La cau dòn Yang, di ngăn cau lơi tòm bŏl he kŭng găm gơs jơnau họi dăn jơh nùs băl mơ Yang. Bŏl he dăn Yang ai ală broă gơs bơtoah, ai hìu nhă ĭn geh rĭng lơngai, hala ai dô tŭ lơmpah krơi is lơi nàng geh gơlik gơs wil tơl. Mơya, tơnơ̆ jơnau họi dăn hơ̆, bơta ò kơp koñ gơlik gơs wơl. Digơlan bŏl he lùp is : ñchi bơh tai bơta rọh gơn kơnòm gơlik gơs băl mơ he? Ñchi bơh tai Yang gơlơh be òhềt iat kơno jơnau he di.

Ngai do, ngai 10/03/2026 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl D. Leon Pippin dê bơh Tơnggume TŬ YANG GƠLƠH BE ÒHỀT GIT KƠNO.

“Tòm tŭ khai hòi dan di Añ, gen Añ rơp dòp jơnau khai dê; Añ rơp ơm bal mơ khai tòm tŭ khai tìp bơta bòl glar, Añ rơp dong tă khai mơ lơh khai in geh jòng ro.” (Đơs Crih 91:15)

Chris neh kơp gơn kir sơnre ngai deh năm dơ̆ jơt bar sơnăm he di jŏ jọng bơh yau. Khai koñ hòn chò ngai kir sơnre hơ̆ tòm dô nơm bă tiah kơñhơl. Drim ngai hơ̆, Chris guh gơñ bơh drim, hòn chò mơ bềng lìu bơta kơp gơn, dòn nền he rơp gơs dô ngai kir sơnre hòn chò ngăn.

Lài mơ tŭ ală cau tòm hiu nhă lik bơh hìu, Bèp Chris di, kŭng la dô nă cau gơnoăr bơtọ, họi jơh tơl nă cau ơm dô bă mơ họi dăn. Ồng dăn Yang ai bơta lòt gùng geh hòn chò mơ sền gar jơh tơl nă cau tòm hiu geh rĭng lơngai.

Bơta lòt gùng gơlơh be jọng rlau òs mòng. Mơya lồi dut, tiah ơm kơñhơl kŭng tơlik diđap măt. Bàp pa ơn rơndeh di di tòm tiah ơn gen Chris neh mù mơ bơh rơndeh. Hơđăng gùng lòt tus tiah tác sră mut tòm mpồng, khai kơno iat jơnau driau dờng hòn chò, jơnau driau ñŏ ntas bơh di tiah ơm kơñhơl. Mơya gen Chris sền bàn bơta kơñhơl gơboh gơbài he di: vòng quay ơseh bar dap. Khai đal git mo, hơ̆ là bơta kơñhơl sơnrờp jơh tơl nă cau hiu nhă rơp kơñhơl băl.

Chris ntoat tus tiah quay, hào sơrbac sơrbăng dap hơđăng, gen hào hơđăng kon ơseh dờng rlau jơh. Tòm tŭ hơ̆, Chris jơt bar sơnăm gơlơh be ò găm ơm tềng hơ̆ tai. Tòm bồ dơngoh kơlôi sơnơng, khai gơlik gơs be dô nă cau chài rgơi at bồ ơseh đah Đơm, găm ràng tơlik bơta chài rgơi diđap ală cau driau dờng, hào mù, xoay gut dăr ò dơh.

Mơya bơta chò hòp hơ̆ ò jŏ jọng mơya pơndut mhăr.

Tŭ Christ gơmù lik bơh “kon ơseh dờng” he di, jơng khai kòl jơleh mơ gơkòl tiah jă jơng lòs. Khai gơpừ bồng pràn ngăn. Tiah jă jơng lơh sèt pha mơ srơp jrô tòm jơng khai di.

Bơta pơnji pơnkôr gơrơp tus. Chris geh cèng mut tòm tiah cấp cứu rềp tềng hơ̆, hìu nhă ơm gut dăr. Tŭ sền gŏ mham mơ pơnah poăc kòl tac, khai xỉu mơ. Ală cau gơnoăr sơnơm ai tơnggit bơta tềl sồt njơ̆ ngăn păl rhềm tus 73 sề jrưm.

Chris rọh jơh nùs. Tài bơh khai ơm tòm klờng la dô nă cau chài rgơi re dà , khai òhềt tŭ lơi dòn tŭ cau gơnoăr sơnơm đơs lah păl êt rlau jơh là prau poh tai gen rơp sơntòm re wơl dà. Tòm tŭ gơjrañ ngăn mơ rọh bơta gơn kơnòm, Chris pơlac di măt Bèp khai di, ñìm mơ yoam:

“Bàp neg họi dăn lah bŏl he rơp gơs dô ngai chò hòp, lah ò gơs dô nă cau lơi kòl tềl sồt.

Mơya kon neh tềl sồt, mơ bŏl he ò chò hòp dô êt lơi”

Bar poh tơnơ̆, Chris rơp sơntom kòl ji tôr ngăn. Cau gơnoăr sơnơm Tôr – Muh – Dợ rơp khám tôr đah ma khai in gen đơs lah:

“Chris, bơtoah ngăn la mi ò tŭ lơi rơp re dạ tŭ do mơ”

“Ñchi bơh tai ơ cau gơnoăr sơnơm?” “ò geh sơmbòi sơl ơ?”

