Tòm tŭ kòl jàm jŏ jòng, bơta di pal rngòt gơs dơ̆ ò găm la dô nơm wafng tai, mơ la dunnia đah bơdih nê. Bol he neh mòr mơng mơ ală sơnoa rnoas hơ̆, tian gơs bơta khat gơboh nisơna gơlîk gơs bơta lơh bol he in kơlôi rcăng. Bơdih nè dờng ơ nàng ìr, krơi ngăn, mơ bềng ală bơta ò rgơi ăt bồ. Bơh hơ̆ tàng bol he sac ơm wơl bulah gai lòs kăl mpông neh pờ dơng, bơh cơnđòa lik bơh hơ̆ gơlơh be rngòt rlau tai. Mơya dilah kừ pùn să he tòm ơnih tiah rìng lơngai, di gơlăn bol he rgơi git lam rài kis pha lin mơ Yàng neh rcăng ai hơđăp?

Ngai do, ngai 15/03/2026, tơnggu Hòi Dăn Kòp Ngai dăn ja ông mò oh mi kơlồi sơnờng băl jơnau Yàng kơnờm bơta dong kờl Nina Keegan bơh tơngu mê BAÑ ƠM SÙM TÒM WÀNG NEH GƠ PÒ

“Cau kơñau mìng tùs nàng kơñau, hàl mơ tơnroh.” (Jang 10:10)

Roatan la dô nơm pồt pơlao dềt, ơm digah dàlềng Honduras pơgăp 100km. Hơ̆ là dô nơm pồt pơlao hèr hàng mơnĕ mơ añ bơtoah neh geh wèt còp ơă dơ̆.

Bơh Roatan mìng dô dơ̆ lòt plùng liah là dô nơm pồt pơlao dềt gơs sơnđăn la Little French Key. Pồt pơlao dềt do neh geh sền gàr bơh lu dà lềng dờng dơ̆ bàr, gòm gùt dàr la dà tơlìr mơnĕ. Pồt pơlao is do la dô nơm ơnih ală phăn dềt dê mơya gơ la krơi is.

Ală cau tờm sươn phăn poan jơng neh dong tă ală phăn gơ kòl sồt mơ gơkol wèt ò niam bơh sal pơlin kung be ală cau tòm ròng siau gơnoăr tòm lam dunnia. Bol khai neh bơtao gơs dô nơm sươn sền gàr ală phăn hơ̆ in hơđăng bồt pơlao hàng mơnĕ, tiah mơ ală phăn neh geh kờñ gơboh mơ sền gàr dô bă niam.

Dùl tòm ală phăn mơ añ gơboh rlau jơh la kliu trĭa sơnđăn la Charlie. Charlie ò git lah gơ la kliu trĭa. Lơbơn niam be dô nơm kon mèo tòm hiu, niam gơboh be dô nơm sò dềt. Lai mơtŭ geh cèng ri bơh suơn ală phăn, gơ neh kol tă kơlđiă, mìng găm dô ềt sề, rgai rgong nting gời mơ bing toh kiat tian gơs ò găm gơlơh ndrơm be phăn “Yang ăt bồ phăn bri”. Gơlơh be gơ ò rgơi gam kis tai. Charlie do neh kra, mơya pràn, mơ tŭ lơi kùng ơm bic tòm tiah gơs măt tơngai di.

Jơh rài kis Charlie di kis tòm tiah kòl kơt jam. Gơ ò git rà kis dô nơm kliu trĭa bri di la mbe lơi. Dilah tŭ do Charlie geh tơn klas ri wơl tòm bri mơnơm, gơ rơp chơt. Gơ ò rgơi gàr is să, tai boh neh ò tŭ lơi geh gơlik gơs là phăn be gơ neh geh crơng gơs bơh sơnrơp. Rai kis gơ kol gơrwàng bơh dô nơm wàng jam.

Gơs nđờ nă tòm bol he neh lik lòt bơh ală wàng ò gơs rùp òs neh krơ̆ jam he, mơya găm ò hềt kis tòm toh mơ rài kis he neh geh deh nàng kis? Ông mò oh mi sền gơlơh he be găm kòl kơt, kùng be bơdih ne là jơh mơ dunnia dờng ơnàng mơ ông mò oh mi găm lơỉ roh?

Yàng Jesu neh tùs tom dunnia nàng dŏng tă ală cau kòl krơ̆ jam.

Behơ̆ tàng, bơta lơi găm prăp gàr ông mò oh mi tom bơta kùp krơ̆, ò ai gơnoăr oh mi in kis wil tơl rài kis niam rlau jơh? Bơta lơi găm lơh ông mò oh mi kră kơldăng, ò khin cơnđoà lik bơh poan đah dơrñàng tòm ơnih rìng lơngai òs mòng? Ngăn sơl la bơta rngot kong alah hala ală bơta ò hềt git tus? Ngăn la bơta kơlôi he ò di păl, he ò tơl niam?

