Gơs tŭ lơi nisơna oh mi lùp ìs să-tòm he: Dilah ngai do la ngai lồi dut he gam kis hơđăng ù do, gen bơta lơi tom rài kis do la dờng mang ngan taih? Gùng oh mi neh kis kờp ngai, ală bơta oh mi lơh nền-behơ̆ gơs tŭ lơi oh mi ai lơh pơrlai-soh sơl? Mơ tom tŭ lik bơh dunnia do, oh mi rơp lòt tus hơ tiah lơi? Digùl oă ngan jơnau đơs nggồr-nggàc rài kis dê, tom tiah lơi hơ̆ kư gơs dô jơnau hòi jà lơbơn niam-hòi jà bol he sac bơta kis, sac bơta hòn-chò gam sùm sùm ò tom pơrgơl.

Ngai do, ngai 05/03/2026, Bơta Hoi Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Eddie Jones bơh tơnggume BƠTA GƠLIK GƠS DÔ BĂ NISƠNA.

“Yàng Jehôwa At-bồ Hơđăng Jơh đơs lah: ‘Ăñ ò niăm nùs bơh bơta chơt dô nă cau lơi ò, behơ̆ gơjrăñ săng-glài tĕ mơ geh kis!”’ (Eseciel 18:32)

Ò gơs cau lơi tom bol he rgơi lik klàs bơh bơta chơt. Mơ ya gùng lòt kờp nă cau dê pơndùt wơl dô bă pha ìs: gơs cau lòt dô bă lơngap-lơngai, gơs cau lòt tom bơta jê-sồt pơrlai soh, ai gơs cau lòt òm-om ndơp thit.

Di di tŭ do, añ gam nggui hơ dô nơm rơndeh par, gơ ơm di pah gòi jòng. Rơndeh par păr mhar ngan, ai tom dơlăm gen ngềt-ngơt ngan dô bă crih-crài. Hơđăng bồ añ la ală tiah ơn phan, gùt dar añ la ală cau crih mat-kờp nă gơs ală bơta yal yau, ală bơta kơlôi rngòt mơ gùng lòt ìs he dê.

Tom tŭ ơm gơn ‘máy tính’ sơntòm lơh broă, añ at ‘thẻ’ tề lăm, sền gơ sơniọ mbe lơh nàng sền gàr bơta lơngap-lơngai hơđăng rơndeh par. Mơ digùl dô nơm tiah dềt, hat-hơl hơ̆, nisơna añ đal git dô bơta òs mòng ngan: Rài kis do kung dròm be ală gùng par, gơs ală bơta nisơna gơlik tus mơ ò gơs cau lơi yal lài. Mơ tom ală tŭ behơ̆, tŭ lơi kung rơp gơs cau geh hòi jà pal ñă ntào lơh krơh, mơ dong kơl cau ndai joi geh gùng lik dô bă lơngap-lơngai. Hơđăng ‘mpàn thẻ” cih:

“Dilah oh mi nggui rềp di gah gùng lik, gen digơlan oh mi rơp geh sồr pò mpồng lik klàs mơ dong kơl ală cau nàc ndai du-lik bơh rơndeh par.”

Sền tus ting do, añ ñọ̆ òm. La cau dòn Yàng, ò di añ kung geh hòi jà gơlik gơs bơta àng lăm gùng, gơlik gơs mpang tê yò-đo tom tŭ cau ndai tìp bơta gơlòng-bòl glar sơl ơ?

“Nàng rgơi lơh gơnoar broă do, dan ai lơh nền lah oh mi rgơi lơh wĭl tơl ală gơnoar broă tơnơ̆ do.”

Ơi, añ git. Kơnòm ală kơnhai sơnam lòt gan bơta gơlòng, gơkòl bơklơn kư bơtơl sùm mơ ò git nđò bơta sơlồng-sơlang, añ neh bơtê mbe sền gàr bơta ring ngơt tom tŭ bơta rung-rài gơtơn tus.

Ală sơnđan ală broă pơnjat lơh añ kơlôi sơnơng jrô rlau tai:

“Git tiah lơi gùng lik klàs bơh sơrbơng roh”

Mpồng lik klàs hơđăng rơndeh par gen rềp đah mơ añ. Mơ ya tom rài kis, añ dòn lah Mpồng bơta kis dê-să tòm Yàng Dọ̆ng-Klàs Jesu sùm ơm rềp ngan, mơ Kơnràñ ho rơp ò tŭ lơi săng-lòi añ.

