Oă cau kơlôi lah kòñ lơh gơs dô bơta tơm pơrgơl dờng dunnia in gen pal ơm hơđang ală cau, pal ntào tom ală tiah dờng mang tom dunnia. Mơ ya Sră Goh ai bol he in git dô bơta pha ìs: mìng pal cang gơs nùs nhơm dòn-sọ̆ng mơ Yàng, jơh nùs tề lăm ală cau ơm bal gùt dar he cơnoà lòt bal tom gùng duh rngòt gen rgơi cèng wơl bơta tom pơrgơl dờng ngan. Hơ̆ la gơnoar broă cau gơnoăr bơyai broă dê.

Ngai do, ngai 14/03/2026, Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Terry Murphy dê bơh tơnggume GƠNOĂR PRÀN CAU GƠNOĂR BƠYAI BROĂ DÊ.

“Jôas lơh bơta di niăm di đap mat Yàng Jehôwa tom jơh ală năm cau gơnoăr ơn phăn duh khoai Jehôjađa găm kis.” (II Yal Yau 24:2)

Ală sră Yal Yau yal wơl bơta yal yau bơh bơtau Dabit mơ ală kọ̀n pơrdòn wơl sơbàn ồng dê. Tơnơ̆ mơ tŭ lơgar gơkòl cah bàr lơgar, Israel hơ đah đăng mơ Juđa đah đơm, bơta yal yau pơnjat mơ oă bơta yal yau bơh ală bơtau niăm mơ ală bơtau ò niăm.

Israel la lơgar gơs oă bơtau iơh bơsăk, ting hơ̆ gơs Ahap, bau klau Jesabel dê, la dul tom ală bơtau iơh bơsăk rlau jơh. Bơta iơh bơsăk hơ̆ gơmù tus tom Juđa tom tŭ kọn ùr Ahap la Athalia tơmƀau mơ bơtau Jôram.

Bọ̆l khai deh kọn klau la Acasia. Ồng guh lơh bơtau tom Juđa mìng tom dô tŭ tơngai liah tơnơ̆ mơ bèp săng rài. Pơrlai soh ngan, Acasia bơtê jat ală bơta tìs nrah bơh mè khai mơ mhar gơlik gơs dô nă bơtau iơh bơsăk. Bơta chò-hòp cau Juđa in hơ̆ la ồng mhar gơkòl tơnchơt. Mơ ya bơta rŭng-rài ò bơdơh wơl ting hơ̆. Mè ồng la Athalia neh ngui tŭ lơmpah hơ̆ nàng tơrgòm gơnoăr at-bồ, jọi jơh tom hiu cau bơtau dê nàng tơnchơt ală cau rgơi tơmpìt sơbàn bơtau.

Jơh ală bơta roh gơn kơnòm gơwèt mơ cau Juđa. Mơ ya Yàng Tom Trồ găm kư lơh broă dô bă ndơp ndơr.

Acasia gơs dô nă ruh. Mò ò gơs gơnoăr pơrdòn sơbàn, mơ ya bal mơ bau klau he dê la cau gơnoăr ơn phan duh khoai Jehôjada, mò neh dọ̆ng tă Jôas, kọn klau Acasia dê klàs bơh bơta joi tơnchơt. Bọ̆l khai pồn kọn dềt mơ ròng siăm.

Jơl poh năm, Jôas geh pồn mơ têh dờng, geh bơto sồr mơ sền gàr. Jơl tus di tŭ khai poh sơnăm, Jehôjada ñă ntào bơtào gơs dô bơta tơm pơrgơl, bơtào Jôas guh lơh bơtau mơ pơndùt rài bơta iơh bơsăk Athalia dê.

Bơh tŭ hơ̆ jơl tus lồi dut rài kis he, Jehôjada sùm ơm digah bơtau Jôas. Bơta cồng nha dờng rlau jơh tom rài Jôas la broă bơtào wơl hiu duh khoai Salômôn, tiah neh gơkòl oă rài bơtau iơh bơsăk lơh bơ̆ bơl, mơ cèng bơta duh khoai Yàng Tom Trồ rê wơl tomtoh. Mơ ya bơta dờng mang la: Jôas mìng lơh bơta hơ̆ tom tŭ Jehôjada găm kis. Tom jơh 130 năm rài kis cau gơnoăr ơn phăn hơ̆ dê, bơtau lơh niăm nùs Yàng Jehôwa, mơ jơh lang bòl dòp geh lơngai.

