Kòn mơnùs bol he ơs gơs nùs nhơm wet tus ală bơta đah bơdih: jơnau đơs păl lơbơn niam, să jăn pal ngui soh niam, gùng lơh lòt pal chai rgơi. Ală bơta hơ̆ ngăn la dơng mang. Mơya bol he gơs đăl git lah jơh ală bơta sơmpô đah bơdih hơ̆ ngăn la công nha ơs dô nơm nùs nhơm neh geh Yàng tơmgơl pa haha ò? tai behơ̆, tòm rai kí kơp ngai, gơs dơ̆ lơi bol he sền rmê oă ir ală bơta dah bơdih mơ hŭi sền rmê nùs nhơm đah dơlăm he dê geh sang goh mơ wil tơl diđap măt Yàng hala ò?

Ngài do, ngai 13/03/2026, Bơta Hoi Dăn Kơp Ngai dăn jà ală ồng mò oh mi bơtê bal jơnau Yàng kơnơm dê bơta dong kơl Nathalie Jeter dê bơh tơnggumê PRĂP NÙS SÀNG GOH.

“Ơ Yàng Tom Trồ, dan crơng gơs tòm añ dô nơm nùs sàng goh; Mơ ơn tòm añ dô nơm hwềng nùs pa mơ song ngan.” (Đơs crih 51:10)

Añ ò di la dô nă cau kălke ir tòm broă lơh sàng goh hiu tum. Ming cang ală bơta gơlơh ơm niam, sền đah bơdih sàng goh la añ sền di rau. Behơ̆, añ ơs lơi hŭi ală tiah cau ndai ò hoan cau rmê tus be la quạt, jơng dơrñăng hala tiah mum ò rgơi sền gŏ. Hơ̆ la ală ơnih tiah mơ dô nă cau git kơrhia rơp ò lơi siơ̆u tòm tŭ lơh sàng goh.

Mơya bulah behơ̆, tòm dô bơta lik lòt rềp dô, añ neh tơngkah bơh bơta dơng , ang broă wàs goh ală tiah cau ò sền gŏ. Tòm dô ang drim, tòm tŭ sền bơh mpông dềt ơdŭ bic dê, añ sền gŏ dô nă cau mò kra sŏ kò lòt drĕ drĕ, kơrhia peh was jơng gùng diđap hiu he. Hiu mò dê ơm tòm tiah hơđơm rlau gah gùng, gen tang dilah ò rmê sền gen ò rgơi gŏ hiu hơ̆.

Añ lùp is ñchi bơh tai mò guh gơñ nàng wàs ơnih tiah ndơp behơ̆, dô nơm ơnih gơlơh be tơl nă cau ò sền gŏ?

Digơlăn mò găm gơn dô nă cau nac krơi is. Kung digơlăn mò là dô nă cau git kơrhia mơ ò rgơi ơm iang tòm tŭ jơng gùng găm bơ̆. Bulah la bơh tơnggu lơi, rup hơ̆ kung lơh añ in kơlôi bơh să tòm he. Añ đăl git rai kis đah hwềng he dê kung gơs ală “ơnih òhềt geh wàs”. Rlau añ mơ Yàng, gen ò gơs cau lơi rgơi sền gŏ ală tiah hơ̆. Oă dơ̆ añ wet ir tus rcăng gar ală bơta đah bơdih, la ală bơta cau ndai buôn rgơi sền gŏ, mơ hŭi rcăng gar nùs nhơm đah dơlăm he dê. Tòm jrô dơlăm, añ git lah tòm tŭ nùs nhơm geh Yàng Tòm Trồ lơh sàng goh, tơmgơl bơh đah dơlăm, gen bơta tơmgơl bơh đah bơdih ò găm la bơta dơng tai.

Bơtau Dabit wơng loh bơta do. Ông dơp git dô nơm nùs nhơm sang goh dơng mang diđap măt Yàng Tom Trồ mbe lơi. Gen tàng, tơnơ̆ moe neh tis glài mơ Yàng, mơ nùs nhơm lề làc, ông hôi dăn mơ Kơnrañ lah: “Ơ Yàng Tom Trồ, dan crơng gơs tòm añ dô nơm nùs sàng goh; Mơ ơn tòm añ dô nơm hwềng nùs pa mơ song ngan.” mơ “Ơ Yàng Tom Trồ, dan sền sơwì añ mơ git nùs añ jê! Dan lòng añ mơ git ală bơta kơlôi sơnơng añ jê! Dan sơwì sền tòm añ gơs gùng dà iơh lơi hala ò? Dan tề lam añ tòm gùng gam sùm sùm. (Đơs Crih 51:10 mơ 139:23-24).

