Cau sò tơm òs ò tơlik mat dô bă nggôr nggac hala pràn kơl dang nàng bol he in rgơi git nàng kơrhia, kung ò ràng tơlik bơta pràn kơldang nàng bol he đal git nàng pleh ngài. Gơplơ̆ wơl, bol khai òm òm pồn ndơp tòm ală gùng dà os mòng, ală bơta kơ lôi sơ nơng mơ bol he os sền la “be òs” mơ ală bơta òs mòng mơ bol he ò kah kơ lôi tus. Gơ be la ală kòn bơs ơm pồn ndơp tềng hơ̆ – mơ mìng dô cơn đoà ò git kơrhia, gen cồng nha ò rgơi git nđò ò.

Ngai do, ngai 16/03/2026, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Laura Bagby bơh tơnggume: KÒN BƠS PỒN NDƠP

‘Behơ̆ dòn duh tĕ Yàng Tom Trồ. Tòmdră tĕ mơ cà ràk, gen gơ rơp pleh ngài di oh mi. ‘ (Jakơ 4:7)

Dilah gơs dô nơm kòn bơs pồn ndơp, gen ngan ăn rơp la cau pal tìp gơ – hala gơ rơp jòi ăñ.

Ăñ đal git bơta ta do dơ̆ sơn ròp tŭ lơh broă tòm Suơn Quốc Gia Yosemite. Ngai hơ̆, ăñ mơ dô nă cau bơyô lòt cơn đoà jơng nàng lòt jòi “croh dà pồn ndơp” di gùl trồ duh mat tơ ngai, bềng thul rmul.

Gùt dar gùng cơn đoà jơng bol he lòt la ală lŭ hoa cương dờng – dô bă tiah niam ngan nàng ală kòn bơs ơm pồn. Mơya, tŭ hơ̆, ăñ ò kah kơ lôi tus kòn bơs, bulah pal cang kơ lôi tus. Añ mìng ơn nùs ơn tôr dô tơnggu hơ̆ lah: Jòi bàn croh dà hơ̆, bulah cau bơ yô añ tơngkah pal kơrhia, muh mat khai gơ lơh bol glar ngan.

Mơ gen, añ gơ kòl dơh wơl – jat bơta gơtha gơ tòm toh nền. Dô nơm kòn bơs wìn bơh lŭ, mìng ngài mơ añ dul mét gòi. Añ driau dờng ngan tian gơs añ òhềt đal tơn. Bơta driau dòng ngan, gan dê ală thong, ntas gơplơ̆ wơl oă dơ̆ di gùl brê mơ nơm.

Kòn bơs đal bơta lơng gơr hơ̆, đal git bơta sơ bơng rơng gen tàng gơ mhar lik dô mut tòm tiah ơm pồn. Mơya lài mơ tŭ lik, khai lòi añ in dô nơm tềl ò rgơi gơ hŭi: ntas tiang kòn bơs bih khih. Añ mơr jă di gơ – dô nơm kòn bơs mơ mìng dô êt phuk añ ò hềt gơs tòm bơta kơ lôi sơ nơng añ jê.

Tồi glài kung be hơ̆. Gơ gam ơm jŏ mơ bol he òhềt đal git. Gơ mut ơm tòm bơta kơ lôi sơ nơng, gen sơ lo ngai geh jòi bàn dô bă tiah os mòng tòm hwềng soan bol he dê. Tus dô ngai ne, tŭ bol he hoi dan, sền Sră Goh hala iat kơ no ală jơ nau tơngkah jak chài bơh ồng mò oh mi tòm Yang, gen Yang Hwềng Goh sơn tòm sơnio ală bơta gơlik ngan tòm nùs bol he.

Dabit neh hòi dan: “Ơ Yàng Tom Trồ, dan sền sơwì añ mơ git nùs añ jê! Dan lòng añ mơ git ală bơta kơlôi sơnơng añ jê! Dan sơwì sền tòm añ gơs gùng dà iơh lơi hala ò?Dan tề lam añ tòm gùng gam sùm sùm.” (Đơs crih 139:23–24). Tŭ hòi dan be hơ̆, bol he pal rcang nùs nhơm he, tài bơh Yang Hwềng Goh rơp sơnio ală kòn bơs ờm ờm ơm pồn tòm rài kis bol he.

Dô bơta đơs blac, dô jơ nau đơs srat bơtăng lơh moat jrung cau ndai, bơta rùi ram, nus ò dòn song, ala bơta hàm kòñ tis…..Tŭ bol he dơ̆ sơn ròp đal git hơ̆ la bơta tồi glài, digơlan bơta sơn ròp gơ lơh bol he in la rơp rngòt rngơt.

Tài bơh lài or, bol he os sền ala bơta hơ̆ mìng là dềt rhền. Là bơta os mòng kòn mơ nus dê. La bơta tìs cau ndai dê, la tài bơh ală bơta gơlik gơs gùt dar. La tài bơh nùs nhơm să tòm dê. Tian gơs la “gơ noar” he dê. Bòl he òhềt kơ lôi lah ala bơta gơ lơh be ò iơh gen gơ cèng tus bơta sơ bơng rơng tian gơs gơ tơnchơt bơta kis đah hwềng soan he dê jat tŭ tơngai.

Mơya ưn ngai Yang, bol he ò cang kis tòm bơta rngòt hala bassil tŭ bơta song geh rang tơlik. Bol he mìng càng lơh dô bơta: đal git bơta tìs glai hơ̆ la bơta tồi glài, gơ jran sang glài mơ dòp rò bơta toh glai.