Mơ ya moàt-jrùng ngan, tơnơ̆ mơ tŭ Jehôjada chơt, gen Acasia sơntòm gơpừ. Mơ ya bơh bơta hơ̆ ai gọ̆ loh làng dô bơta: cau tòm tom bơta yal yau tom 2 Yal Yau 22-24 ò di la cau bơtau, mơ la cau gơnoăr bơyai broă ntào tơnơ̆ ồng.

Tom jơh ală kơnhai sơnăm hơ̆, gơnoăr pràn ngan ò di tus bơh sơbàn, mơ la bơh dô nă cau ơm bơh đah ngkòi tề lăm, yò-đo, hòi dan mơ rcang sir kong bơta sơrbơng roh. Mơ ồng kung pal kong bơta roh gơchoh tom bơta gơtom klac hiu nhă, mìng nàng lơh bơta niăm di đap mat Yàng Tom Trồ.

Hơ̆ la dô jơnau lơh cơng niăm ngan bơh gơnoar broă cau gơnoăr bơyai broă dê.
Behơ̆ oh mi gen mbe lơi taih? Tom rài kis he dê, oh mi neh yăl tơlik gơnoăr pràn he dê tus cau lơi taih? Oh mi gam kơno, tơngkah, yò-đo mơ hòi dan cau lơi in? Oh mi ntào bal mơ ñcau, nàng dọ̆ng kơl mơ dòn kơnòm lah cau hơ̆ rơp lơh bơta di pal taih?

Bulah cau hơ̆ pơnjat lòt di gùng hala ò, pal kah tĕ bơta yal yau Jehôjada mơ Jôas dê. Kong-ơ̆t tĕ mơ dòn song sìh bơta niăm oh mi dê. Tài bơh behơ̆, oh mi gơs pơnah bal tom bơta tom pơrgơl ò di mìng dô nă cau, mơ la jơh dô pah rài.

Dan jà bol he dô nùs bal tòm bơta hòi dan: Khoai Yàng, kọn ưnngai Yàng tài bơh ală cau gơnoar bơyai broă Kơnràñ neh ơn tom rài kis kọn dê, ală cau neh sùm yò-đo dồ bă ndơp ndơr, bơto tơngkah mơ hòi dan kọn in lòt tomtoh di đap mat Kơnràñ. Dan ai kọn it git sền dờng mang gơnoăr broă bơta bơyai broă tom Yàng, mơ kung rcang sir gơlik gơs cau ñă ntào bal mơ cau ndai mơ nùs nhơm pơndềt să mơ dòn-sọ̆ng. Bulah ò geh dòp hala jòng-ro, dăn ai kọn in kư ơm kơ̆ tom bơta kòñ gơboh, yò-đo mơ sùm wèt hơ cau ndai rê wơl mơ jơnau sọ̆ng Kơnràñ dê. Dan Yàng ngui rài kis dềt rhền kọn dê nàng cèng wơl bơta pràn kơldang niăm tus oă cau. Kọn jơh nùs hòi dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, bulah oh mi ntào tiah lơi, bañ sền òsơp gơnoăr pràn mơ Yàng neh jao oh mi in. Digơlan oh mi ò ntào hơđăng tiah bơto Jơnau Yàng hala gơlik gơs tiàng pơnro digùl bơta ryŭ ryơm, mơ ya oh mi kung rgơi ntào bal mơ dô nă cau lơi hơ̆-nàng kơno, hòi dan mơ tơngkah bọ̆l khai cơnoà lòt tom gùng dà Yàng dê. Bơta dòn-sọ̆ng oh mi dê di đap mat Yàng Tom Trồ ò tŭ lơi la ò kwơ. Kư pơnjat tĕ sih bơta niăm, bal mơ nùs nhơm kơ̆-dơn mơ bîng bơta kòñ gơboh. Bơh git lah, bơh bơta gơs mat dô bă ndơp ndơr oh mi dê ngai do rgơi pồn prap jơh dô pah rài in lòt tomtoh gùng jat nùs kòñ Yàng.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.