Tòm pah rài mơ cau lơi kung pơnđơl pràn nàng ò kol lơi wơl bè rài do, lơh roh oă tú jơ la dô bơta ò niam. Ală cau ur gil gal ngan bơh broă lơh: lơh broă tô gơs jền priă, rong siam sên gar hiu nhă mơ bơtê bơto oh kon. Bol he pal ngui kòp jơ kòp phuk nàng lơh broă, bơtê bơtơl bơta jak chài he in mơ kis dô rai kis kwơ mang. Mơya, bơta gơtha rai kis do ơm tòm tú he lơh broă ò rlô, tú he ming kơlôi tus rai kis ngai tơnớ mơ húi hwơr he rơp rê ting lơi sơl? Gơs tú lơi he ơm is mơ lùp lah: Yàng hòi he nàng duh broă, tòm tú do – tòm tú jơ tòm toh mơ Kơnràn ơn he in tú do sơl?

Ngai do, ngai 08/03/2026, Ngai cau ur dê mơ ngai cau ur Jơnau Niam, rơndap bơta hòi dăn kòp ngai hòi jà ồng mọ oh kơlôi sơnơng Jơnau Yàng bơh tơnggume BƠH GƠS TÚ BÈ DO!

“Mơ ñcau rgơi git taih? Digơlan ai geh gơlik bau ùr bơtau ò di la tài bơh dô tŭ tơngai be do ò ơ?” (Este 4:14)

Gơs tú lơi ồng mò oh mi lùp is lah: Nchi bơh tài bơta pơrlài tú tơngai la dơng mang behớ taih? Tòm dô ngai ne, tòm tú jơ rlô tòm tiah lơh broă mơ ẵn kơlôi lah: ẵn lơh sang lòi nđò tú jơ lòt gan ò kwơ taih?

Ăn ò di la cau kỡn ơm nggui gòi. Ẵn lơh broă 40 jơ tòm dô poh, gơs tú oă rlau tai. Ẵn òs lòt hiu jum, sên gar hiu nhă, gơs tú jơ ală cau tòm hiu mơ gơp bơyô in. Sên ẵn la cau gil gal broă mơ bêng tơl phan ngui.

Mơya ẵn kah wơl ălă tú ò ring niam, tú mơ ẵn rgơi dơh wơl dô êt, ẵn rgơi dong cau ndai, hala lơh dô nơm broă lơi gơs kwơ mang tòm rai kis. Mơ ẵn dòp gó dô bơta: lơh ẵn in gó rai kis ẵn jê gơs kwơ mơ gơs gơtha ming 5 jơ tòm dô poh lơm.

Tòm Hiu Jum Goh ẵn jê gơs dô hiu nhă. Ẵn òs dong bol khai sên gar kon ur dềt bol khai dê tòm ơdú bơta mpôl cau kơnòm dê, tài bơh kon dềt hớ kòp kơnjớ ngan. Ming bàr mang tòm dô kơnhai, mơya tú lơi lik rê ẵn kung gó chò hòp mơ bêng bơta hòn chò, bè la ẵn neh dòp geh oă rlau mơ phan ẵn neh pài ai cau in.
Đơs tus bơta duh broă Yàng, ẵn ò kơlôi tus bơta dơng mang. Ẵn kơlôi tus kon dềt hớ nhó tòm tú bol he kơnhơl. Ẵn kah tus tú khai ơm nggui mó mó, tê sơmbat kớ bãn dềt. Khai niam ngan. Khai oă ngan bơta kòp jê, khai pal ceng gòm muh sùm. Mơ kòp tú khai yò tê, kỡn ẵn pú, nùs ẵn chò hòp oă ngan.

Tòm bơta yal yau bơh mò Este, gơs dô jơnau đơs lơh ẵn in ò rgơi húi. Ồng Mac-đô-ce la cau rong siam mơ dong kơl nàng rgơi lơh cau ur bơtau dê, mơ đơs mơ mò lah: ““Mơ ñcau rgơi git taih? Digơlan ai geh gơlik bau ùr bơtau ò di la tài bơh dô tŭ tơngai be do ò ơ?” (Este 4:14). Jơnau ồng đơs gơtha la “kon geh deh tòm tú jơ bè do in,”. Jơnau hớ ơm sum tòm bơta kơlôi sơnơng ẵn jê. Ẵn sên gó lah: He kung gam ntao digul “tú jơ bè do” – dô tú jơ nền cê, mơ ò gơs bơta lơi pha is – nàng gơlik gơs ală bơta tòm gơl niam tòm tiah mơ Yàng Tòm Trồ ơn he.

Ẵn kung neh lơh sis dô bơta long đơs bơh bơta nđàc. Ẵn neh lơh bơta long dô tòm oă nam neh rlau, mơya tú do, ẵn dòp git gơs bơta tòm gơl. Gơs tú lơi do la têl sơnio bơta têh dơng đah hwềng sơl? Ẵn kơp kỡn ngan behớ.

Bơta nđàc bơto yal Jơnau Yàng ẵn jê loh lang ngan tòm công nha. Ẵn gơboh ală ang drim ngai rlô ẵn geh dong kơl tòm ơdú bơtê Sră Goh. Mơ bơta lơh ẵn in rngoh rngac, hớ la tú hòi dan ala ală cau kơnòm ơm tòm bơta kòp jê in, tài bơh ală broă ẵn neh lơh cau kơnòm ur hớ in. Ẵn ming rgơi đơs mơ Yàng lah: “Khoai Yàng, kon ưnngai Kơnràn neh hòi sac kon tòm tú jơ tòm toh bè do.”