Sră Goh cih: ‘Dilah bol he yal glài he dê, gen Kơnràñ la Bơtau lơh jat jơnau ho Kơnràñ dê mơ la Bơtau song ring rơp toh glài bol he in, mơ rào bol he in goh jơh ală bơta ò song ring. ‘ (I Jang 1:9)

Mơ Jơnau Yang hòi jà bol he: ‘Behơ̆ dòn duh tĕ Yàng Tom Trồ. Tòmdră tĕ mơ cà ràk, gen gơ rơp pleh ngài di oh mi. ‘ (Jakơ 4:7)

Gơs gơ tha lah: bañ lòi kòn bơs hơ̆ tus rềp.

Dilah ò lơh nền bơta tồi glài gen be lơi tiah? Rơp be lơi tŭ bol he sac rwah…ò lơh bơta lơi? Dilah bol he lơh ò bat, pleh pơrdô hala lơh be ò gơs bơta lơi gen rơp be lơi tiah?

Mơya, rngòt ngan, tồi glai ò gơ roh ò. Gơ gơlik iơh rlau tai. Sră Goh tơngkah he rgơi lơh gơlik “dô tŭ lơm pah…cà rak in” (Epheso 4:27)

“Tŭ lơmpah “ hơ̆ ò dê la dềt rhền. Gơ la dô mơnàng kơ̆ cê nàng tồi glài kư̆ pơn jat ntào dờng. Mơ kư̆ lòi be hơ̆, kòn bơs dềt bơh sơn tòm rơp gơlik bơta sơ bơng rơng tơn chơt cau.

Jakơ 1:15 cih loh lang: ‘Chòp bơta hàm kòñ is gơ kung be bun gen deh tồi glài; dơ̆ tồi glài neh tơl dờng, gen tơnggơs bơta chơt. ‘

Tồi glai ò ơm mŏ ò. Gơ sơlo ngai dờng, pa is mơ gơrè dilah bol he ò tòm pơn dang mơ gơ.

Gen lơh be lơi nàng tơn jơh ală bơta tồi glài “buơn ngan gơ đềt” be ồng Pol cih tòm Hebrơ 12:1, tŭ gơ os be neh ơm tềng hơ̆ neh jŏ rau? Sèng ho ò ơm tòm bơta jak chài sa tòm he dê.

Jơnau Pơnđik 3:5–6 cih: ‘Jơh nùs dòn kơnòm tĕ di Yàng Jehôwa. Bañ dòn kơnòm di bơta àng loh kòn dê; ‘Tòm jơh ală gùng dà kòn dê, dòp git tĕ Kơnràñ, Gen Kơnràñ rơp bơsong ală gùng dà kòn dê.’

Tŭ gơ kòl tòm bơta tồi glai, bol he pal cang ơn bơta dòn tòm Yang Dong Klas Jesu Krist la Bơtau Pha Lin, mơ lòi gơ nap gơ noar Yang dê lơh kòn bơs hơ̆ in dô pleh.

Ală bơta “rngoh rngac” đah hwềng ò dê la bơta ndơp ndơr hala ngài. Hơ̆ la cồng nha os mòng tŭ bol he dòn wil tơl tòm sơn đan Yang Jesu Krist, ràng tơlik jơnau Yang dô bă khin cha, jong rơ sơnđan Yang, hòi dan ò dơh, yal tơlik bơta phalin Yang di tòm bơta don.

Sră Goh cih wơl ală bơta be hơ̆. Ală jơnau driau dơng làng bol Israel dê neh lơh dơrñang ƀòn Jeriko tơrlơm lề jơh (Josue 6). Ông Pol mơ Sila hòi dan mơ jong rơ Yang, mơ hiu jam lơng gơr, che sreng gơ hồ jơh (Broa 16:26). Mơ tŭ Yang Jesu Krist tă nhơm, bài kơrning tòm hiu duh khoai gơ crè bàr gah, pò gùng bol he lòt tus rềp mơ Yang Tom Trồ (Mak 15:37–38).

Mìng càng gơs nus nhơm gơ jran sang glai, dô rài kis hoi dan, jơnau jong rơ jơh nus – gen tàng cau sò tòm he rơp gơ tup pừ. Tềng hơ̆ gơs bơta tồi glai să tòm he dê.

Dan jà bol he dô nùs bal tòm bơta hòi dan: Khoai Bèp kòn gơboh, gơs ala bơta neh òm òm ơm neh jŏ rau mơ kòn ò đal git, mơya kòn git hơ̆ la tồi glai đap mat Bèp. Dan Bèp toh glai kòn in tài bơh neh oă dơ̆ ò ơn nùs ơn tồr dê jơnau tơngkah Yang Hwềng Goh, tài bơh neh lòi bơta tồi glai ơm tòm nus mơ ò pơn dang sang. Ngai do, kòn yal tơlik ala bơta dê đap mat Bèp, kòn gơ jran sang glai mơ rê wơl hơ Yang. dan dong kòn in dòn kơ nơm dê Yang dô bă wil tơl tòm ala gùng lòt kòn dê.Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, drơng kơp te. Dan Yang Hweng Goh ai pà bol he in sền go ala kòn bơs bih khih wìn tòm đah hweng soan. Gơ jran sang glai. Tòm pơn dang mơ cà rak. Kư kơ cê tòm bơta hòi dăn, jong rơ Yang mơ yal tơlik bơta gơ nap gơ noar Yang Dong Klas Jesu Krist. Mơ gen, jong rơ Yang tài bơh bơta dong tă phal lin mơ Yang ai pà ồng mò oh mi in. Ha-le-lu-ya.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.