Sơlơ ơm jŏ tòm bơta krơ̆ jam ală tiah ling dê kùp krơ̆ he, bol he sơlờ gơlik gơs ală cau gơkol jat sơnoa rnoas, gơkòl kùp bơklơn bơh bơta òs mòng, rhơi rhơi kŏng dô rai kis kis lơngai tồr.

Be Jơnau Yang neh cih: “Cau kơñau mìng tùs nàng kơñau, hàl mơ tơnroh.” (Jang 10:10) khai ntung kơñau bơta pràn, bơta chò hòp, bơta ring lơngai bol he dê. Khai phà tơnroh bơta khin chà mơ kơñau rài kis pha lin he di, bơta pràn kơl dăng mơ Jơnau Yàng hòi jà bol he kis!

Lòi tĕ Yàng Tom Trồ dong ông mò oh mi tòm tip mơ bơta rngòt rngơt he di, mơ să tòm Kơnràñ ròp ceng ông mò oh mi lòt găn gơ. Yàng Jesu neh tùs nàng bol he geh kis tòm gonăp gơnoăr, bơta kờñ gơboh mơ dô nơm bồ dơngoh kah rngăl, kơ̆ cề. Bol he neh geh hòi ja gơlik gơs la ală cau ling ò rngòt rngơt mơ ală cau kong sồr gơnăp gơnoăr Bơtau krist in.

Bơta pha lin ông mò oh mi di ơn wil tơl tơm Yàng Tom Trồ, ò di tòm bơta pràn is ông mò oh mi di. Kơnràñ sùm prăp gàr ông mò oh mi, mơ Kơnràñ ròp ò tŭ lơi lòi cau song ring pal gơpừ!

“Hwềng Yàng di rơp hơđăng Añ, bơh Kơnràñ neh bong mơñà Añ in nàng bơtô yal Jơnau Niam ală cau rbâh lơ òi in, sồr Añ lòt yăl ală cau gơkòl kùp in geh hồ toh, cau jơngo geh àng, cau gơ kòl rồn bơklơn in geh khat gơboh , mơ bơtô yal năm ai bơta nđàc Yàng dê…” (Luka 4:18- 19)

Dan jà bol he dô nùs bal tòm bơta hòi dan: Khoai Yàng, kon neh ơm tòm bơta gơkòl kùp jam neh jŏ jòng tian gơs rngòt di bơta khat gơboh mơ să tò Kơnràñ neh ai pà kon in. ală bơta rngòt rngơt òs mòng, ală rnoàs mơ kòn neh ơn is neh kùp krơ̆ kòn, lơh kòn in pồn să he wơl ala bơh di dòn kơnòm tòm Kơnràñ mơ cơnđòa tùs. Dan Yàng sòl pơnđàng nàng kòn in đal git bơta lơi găm kùp căp nùs he. Dan ai kòn in nùs khin chà nàng cơnđòa lik, bulah tòm nùs găm gơs bơta rơm să rngòt. Dăn tơngkah kòn lah Yàng Dong Klàs Jesu neh tùs nàng hồ toh cau kol jam, mơ tòm Kơnràñ, kòn geh ai gơnăp gơnoăr nàng kis pha lin. Kờp kòn kòn geh kis wìl tơl rai kis àng gơcrà mơ Kơnràñ neh rcăng lai kòn in. kòn jơh nùs hoi dăn, tòm sơnđăn Yàng Jesu Krist, Amen.

Ơ ală ông mò oh mi kờñ gơboh, ngai do mo, sền wơl tĕ ală bơta kòp kờn jrô ndơp tòm nùs bol he, ală bơta lơi gơlơh be ò gơs rùp mơ bol he neh ơn prăp dô gah bơh jơ̆ jòng, ală bơta chai rgơi neh săng lơi be bơta hơ̆ ò rgơi nàng ngui. Ò gơs bơta lơi là ò rgơi di đăp Batau Krist, Bơtau ai gơnoăr pràn, Bơtau bơntơl pràn, mơ la Bơtau lơh sàng goh, lơh bol he in gơlik gơs di păl Kơnràñ in. Sền song tĕ di bơta rngòt rngơt, lùp làp gơ, mơ tòm dră tòm bơta tòm lơh niam bơta dòn dê. Rài kis àng gơcrà rlau jơh bol he di găm gơn kờp bol he hđăp. Lơh nền tĕ cơnđòa tòm bơta dòn tòm Yàng ngai do mơ!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.