Tòm rài kis kòp ngai, bol he ờs lòi oă tŭ jơ nàng sền gàr să jă: bơh bơta sa ngui, bơta rlô ơm tus dê bơta bơ srăm nàng lơh pràn đah să jăn rlau tai. Mơya, tŭ đơs tus rài kis đah hwềng, oă nă tòm bol he sền ò sơp mờ lời hŭi. Gen bơta dòn rgơi ntào kơ̆ di lah kòp ò gơs bơta ròng siăm sơl? Mờ bol he păl lơh bơta lơi nàng hwềng soàn bol he dê geh dờng?

Ngai do, ngai 12/03/2026, Bơta Hòi Dan Kòp Ngai dan jà ồng mò oh mi bơtê bal Jơnau Yàng bơh kơnòm dê bơta dong kòl M. Sellers bơh tơnggume BƠ SRĂM RÀI KIS ĐAH HWỀNG

“Mơya sơlo dờng tĕ tòm bơta nđàc mơ tòm bơta dòp git Yàng la Yàng Dong Klàs bol he dê la Yàng Jesu Krist. Dan bơta gơklŏ gơrê bal mơ Kơnràñ bơh do jơl sùm sùm. Amen.” (II Pier‬ ‭3‬:‭18)

Tòm ala ngai găm ơm ling di tiah dà lềng, añ sùm bơ srăm thể dục. Ala ngai lòt tòm dà lềng dê là jơt nhai, mờ tòm tŭ hơ̆, añ sùm bơ srăm kòp ngai, yờ tạ, ntoat, mờ ala bơta bơ srăm ndai. Tŭ rê dê hìu, añ sền gŏ să jăn añ pràn ngăn.

Mơya, tŭ lik bơh tiah hơ̆ mờ rê wơl dê rài kis kòp ngai, jơh ală bơta sơtờm tòm gơl. Sơnrờp añ sùm găm bơ srăm mơya dô êt tŭ jơ. Añ ò guh drà dê tŭ poăn jơ bè lài, mờ ya bik rọ. Gen rơ hời, añ mìng bơ srăm bàr pe tŭ tòm dồ tuần. Tơnơ̆ tai, añ ò yờ tạ tai, mìng ntoat lơm. Kư̆ bè hơ̆, bơta pràn , să đah bơdìh, poăc mờ bơta kơ̆ pràn…ala bơta mờ añ neh bòl glăr bơt bơtào tŭ do rhời roh wơl. Tŭ ờ bơ srăm dồ bă tơ riăng tai, să jăn añ gơs bơta lơbơn lơñio mờ añ ò đăl git.

Rài kis đah hwềng bol he dê kung bè hơ̆ sơl. Tŭ he lờ tŭ jơ is Yàng in, đọk Sră Goh, hòi dăn, kòp ngai bol he rơp git loh bơh Yàng rlau tai, đăl git he là ñcau tòm Kơnràñ, mờ bơta đềt mềr di bol he mờ Yàng kòp ngai là drô dơp rlau.

Mơya bơta moat jrùng hơ̆ là bol he sùm lời nhờt tŭ jơ dờng màng do. Broă lơh, hìu nhă, gơp bơyô mò tơl bơta gê ga ndai lơh tŭ jơ he lời Yàng in rhời dô êt. Gen tŭ lài bol he neh lời oă tŭ jơ mờ Kơnràñ, mờ ya rhời ngai, bơta hơ̆ mìng là jơnau hòi dăn dồ bă ba lơya. Gen bơta hơ̆ neh tơl rau gơwèt mờ rài kis đah hwềng bol he sơl ơ?

Tòm Sră II Pier, ồng Pier neh tơng kah ala cau dò Yàng bơh bơta rêwơl Yàng Jê-su dê, mờ kung chồl pơndờm bol khai kis dồ rài kis sàng goh mờ duh rngòt tòm tŭ kơp gơn Kơnràñ rêwơl. Di gùl bơta kơp gơn hơ̆, ồng đơs “Mơya sơlo dờng tĕ tòm bơta nđàc mơ tòm bơta dòp git Yàng la Yàng Dong Klàs bol he dê la Yàng Jesu Krist. (II Pier‬ ‭3‬:‭18)

Ồng Pol neh tơngkah bàr bơta mờ cau dòn Yàng kơp koñ nàng geh dờng: Dờng tòm bơta nđàc mờ dờng tòm bơta git wă Yàng. “Dờng tòm bơta nđàc” tơngkah bol he lah bol he neh geh dŏng tă bơh bơta nđàc, mờ kung bơh bơta nđàc hơ̆ mờ bol he geh dờng, hơ̆ ò di là bơh pràn is hala bơh să tòm he.