“Tôr kon geh nhiễm trùng mơ…”

Chris kơlôi rcang đơs mo lah: “ngăn sơl la gơs jơnau iơh lơi gơlik gơs sơl?”

Cau gơnoăr sơnơm sền khai gen đơs : Gơs. Dilah kon ò kòl tềl sồt tòm jơng mơ kư̆ pơnđơl pràn re dà, màng nhĩ kon di rơp tac ray, mơ kọn rơp ò tŭ lơi kơno jơnau lơi tòm tôr đah ma hơ̆.”

Chris sơntom pram nùs gen ñìm. Jơnau iơh do găm iơh rlau khai kơlôi. Khai neh gơn kơnòm do mìng la bơta pơnji pơnkôr tôr òs mòng lơm. , lah tŭ lơi jơng geh bòi wơl, khai rơp ri wơl tiah re dà be lài or. Me khai hwài khai tus rềp koar nùs, mơ bar nă me mơ kon ñìm.

Tus ri hiu, Chris là cau cơnđòa mù lài bơh rơndeh. Khai ò ntào jai, păl sơnding să tom rơndeh nàng ntào. Tŭ Bèp cơnđòa lik bơh rơndeh, Chris đơs òm, jơnau đơs òm mơya bềng kơlôi sơnơng:

“Ơ Bèp, gơs tŭ kọn gơlơh be Yang òhềt iat kơno. Mơya be Bèp òs đơs lah, Yang neh ho pơgon lah: “Tòm tŭ khai hòi dan di Añ, gen Añ rơp dòp jơnau khai dê; Añ rơp ơm bal mơ khai tòm tŭ khai tìp bơta bòl glar, Añ rơp dong tă khai mơ lơh khai in geh jòng ro.” (Đơs Crih 91:15)

Gen Chris lòt ò kơ̆ găn rơndeh, koar Bèp bơh dô nơm koar kơ̆ ngăn, sơnding bồ tơm ntơh bèp mơ đơs lah:

“Kọn dăn să Bèp…

Kọn dăn să oă ngăn.”

Bŏl khai cơnđòa lòt băl tus di hiu, tê koar tê, kòp nă cèng bơta kơlôi sơnơng pha is. Cau Me òm ưnngai Yang tài bơh hìu nhă he. Cau Bèp kơlôi sơnơng òm Jơnau Sră Goh: “Tê ma Kơnràñ dê at bồ dô bă pha lin rlau.” (Đơs Crih 48:10). Ngăn, Yang Tom Trồ òs lơh tòm tọh di ală jơnau Kơnrẵn neh đơs!

Tòm nùs git lah he gơs dô nă Bèp niam crih crài Chris neh dô dơ̆ tai bơtê git dòn kơnòm di jơnau họi dăn bèp di.

Ơm tòm tiah ngài ngăn, jơnau ntas rơndeh cứu thương, Chris nisơna dơh wơl tŭ kah tus jơnau ntas hơ̆, gen dô dơ̆ tai òm ưnngai Yang Tom Trồ – tài bơh Kơnrẵn neh sền gar, jơm gọm khai, jat be broă bơh sơnrờp khai ò wă lọh.

Dan jà bol he dô nùs bal tòm bơta hòi dan:

Khoai Yang, gơs ală tŭ kọn họi dăn sŏng ngăn, mơya ală bơta gơlik gơs wơl ò ndrom be bơta kon kơp gơn. Gơs tŭ kọn rọh bơta gơn kơnòm, dơrcul mơ pin wil wơl Yang. Mơya dăn dŏng kọn dòn kơnòm Yang bulah kọn ò wă lọh bơta Kơnrẵn găm lơh. Tŭ kọn ji nùs hala gơplơ̆ nùs, dăn tơngkah kọn kah tĕ lah Yang găm ơm rềp, găm iat kơno, mơ lơh ală bơta gơlik gơs kwơ he ĭn. Dăn dŏng kọn git jào phi wil tơl Yang ĭn, git ưnngai Yang bulah tòm ală tŭ gơlơh be òhềt wil tơl. Kọn jơh nùs họi dăn, Kon ai sơnđăn Yang Jesu Krist, Amen.

Ơ ală ồng mọ ọh mi koñ gơboh, dilah he neh họi dăn oă ngăn, mơya ală broă ò gơlik gơs be bơta kơp koñ. Dilah behơ̆, kah tĕ lah Yang găm lơh ală broă, jat rnoas Kơnrẵn di, tòm tọh tŭ jơ Kơnrẵn di. Bulah jơ do mo he ò git lọh, ò gŏ lọh jơnau ho wơl, Kơnrẵn găm òm sền gar he. Gơs ală tŭ, mìng tŭ lơi lòt găn jơh ală bơta mơ sền wơl, gen bŏl he đal git lah bơta lơi he neh sền là “bơta iơh rmơh” mơya bơh ală bơta hơ̆ wơl la bơta jơm gọm bềng koñ nđàc gen Yang ai pà rài kis he.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.