Oh mi gơs ji gloh tơhir nùs nhơm he sum geh sang goh diđap măt Yàng hala ò?
Nàng kis dô rai kis sàng goh, prăp gar tĕ he tòm bơta gơtơmklac mơ Yàng Tòm Trồ dô bă pơnjat, ơs mơng. Mơ hôi dăn la gùng nàng bol he tus mơ Yàng, dăn Kơnràñ sền sơwì mơ lơh goh nùs nhơm, dong bol he gơjrañ săng glài mơ tơmgơl pa tòm Kơnràñ. Be Cau Gơnoăr Bơto Dơng Pol neh bơta bơto tơngkah bol he “Hòn chò tĕ sùm sùm. Hòi dan tĕ ò dơh.” (1Tesalônika 5:16-17)

Bơta hôi dăn ò kol kơryăn tòm dô nơm tŭ jơ lơi, mơ ya pal là dô nơm hiong dà hor sùm tòm rai kis bol he. Bol he hôi dăn tòm tŭ pah guh bic, lai mơ tŭ sa, tòm gùng lòt lơh broă hala lòt bơtê, tòm gùng ri hiu, lai mơ tŭ ri bic … Kơp jơnau hôi dăn la tŭ lơmpah bol he lơh tơmgơl wơl nùs nhơm he.

Riwơl til sèng yăl yau bơh sơnrơp, oh mi găm kah mò kra mơ añ neh đơs tus hala ò? Mhô ngai hơ̆, añ lăng di mpông dềt mơ sền gŏ dô nă ồng kra tus diđap mpông hiu mò, tòm tê ồng cèng bơkao. tŭ hơ̆ añ neh wơng lah mò kơrhia was goh tai bơh mò ò kòñ ông sền gŏ ală bơta sơlung sơlăng hala bơ̆ iơh diđap mpông hiu. Hala đơs tòm toh ngăn, bơta kòñ gơboh là bơta gơchôl dơng rlau jơh nàng mò rgơi niam rlau jơh tòm tŭ ntao diđap cau he kòñ gơboh.

Kung behơ̆, tòm bơta gơtơmklac mơ Yàng Tòm Trồ, să tòm bơta kòñ gơboh ai Kơnràñ in la dô bơta gơ chôl bol he guh kơp ang drim, hôi dăn mơ Kơnràñ, mơ lơi Kơnrañ “peh was” ală tiah jrô ndơp tòm nùs. Lai mơ tŭ ntao diđap mơ ală bơta wă broă mơ tồi glài rài kis kơp ngai, broă was goh nùs nhơm la broă dơng mang rlau jơh mơ bol he păl cang ơn hơđăp kơp ngai.

Dan jà bol he dô nùs bal tòm bơta hòi dan: Khoai Yàng kòñ gơboh, Kơnràñ la Bơtau sền gŏ ală tiah jrô ndơp rlau jơh tòm nùs kòn dê. Ngai do kòn tus mơ Yàng, dăn Kơnràñ jut jơh ală tồi glài tòm nùs kòn. Dăn dong kòn săng ală bơta lơh nùs kòn bơ̆ iơh mơ ò wil tơl diđap Kơnràñ. Kơp kòñ kòn sùm kòñ gơboh bơta sàng goh mơ ji gloh tơhir kis tòm bơta gơtơmklac mơ Kơnràñ kơp ngai. Kòn jơh nùs hôi dăn tòm sơnđăn Yàng Jêsus Krist, Amen.

Ơ ală ồng mò oh mi kòñ gơboh, nùs nhơm la bơta đơs tus sơnrơp tòm bơta bơto Yàng Jêsus dê: “ Mê jơh tĕ nùs, jơh hwềng soan, jơh dơngoh jak mơ kòñ gơboh Yàng la Yàng Tòm Trồ mê”. Nàng prăp nùs sùm kòñ gơboh Yàng, sùm don song diđap Yàng, bol he păl càng prăp bơta hôi dăn sum, pơnjat. Bol he rgơi sơntơm mơ pơndut dô ngai he dê tòm bơta hôi dăn mơ sền sơwì să tờm he. Kơp dơ̆p git nus nhơm he kol bơ̆ iơh bơh tồi glài hala ală bơta kơlôi sơnưng iơh, dăn jà ồng mò oh mi tus tĕ mơ Yàng mơ hôi dăn be bơtau Dabit lah: “Ơ Yàng Tom Trồ, dan crơng gơs tòm añ dô nơm nùs sàng goh; Mơ ơn tòm añ dô nơm hwềng nùs pa mơ song ngan.”

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.