Bol he òs kơlôi lah bơta iơh păl soh rùp să iơh rmơh, rngòt rngơt. Mơya gơs dơ̆ bơta iơh ò càng pal tơlik să nggồr nggàc hala pràn kơldăng, mơya la ngềt ngơt pôn să he tòm ală jơnau mơ bol he đơs kòp ngai. Ông mò oh mi git sơl lah kòp ngai bol he rơp đơs pơgăp 16.000 jơnau sơl? Ngăn la khả dơng ngăn! Mơya ngăn sơl lah, tòm ală jơnau hơ̆, gơs nđò jơnau đơs la đơs ngăn he di cèng wơl bơta kwơ? Bol he tôn lah jơnau đơs gơ la mìng là càl gơ lòt găn gơi, đơs rau gen roh thit. Moya ngăn lah, kòp ală jơnau gơ cèng bal dô bơta kơnjơ̆ ò rgơi pleh. Dô nùs bal iat nàng sền sơwì wơl: digơlăn bơta iơh găm pồn să tòm ală jơnau đơs mơ bol he kơlôi la ò ơniai?

Ngai do, ngai06/03/2026, tơnggu hòi dăn kòp ngai dăn ja ông mò oh mi kơlôi sơnờng bal Jơnau Yàng kơnơm bơta dong kờl Shadia Hrichi găn tonggu mê BƠTA IƠH BƠSĂK SOH RÙP SĂ MɃE LƠI?

“Mơya ò gơs cau lơi rgơi ăt bồ lơmpiat, hơ̆ la dô nơm phăn iơh sùm ò dơh, bing liu phăn bih khih tơnchơt cau.” (JaKơ 3:8)

Gơs ală bơta gơlơh gơchồl tòm bol he gơs nùs rngòt rngơt, brit bràt, mơ păl kơrhia. Bơs la do nơm pơnyơu loh làng ngăn gơwèt mơ oă cau. Mìng đơs tùs lơm kùng neh lơh he in rà să. Krơi is să tòm añ kùng ò kờñ bơs dô êt lơi. Khai lơh añ in kơbrìt. Bơh di găr mat gơ, mơ gùng lòt òm gơ di gơlơh be ò rgơi đăl sền, lơto gơ thiar… mờ rùp să gơ tŭ lơi kùng gơlơh be kòp mòc, rcăng sìr nàng brồ crề dô nơm phăn ò tŭ lơi rcăng gàr.

Mơya kơlôi nĭ wơl gèn krơi ya. Dilah mìng bơh bơta sền lơh rngòt rngơt mơ sơrbơng roh mơ kol sền la iơh rmơh, gèn ñchi bơh tai bol he ò brơt să tòm tŭ đơs tùs kadờng, kliu triă, hala..pì ƀồ?

Sèng hơ cèng bol he ri wơl tùs suơn E- đen. Tơnơ̆ mơ tŭ tòm dră mơ Yang Tom Trô mơ kol sơrƀì bơh đăng trồ, satan neh sac bơs lơh gơs phăn ngui nàng pồn să he. Mơ bơh hơ̆, găn di rbô năm , rùp sơñio bơh bơs gơlơh be gơdêt mơ bơta iơh tòm bồ dơngoh jơn kòn mơnùs dê.

Rềp do, tòm tŭ sền sră Jakơ, añ nisơna sền bơs bơh dô pơnah pha is. Mơ pal đơs ngăn lah, rùp sơñio gơlik tòm ƀồ dơngoh añ găm rngòt rngơt oă rlau tai. Tòm dap 3, Jakơ đơs pràn bơta dơng mang broă ăt bồ jơnau đơs dê. Ông ràng tolik bơh lơmpiat kòn mơnùs dê be do:

“Mơya ò gơs cau lơi rgơi ăt bồ lơmpiat, hơ̆ la dô nơm phăn iơh sùm ò dơh, bing liu phăn bih khih tơnchơt cau.” (JaKơ 3:8)

Gèn ông pò tơlik dô bơta gơlik gơs ngăn kơñjơ̆ ngăn:

“Bơh lơmpiat bol he jòng rơ Yàng la Bèp, mơ kùng bơh gơ bol he sràt rma kon mơnus la jơi neh geh crơng gơs bơsùt be rùp să Yàng Tom Trồ dê.” (Jakơ 3:9)
Ông mò oh ni neh gơs be hơ̆ sơl? Añ gèn neh gơs rau!

“Bơh dô nơm bơr mơ gơlik bơta jòng rơ băl mơ bơta sràt rma sơl? (Jakơ 3:10)

Tòm tŭ neh sền tùs ting do, tòm ƀồ añ tŭ hơ̆ mơ gơlik rùp sơñio lơmpiat gơcah bàr đah bơs dê. Sră Goh ai tơnggit jơnau đơs tis gơs oă pơnh: jôi jơnau, tơnliah cau ndai, pơn nhừ să, lơh khăt gơboh, bơtô tis, lơh kơlì jơnau, yoam, tach nùs, blac pơrlôm. Mơ đơs ngăn lah, ò git nđò dơ̆ bol he dòp git ală broă lơh pồn prăp bơh đah ngkơi- ală bơta ò gơs niam tòm nùs he.

