà tŭ” tòm tŭ lơmpah hơ̆.

Đơs ngăn, bơh lai añ òhềt wờng ngăn Đơs crih 23, bulah hơ̆ la sèng sră goh kơñ gơboh añ jê. Sền Sră Goh mơ ai tơlik Jơnau Yàng la dô bơta, ai ngăn cơnđòa lòt tòm sơndiang klăm jơngo chơt là dô bơta ndai.

Tòm sơndiang klăm jơngo hơ̆, bơta ming dul añ rgơi git lam la bơta gơs mat Cau I dê. Añ ò rgơi kơlôi sơnưng bơh KƠnràñ, kung ò rgơi tơmbơh bơr mơ Kơnràñ, bơh bồ dơngòh añ gơlơh gợi lơm. Lơh mbe lơi nàng rgơi ràng tơlik bơta dơp git gơlik gơs dô dà tŭ, tòm tŭ să tòm he la dô nơm dà tŭ?

Tòm tŭ đơs mơ kơlôi sơnưng wơl til, bơta loh làng rlau jơh añ rgơi tòmpà là be do: tiah klăm jơngo chơt, jơh ală bơta gơri bơh rai kis – ală pơnah dềt rhền, ală bơta lơh nền, bơta phalin mơ alah, kơlôi sơnưng oă ir, ală bơta gơtơmklĕ, broă lơh – jơh ală bơta gơlik dềt rhên jơh. Bol gơ ming be dà tŭ, mhăr roh thit mơ ò gơs kas mang sùm sùm. Tòm tŭ ntao di gah nhar hơ̆, ală bơta gơlik tomtoh be sătòm gơ: ming la mhwal ñhŭ.

Tom tŭ plai nùs ò nhơm tă tai, bol he ò kơno klơm soh nhơm hala plai nùs he dê gơcong tai. Tŭ hơ̆, bol he rgơi rngòt bơta òhềt git. Hala bol he rgơi sac rlô bol tom jơnau song, lah Yang la Cau I bol he dê, mơ bol he ò ơm is. Añ neh git lam dô bơta ơm mŏ niam ngăn, bơta ngềt ngơt neh gơs bơh lai. Añ ò kòñ lik bơh bơta niam hơ̆. Hơ̆ la dơ̆ sơnrơp añ geh khat gơboh bơh ală bơta jơnau nggôr ò dơh mơ ală bơta păl cang pơnjat să jăn he dê.

Bulah behơ̆, añ git nùs ưnngai Yàng bơh geh riwơl, nàng ò lơi wơl bau ur kòñ gơh boh añ dê ơm is, mơ nàng hiu nhă añ ò gơkrăm tòm bơta chơt roh.

Tŭ do, geh dô dô nhơm tă jrô bêng ntơh bơta bô niam cal bơh dê jơng mơnơm ngkơi hiu, geh sền cal hơ̆ khôm lơnggơh ală chi chê ơs mơng, gơwet mơ añ la dô bơta dơp git pa wil tơl mơ crih crai ò git nđờ.

Dan jà bol he dô nùs bal tòm bơta hòi dan: Khoai Yàng kòñ gơboh, kon ưnngai Kơnràñ bơh kơp nhơm tă ngai do kòn găm geh dơp lềng. Kòn dơp git rai kis he liah ngăn, ming be dà tŭ lòt găn. Dăn toh glài kon in bơh gơs tŭ kòn găm kis be hesơmbăt gơnoăr ăt bồ, hŭi lah ală bơta gơ ơm tòm tê Yàng. Dăn bơtô kòn git pơndề să dơp git n’hal he dê, mơ ơn wil tơl nùs dòn dê Kơnràñ là Bơtau sơmbăt bơta kis, bơta chơt, mơ bal mơ ală bơta kòn òhềt git tus. Tom tŭ ntao diđap ală bơta ò niam gơlik gơs hala rngòt rngơt, dăn ai kòn in git lah Yàng la Cau I kòn dê, mơ kòn ò ơm kòn đơi. Kơp kòñ kơp ngai găm wơl tòm rai kis kòn geh kis dô bă gơs gơtha, niam nùs Kơnràñ, mơ ràng tơlik bơta gơn kơnơm kòn gơs tòm Kơnràñ. Kòn jơh nùs hôi dăn tòm sơnđăn Yàng Jêsus Krist, Amen.

Ơ ală ồng mò oh mi kòñ gơboh, gen kung rơp tus ngai jơh tơl bol he kung dơp git lah: bơta kis liah ngăn, mơ jơl jơh rai kis do, bol he ming la ală dà tŭ lơm. Tòm tŭ rai kis hơđăng ù dô lòt găn, bol he rơp cơnđòa mut tòm hiu mơ să tòm Yàng, Bơtau I Belàt niam neh rcăng sir kơp nơm belàt Kơnràñ dê – ală kòn kòñ gơboh gơri is hơ Kơnràñ mơ geh Kơnràñ kờñ gơboh hôi sơnđăn kơp nă, kơp nă. Ưnngai Yàng ngăn, bol he ò cang pal rcăng dô bơta lik lòt mhăr lơi in, bơh Kơnràñ neh rcăng sir jơh bol he in rau. Digul bơta liah ngăn rai kis dô dê, sền dơng mang tĕ kơp tŭ jơ phuk kas mang mơ Yàng ai pà kơp nă bol he in nàng kis gơs gơtha mơ công nha lơgar Kơnràñ in.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.