Doi bơta păl càng nàng rài kis hòn chò hừh hơh, niăm nùs koñ Yang hơ̆ la gơlik gơs dô nă “jòi jat”. Jòi jat ò gơtha la tŭ lơi kŭng bềng tơl bơta pràn kơldăng, bềng lìu bơta ngac ngar, mơya gơtha la ò tŭ lơi dơh ri wơl mơ Yang, tơ’ai lah tŭ bŏl glăr, kơlôi rcang gi ga. Digul oă bơta sac rwah niăm her ngăn tom tòm rài kis, gơlik gơs “cau jòi jat “hơ̆ la dô bơta lơh nền krăñ-cê tòm dơlăm nùs: sac Yang, jòi Yang, mơ lòi Yang tề lăm cơnđòa lòt he di kòp ngai.

Ngai do, ngai 03/03/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Scott Presson dê bơh Tơnggume CAU JÒI JAT.

“Jòi jat tĕ Yàng Jehôwa tòm tŭ rgơi bàn Kơnràñ; hòi dan tĕ mơ Kơnràñ tòm tŭ Kơnràñ ơm rềp.” (Esai 55:6)

Gơs tŭ lơi he lùp is lah: he gơs ngăn la “cau jòi jat “ sơl? He găm gơs jơh nùs ntoat jat Yang Tom Trồ, hala găm añ tom dơlăm nùs he ală bơta boah gơjrañ ò hồ săng? Gơs tŭ lơi he găm gơs prap wơl ală bơta tềl sồt yau, bơta gơjrañ mañ hala òhềt tọh glài? Găm gơs ală bơta ò gơn kơnòm, ală bơta pơnji pơnkôr jŏ jọng mbe lơi taih?

Òs mòng, bŏl he buơn ngăn tơnsọh he in sơnđăn “Cau Don Yang”, mơya tòm dơlăm mìng là bơta pơnđơl pràn lơm, kis kơnòm pràn is mơ lơh lòt òs mòng is lơm. Bŏl he họi sơnđăn hơ̆ lan”cơnđòa lòt băl mơ Yang”, mơya oă dơ̆ mìng la găm ntào pơt lơhơ đah nhar lơm, kơp koñ he băñ kòl pơrwai tòm gơlòng bŏl glăr rlau ir mơ pràn he kŏng.

Jơnau Yang tòm Esai 55: 6 cih lah: “Jòi jat tĕ Yàng Jehôwa tòm tŭ rgơi bàn Kơnràñ; hòi dan tĕ mơ Kơnràñ tòm tŭ Kơnràñ ơm rềp!”

Yang Tom Trồ găm ai gơnoăr sôr bŏl he inĭn păl jòi jat tĕ Kơnrẵn. Mơ ăñ koñ bơta lơh nền lọh lang behơ̆. Ò gơs bơta lu li tềng do. Bulah he găm sền Sră Goh ală jơnau cih pha is, Jơnau Yang ò tòmgơl: Jòi jat tĕ Kơnrẵn.

Bŏl he geh họi sơnđăn gơlik gơs “cau jòi jat “ tòm ală pơnah gùng dà cơnđòa lòt băl mơ Yang Tom Trồ. Dabit neh kis behơ̆, ồng găm pơndềt să họi dăn Kơnrẵn gar he bơh lòt tìs nrah gùng dà.

“Añ jơh nùs jòi jat Yàng; Dan Yàng bañ lòi añ tìs nrah ngài bơh ală bơta sồr lam Kơnràñ dê.” (Đơs Crih 119:10)

Kis be dô nă “cau jòi jat” rơp ai wơl bŏl he ĭn oă bơta lơngai lơngọ, mơ kŭng gơs ală bơta păl càng tĭng jat. Yang Tom Trồ koñ ală kọn sau Kơnrẵn kis bơh ti ò lơh tìs glài, mơ gơs nùs sàng gọh, Ò wèt hwềng soàn he hơ bơta ma blac, ò kis tòm bơta srat să blac pơrlồm. Mơ tŭ bŏl he sac ơm kis tòm tọh dipăl, gen jơnau ho pơgon Kơnrẵn ai pà wơl bŏl he ĭn lọh lang ngăn:

“Ñcau rơp geh guh hơ mơnơm Yàng Jehôwa? Ñcau rơp geh ntào di tiah sàng goh Kơnràñ dê taih? [4] Hơ̆ la cau gơs tê ò lơh tìs glài mơ gơs nùs sàng goh, Ò wèt hwềng soàn he hơ bơta ma blac, Kung ò srat să blac pơrlồm. Cau hơ̆ rơp geh lơngai bơh Yàng Jehôwa, Mơ geh Yàng Tom Trồ bơta dong klàs khai dê yal tơlik khai la song ring.” (Đơs Crih 24:3-5)

Bŏl he dơñ geh bơta lơngai Yang ai. Bŏl he geh ntào sŏng diđap măt Kơnrẵn. Mơ tòm gơnap gơnoăr wil tơl, Yang Jesu neh đơs nền cê bơta hơ̆ bơh dô jơnau ho pơgon lọh lang ală hwing nùs lơi jòi jat Kơnrẵn:

“Bơh dilah cau lơi dan gen geh, cau lơi jòi gen bàn, mơ cau lơi teh gen geh pò khai in.” (Luka 11:10)

Tŭ bŏl he jòi jat, bŏl he rơp dòp geh. Tŭ bŏl he tus rềp, bŏl he rơp bàn. Tŭ bŏl he the mpồng, Kơnrẵn ho wơl. Jơh nùs jòi jat Yang Tom Trồ ò tŭ lơi là broă lơh ò kwơ ò, hơ̆ la nùs koñ Kơnrẵn di. Hơ̆ là gùng dà Kơnrẵn ngùi nàng ai lơngai, nàng tuh wơl bơta sŏng rĭng tơngkah tơngkăñ hơđăng rài kis bŏl he.

“Sih tĕ să tòm bol mê in bơta song ring, toès tĕ bơta kòñ gơboh kơ̆ dơn, lơòr tĕ ù tiah pa; Bơh tŭ do la tŭ tơngai jòi jat Yàng Jehôwa, jơl tus di tŭ Kơnràñ tus, mơ tuh mìu bơta song ring hơđang bol mê.” (Ôse 10:12)

Yang Tom Trồ đơs lah: tŭ do la tŭ jòi jat Kơnrẵn. Tŭ bŏl he sih bơta sŏng rĭng tòm bơta gơtòmklac băl mơ Yang, bŏl he rơp toes wơl bơta jrô ndơp nùs he kơp koñ – bơta koñ gơboh ò tŭ lơi jơh Kơnrẵn di.

Cau jòi jat la cau sum sum koñ jat Yang. Hơ̆ la cau kơp koñ họi dăn, kơp koñ lơh cơng, kơp koñ kis jat nùs koñ Yang di. Là cau sum jòi tŭ lơmpah nàng tòm pà ală bơta Yang neh ai he ĭn kòp ngai – digơlan là chò Gọh jọng ro, dô jơnau chồl bơtrut, hala buơn rlau mìng la rcang sir iat kơno tŭ dô nă cau lơi păl càng.

Òs mòng, ò di tŭ lơi bŏl he kŭng gơlơh “tơngkah tơngkăñ “. Gơs ală ngai bŏl he lơbơn pràn, bŏl glăr. Mơya tòm ală tŭ hơ̆ mo, Yang găm rơp ngùi bŏl he nàng lơh gơklŏ sơnđăn Kơnrẵn.