“Bơh dilah ai ơm mŏ mŏ tòm tŭ gơs bơta be do, gen bơta dong kòl mơ dong tă rơp tơngguh làng bol Israel in bơh đah ndai, mơya ai mơ hìu nhă bèp ai dê rơp kong roh rui. Mơ ñcau rgơi git taih? Digơlan ai geh gơlik bau ùr bơtau ò di la tài bơh dô tŭ tơngai be do ò ơ?”” (Este 4:14)

Bulah broă ẵn lơh ming la sên gar dô nă cau kơnòm dềt lơm, ò dơng bè mò Este, mơya do la tú ẵn rgơi duh broă Yàng bal. Mơ do kung la bơta mơ Yàng hòi jà kon sau Yàng dê lơh. Cau lơi tòm bol he kung gơs dô bơta nđàc nàng pà ai: hớ digơlan la dô bơta chò hòp, dô bơta pơndòm pơniang, dô seng đơs chò hala dô bơta yal yau geh đơs wơl dô bă loh lang.

Ẵn sên gó lah, gơlik gơs dô nă cau pơndòm pơniang mơ dong kơl cau ndai la dô bơta nđàc dơng ngan rau, bơta dô dơng ngan gơwèt mơ cau mè gơs kon kòp kơnjớ. Bè la ai cau kal ke in dô êt jền, hala ơn tú jơ he dê mut tòm ơdú cau kơnòm nàng yal yau bol khai in, ồng mò oh mi kung rgơi gơs ală bơta tòm gơl niam tòm Hiu Yàng in. Dan Yàng tề lam ồng mò oh mi nàng rgơi git ală bơta pal cang, mơ tề lam ồng mò oh mi ngui bơta nđàc he dê. Nùs nhơm oh mi kah kơlôi tus bơta lơi taih?

Kòp nă he ming la dô pơnah dềt tòm să jan Bơtau Krist dê lơm. Tú he duh broă bal, gen he gơs dô nơm rùp sơnio niam ngan. Mơ dilah siớu bơta lơi, gen rùp sơnio hớ ò niam tai. Tòm bơta duh broă hớ, bol he geh chò nùs, geh tòm klac bal, mơ geh kis tòm toh mơ bơta hoi jà Yàng dê.

Yàng Tòm Trồ neh ràng tơlik ồng mò oh mi in bơta nđàc lơi mơ bơta chài rgơi lơi nàng ồng mò oh mi rgơi duh broă Yàng mơ duh broă bal mơ gơp. Ồng mò oh mi geh Yàng hòi sac – tòm tú jơ tòm toh.

Dan jà bol he dô nùs bal tòm bơta hòi dan: Khoai Yàng, digul ală bơta òs gơs tòm rai kis do, dan ai kon in git dơh wơl nàng kơno jơnau hòi sac Yàng dê. Dan pò mat kon nàng kon rgơi sên gó ală pơnah pal cang gut dar kon. Dan ai kon in bơta pơndềt să nàng lơh sir broă Yàng jao kon in, bulah cau git hala ò. Kon dan ơn tú jơ, bơta chài rgơi mơ nùs nhơm kon dê tòm tê Yàng at bồ. Dan ngui kon jat nùs kỡn Yàng dê, tòm tiah do mơ tòm tú do. Kon jơh nùs hòi dan, ai sơnđan Yàng Jesus Krist, Amen.

Ơ ală ồng mò oh mi kỡn gơboh, ò di cau lơi kung geh ơn tòm tiah oă cau sên gó, geh jong rơ ò. Gơs ală cau ur kòp ngai jơh nùs dong kơl, sên gar hiu nhă hê dê mơ tong tê dong kơl oă pơnah pal cang ndai bơdih hiu nhă hê dê – mơ ò cau lơi git. Mơya ồng mò oh mi git ò, Yàng rgơi lơh ală bơta dơng rlau mơ bơta he rgơi git tòm bơta dềt rhên hớ. Kung bè Kơnràn neh sac dô nă cau ur dềt rhên nàng gơlik gơs bau ur cau bơtau at bồ dô lơgar dê, Kơnràn kung rgơi ngui ồng mò oh mi mơ ẵn tòm nùs kỡn niam Kơnràn dê. Dilah ngai do ồng mò oh mi gam ò hềt git bơta nđàc he dê la nchi, gen kung bẵn kơlôi rcang. Digơlan Yàng ò ơm gơn ồng mò oh mi lơh broă lơi dơng mang, mơ Kơnràn ming kơp kỡn ồng mò oh mi mhar lơh ală bơta mơ Kơnràn ơn di đap mat ồng mò oh mi dê. Mơ ò git hớ la tiah Yàng ngui ồng mò oh mi dô bă gơnap gơnoar – tòm tú jơ tòm toh bè do.

Ơ ală ồng mò oh mi kỡn gơboh, nhưk la ală cau ur, oh mi la kon ur Yàng Tòm Trppf dê, geh Kơnràn crơnggơs mơ dô nơm tơnggu pha is. Ò di ming ngai cau ur dê lơm, mơ tòm ală ngai, rơp geh sên dơng mang mơ geh kỡn gơboh kòp ngai. Dan bơta nđàc, bơta kỡn gơboh Yàng dê rơp ai bơtơl pràn, bơtơl bơta nđàc nàng oh mi in geh ntào kớ nàng kis dô rai kis dơng mang, gơkló ang sơnđan Yàng.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.