“Đal git bơta gơlik tus dô bă nisơna.”

Hơđăng rơndèh par, bơta gơlik gơs nisơna digơlan la bơta ji-duh tom dơlăm gơguh dô bă nisơna, mpồng tiah ơn phan nisơna gơ pò, hala nisơna ò rgơi at tê. Tom rài kis, Yàng Jesu kung neh yal lài: rơp gơs ală bơta roh-gơchoh ò rgơi rcang sir lài, ală tŭ bîng bơta pal cang ngan mơ dơrcùl.

“Git wă mơ lơh jat bơta tề lăm mpôl par bal”

Añ pal dòn dòp lah, tom gùng par do, añ neh bar dơ̆ pal lùp wơl cau wă-rò hơđăng rơndeh par nàng git nền: “Ngan la añ mìng dòp geh kơldung koah dềt do mơ dô ềt dà do lơm ơ?”

Gùng lòt bơta dòn añ jê kung behơ̆ sơl. Oă dơ̆ añ wơl kê lùp Yàng la Cau tom cih Jơnau Kis Sùm dê, mìng nàng dan Kơnràñ ai git loh nùs kòñ mơ jơnau bơto sồr Kơnràñ dê añ in.

“Sơntòm pò mpồng lik klàs.”

Ngan tus di tŭ do kalkê ngan. Añ òhềt rcang sir lik bơh mpồng, ñưk la tom tŭ gam ơm hơđăng tus 10.000mét. Mơ ya dilah gơs cau lơi hơ̆ pal cang du lik lài nàng pò gùng, gen kơp kòñ lah añ tơl khin cha.

“Lơh jat bơta sơniọ lăm.”

Pơnah do lơh añ pal kŭn bồ kơlôi sơnơng. Añ òs ò jak dòn jat bơta tề lăm, bulah la hơđăng rơndeh par, tom rài kis, hala cơnđoà lòt bal mơ Yàng Tom Trồ. Mơ ya dilah añ geh hòi jà lơh krơh cau ndai in, gen añ pal cang bơtê wơl bơta bơtê dòn duh.

“Pal lòt mhar tus hơ gùng lik klàs.”

Di rau…ơ Yàng, kọn rơp pò mpồng do.

“Lòt jat gùng lơngap-lơngai lòt ngài.”

Lik bơh rơndeh par do. Lik bơh să-jăn do. Lik bơh plai ù do. Mơ cơnoà lik.

Yàng Tom Trồ ò niăm nùs bơh bơta chơt. Mơ bơta klam jơngo bơta chơt dê gam kư sùm gơpar hơđang kờp nă bol he. Bol he kơlôi rcang, rngòt rngơt, jòi oă gùng nàng ơm dơh wơl ngài he pal lik lòt. Mơ ya lồi dùt, bol he kung rơp chơt.

Ngài do, añ dòp geh sră pơyoă ‘điện tử’ bơh dô nă cau bơyô. Me lọ̆ hơ̆ gam nggui hơđăng cơnòng bic kòp bèp khai dê. Khai cih:

“Bèp gam tơmbơh bơr mơ he jọ̆jọ̆ dồ ềt, mơ ya ò găm rgơi sa ñô tai. Gen tang gam mìng la tŭ jơ lơm. Mơ ya pha is hơ̆ la Yàng Tom Trồ bư. Hiu nhă he kư pò nùs dòp leng bơta hơ̆! Añ đơs mơ Bèp lah dilah Bèp ò rgơi lòt gan “bơta lòng sa-loàn pòr”, gen digơlan ngan Bèp rơp wă rò Ngai Lik Ling bal mơ Mè-Mè neh săng rài prau năm rau. Bèp hơ wơl mo: ‘Nam do òhềt!”

Ò. Ò gơs cau lơi tom bol he koñ chơt. Mơ ya bol he kung rơp chơt.

Bơh di tiah nggui añ jê, añ rgơi sền song gùng lòt hơđap rơndeh par, mơ ya ò rgơi sền gŏ ơdŭ wĭa rơndeh. Digơlăn hơđap gơs lơnggơr, añ ò rgơi git. Hala digơlăn la ‘dô pơnồng klam jơngọ’ gam kơp gơn, añ kung ò rgơi git.

Bơta añ mìng git nền la añ neh ơn bơta dòn di ală cau at rơndeh, dòn kơnòm di cau neh lơh rơndeh par, kung be ală cau neh mòn gơs kờp pơnah rơndeh par do dê.