Yang Tom Trồ ò tŭ lơi ơm ngài ò. Jơnau Yang đơs lah Kơnrẵn là “bơyô dềt mềr rlau ọh mi tòm”. Bulah ngai do he gơlơh he ơm ngài ngăn bơh Yang, sơntom wơl tĕ sih bơta sŏng rĭng diđap măt Kơnrẵn. Kơnrẵn rơp ho wơl bơh bơta tuh bềng lìu bơta sŏng rĭng hơđăng rài kis he. Mơ tŭ he cơnđòa lòt sŏng ngăn, he rơp toes wơl bơta lơi he neh sih.

Bơh hơ̆, he rơp rhòi rhòi cơnđòa lòt tòm tọh tiah lơi Yang ai he ĭn tòm Lơ gar Kơnrẵn. Tŭ he kis wil tơl bơta họi sac Yang di gơwèt hơ he, he kŭng rơp dŏng cau ndai cơnđòa lòt tòm bơta họi sac Yang di gơwèt hơ bŏl khai. Mơ ya gen Hiu Jum Goh rơp rơp gơlik gơs ngăn Hiu Jum Goh gen Yang kơp koñ.

Bŏl he gơs pơnah tòm bơta rơndăp Yang Tom Trồ di hơđăng ù do, bulah gơs dơ̆ bŏl he kŭng ò đal git. Mơ jơh ală bơta sơntom bơh dô bơta dềt rhền : nùs kơp koñ jòi jat Yang mơ kơp koñ kis jat nùs koñ Kơnrẵn.

Klọ săng ală bơta yau or. Sơrbì ngài tĕ ală Njơ̆-njŭ tồi glài lài or hơđơm cir jrô dà lềng hŭi hơr tòm bơta tọh glài Yang Tom Trồ di. Mơ cơnđòa lòt jat tơnơ̆ tai tus hơđap, be dô nă cau jòi jat Yang Tom jơh nùs, be dô nă cau jòi jat Yang là tomryas rài kis he di.

Dan jà bol he dô nùs bal tòm bơta hòi dan: Khoai Bèp koñ gơboh, dăn bơtọ kọn gơlik gơs dô nă cau jòi jat Kơnrẵn kòp ngai, nàng hwài rềp dềt mềr Kơnrẵn rlau, yò tơngguh Kơnrẵn lơh gơs tơnggume rài kis kọn, bulah nùs kọn găm oă bơta ò wil tơl. Dăn pò măt kọn nàng dòp git lah Kơnrẵn òs kơ̆-dơn kơp gơn kọn bơh bơta dòn sŏng Kơnrẵn di. Kơp koñ rài kis bơta dòn kọn di ò di la phăn añ kơnjơ̆ păl prap gar, mơya bềng lìu lơngai lơngọ hừh hơh. Dăn ai kon ĭn geh kis kòp ngai tòm bơta koñ gơboh ò tŭ lơi jơh Bèp di, mơ cơnđòa lòt jat nùs koñ Kơnrẵn di bơh hwing nùs gơn kơnòm, Amen.

Ơ ală ọh mi koñ gơboh, Yang sền dờng màng ală hwing nùs dềt rhền òs sum gơwèt mơ Kơnrẵn. Kơnrẵn găm òs ntào tềng hơ̆, kơ̆ dơn, dòn sŏng mơ òs rcang sir ho wơl ală cau jòi jat Kơnrẵn jơh nùs. Gơlik gơs “cau jòi jat” ò do cèng gơnoăr crih crài. Mơya mìng buơn lah kòp ngai sac rê wơl, sac yò tơngguh Yang lơh gơs tơnggume, bulah nùs găm oă bơta òhềt wil tơl. Hơ̆ la bơta sac rsih bơta sŏng rĭng nàng toes wơl cồng nha lơngai lơngọ găm sum sum. Mơ bơh tŭ hơ̆, rài kis bơta dòn ò găm ro răñ tai, njơ̆-njŭ hala srat bơtăng, gen gơlik gơs dô nơm gùng dà rĭng lơngai, tòm bơta tề lăm mơ bơta koñ gơboh ò jơh ò lồi Kơnrẵn di.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.