Koj puas tau muaj ib zaug twg siv zog ua ib yam uas yog kev, tiamsis ho raug lwm tus rhuav tshem vim lawv muaj lub siab phem? Koj puas tau ntsib qhov uas siv zog ua ib yam haujlwm tiamsis lwm tug ho txeeb koj li nqi zog lawm? Lossis tseem mob siab dua yog koj raug iab liam, raug thuam saib tsis taug tabmeeg ntawm tug neeg uas koj hlub? Yog tias koj twb tau ntsib lawm, tsis txhob hnov tu siab, vim rau qhov Tus Tswv Cawmseej kuj twb tau raug li ntawd lawm thiab.

Hnub no, yog hnub 27/4/2027, Kev Thov Vajtswv Txhua Hnub thov caw sawv daws nrog kawm Vajtswv txoj lus nrog tus sau Brad Henry nrog lub ntsib lus: KEV UA TWJYWM MUAJ YEEJ

Thaum luag thuam nws, nws tsis teb luag ib los li; thiab thaum luag tsimtxom nws, nws tsis foom luag, tiamsis nws muab tej ntawd tso rau Vajtswv tus uas txiav txim ncaj ncees (1 Petus 2:23)

Thov xav txog Yexus Khetos lub hwjchim: Nws tsuas hais ib los, tsheej txhiab tus tim tswv yuav los rhuav tshem tag nrho tej kev txomnyem. Tiamsis Nws ho ua twjywm. Vim li cas? Yog tias tus Tswv xaiv qhov uas cawm Nws tib leeg rau lub sijhawm ntawd ces peb tib neeg ntiajteb yuav tsis tau cawmdim. Tswv Cawmseej twb xaiv ib txojkev uas tsis ncaj ncees rau Nws. Nws ris tag nrho peb tej kev txhaum kom pub tau raub peb ib lub neej ncaj ncees uas peb twb tsis tsimnyog tau txais.

Hauv lub neej, thaum peb xaiv ua phem pauj phem rau tej neeg ua phem rau peb, peb yuav kov yeej ib zaug tiamsis ho ua poob ib tug ntsuj plig. Tej neeg uas tabtom ua phem rau koj tseeb tiag yog lawv kuj tabtom yuam kev rau hauv qhov kev tsaus ntuj -lawv tsi paub Vajtswv, thiab kuj tsis paub yus tabtom ua dabtsi.
Koj yuav tsum feeb tau ib qho tseeb cawm neeg txojsia: Peb lub homphiaj ua neej hauv ntiajteb no tsis yog tshim kom tau ntau li ntau haujlwm nto npe. Tej ntawd tsuas yog tej kev pab xwb. Peb tes haujlwm uas twb tau cawmdim lawm yog ua “lub teeb taw kev” siab siab thaum muaj cua daj cua dub.

Yog koj twb tau ntsib dhau ntau chaw ua haujlwm sib txawv lawm, koj yuav totaub tias, ua tiav vam meej yeej tsis yog nyob ntawm tib neeg txhais tes. Ua tiav yog thaum Vajtswv nqes tes rau tes haujlwm ntawd, thiab thaum Vajtswv tsis ua lawm, txhua txoj kev siv zog cia tsis muaj nqis lawm. Txhob cia koj kev muab hlob ua rau koj xav tias koj yog tus ua tiav txhua yam. Yog ua li ntawd peb yuav hnov npau taws thaum raug luag thuam. Tiamsis yog peb nkag siab tias txhua yam yog Vajtswv ua xwb peb yuav paub txo hwjchim thiab tsis tag siv zog ua phem pauj.
Tus Tswv “muab Nws tus kheej fij rau Vajtswv tus uas txiav txim ncaj ncees.”

Cia li thov Vajtswv pab kom peb muaj txaus kev ntseeg thiab tsis ua phem pauj. Nco ntsoov tias Vajtswv yuav siv peb lub neej mus tau zoo tshaj yog thaum peb tsis cia yus lub meej mom ua qias txog Vajtswv. Tswv Yexus tsis yog tsuas tiv yeeb ncuab xwb Nws tseem thov pab rau yeeb ncuab thiab. Hauv lub ntiajteb no tseem muaj coob leej ntau tug tsis tau paub txog lo lus “lub neej ib txhis”, lawv tsuas ua neej sib tseem kom mus taug xwb.