Mơ gơwèt mơ rài kis añ, añ kung neh sac rwah ơn bơta dòn tom Yàng-Kơnràñ la Cau At-rơndeh, Cau Lơh Rùp nàng cau bơt mòn mơ Bơtau Bơt Mòn să jan poăc să do añ jê.

Añ òhềt rcang sir lik lòt. Mơ ya kung dròm be gùng par do, rài kis bol he dê rơp tus di lôi dut. Mơ tom tŭ ngai hơ̆ tus, añ ò di mìng kòñ lik bơh tiah do, mơ ya añ jê-gloh tơhir cơnoà hơ đap dô bă niăm rlau jơh.

“Gơjrañ săng-glài tĕ nàng geh kis!” hala dilah ò. Bơta sac rwah ơm tom tê oh mi.
“Dilah lang bol añ jê la lang bol geh họi mơ sơnđăn añ rơp tơnliah să bọ̆l khai dê mo họi dăn jọi jat muh mat ăñ mơ pơrlac wơl bơh di ală gùng dà iơh bơsak bọ̆l khai dê, gen ăñ rơp iat bơh hơđăng trồ mơ rơp toh glài bọ̆l khai in mơ rơp sơmboi lơgar bọ̆l khai dê.” (II Yal Yau 7:14)

Dan jà bol he dô nùs bal tòm bơta hòi dan: Khoai Yàng, digùl rài kis oă bơta giga, oă dơ̆ kọn kư kơlôi kis sơrlèt ngài mơ hŭi he gam kis bơh bơta lơi. Gơs ală tŭ kọn bơdơh wơl, kọn ò kơlôi tus jơnau hòi jà Yàng dê. Dan tọh glài kọn mơ ai kọn in dô nùs nhơm lơbơn niăm, nàng kọn sùm rê wơl mơ gùng lòt bơta kis mơ Kơnràñ òs sùm kong-ơt ơn di đap mat kọn. Ngai do, kọn dan sac rwah gơjrañ săng-glài tồ geh kis bal mơ Kơnràñ sùm sùm. Dan tề lăm kọn lòt tus tơnggu gùng lòt mơ Kơnràñ neh rcang sir lài kọn in! Kọn jơh nùs hòi dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, gơs jơnau đơs lah “rài kis la dô gùng tơnhùc wơl”, kờp ngai sơrlèt rlau, jơh tơl nă bol he cơnoà lòt hơđap dô cơnoà tus di tơnggu lồi dut rài kis he dê, mơ hơ̆ la broă ò gơs cau lơi rgơi pleh klàs. Mơ ya gơs dô bơta mơ oh mi mơ añ sùm sơmbat prap: hơ̆ la mbe bol he cơnoà lòt ngài do, mơ Bơtau mơ bol he wèt tus. Bơta chơt be òs ò di nàng lơh bol he in rngòt rngơt hala roh gơn kơnòm. Chơt la dô jơnau tơngkah nàng bol he kis wĭl tơl-mơ kis mbe lơi di pal. Yàng Tom Trồ gam ai kờp nă bol he in d ôjơnau hòi jà bîng kòñ gơboh, jơnau jà cơnoà mut tom bơta kis gơklọ̆ bal mơ Kơnràñ. Behơ̆ bol he gơs bơta lơh nền sơmbat prap jơnau hòi jà hơ̆ mơ cơnoà lòt bal mơ Kơnràñ, bơh ngài do jơl tus di gùng lòt rơp tĭl wơl hala ò?

Mơ… dilah bơta hòi dan do lơh bol he in kah tus ală cau kòñ gơboh, gơp bơyô, cau lơh broă bal, ală cau lơi òhềt dòn Yàng, gen bơta Hòi Dan Kờp Ngai pơndòm pơiàng ală cau iat pơyoa tĕ bơta hòi dan do tus cau kòñ gơboh hơ̆, mơ hòi jà tĕ cau hơ̆ gơs dô bơta lơh nền dòn dòp Yàng nàng dòp geh bơta dong klàs Yàng dê, geh dòp bơta kis gam sùm sùm.

“Bơh Yàng Tom Trồ kòñ gơboh dunnia, tiàn gơs neh ai Kòn Dul Kơnràñ dê, tô cau lơi in dòn Kòn hơ̆ gen ò kol roh rui mơ ya geh bơta kis gam sùm sùm.” (Jang 3:16)
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.