Bol he òs kơlôi lah Yàng Tòm Trồ ming rơp lơh ală broă dơng, mang ryú ngan. Mơya gơs oă tú, Kơnràn ming bư tus dê rai kis he dê lơm. Kơnràn lơh broă kơnòm dê ală cau dềt rhên, tòm ală bơta tồn lah ò kwơ mang, bal mơ ală jơnau hòi dan dềt rhê mơya dòn song. Kơnràn kỡn ngui să tòm he nàng ceng tus bơta pơndòm pơniang, bơta sơm bòi mơ bơta gơn kơnòm tus ală cau jê sồt moat jrum in.

Ngai do, ngai 19/03/2026, rơndap bơta hòi dăn kòp ngai hòi jà ồng mọ oh kơlôi sơnơng Jơnau Yàng bơh tơnggume YÀNG GƠS MAT TÒM RAI KIS KÒP NGAI.

“Bơh Kơnràñ neh bong mơñà Añ in nàng bơto yal Jơnau Niam ală cau rƀah lơòi in, Sồr Añ lòt yal ală cau gơkòl kup in geh hồ toh, Cau jơngo geh àng, Cau gơkòl rồn bơklơn geh khat gơboh,” (‭‭Luka‬ ‭4‬:‭18‬b)

Gơs tú lơi ồng mò oh mi lùp is lah: Ngai do Yàng gam sơm bòi sơl? Yàng Tòm Trồ gam ngui bol he nàng ceng tus bơta pơndòm pơniang hala sơm bòi cau ndai in sơl? Ngan la cau lơi kung rgơi geh Kơnràn sơm bòi sơl? Mơ ẵn rơp pal lòt tus tòm dô bă tiah pha is, geh dô nă cau ơn tê hòi dan dô bă pha is, gen song rơp geh sơm bòi sơl?

Ală seng lùp do ò gơs bơta krơi is lơi. Hớ la seng lùp ală cau gam bol glar, jê sồt mơ pal cang Yàng bư tus. Ẵn dan yal ồng mò oh mi in dô broă. Ồng mò oh mi rgơi kơlôi sơnưng is.

Tòm dô ngai ne, ẵn gam nggui tòm rơndeh bal mơ kon ur ẵn jê, nàng roat phan. Tú ẵn pa lik bơh hiu gen ẵn gó cau gơp bòn ẵn jê. Khai ntao di gah hiu mơ tă tơlik ală phan tòm rơndeh. Ẵn dơh wơl mơ còp să mò. Tú hớ, ẵn ò rgơi git broă Yàng rơp lơh. Ẵn lơh bè dô nă cau gơp đềt mêr lơm.

Bol he sơntòm tơm bơh bơr dô êt. Tú ẵn mòr rê, mò đơs mơ ẵn lah: “kah hòi dan ẵn in bà yơ.”

Jat bè ẵn git, mò ò hềt dòn Yàng. Mơya tú hớ, mò jê sồt ngan mơ cang dong kơl. Cau gơnoar sơnơm đơs lah mò bị thoái hóa điểm vàng tòm mat mò dê. Tòm nùs ẵn kơlôi lah: bơta kòp jê do kơnjớ ngan, ò rgơi sơm bòi.

Ẵn rngoh rngac ngan. Ẵn ò kơlôi oă ẵn lùp lah: “Ẵn rgơi hòi dan mò in tú do sơl?”. Mơ ẵn ai lơh krơi ngan la ẵn rgơi lơh bơta hớ tơn.

Tòm gung mut tòm hiu, ẵn at tê mò mơ sơntòm hòi dan. Tú hòi dan, ẵn dòp git loh lang lah gơnap gơnoar Yàng Tòm Trồ dê mơ tòm nùs ẵn dòp git lah Kơnràn gam lơh broă. Neh lồc hòi dan rau, mò ntào têng hớ, dà mat mò hor mơ ưnngai ẵn. Bol he kwar, ẵn rê wơl mơ kon ur mơ tòm nùs ẵn chò hòp ngan. Kon ur ẵn neh gó jơh. Ẵn yal wơl kon ẵn in mơ sôr khai kung kah hòi dan cau mò hớ in.