Yuav yog ib qho phem heev yog tias peb cia yus lub meej mom tav ib tug twg kev mus cuag tau qhov tseeb? Muab ua tib zoo saib, nyob ntawm Vajtswv qhov muag peb txhua tus puav leej yog neeg txhaum. Koj tau cawmdim tsis yog vim koj zoo dua lossis txawj dua, tiamsis yog vim Vajtswv khuvleej koj. Tsuas yog npaum ntawd xwb twb pab rau peb yuav tsum tso tseg txhua txoj kev sib ntxub.

Tom qab no, thaum lub ntuj ib ncig koj cuag li puag tag lawm – koj tsis txhob siv zog tseem, cia li thov Vajtswv.

Thaum luag hais lus thuam saib tsis taug koj – txhob maj tawm tsam, cia li thov Vajtswv.

Thaum koj tsa koj lub hwjchim nrhiav meej mom – Cia li thov Vaj Ntsujplig pab kom koj lub siab tiaj tug.

Thiab thaum cuag li lub ntiajteb no tabtom tawmtsam koj, -cia li tsa muag mus saib tus ntoo khaublig.

Txhob txhawj, Tswv Yexus nkag siab txhua yam. Nws yog tus yuav tuaj koj tog. Cia li muab txhua yam tso rau ntawm tus ntoo khaublig thiab mus rau hauv Tus TSwv txoj kev ywj pheej.

Thov caw nrog kuv peb thov Vajtswv ua ke: Kuv tus Tswv uas muaj kev hlub, kuv ua Koj tsaug rau qhov koj yeej nkag siab tag kuv txhua txoj kev mob siab, tsis ncaj ncees, thiab kuv tej kua muag huv tibsi. Thov Koj zam lub txim pub rau kuv rau tej zaug uas kuv tsa hwjchim, hnov iab siab thiab tsis muaj kev hlub. Sijhawm no, thov muab kuv txhua lub ntxa nyhav, txhua yam tsis ncaj ncees,thiab kuv tej kev ntshaw tso rau ntawm tus ntoo khaublig. Thov Vaj ntsujplig pab kom kuv lub siab tug, kom kuv tsis coj raws li kuv tug cwjpwm tiamsis yuav kov yeej los ntawm lub siab txo hwjchim. Thov pab kom kuv pom txhua tus ntuj plig tabtom yuav puas tsuaj tom qab lawv tej lus phem, kom kuv thov pab rau lawv tsis ntxub lawv. Thov kom kuv lub neej yuav yog ib zaj nkauj hu qhuas Koj txoj kev hlub, yog qhov kaj ci pom txog lub ntuj ceeb tsheej. Kuv thov txhua yam los ntawm Yexus Khetos lub npe, Amees.

Ib tsoom phoojywg, Lub ntiajteb tej zaug yuav tseeb koj lub koob npe lossis koj li nqi zog, tiamsis yuav txeeb tsis tau koj lub chaw uas yog Vajtswv menyuam. Txhob cia tej kev tsis ncaj ncees txeeb tau tes haujlwm muaj nqis mus ib txhis. Thaum koj saib ua twjywm thiab hlub, thaum ntawd Vajtswv lub tshwjchim yuav ci tawm. Nco ntsoov tias, tib neeg kev ncaj ncees tej zaug yuav yuam kev, tiamsis Vajtswv li kev txiav txim ncaj ncees yuav yog li xwb. Thov kom Vajtswv kev thajyeeb kav koj lub siab, kom hauv lub neej no, koj tseem luag ntxhi tau vim paub koj yog Vajtswv tug. Thov foom kom koj muaj ib hnub tshiab muaj yeej los ntawm Vajtswv lub hwjchim uas twb kov yeej lub ntiajteb no.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.