Dơ bàr “dòng tòm bơta git wă Yàng”. Gen ò geh dồ nă cau lơi rgơi git loh làng Yàng dê dilah cau hơ̆ ò koñ gơboh Jơnau Yàng mờ kơp koñ đăl git Kơnràñ tòm rài kis he dê. Git wa Yàng dong bol he ntào kơ̆ tòm Kơnràñ, ò geh pơndờm bơh bơta tìs glài hala bơh dunnia do.

Gen tàng, là dồ nă cau dòn Yàng ngăn, bol he ò rgơi kis mờ dồ bơta dòn bă lơya hala mìng là “prap bơta jat”. Bơta dòn koñ geh bơ srăm kòp ngai. Bol he git lah nàng geh dồ să jăn pràn, tập thể dục là broă ờ siơ̆u. Gen koñ geh dồ bơta dòn kơ̆ cê, gen bol he chài rgơi sang lời tŭ jơ tus mơ Yàng sơl? Gen là dồ bơta ò gơs ngăn di lah bol he kơp koñ bơta dòn he dê pràn kơldàng, mơya sang sơbì hwềng soàn he dê.

Tŭ ò gơs tŭ jơ ơm is mờ Yàng, bơta dòn bol he gơ lik gơs lơbơn lơ nho. Bol he rơp roh dê bơta ngak ngar đah hwềng mờ rơp lòt hŭi gùng. Cà ràk sùm ơm mòc bol he, kơp koñ bol he gơ plơ̆, mờ ngui dê ala bơta gê ga hơ̆ nàng hwài bol lòt ngài bơh Yàng. Cà ràk git loh làng tòm tŭ rài kis bol he nđềt mềr mờ Yàng, gen gơ̆ ờ gơs lơm pah lơi nàng lơh he in gơ plơ̆.

Gen bol he gam lơi ngăn tŭ jơ Yàng in kòp ngai sơl? Bol he ngăn kơp koñ họk git Kơnràñ mờ bơ srăm rài kís đah hwềng bol he sơl? Ngai do là tŭ bol hê rêwơl mờ Jơnau Yàng, pơnjat bơta dờng tòm bơta đềt mềr mờ Bơtau Krist. Kung bè să jăn kung păl geh bơ srăm, rài kis bơta dòn bol he dê kung păl koñ geh ròng siăm mờ bơ srăm kòp ngai sơl.

Dan jà bol he dô nùs bal tòm bơta hòi dan: Khoai Bèp koñ gơboh, dăn dong kòn git kơp koñ geh kis tòm bơta sền gŏ Kơnràñ rlau mờ jơh ala bơta. Dăn dong kòn sùm koñ gơboh tŭ jơ ơm is mờ Kơnràñ, nàng kòp ngai kòn sùm geh dòng tòm bơta dòn mờ tòm bơta đăl git Kơnràñ dê. Kòn jơh nùs hòi dăn tòm sơnđăn Yàng Je-su Krist, A-men.

Ơ ồng mọ, oh mi koñ gơboh, bơta dòn geh dòng koñ geh bơta bơ srăm, hơ̆ là ngăn. Gen lời te dồ tŭ jơ kòp ngai nàng tus mrêp mờ Yàng tòm bơta đọk Sră Goh mờ hòi dăn. Bol he ờ lơh ala bơta bơklơn đah hwềng dồ bă kră kơldăng hala bè máy, mơya păl càng git tơng guh dồ bă loh làng: nàng git wă Kơnràn, nàng koñ gơboh Kơnràñ rlau tai, mờ kis dồ rài kis gơlik plai Kơnràñ. Bơta dòng đah hwềng ò tus mơ, mơya là cồng nha bơta dòn song tòm ala bơta bơklơn mờ bol he găm lơh kòp ngai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.