Nđò ngai tơnớ, kon ur ẵn đơs lah khai neh tìp mơ tơmbơh bơr mơ mò hớ. Cau gơnoar sơnơm đơs lah mò pal bơtê kis mơ dô nơm đốm jù digul bơta sên gó mò dê, jơh rai kis. Mat mò dê pràn dô êt rau, mơya jat cau gơnoar sơnơm dê hớ la niam rau.

Kon ur ẵn đơs mơ mò lah ală jơnau cau gơnoar sơnơm dê đơs ò di la lôi dut. Kon ur ẵn đơs bơta kòp jê mò dê rơp geh bòi, Yàng rgơi lơh ală bơta hớ mò in. Cau mò hớ ò dòn. Tú hớ, mò ming git lah bơta kòp jê hớ lơh mò in lơbơn mơ bol glar ngan.

Mơ ming nđò poh tơnớ, tú gam ơm tòm hiu, ẵn kơno jơi mò đơs lah: “Dan đơs mơ ală cau neh hòi dan ala ẵn in… mat ẵn jê neh bòi rau!”

Ẵn chò hòp ngan. “Ală cau hòi dan” ming gơs bàr nă lơm: ẵn mơ kon ur ẵn jê. Yàng Tòm Trồ neh ngui dô jơnau hòi dan liah, tòm gung mut tòm hiu, nàng tòm gơl rai kis dô nă cau dê. Mò geh bòi.

“Hwềng Yàng dê rơp hơđang Añ, Bơh Kơnràñ neh bong mơñà Añ in nàng bơto yal Jơnau Niam ală cau rƀah lơòi in, Sồr Añ lòt yal ală cau gơkòl kup in geh hồ toh, Cau jơngo geh àng, Cau gơkòl rồn bơklơn geh khat gơboh,Mơ bơto yal nam ai bơta nđàc Yàng dê.” (Luka 4:18-19).

Ngai hớ, tòm tú hòi dan, ẵn neh rang tơlik lah, bơta gơkló gơri mơ Yàng Tòm Trồ. Hớ kung la tơnggu mơ ẵn cih ală bơta do. Jơh ală bơta la bơta gơkló tê Yàng dê lơm. Jong rơ Yàng. Ẵn ưnngai Yàng tài bơh ẵn ò sang lòi tú jơ hớ. Ẵn kung ưnngai Yàng tai bơh kon ur ẵn jê geh bơtê git dô bơta bơtê dơng mang: jơnau đơs mơ bol he pal bơtê kơnò ò di la jơnau đơs kon mơnùs dê, mơ la jơnau đơs Yàng Tòm Trồ dê.

Dilah tòm rai kis kòp ngai, Yàng Tòm Trồ chồl ồng mò oh mi lơh bơta lơi, khin cha té. Yàng Tòm Trồ gam gơs mat tòm rai kis kòp ngai. Kơnràn gam lơh broă bơh di ală cau dòn bơr Kơnràn. Mơ công nha krơi is ngan!

Dan jà bol he dô nùs bal tòm bơta hòi dan: Ưnngai Yàng bơh Kơnràn sum gơs mat tòm rai kis kon dê. Dan pò mat kon nàng kon in dòp git lah Yàng gam lơh broă dơng tòm rai kis bol kon dê, Dan ai kon in dô nơm nùs nhơm rcang sir kơno jơnau đơs Kơnràn dê, bal mơ nùs nhơm dòn bơr Yàng tú Yàng hòi sac bol kon. Dan ngui rai kis kon nàng ceng tus bơta pơndòm pơniang, bơta sơm bòi mơ bơta gơn kơnòm tus ală cau jê sồt moat jrum gut dar kon. Dan gơkló gơri bal mơ Yàng. Kon hòi dan ai sơnđan Yàng Jesus Krist, Amen.

Ơ ală ồng mò oh mi kỡn gơboh, dilah gơs tú lơi ồng mò oh mi kơno jơnau đơs Yàng dê, bẵn lơh kơnjớ kơnjut mơ ò kơno. Hớ digơlan la dô jơnau còp să, dô jơnau hòi dan dềt rhên ală cau pal cang in. Mơya tú bol hê dòn bơr Yàng tòm ală tú hớ, Yàng rgơi lơh ală bơta rlau mơ bơta kơlôi sơnơng bol he dê. Ngai do, dan Yàng ai he in dô nơm nùs hơm ngkhòc ngkơr, nàng ceng bơta sơm bòi tis ală cau pal cang Yàng.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.