Bol he òs kơlôi rùp bơta iơh bớăk be la dô nơm phăn lơi hơ̆ loh lang ngăn: rùp să iơh rmơh, kơnềng sồt, bềng dà bih khih chơt cau. Mơya, tŭ satan lùp còp A-đam mơ E-va tòm rùp bơs, bol khai ò rngòt dô êt lơi. Ò gơs bơta lơi la iơh rmơh ò.

Mìng la dô bơta tòmbơh bơr be òs gơlơh be ò gơs ơniai lơi. Mơya bơh tòm tŭ jơ hơ̆ neh pò dô bơta gơtòm klĕ tùs pah ra jơi kon mơnus. Mơ kùng bơh tòm tŭ hơ̆, Yàng Tom Trồ neh ràng tơlik tơnggu broă dŏng twoai gơ klŏ Kơnràñ dê.
Satan neh lơh bơta hơ̆ mơ gùng dà lơi?

Ò di mơ phăn tòm lơh, kùng ò di kơnòm gru pơrju hala bơta pràn. Ò gơs ală jơanau huit rơm să, kùng ò bơh bơta pơlìn blơ̆ blăc lơi. Jơh ală bơta gơ càng mìng la dô nơm phăn dềt rhền, mơya gơ òs kol bol he sền òsơp: lơmpiat. Mơ mìng bơh dô jơnau đơs bă liă, gơ neh rsih dô bơta pìn wil wơl dờng ngăn.

“Ngăn la Yang Tom Trồ neh sồr…?” (Sơnrơp 3:1)

Cau Dòn Krist bol he pal càng ngăn pleh ngai ală tồi glài òs: tờchơt cau, rìs àr bơrnàn, ntung kơñau…. Mơya oă dơ̆, bol he ò đăl git lah bơh ală jơnau mơ he neh đơs tơlik kùng rgơi lơh jê sồt cau ndai in dờng ngăn, mơ di gơlăn kùng lăm tùs bơta chơt.

“Bơh jat bơta bềng liu tòm nùs gen sồng bơr đơs tơlik…. Bơh tòm nùs mơ gơlik bơta kơlôi iơh, tơnchơt cau, rềs àr, ntung kơñau, lơh cơng blac mơ jơnau tràl sơrbìl.” (Mathiơ 12:34; Mathiơ15: 19)

Behơ̆ gèn lơh mƀe lơi nàng bol he rgơi sền gàr să he klàs bơh ală jơnau tis behơ̆? Sră Goh tơngkah bol he dô bơta sồr lăm mơnàng:

“Prăp gàr tĕ nùs kon dê dô bă kơrhia rlau jơh, bơh ală croh dà bơta kis gơlik bơh di gơ” (Pơnđik 4:23)

Mơ bol he kòp gàr nùs he di mơ gùng dà lơi? Mơ bơta kah prap ală jơnâu Yàng Tom Trồ neh bơtô bol he, mơ prăp kơ̆ Jơnau Kơnràñ tòm nùs, nàng rcăng sìr tòm dră mơ satan bal mơ jơh kai gơrmơi gơ di:

“Añ neh prăp jơnau Yàng tòm nùs añ nàng añ ò tis glài tòm dră mơ Yàng.” (Đơs Crih 119: 11)

Dan jà bol he dô nùs bal tòm bơta hòi dan: Khoai Yàng gơboh, dăn Yàng toh glaì kon in tòm ală tŭ bơr sơndôi kòn ò ràng tơlik bơta niam nùs Kơnràñ. Gơs ală jơnau đơs mhăr gơjăl, siau bơta nđàc, lơh jề sồt cau ndai in mơ gơs dơ̆ kòn ò đăl git. Dăn Yàng prăp gàr nùs kon dê, nàng boh hơ̆ hòr lik ală jơnau cèng wơl bơta kis, gơrề bơta nđàc mơ nđàc sơmƀơi. Dăn tơngkah kon in git ơlĕ ơdàr wơl lai mơtŭ đơs, git sền sơwì lai mơtŭ lơh lòt. Dăn bơtô kòn git gơn kơnòm tom Yang, nàng Jơnau Kơnràñ tề lăm jơh ală jơnau kon đơs tơlik. Dăn bơr sơndôi kòn ò gơlik gơs phăn ngui bơta iơh dê, mơya gơlik gơs phăn ngui ràng tơlik bơta kờn gơboh mơ jơnau song Yang di tòm rai kis kon. Kòn jơh nùs hòi dăn, tòm sơnđăn Yàng Jesu Krist, Amen.

Ơ ală ông mò oh mi kờñ gơboh, kòp ngai bol he đơs tơlik nđờ jơnau bơt bơtao, sơmbơi, pơnđang nùs nhờm Yang Tom Trồ? Mơ gơs nđờ jơnau ò kơlôi sơnơng lik bơh di bơr lơi wơl bơta jê sồt dờng cau ndai in? Di gơlăn bơta bol he pal càng lơh ò di la đơs it rlau, mơya la đos dô bă git kơlồi sơnơng rlau. Lai mơtŭ gơs dô jơnau lơi lik bơh di bơr he, ơn tĕ nùs he nàng Jơnau Yàng tề lăm lai. Bơh dilah nùs nhờm he geh prap gàr, gèn jơnau đơs bol he di ròp geh tòm gơl pa, bềng bơta nđàc jat tơnơ̆. Dăn kòp ngai lòt găn, lơmpiat bol he ò găm la ơnih rsih bơta jề sồt, moya gơlik gơs la phăn ngui cèng wơl bơta kis, bơta sơm ƀơi mơ bơta nđàc.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.